ជំពូកទី១០៧
រឿងប្រៀបប្រដូចអំពីពិធីមង្គលការ
តាមរយៈរឿងប្រៀបប្រដូចពីរទៀត នោះព្រះយេស៊ូលាតត្រដាងមុខមាត់ពួកស្ក្រែបនិងពួកសង្គ្រាជ ដូច្នេះពួកគេចង់ធ្វើគុតទ្រង់។ ប៉ុន្តែ ព្រះយេស៊ូនៅមានរឿងលាតត្រដាងមុខមាត់ពួកគេទៀត។ ទ្រង់ក៏មានបន្ទូលប្រាប់ពួកគេនូវរឿងប្រៀបប្រដូចមួយទៀត ដោយថា៖
«នគរស្ថានសួគ៌ប្រៀបដូចជាស្តេច១អង្គ ដែលរៀបវិវាហមង្គលឲ្យព្រះរាជបុត្រា ទ្រង់ចាត់ពួកមហាតលិកឲ្យទៅហៅពួកភ្ញៀវ ដែលទ្រង់បានអញ្ជើញមកក្នុងមង្គលការនោះ ប៉ុន្តែ អ្នកទាំងនោះមិនព្រមមកទេ»។
ព្រះយេហូវ៉ាជាព្រះមហាក្សត្រដែលរៀបចំពិធីមង្គលការសំរាប់បុត្រារបស់ទ្រង់ គឺព្រះយេស៊ូគ្រីស្ទ។ នៅទីបំផុត កូនក្រមុំដែលជាអ្នកចាក់ប្រេងតាំងដែលកាន់តាមទ្រង់មានចំនួន១៤៤.០០០នាក់ នឹងរួមគ្រប់គ្រងជាមួយនឹងព្រះយេស៊ូនៅស្ថានសួគ៌។ អនុរាស្ត្ររបស់ព្រះមហាក្សត្រនេះគឺជាសាសន៍អ៊ីស្រាអែល ដែលបាននាំចូលក្នុងកិច្ចព្រមព្រៀងខាងក្រិត្យវិន័យក្នុងឆ្នាំ១៥១៣ ម.ស.យ. ដែលបានទទួលនូវឱកាសឲ្យក្លាយទៅជា‹ព្រះរាជាណាចក្រដែលសុទ្ធតែជាសង្ឃ›។ ដូច្នេះហើយ នៅគ្រានោះ ពួកគេបានត្រូវអញ្ជើញឲ្យចូលរួមពិធីមង្គលការ។
ប៉ុន្តែ សេចក្ដីអញ្ជើញដំបូងដល់អ្នកដែលបានអញ្ជើញ គឺបានធ្វើឡើងនៅរដូវស្លឹកឈើជ្រុះនាឆ្នាំ២៩ ស.យ. ពេលព្រះយេស៊ូនិងពួកសិស្សរបស់ទ្រង់ (ពួកមហាតលិក) ចាប់ផ្ដើមកិច្ចការរបស់ពួកគេ នោះគឺជាការផ្សព្វផ្សាយព្រះរាជាណាចក្រ។ ប៉ុន្តែ ពួកអ៊ីស្រាអែលខាងសាច់ឈាមដែលបានទទួលសេចក្ដីអញ្ជើញដោយពួកមហាតលិកពីឆ្នាំ២៩ ស.យ.ទៅដល់ឆ្នាំ៣៣ ស.យ. នោះមិនព្រមមកទេ។ ដូច្នេះព្រះក៏ប្រទានដល់មនុស្សក្នុងសាសន៍នេះនូវឱកាសមួយទៀត។ ព្រះយេស៊ូរៀបរាប់ថា៖
«ទ្រង់ក៏ចាត់ពួកមហាតលិកឯទៀតឲ្យទៅដោយបន្ទូលថា ចូរឯងប្រាប់ពួកភ្ញៀវថា ឥឡូវ គ្រឿងជប់លៀងបានរៀបជាស្រេចហើយ គេបានសំឡាប់គោ នឹងសត្វបំប៉នយ៉ាងធាត់ៗ ហើយក៏រៀបចំគ្រប់ទាំងអស់រួចជាស្រេច ចូរមកបរិភោគការចុះ!»។ សេចក្ដីអញ្ជើញទីពីរ ហើយជាលើកចុងក្រោយសំរាប់ពួកភ្ញៀវ បានចាប់ផ្ដើមនៅបុណ្យថ្ងៃទី៥០នៅឆ្នាំ៣៣ ស.យ. ពេលដែលវិញ្ញាណបរិសុទ្ធបានចាក់មកលើពួកអ្នកកាន់តាមព្រះយេស៊ូ។ សេចក្ដីអញ្ជើញនេះមានរហូតដល់ឆ្នាំ៣៦ ស.យ.។
ប៉ុន្តែ ពួកជនជាតិអ៊ីស្រាអែលភាគច្រើន បដិសេធចោលនឹងសេចក្ដីអញ្ជើញនេះដែរ។ ព្រះយេស៊ូមានបន្ទូលថា៖ «តែអ្នកទាំងនោះធ្វេសប្រហែសវិញ ម្នាក់ក៏ទៅឯចំការខ្លួន ម្នាក់ទៀតទៅឯការជំនួញ អ្នកឯទៀតក៏ចាប់ពួកមហាតលិកត្មះតិះដៀល ហើយសំឡាប់ចោលទៅ»។ ព្រះយេស៊ូមានបន្ទូលទៀតថា៖ «កាលស្តេចបានឮ នោះទ្រង់មានព្រះទ័យក្រេវក្រោធ ក៏ចាត់ទ័ពឲ្យទៅបំផ្លាញពួកមនុស្សដែលសំឡាប់គេនោះ ព្រមទាំងដុតទីក្រុងរបស់គេចោលអស់»។ នេះបានកើតឡើងនៅឆ្នាំ៧០ ស.យ. ពេលពួករ៉ូមបានកំទេចចោលក្រុងយេរូសាឡិម ហើយក៏បំផ្លាញពួកមនុស្សដែលសម្លាប់គេនោះ។
រួចមក ព្រះយេស៊ូបានពន្យល់នូវអ្វីដែលបានកើតឡើងក្នុងចន្លោះគ្រានោះ «រួចទ្រង់[ស្តេច]មានបន្ទូលទៅពួកមហាតលិកថា ‹ការបានរៀបចំជាស្រេច តែពួកភ្ញៀវមិនគួរនឹងមកបរិភោគទេ ដូច្នេះ ចូរទៅឯផ្លូវប្រសព្វ អញ្ជើញអស់អ្នកណាដែលប្រទះឃើញ ឲ្យគេមកបរិភោគវិញ›»។ ពួកមហាតលិកបានធ្វើដូច្នេះ ហើយ«ប្រមូលអស់អ្នកណាដែលប្រទះឃើញ ទាំងអាក្រក់ ទាំងល្អមក នោះរោងការមានភ្ញៀវពេញព្រៀប»។
កិច្ចការប្រមូលភ្ញៀវនេះនៅតាមផ្លូវក្រៅទីក្រុងបានចាប់ផ្ដើមនៅឆ្នាំ៣៦ ស.យ.។ កូនេលាសដែលជាមេទ័ពសាសន៍រ៉ូមនិងក្រុមគ្រួសាររបស់លោក គឺក្រុមដំបូងក្នុងចំណោមសាសន៍ដទៃដែលមិនកាត់ស្បែកបានប្រមូលឲ្យចូល។ ការប្រមូលយកពួកសាសន៍ដទៃ ដែលពួកអ្នកទាំងនេះមកជំនួសអស់អ្នកដែលបដិសេធនឹងសេចក្ដីអញ្ជើញដំបូង គឺមានបន្តរហូតមកដល់សព្វថ្ងៃនេះ។
គឺនៅកំឡុងសតវត្សទី២០ ដែលរោងការបានពេញព្រៀប។ ព្រះយេស៊ូរៀបរាប់នូវអ្វីដែលកើតឡើងពេលនោះ ដោយមានបន្ទូលថា៖ «ស្តេចក៏យាងចូលទៅទតមើលពួកភ្ញៀវ ទ្រង់ឃើញមានមនុស្សម្នាក់នៅទីនោះ ដែលមិនបានពាក់អាវផាយ ក៏មានបន្ទូលទៅអ្នកនោះថា សំឡាញ់អើយ! ដូចម្ដេចបានជាអ្នកចូលមកក្នុងទីនេះ ឥតពាក់អាវផាយដូច្នេះ? អ្នកនោះរកឆ្លើយអ្វីមិនបានឡើយ ទើបទ្រង់បង្គាប់ទៅពួកមហាតលិកថា ចូរចងជើងចងដៃវាបោះចោលទៅឯទីងងឹតខាងក្រៅទៅ នៅទីនោះនឹងយំ ហើយសង្កៀតធ្មេញ»។
បុរសដែលឥតស្លៀកសំលៀកបំពាក់សំរាប់មង្គលការ តំណាងពួកគ្រីស្ទានក្លែងក្លាយពីពិភពគ្រីស្ទសាសនា។ ព្រះទ្រង់មិនដែលទទួលស្គាល់ពួកអ្នកទាំងនេះ ថាពួកគេមានអត្តសញ្ញាណត្រឹមត្រូវជាពួកអ៊ីស្រាអែលខាងវិញ្ញាណឡើយ។ ព្រះទ្រង់មិនដែលចាក់វិញ្ញាណបរិសុទ្ធលើពួកគេ ជាអ្នកទទួលព្រះរាជាណាចក្រជាមរតកឡើយ។ ដូច្នេះ នឹងត្រូវបោះចោលទៅទីងងឹតខាងក្រៅឲ្យទទួលសេចក្ដីហិនវិនាស។
ព្រះយេស៊ូបញ្ចប់រឿងប្រៀបប្រដូចរបស់ទ្រង់ ដោយមានបន្ទូលថា៖ «ដ្បិតបានហៅមនុស្សជាច្រើន តែរើសបានតិចទេ»។ មែនហើយ គឺបានអញ្ជើញភ្ញៀវជាច្រើនពីសាសន៍អ៊ីស្រាអែល ឲ្យក្លាយទៅជាសមាជិកនៃកូនក្រមុំរបស់ព្រះគ្រីស្ទ ប៉ុន្តែមានតែពួកអ៊ីស្រាអែលខាងសាច់ឈាមមួយចំនួនតូចទេ ដែលបានត្រូវរើសយកនោះ។ ពួកភ្ញៀវដែលមានចំនួន១៤៤.០០០នាក់បានទទួលរង្វាន់នៅស្ថានសួគ៌ ភាគច្រើនជាសាសន៍ដទៃទេ។ ម៉ាថាយ ២២:១-១៤; និក្ខមនំ ១៩:១-៦; វិវរណៈ ១៤:១-៣
▪ តើជនមួយក្រុមដំបូងដែលបានត្រូវអញ្ជើញឲ្យមកពិធីមង្គលការជាអ្នកណា? ហើយតើពេលណាដែលត្រូវផ្ដល់សេចក្ដីអញ្ជើញឲ្យពួកគេនោះ?
▪ តើសេចក្ដីអញ្ជើញដំបូងត្រូវធ្វើឡើងនៅពេលណា? ហើយតើពួកណាជាពួកមហាតលិកដែលទៅអញ្ជើញនោះ?
▪ តើសេចក្ដីអញ្ជើញទីពីរមានឡើងនៅពេលណា? ហើយតើត្រូវបានអញ្ជើញអ្នកណាក្រោយមក?
▪ តើបុរសដែលឥតស្លៀកសំលៀកបំពាក់សំរាប់មង្គលការតំណាងអ្នកណា?
▪ តើមនុស្សជាច្រើនដែលបានត្រូវអញ្ជើញជាអ្នកណា? ចុះអ្នកតិចដែលបានរើសយកជាអ្នកណា?