ជំពូកទី៩៨
ពួកសិស្សឈ្លោះប្រកែកគ្នាពេលការសោយទិវង្គតរបស់ព្រះយេស៊ូកាន់តែកៀកណាស់ហើយ
ព្រះយេស៊ូនិងពួកសិស្សរបស់ទ្រង់គឺនៅជិតទន្លេយ័រដាន់ ជាកន្លែងដែលទ្រង់និងពួកសិស្សឆ្លងកាត់ពីស្រុកប៉េរ៉េចូលទៅក្នុងស្រុកយូដា។ មនុស្សជាច្រើនឯទៀតកំពុងតែធ្វើដំណើរទៅពិធីបុណ្យរំលងនៅឆ្នាំ៣៣ ស.យ. ដែលសល់តែមួយសប្ដាហ៍ទៀតប៉ុណ្ណោះ។
ព្រះយេស៊ូកំពុងតែយាងទៅជាមួយពួកសិស្ស ហើយពួកគេមានចិត្តស្ងើចនឹងការតាំងចិត្តដ៏ក្លាហានរបស់ទ្រង់ណាស់។ ចូរនឹកចាំឡើងវិញ បីបួនសប្ដាហ៍មុននេះ ពេលឡាសារបានស្លាប់ នោះព្រះយេស៊ូបានយាងចេញពីស្រុកប៉េរ៉េចូលទៅស្រុកយូដា នោះថូម៉ាសបានលើកទឹកចិត្តអ្នកឯទៀតថា៖ «ចូរយើងរាល់គ្នាទៅដែរ ដើម្បីនឹងប្ដូរស្លាប់ជាមួយនឹងលោក»។ ចូរនឹកចាំដែរ ក្រោយពីព្រះយេស៊ូប្រោសឡាសារឲ្យរស់ឡើងវិញ នោះក្រុមប្រឹក្សាជាន់ខ្ពស់បានរកវិធីធ្វើគុតទ្រង់។ ដូច្នេះហើយ បានជាពួកសិស្សមានចិត្តខ្លាច ពេលពួកគេចូលទៅក្នុងស្រុកយូដាម្ដងទៀត។
ព្រះយេស៊ូនាំពួកសាវ័ក១២នាក់ទៅដោយឡែកពីហ្វូងមនុស្សដើម្បីជួយពួកគេឲ្យត្រៀមខ្លួនជាមុនចំពោះពេលវេលាខាងមុខ ដោយមានបន្ទូលប្រាប់ថា៖ «មើល! យើងឡើងទៅឯក្រុងយេរូសាឡិម នោះកូនមនុស្សនឹងត្រូវបញ្ជូនទៅឯពួកសង្គ្រាជ នឹងពួកអាចារ្យ គេនឹងកាត់ទោសលោកដល់ជីវិត ហើយបញ្ជូនទៅដល់ពួកសាសន៍ដទៃ ពួកនោះនឹងចំអកមើលងាយ វាយនឹងរំពាត់ ស្ដោះដាក់ ហើយសំឡាប់លោក រួច៣ថ្ងៃក្រោយដែលស្លាប់ទៅ នោះលោកនឹងរស់ឡើងវិញ»។
នេះជាលើកទីបីក្នុងប៉ុន្មានខែនេះ ដែលព្រះយេស៊ូបានមានបន្ទូលប្រាប់ពួកសិស្សរបស់ទ្រង់ អំពីការសោយទិវង្គតនិងការរស់ឡើងវិញរបស់ទ្រង់។ ហើយទោះជាពួកគេស្ដាប់ទ្រង់ ក៏ពួកគេនៅតែឥតយល់សោះឡើយ។ នេះប្រហែលជាពួកគេស្មានថារឿងនោះសំដៅទៅលើការស្ដារឡើងវិញ នូវព្រះរាជាណាចក្រនៃប្រទេសអ៊ីស្រាអែលនៅលើផែនដី ហើយពួកគេទន្ទឹងចាំយ៉ាងរំភើបនូវសិរីរុងរឿងនិងកិត្ដិយសក្នុងព្រះរាជាណាចក្រជាមួយព្រះគ្រីស្ទនៅលើផែនដីនេះ។
សាឡូមេគឺជាអ្នករួមដំណើរទៅធ្វើបុណ្យរំលងដែរ ហើយគាត់ជាម្ដាយរបស់សាវ័កយ៉ាកុបនិងយ៉ូហាន។ ព្រះយេស៊ូហៅយ៉ាកុបនិងយ៉ូហានជា«កូនផ្គរលាន់» ច្បាស់ជាដោយសារលក្ខណៈដ៏ឆេវឆាវរបស់ពួកគេហើយ។ ជាយូរមកហើយ សាវ័កទាំងពីរនេះមានមហិច្ឆតាចង់បានឋានៈដ៏ធំក្នុងព្រះរាជាណាចក្ររបស់ព្រះគ្រីស្ទ ហើយពួកគេបានប្រាប់ម្ដាយខ្លួននូវសេចក្ដីប្រាថ្នារបស់ពួកគេ។ ឥឡូវនេះ ម្ដាយរបស់ពួកគេក៏ចូលមកគាល់ព្រះយេស៊ូជំនួសពួកគេ ក្រាបទៀបព្រះបាទាទ្រង់ និងទូលសុំអ្វីមួយ។
ព្រះយេស៊ូមានបន្ទូលសួរថា៖ «តើអ្នកចង់បានអ្វី?»។
គាត់ទូលថា៖ «សូមអនុញ្ញាតឲ្យកូនខ្ញុំម្ចាស់ទាំង២នេះបានអង្គុយ ១ខាងស្ដាំ១ខាងឆ្វេងទ្រង់ ក្នុងនគររបស់ទ្រង់»។
ព្រះយេស៊ូជ្រាបនូវប្រភពនៃសេចក្ដីស្នើសុំនេះ ដូច្នេះទ្រង់ក៏មានបន្ទូលទៅយ៉ាកុបនិងយ៉ូហានថា៖ ‹អ្នករាល់គ្នាមិនយល់សេចក្ដីដែលអ្នកសូមទេ តើអ្នកអាចនឹងផឹកអំពីពែង ដែលខ្ញុំរៀបនឹងផឹកបានទេ?›។
ពួកគេទូលឆ្លើយថា៖ «ទទួលបាន!»។ ថ្វីបើព្រះយេស៊ូទើបបានប្រាប់ពួកគេ ថាទ្រង់នឹងរងទុក្ខនូវការបៀតបៀនយ៉ាងឃោរឃៅ ហើយត្រូវផុតព្រះជន្មទៅក៏ដោយ តែតាមមើលទៅ ពួកគេឥតយល់ន័យអំពី«ពែង»ដែលទ្រង់រៀបនឹងទទួលនោះទេ។
ប៉ុន្តែ ព្រះយេស៊ូមានបន្ទូលប្រាប់ពួកគេថា៖ «អ្នករាល់គ្នានឹងផឹកពីពែងខ្ញុំ ហើយនឹងទទួលបុណ្យជ្រមុជដែលខ្ញុំទទួលមែន តែដែលអង្គុយខាងស្ដាំឬខាងឆ្វេងខ្ញុំ នោះមិនស្រេចនឹងខ្ញុំទេ គឺសំរាប់តែអ្នកណា ដែលព្រះវរបិតាខ្ញុំបានរៀបចំទុកឲ្យវិញ»។
នៅពេលក្រោយមក ពួកសាវ័កដប់នាក់ទៀតដឹងរឿង ដែលយ៉ាកុបនិងយ៉ូហានបានស្នើសុំនោះ ដូច្នេះពួកគេខឹងយ៉ាកុបនិងយ៉ូហានជាខ្លាំង។ ប្រហែលជាយ៉ាកុបនិងយ៉ូហានជាអ្នកផ្ដើមឲ្យមានការទំនាស់គ្នាពីមុនក្នុងចំណោមពួកសាវ័ក អំពីអ្នកណាដែលធំជាងគេនោះហើយ។ សេចក្ដីស្នើសុំរបស់ពួកគេលាតត្រដាងឲ្យឃើញថា ពួកគេពុំទាន់ធ្វើតាមឱវាទដែលព្រះយេស៊ូប្រទានឲ្យចំពោះរឿងនេះនៅឡើយទេ។ គួរឲ្យស្ដាយមែន ដែលសេចក្ដីប្រាថ្នាចង់បានឋានៈធំគឺនៅតែមានក្នុងចំណោមពួកគេដដែល។
ដូច្នេះដើម្បីនឹងដោះស្រាយនូវទំនាស់ថ្មីៗនេះ និងការចងគំនុំដែលកើតមានឡើង នោះព្រះយេស៊ូក៏ហៅពួកសាវ័ក១២នាក់មក។ ព្រះយេស៊ូទូន្មានប្រដៅពួកគេដោយសេចក្ដីស្រឡាញ់ ទាំងមានបន្ទូលថា៖ «អ្នករាល់គ្នាដឹងថា ពួកចៅហ្វាយនៃសាសន៍ដទៃតែងគ្រប់គ្រងលើសាសន៍របស់ខ្លួន ហើយពួកអ្នកធំក៏មានអំណាចលើគេដែរ ប៉ុន្តែមិនត្រូវឲ្យមានដូច្នោះក្នុងពួកអ្នករាល់គ្នាឡើយ គឺអ្នកណាក្នុងពួកអ្នករាល់គ្នា ដែលចង់ធ្វើជាធំ នោះនឹងត្រូវធ្វើជាអ្នកបំរើដល់អ្នករាល់គ្នាវិញ ហើយអ្នកណាក្នុងពួកអ្នកដែលចង់បានជាលេខ១ អ្នកនោះត្រូវធ្វើជាបាវដល់អ្នករាល់គ្នាវិញដែរ»។
ព្រះយេស៊ូបានតាំងគំរូ ដែលពួកគេគប្បីយកតម្រាប់តាម ទ្រង់ពន្យល់ថា៖ «ដូចជាកូនមនុស្សបានមក មិនមែនឲ្យគេបំរើលោកទេ គឺនឹងបំរើគេវិញ ហើយនឹងឲ្យជីវិតខ្លួន ទុកជាថ្លៃលោះមនុស្សជាច្រើនផង»។ ព្រះយេស៊ូមិនគ្រាន់តែបំរើប្រយោជន៍ឲ្យអ្នកដទៃប៉ុណ្ណោះទេ តែទ្រង់សុខព្រះទ័យសោយទិវង្គតសំរាប់មនុស្សលោកទៀតផង! ពួកសិស្សត្រូវមានលក្ខណៈដូចព្រះគ្រីស្ទដែលទ្រង់ចង់តែបំរើគេ មិនមែនឲ្យគេបំរើទ្រង់នោះទេ។ ហើយពួកគេក៏ត្រូវមានចិត្តរាបទាប មិនមែនចង់បានឋានៈធំដុំនោះដែរ។ ម៉ាថាយ ២០:១៧-២៨; ម៉ាកុស ៣:១៧; ៩:៣៣-៣៧; ១០:៣២-៤៥; លូកា ១៨:៣១-៣៤; យ៉ូហាន ១១:១៦
▪ ហេតុអ្វីបានជាពួកសិស្សមានចិត្តខ្លាចម្ល៉េះ?
▪ តើតាមរបៀបណាដែលព្រះយេស៊ូជួយពួកសិស្សឲ្យត្រៀមខ្លួនជាមុន ចំពោះអ្វីដែលមាននៅខាងមុខ?
▪ តើមានសេចក្ដីស្នើសុំអ្វីពីព្រះយេស៊ូ? ហើយតើពួកសាវ័កឯទៀតមានអារម្មណ៍យ៉ាងណា?
▪ តើតាមរបៀបណាដែលព្រះយេស៊ូដោះស្រាយបញ្ហា ដែលមានក្នុងចំណោមពួកសាវ័ករបស់ទ្រង់នោះ?