មេរៀនទី៤
តើអារក្សជាអ្នកណា?
អារក្សសាតាំង—តើវាកើតមកពីណា? (១, ២)
តើតាមរបៀបណាដែលសាតាំងនាំមនុស្សឲ្យវង្វេង? (៣-៧)
ហេតុអ្វីអ្នកត្រូវទប់ទល់នឹងអារក្ស? (៧)
១. ពាក្យ«អារក្ស»មានន័យថាអ្នកដែលប្រាប់ពាក្យកុហកដ៏អាក្រក់អំពីបុគ្គលម្នាក់ទៀត។ «សាតាំង»មានន័យថា សត្រូវឬអ្នកប្រឆាំង។ ពាក្យទាំងនេះជាពាក្យប្រើសំរាប់មេសត្រូវនៃព្រះ។ ដំបូងបុគ្គលនេះជាទេវតាគ្រប់ល័ក្ខណ៍មួយរូប ដែលគង់នៅក្នុងស្ថានសួគ៌ជាមួយនឹងព្រះ។ ប៉ុន្តែ ក្រោយមកវាគិតគូរច្រើនហួសហេតុពេកអំពីផលប្រយោជន៍ផ្ទាល់ខ្លួន ហើយចង់បានការថ្វាយបង្គំដែលជារបស់ផងព្រះយ៉ាងត្រឹមត្រូវ។—ម៉ាថាយ ៤:៨-១០
២. ទេវតានេះ គឺសាតាំង បាននិយាយទៅកាន់នាងអេវ៉ាតាមរយៈសត្វពស់មួយ។ ដោយប្រាប់ពាក្យកុហកដល់នាង វាបានធ្វើឲ្យនាងមិនស្ដាប់បង្គាប់ព្រះ។ ដូច្នេះ សាតាំងបានប្រឆាំងរុករានលើអ្វីដែលហៅថា«ព្រះអធិបតេយ្យភាព»របស់ព្រះ ឬតំណែងជាព្រះដ៏ខ្ពស់បំផុត។ សាតាំងបានចោទសួរថាតើព្រះទ្រង់គ្រងក្នុងរបៀបដ៏សមល្អឬ ហើយឲ្យបានផលប្រយោជន៍ល្អបំផុតដល់អនុរាស្ត្រនៃទ្រង់មែនឬទេ។ សាតាំងក៏បានលើកការសង្ស័យឡើងដែរ ដោយសួរថាតើនឹងមានមនុស្សលោកណាដែលនៅស្មោះត្រង់ចំពោះព្រះជានិច្ច។ ដោយធ្វើដូច្នេះ សាតាំងបានលើកខ្លួនជាសត្រូវរបស់ព្រះ។ ដូច្នេះហើយបានជាគេហៅវាថា អារក្សសាតាំង។—លោកុប្បត្តិ ៣:១-៥; យ៉ូប ១:៨-១១; វិវរណៈ ១២:៩
៣. សាតាំងខំប្រើល្បិចបញ្ឆោតមនុស្សឲ្យថ្វាយបង្គំវា។ (កូរិនថូសទី២ ១១:៣, ១៤) វិធីមួយដែលវានាំមនុស្សឲ្យវង្វេងគឺដោយប្រើសាសនាក្លែងក្លាយ។ បើសាសានាណាបង្រៀនពាក្យកុហកអំពីព្រះ នោះគឺពិតជាបំពេញគោលបំណងរបស់សាតាំងហើយ។ (យ៉ូហាន ៨:៤៤) មនុស្សដែលជាសមាជិកនៃសាសនាក្លែងក្លាយប្រហែលជាជឿដោយស្មោះពីចិត្តថាគេកំពុងថ្វាយបង្គំព្រះពិត។ ប៉ុន្តែពួកគេតាមពិតគឺបំរើសាតាំងវិញ។ វាជា‹ព្រះរបស់លោកីយនេះ›។—កូរិនថូសទី២ ៤:៤
៤. មន្តអាគម គឺជាវិធីមួយទៀតដែលសាតាំងប្រើដើម្បីទាញមនុស្សឲ្យចូលក្រោមអំណាចរបស់វា។ ពួកគេប្រហែលអំពាវនាវហៅពួកវិញ្ញាណឲ្យការពារគេ ឲ្យធ្វើទុក្ខដល់មនុស្សឯទៀត ទាយអំពីអនាគត ឬធ្វើអព្ភូតហេតុ។ សាតាំងគឺជាកម្លាំងដ៏កំណាចដែលនៅពីក្រោយ គាំទ្រការប្រព្រឹត្តទាំងនេះ។ ដើម្បីផ្គាប់ព្រះហឫទ័យនៃព្រះ យើងត្រូវតែកុំប៉ះពាល់នឹងមន្តអាគមឲ្យសោះ។—ចោទិយកថា ១៨:១០-១២; កិច្ចការ ១៩:១៨, ១៩
៥. សាតាំងក៏នាំមនុស្សឲ្យវង្វេងដែរ ដោយប្រើសេចក្ដីក្រអឺតអួតអាងពូជសាសន៍ហួសហេតុ និងប្រើការថ្វាយបង្គំអង្គការនយោបាយ។ មនុស្សខ្លះយល់ថាជាតិឬពូជសាសន៍របស់គេគឺល្អប្រសើរជាងជាតិឬពូជសាសន៍ឯទៀត។ ប៉ុន្តែនេះគឺមិនពិតទេ។ (កិច្ចការ ១០:៣៤, ៣៥) មនុស្សឯទៀតពឹងផ្អែកលើអង្គការនយោបាយឲ្យដោះស្រាយវិបត្ដិមនុស្សជាតិ។ ដោយធ្វើដូច្នេះ ពួកគេបដិសេធចោលព្រះរាជាណាចក្រនៃព្រះ។ គឺមានតែព្រះរាជាណាចក្រនៃព្រះប៉ុណ្ណោះទេ ដែលអាចដោះស្រាយវិបត្ដិរបស់យើងបាន។—ដានីយ៉ែល ២:៤៤
៦. វិធីមួយទៀតដែលសាតាំងនាំមនុស្សឲ្យវង្វេងគឺដោយប្រើសេចក្ដីប៉ងប្រាថ្នាដ៏មានបាបមកល្បួងគេ។ ព្រះយេហូវ៉ាមានបន្ទូលប្រាប់យើងឲ្យជៀសវាងការប្រព្រឹត្តដ៏មានបាប ពីព្រោះទ្រង់ដឹងថាការទាំងនេះនឹងនាំផលអាក្រក់ដល់យើង។ (កាឡាទី ៦:៧, ៨) មនុស្សខ្លះប្រហែលចង់ឲ្យអ្នកចូលរួមជាមួយពួកគេក្នុងការប្រព្រឹត្តបែបនេះ។ ប៉ុន្តែសូមចាំថា គឺពិតជាសាតាំងទេ ដែលចង់ឲ្យអ្នកប្រព្រឹត្តការទាំងនេះ។—កូរិនថូសទី១ ៦:៩, ១០; ១៥:៣៣
៧. សាតាំងប្រហែលប្រើការធ្វើទុក្ខបៀតបៀន ឬការប្រឆាំង ដើម្បីធ្វើឲ្យអ្នកចាកចេញពីព្រះយេហូវ៉ា។ បងប្អូនញាតិមិត្តជាទីស្រឡាញ់ខ្លះរបស់អ្នក ប្រហែលទៅជាខឹងណាស់ពីព្រោះអ្នកសិក្សាព្រះគម្ពីរ។ អ្នកឯទៀតប្រហែលជាចំអកដាក់អ្នក។ ប៉ុន្តែ តើអ្នកបានជីវិតមកដោយសារអ្នកណាគេ? សាតាំងចង់បន្លាចអ្នកដើម្បីឲ្យអ្នកឈប់រៀនអំពីព្រះយេហូវ៉ាទៀត។ សូមកុំឲ្យសាតាំងបានជ័យជំនះឡើយ! (ម៉ាថាយ ១០:៣៤-៣៩; ពេត្រុសទី១ ៥:៨, ៩) ដោយទប់ទល់នឹងអារក្ស អ្នកអាចធ្វើឲ្យព្រះយេហូវ៉ាសព្វព្រះហឫទ័យ ហើយនិងបង្ហាញថាអ្នកជួយរក្សាការពារព្រះអធិបតេយ្យភាពនៃទ្រង់ផង។—សុភាសិត ២៧:១១
[រូបភាពនៅទំព័រ៩]
សាសនាក្លែងក្លាយមន្តអាគម និងជាតិនិយមនាំមនុស្សឲ្យវង្វេង
[រូបភាពនៅទំព័រ៩]
សូមទប់ទល់និងសាតាំងដោយបន្តការរៀនសូត្រអំពីព្រះយេហូវ៉ា