ជំពូកទី៣២
តើអ្វីដែលត្រឹមត្រូវតាមច្បាប់នៃថ្ងៃឈប់សំរាក?
នេះជាថ្ងៃឈប់សំរាកមួយទៀត ដែលព្រះយេស៊ូយាងទៅសាលាប្រជុំជិតសមុទ្រកាលីឡេ ហើយបុរសស្វិតដៃខាងស្ដាំក៏មានវត្តមាននៅទីនោះដែរ។ ពួកស្ក្រែបនិងពួកផារីស៊ីខំសង្កេតមើលថាតើព្រះយេស៊ូនឹងប្រោសឲ្យគាត់ជាឬក៏យ៉ាងណា? នៅទីបំផុត ពួកគេសួរថា៖ «តើមានច្បាប់នឹងប្រោសឲ្យជា នៅថ្ងៃឈប់សំរាកបានឬទេ?»។
ពួកមេដឹកនាំសាសនាយូដាជឿថា ការប្រោសមនុស្សឲ្យជាគឺត្រឹមត្រូវតាមច្បាប់នៃថ្ងៃឈប់សំរាក លុះត្រាតែមានគ្រោះថ្នាក់ដល់ជីវិត។ ជាឧទាហរណ៍ ពួកគេបង្រៀនថានៅថ្ងៃឈប់សំរាក គឺមិនត្រឹមត្រូវតាមច្បាប់ក្នុងការតឆ្អឹងឬចងរុំដោយព្រោះការគ្រេចណាមួយនោះឡើយ។ ដូច្នេះពួកស្ក្រែបនិងពួកផារីស៊ីកំពុងសួរព្រះយេស៊ូ ក្នុងគោលបំណងរកលេសដើម្បីចោទប្រកាន់ទ្រង់។
ក៏ប៉ុន្តែ ព្រះយេស៊ូជ្រាបអំពីការវែកញែករបស់ពួកគេ។ នៅពេលដដែលនេះ ទ្រង់ជ្រាបថាពួកគេប្រកាន់ទស្សនៈដ៏តឹងរ៉ឹងដែលមិនមកពីគម្ពីរ ស្តីអំពីអ្វីដែលបំពានលើតម្រូវការនៃថ្ងៃឈប់សំរាក ដែលហាមមិនឲ្យធ្វើការនោះ។ ដូច្នេះ ទំនាស់រវាងពួកគេនិងព្រះយេស៊ូមានកាន់តែខ្លាំងឡើង ដោយទ្រង់បានប្រាប់បុរសស្វិតដៃនេះថា៖ «ចូរអ្នកក្រោកឡើង ឈរនៅកណ្ដាលនុ៎ះទៅ!»។
ឥឡូវនេះ ព្រះយេស៊ូបែរទៅពួកស្ក្រែបនិងពួកផារីស៊ី ហើយមានបន្ទូលថា៖ «បើអ្នកណា ក្នុងពួកអ្នករាល់គ្នា មានចៀមតែ១ ហើយចៀមនោះធ្លាក់ទៅក្នុងរណ្ដៅ នៅថ្ងៃឈប់សំរាក នោះតើមិនទៅចាប់ស្រង់វាមកទេឬ?»។ ដោយព្រោះចៀមជាកំរៃមួយរបស់គេ នោះពួកគេនឹងមិនទុកសត្វចៀមក្នុងរណ្ដៅរហូតដល់ថ្ងៃស្អែកនោះឡើយ ប្រហែលជាអាចទៅជាឈឺហើយបណ្ដាលឲ្យពួកគេខាតប្រាក់កាសទៀតផង។ ម្យ៉ាងទៀត បទគម្ពីរចែងថា៖ «មនុស្សសុចរិតរមែងប្រណីដល់ជីវិតនៃសត្វរបស់ខ្លួន»។
ព្រះយេស៊ូធ្វើការប្រៀបធៀប ដោយមានបន្ទូលបន្តថា៖ «ឯមនុស្ស តើមានដំឡៃលើសជាងចៀមអម្បាលម៉ានទៅទៀត ដូច្នេះ មានច្បាប់ឲ្យធ្វើការល្អនៅថ្ងៃឈប់សំរាកដែរ»។ ពួកមេដឹកនាំសាសនាពុំអាចឆ្លើយបដិសេធនឹងការវែកញែកដែលប្រកបដោយក្ដីមេត្ដានិងសមហេតុផលនេះបានឡើយ ដូច្នេះពួកគេក៏នៅស្ងៀមទៅ។
ព្រះយេស៊ូទតមើលជុំវិញ ដោយមានព្រះទ័យក្នាញ់និងអន់ព្រះទ័យចំពោះភាពល្ងីល្ងើនិងការចចេសរបស់ពួកគេ។ រួចមក ទ្រង់ក៏មានបន្ទូលទៅបុរសនេះថា៖ «ចូរលាតដៃអ្នកទៅ!»។ គាត់ក៏លាតដៃ ហើយដៃគាត់ក៏បានជា។
ជាជាងមានចិត្តសប្បាយដោយដៃបុរសនេះបានជាដូចដើមវិញ នោះពួកផារីស៊ីចេញទៅក្រៅ ហើយភ្លាមនោះពួកគេក៏ពិគ្រោះគ្នានឹងពួកអ្នកគាំទ្រស្តេចហេរ៉ូឌ ដើម្បីធ្វើគុតដល់ព្រះយេស៊ូ។ ជាក់ស្តែង គណៈបក្សនយោបាយនេះក៏រួមបញ្ចូលពួកសមាជិកនៃសាសនាសាឌូស៊ីផងដែរ។ ជាធម្មតា គណៈបក្សនយោបាយនេះនិងពួកផារីស៊ីបានប្រឆាំងគ្នាទៅវិញទៅមកដោយចំហ ក៏ប៉ុន្តែពួកគេបានរួបរួមគ្នាដ៏មុតមាំក្នុងការប្រឆាំងនឹងព្រះយេស៊ូ។ ម៉ាថាយ ១២:៩-១៤; ម៉ាកុស ៣:១-៦; លូកា ៦:៦-១១; សុភាសិត ១២:១០; និក្ខមនំ ២០:៨-១០
▪ តើអ្វីជាហេតុនាំឲ្យមានទំនាស់កាន់តែខ្លាំងរវាងព្រះយេស៊ូនិងពួកមេដឹកនាំសាសនាយូដា?
▪ តើពួកមេដឹកនាំសាសនាយូដាជឿយ៉ាងណា ស្តីអំពីការប្រោសមនុស្សឲ្យជានៅថ្ងៃឈប់សំរាក?
▪ តើរឿងប្រៀបប្រដូចអ្វីដែលព្រះយេស៊ូប្រើ ដើម្បីឆ្លើយបដិសេធនឹងទស្សនៈដ៏ខុសរបស់ពួកគេ?