ជំពូកទី២
សត្រូវនៃជីវិតដ៏អស់កល្បជានិច្ច
១ ដោយសារសុភមង្គលនិងសន្ដិភាពមិនសូវទទួលបានទេនោះ តើត្រូវសួរសំនួរអ្វីខ្លះ?
សុភមង្គលនៅលើផែនដី—មនុស្សសឹងតែគ្រប់ៗគ្នាចង់បានសេចក្ដីនេះណាស់។ ចុះហេតុអ្វីក៏មនុស្សជាច្រើនមិនសប្បាយរីករាយអញ្ចឹង? តើមកពីហេតុអ្វី? ដោយសារមនុស្សសឹងតែទាំងអស់ចង់បានសន្ដិភាព ហេតុអ្វីក៏សាសន៍ជាច្រើនបង្កើតសង្គ្រាម ហើយហេតុអ្វីក៏មនុស្សលោកស្អប់គ្នាទៅវិញទៅមកដូច្នេះ? តើមានអានុភាពដឹកនាំណាមួយដែលជម្រុញឲ្យគេធ្វើនូវអំពើអាក្រក់នេះឬ? តើអាចមានឥទ្ធិពលទួទៅណាមួយដែលមើលមិនឃើញ កាន់កាប់គ្រប់សាសន៍ទាំងអស់ឬ?
២ តើឧក្រិដ្ឋកម្មណាខ្លះក្នុងប្រវត្ដិសាស្ត្រ ដែលធ្វើឲ្យមនុស្សជាច្រើនឆ្ងល់ថា ប្រហែលជាមានបុគ្គលអាក្រក់ណាម្នាក់ជាឥទ្ធិពលមើលមិនឃើញដែលកំពុងកាន់កាប់មនុស្សលោក?
២ មនុស្សជាច្រើនឆ្ងល់អំពីរឿងនេះ នៅពេលណាដែលគេគិតអំពីអំពើឃោរឃៅរបស់មនុស្ស ដូចជាការប្រើជាតិឧស្ម័នដ៏គួរឲ្យខ្លាចក្នុងសង្គ្រាម បណ្ដាលឲ្យមនុស្សស្លាប់ដោយឈ្លក់និងឆេះរលាកខ្លួនប្រាណ ហើយព្រមទាំងការប្រើគ្រាប់បែកគីមីរលាក និងគ្រាប់បែកបរមាណូ។ ម្យ៉ាងទៀត សូមគិតអំពីអាវុធបាញ់ចេញភ្លើង ទីឃុំឃាំងមនុស្ស ការសម្លាប់មនុស្សទាល់ច្រកជាច្រើនលាននាក់ ដូចជានៅប្រទេសកម្ពុជាក្នុងប៉ុន្មានឆ្នាំថ្មីៗនេះ។ តើលោកអ្នកគិតថា រឿងអាក្រក់ទាំងអស់នេះ កើតឡើងដោយចៃដន្យឬ? មនុស្សមានសមត្ថភាពអាចប្រព្រឹត្តអំពើដ៏គួរឲ្យខ្លាចមែន ប៉ុន្តែបើអ្នកពិចារណាដល់កិច្ចប្រព្រឹត្តដ៏អាក្រក់ជួជាតិរបស់គេ តើមិនហាក់ដូចជាមានឥទ្ធិពលដ៏កាចសាហាវណាមួយដែលមើលមិនឃើញ មានអានុភាពទៅលើពួកគេទេឬ?
៣ តើព្រះគម្ពីរបានចែងយ៉ាងណាខ្លះ អំពីការគ្រប់គ្រងនៃលោកីយ៍នេះ?
៣ លោកអ្នកមិនចាំបាច់ស្មានអំពីរឿងនេះទេ។ ព្រះគម្ពីរបង្ហាញយ៉ាងច្បាស់ថា បុគ្គលមានបញ្ញាម្នាក់ដែលមើលមិនឃើញ បានកាន់កាប់លើគ្រប់មនុស្សនិងសាសន៍ទាំងអស់រហូតមកដល់សព្វថ្ងៃនេះ។ នៅក្នុងព្រះគម្ពីរ ព្រះយេស៊ូវគ្រីស្ទទ្រង់បានហៅបុគ្គលដែលមានអានុភាពនេះជា «ចៅហ្វាយរបស់លោកីយនេះ»។ (យ៉ូហាន ១២:៣១; ១៤:៣០; ១៦:១១) តើវាជាអ្នកណា?
៤ តើអារក្សបានបង្ហាញអ្វីខ្លះដល់ព្រះយេស៊ូវ ហើយតើវាសុំដូរអ្វីនឹងទ្រង់?
៤ ដើម្បីជាជំនួយដល់យើងក្នុងការតាមដានអំពីវានេះ សូមគិតអំពីរឿងដែលបានកើតឡើងនៅដើមដំបូងនៃកិច្ចបម្រើរបស់ព្រះយេស៊ូវនៅលើផែនដីនេះ។ ព្រះគម្ពីរបានប្រាប់យើងថា បន្ទាប់ពីព្រះយេស៊ូវបានធ្វើបុណ្យជ្រមុជទឹកហើយ ទ្រង់បានធ្វើដំណើរទៅទីរហោស្ថាន ដែលនៅទីនោះទ្រង់បានត្រូវល្បួងពីសត្តវិញ្ញាណម្នាក់ដែលមើលមិនឃើញ ហៅថាអារក្សសាតាំង។ ផ្នែកនៃការល្បួងនោះត្រូវបានរៀបរាប់ដូចតទៅនេះ៖ «មួយទៀត អារក្សបាននាំទ្រង់ទៅលើកំពូលភ្នំយ៉ាងខ្ពស់ ក៏បង្ហាញអស់ទាំងនគរក្នុងលោកីយ នឹងសិរីលំអរបស់នគរទាំងនោះថ្វាយទ្រង់ទត រួចទូលថា ‹បើសិនជាអ្នកក្រាបថ្វាយបង្គំខ្ញុំ នោះខ្ញុំនឹងឲ្យរបស់ទាំងនេះដល់អ្នក›»។—ម៉ាថាយ ៤:៨, ៩
៥ (ក) តើអ្វីដែលបង្ហាញយើងថា រដ្ឋាភិបាលទាំងអស់នៃពិភពលោកនេះជាកម្មសិទ្ធិរបស់អារក្ស? (ខ) យោងទៅតាមព្រះគម្ពីរ អ្នកណាជា«ព្រះរបស់លោកីយនេះ»?
៥ សូមពិចារណាអំពីអ្វីៗដែលអារក្សចង់ប្រគល់ឲ្យព្រះយេស៊ូវ។ គឺ«អស់ទាំងនគរក្នុងលោកីយ»។ តើរដ្ឋាភិបាលនៃលោកីយ៍នេះ ពិតជារបស់អារក្សមែនទេ? ពិតប្រាកដហើយ បើមិនអញ្ចឹងទេ តើវាអាចឲ្យនគរទាំងនោះដល់ព្រះយេស៊ូវបានយ៉ាងដូចម្ដេច? ព្រះយេស៊ូវទ្រង់មិនបានបដិសេធថានគរទាំងនោះមិនមែនជារបស់សាតាំងទេ តែបើនគរទាំងនោះមិនមែនជាកម្មសិទ្ធិរបស់សាតាំងទេនោះ ទ្រង់ពិតជាបដិសេធជាមិនខាន។ សាតាំងគឺពិតជាអ្នកគ្រប់គ្រងដ៏មើលមិនឃើញរបស់មនុស្សគ្រប់សាសន៍នៃលោកីយ៍នេះ! ព្រះគម្ពីរបានចែងយ៉ាងច្បាស់ថា៖ «លោកីយទាំងមូលដេកនៅក្នុងឱវាទនៃមេកំណាច»។ (យ៉ូហានទី១ ៥:១៩) តាមការពិត ព្រះបន្ទូលរបស់ព្រះបានចែងអំពីសាតាំងជា«ព្រះរបស់លោកីយនេះ»។—កូរិនថូសទី២ ៤:៤
៦ (ក) តើពត៌មានអំពីការគ្រប់គ្រងរបស់សាតាំងជួយយើងឲ្យយល់អំពីអ្វី? (ខ) តើសាតាំងចង់ធ្វើអ្វីដល់យើង ហើយដូច្នេះ តើយើងត្រូវធ្វើយ៉ាងណា?
៦ ពត៌មាននេះជួយយើងឲ្យយល់អំពីមូលហេតុដែលព្រះយេស៊ូវបានមានបន្ទូលថា៖ «នគរខ្ញុំមិនមែនត្រូវខាងលោកីយនេះទេ»។ (យ៉ូហាន ១៨:៣៦) ហើយក៏ជួយយើងឲ្យយល់ដែរ អំពីមូលហេតុដែលសាសន៍នានាស្អប់ហើយចង់បំផ្លិចបំផ្លាញគ្នាទៅវិញទៅមក ដែលផ្ទុយពីសេចក្ដីប្រាថ្នារបស់មនុស្សធម្មតា គឺចង់រស់នៅដោយសន្ដិភាពនោះ។ ពិតមែនហើយ «សាតាំង . . . បាននាំលោកីយទាំងមូលឲ្យវង្វេងចេញ»។ (វិវរណៈ ១២:៩) វាក៏ចង់ធ្វើឲ្យយើងវង្វេងដែរ។ វាមិនចង់ឲ្យយើងទទួលនូវអំណោយទាននៃជីវិតដ៏អស់កល្បជានិច្ចពីព្រះឡើយ។ ដូច្នេះយើងត្រូវតែតយុទ្ធជាដរាប ដើម្បីកុំឲ្យយើងត្រូវទទួលអានុភាពពីវា ក្នុងការប្រព្រឹត្តអំពើអាក្រក់។ (អេភេសូរ ៦:១២) យើងត្រូវតែដឹងអំពីសាតាំង និងសកម្មភាពរបស់វា ដើម្បីទប់ទល់នឹងការប្រឹងប្រែងរបស់វា ក្នុងការធ្វើឲ្យយើងវង្វេងនោះ។
អ្នកណាជាអារក្ស
៧ ហេតុអ្វីបានជាយើងមិនអាចមើលឃើញអារក្ស?
៧ អារក្សសាតាំងជាបុគ្គលដ៏ពិតម្នាក់។ វាមិនមែនជាការអាក្រក់ដែលមាននៅក្នុងខ្លួនមនុស្សទាំងអស់ ដូចអ្នកខ្លះប្រហែលជាជឿនោះទេ។ ហ្នឹងហើយ មនុស្សយើងមិនអាចមើលឃើញអារក្សទេ ក៏ដូចជាយើងមិនអាចមើលឃើញព្រះដែរ។ បុគ្គលទាំងពីរ ព្រះនិងអារក្ស ជាបុគ្គលវិញ្ញាណដែលមានសណ្ឋាននៃជីវិតខ្ពស់ជាងមនុស្ស ហើយមើលមិនឃើញនឹងភ្នែកយើងឡើយ។—យ៉ូហាន ៤:២៤
៨ ហេតុអ្វីបានជាមនុស្សជាច្រើនជឿថា ព្រះបានបង្កើតអារក្ស?
៨ អ្នកខ្លះប្រហែលជាសួរថា ‹ប៉ុន្តែបើព្រះជាសេចក្ដីស្រឡាញ់ ហេតុអ្វីបានជាទ្រង់បង្កើតអារក្ស›? (យ៉ូហានទី១ ៤:៨) តាមការពិតនោះ ព្រះទ្រង់មិនបានបង្កើតអារក្សទេ។ អ្នកខ្លះប្រហែលជាថា តែ‹បើព្រះបានបង្កើតបុគ្គលគ្រប់គ្នា ទ្រង់ពិតជាបានបង្កើតអារក្សដែរ។ តើមានអ្នកណាទៀតដែលអាចបង្កើតវាមក? តើអារក្សបានកើតពីណាមក›?
៩ (ក) តើពួកទេវតាជាបុគ្គលប្រភេទណា? (ខ) តើពាក្យថា«អារក្ស»និង«សាតាំង»មានន័យយ៉ាងដូចម្ដេច?
៩ ព្រះគម្ពីរពន្យល់ថា ព្រះបានបង្កើតបុគ្គលវិញ្ញាណជាច្រើនអនេកដែលស្រដៀងនឹងទ្រង់។ នៅក្នុងព្រះគម្ពីរ ពួកវិញ្ញាណទាំងនេះបានត្រូវហៅជា ទេវតា។ ហើយពួកគេទាំងនោះក៏បានត្រូវហៅជា «កូនព្រះ»ដែរ។ (យ៉ូប ៣៨:៧; ទំនុកដំកើង ១០៤:៤, ពថ; ហេព្រើរ ១:៧, ១៣, ១៤) ព្រះបានបង្កើតពួកគេទាំងអស់ឲ្យបានល្អឥតខ្ចោះ។ គ្មានមួយណាក្នុងចំណោមពួកគេជាអារក្ស ឬក៏សាតាំងមួយឡើយ។ នៅក្នុងភាសាដើមពាក្យដែលបកប្រែជា «អារក្ស» មានន័យថា អ្នកនិយាយបង្ខូច ហើយពាក្យ «សាតាំង» មានន័យថា អ្នកប្រឆាំង។
១០ (ក) តើអ្នកណាបានបង្កើតអារក្សសាតាំង? (ខ) តើបុគ្គលដ៏ល្អម្នាក់អាចធ្វើខ្លួនឯងឲ្យទៅជាឧក្រិដ្ឋជនបានយ៉ាងណា?
១០ ប៉ុន្តែមកដល់ពេលមួយ កូនព្រះមួយក្នុងចំណោមទាំងអស់បានធ្វើខ្លួនវាឲ្យទៅជាអារក្ស គឺជាអ្នកកំភូតដែលគួរឲ្យស្អប់ ដែលនិយាយអាក្រក់អំពីអ្នកដទៃ។ វាក៏បានធ្វើខ្លួនវាឲ្យទៅជាសាតាំង គឺជាអ្នកប្រឆាំងនឹងព្រះ។ វាមិនបានត្រូវបង្កើតមកតាមរបៀបនេះទេ ប៉ុន្តែក្រោយមកវាបានទៅជាបុគ្គលប្រភេទនេះ។ ជាឧទាហរណ៍៖ ចោរម្នាក់មិនបានកើតមកជាចោរទេ។ គាត់ប្រហែលជាមកពីគ្រួសារដ៏ល្អមួយ ដែលមានឪពុកម្ដាយជាអ្នកទៀងត្រង់ ហើយបងប្អូនប្រុសស្រីជាអ្នកគោរពច្បាប់។ ប៉ុន្តែដោយតណ្ហារបស់គាត់ផ្ទាល់ដែលចង់បានអ្វីៗដែលលុយអាចទិញបាននោះ បានបណ្ដាលគាត់ឲ្យទៅជាចោរម្នាក់ដូច្នេះ។ អញ្ចឹង តើតាមរបៀបណាដែលបុត្រវិញ្ញាណម្នាក់នេះ បានធ្វើខ្លួនវាឲ្យទៅជាអារក្សសាតាំងនោះ?
១១ (ក) តើគោលបំណងរបស់ព្រះមួយណា ដែលទេវតាបះបោរប្រឆាំងម្នាក់បានដឹង? (ខ) តើតណ្ហាអ្វីដែលទេវតានេះមាន ហើយនេះបាននាំវាឲ្យប្រព្រឹត្តអ្វី?
១១ ទេវតាដែលបានទៅជាអារក្សនោះបាននៅទីនោះដែរ នៅពេលដែលព្រះបានបង្កើតផែនដី ហើយបន្ទាប់មកគូស្វាមីភរិយាទីមួយ គឺអ័ដាមនិងអេវ៉ា។ (យ៉ូប ៣៨:៤, ៧) ដូច្នេះវាពិតជាបានឮព្រះមានបន្ទូលប្រាប់ពួកគេឲ្យបង្កើតកូនចៅ។ (លោកុប្បត្តិ ១:២៧, ២៨) វាបានដឹងថា ពេលក្រោយមក ផែនដីទាំងមូលនឹងត្រូវពោរពេញទៅដោយមនុស្សសុចរិតដែលថ្វាយបង្គំព្រះ។ នេះហើយជាបំណងរបស់ព្រះ។ ក៏ប៉ុន្តែ ទេវតានេះបានគិតតែពីលំអនិងបញ្ញារបស់ខ្លួន ហើយក៏ចង់បានការថ្វាយបង្គំដែលព្រះត្រូវទទួលនោះ មកលើខ្លួនវាវិញ។ (អេសេគាល ២៨:១៣-១៥; ម៉ាថាយ ៤:១០) ជាជាងបំបាត់នូវតណ្ហាមិនត្រឹមត្រូវពីគំនិតវាចេញ វាបែរជាគិតបន្តទៅទៀតពីរឿងនេះ។ ការនេះបាននាំវាឲ្យប្រព្រឹត្តអ្វីមួយ ដើម្បីឲ្យទទួលកិត្ដិយស និងឋានៈខ្ពង់ខ្ពស់ដែលវាបានប៉ងប្រាថ្នានោះ។ តើវាបានប្រព្រឹត្តអ្វី?—យ៉ាកុប ១:១៤, ១៥
១២ (ក) តើទេវតានេះបាននិយាយទៅនាងអេវ៉ាតាមរបៀបណា ហើយអ្វីដែលវាបានប្រាប់ទៅនាង? (ខ) តើទេវតានេះបានទៅជាអារក្សសាតាំងយ៉ាងណា? (គ) តើអ្វីជាទស្សនៈដែលមិនត្រឹមត្រូវ ស្តីអំពីរូបរាងរបស់សាតាំងនោះ?
១២ ទេវតាបះបោរប្រឆាំងនេះ បានប្រើសត្វពស់ដ៏មិនសំខាន់មួយ ឲ្យនិយាយទៅស្ត្រីទីមួយ នាងអេវ៉ា។ វាប៉ិនប្រសប់ណាស់ ដូចជាអ្នកជំនាញម្នាក់ដែលអាចធ្វើយ៉ាងណាហាក់ដូចជាសត្វ ឬរូបតុក្កតាដែលនៅជិតនោះចេះនិយាយដោយខ្លួនឯងអញ្ចឹង។ ប៉ុន្តែ នោះគឺពិតជាទេវតាបះបោរនេះឯង ដែលព្រះគម្ពីរបានហៅថា «ពស់ពីបុរាណ» ជាអ្នកដែលបាននិយាយទៅនាងអេវ៉ា។ (វិវរណៈ ១២:៩) វាបាននិយាយថា ព្រះទ្រង់មិនបានប្រាប់ការពិតដល់នាងទេ ហើយព្រមទាំងបដិសេធមិនឲ្យការចេះដឹងដែលនាងគួរតែមានដែរ។ (លោកុប្បត្តិ ៣:១-៥) នេះជាកំភូតដ៏អាក្រក់ដែលគួរឲ្យស្អប់ ហើយនេះបានធ្វើវាឲ្យទៅជាអារក្សមួយ។ តាមបែបដូចនេះវាក៏បានទៅជាអ្នកប្រឆាំងនឹងព្រះម្នាក់ ឬក៏សាតាំងមួយដែរ។ ដូចជាអ្នកអាចឃើញហើយ ជាការមិនត្រឹមត្រូវទេដោយគិតថា អារក្សជាសត្តវិញ្ញាណដែលមានស្នែងនិងចង្ហាយ ជាអ្នកត្រួតត្រានៅកន្លែងក្រោមដីណាមួយសំរាប់ធ្វើទារុណកម្មនោះ។ វាពិតជាទេវតាដ៏សាហាវដែលមានឥទ្ធិឫទ្ធិខ្លាំងពូកែមែន។
ប្រភពបញ្ហាទាំងឡាយក្នុងពិភពលោក
១៣ (ក) តើនាងអេវ៉ាបានតបនឹងពាក្យកំភូតរបស់អារក្សយ៉ាងណា? (ខ) តើអារក្សបានធ្វើការអះអាងណាខ្លះ?
១៣ ពាក្យកំភូតដែលអារក្សបានប្រាប់ទៅនាងអេវ៉ាបានសម្រេចដូចគម្រោងការណ៍វាអញ្ចឹង។ នាងបានជឿវា ហើយដូច្នេះក៏បានឈប់គោរពដល់ព្រះ។ ហើយបន្ទាប់មកនាងក៏នាំប្ដីនាង ឲ្យប្រព្រឹត្តល្មើសច្បាប់របស់ព្រះដែរ។ (លោកុប្បត្តិ ៣:៦) សេចក្ដីអះអាងរបស់អារក្សគឺថា មនុស្សលោកអាចដឹកនាំជីវភាពខ្លួនបានយ៉ាងប្រសើរ ដោយមិនត្រូវការព្រះទេ។ វាអះអាងទៀតថាមនុស្សលោកអាចគ្រប់គ្រងខ្លួនឯងដោយជោគជ័យ មិនបាច់មានជំនួយពីព្រះទេ។ អារក្សបានបញ្ជាក់ទៀតថា វាអាចបំបែរកូនចៅទាំងអស់ដែលកើតពីអ័ដាមនិងអេវ៉ាចេញពីព្រះបាន។
១៤ ហេតុអ្វីក៏ព្រះទ្រង់មិនបានកំទេចសាតាំងភ្លាមទៅ?
១៤ មែនហើយ ព្រះទ្រង់អាចកំទេចសាតាំងភ្លាមៗបាន។ ប៉ុន្តែធ្វើដូច្នេះមិនបានឆ្លើយនូវសំនួរទាំងឡាយដែលសាតាំងបានចោទទេ គឺសំនួរដែលអាចស្ថិតនៅក្នុងគំនិតរបស់ទេវតាទាំងឡាយដែលកំពុងមើលការទាំងនោះ។ ដូច្នេះហើយ ព្រះទ្រង់បានអនុញ្ញាតពេលវេលាឲ្យសាតាំងដើម្បីខំប្រឹងរកភស្តុតាងបង្ហាញនូវការអះអាងរបស់វា។ តើបានជាលទ្ធផលយ៉ាងណា?
១៥, ១៦ (ក) ពេលវេលាបានកន្លងមក តើការអះអាងរបស់អារក្សបានបង្ហាញឲ្យឃើញយ៉ាងណា? (ខ) តើព្រឹត្ដិការណ៍អ្វីដែលនឹងជិតមកដល់ហើយ?
១៥ ពេលវេលាបានកន្លងមក ហើយបានបង្ហាញឲ្យឃើញថា ដោយគ្មានជំនួយពីព្រះ មនុស្សលោកមិនអាចគ្រប់គ្រងខ្លួនឯងដោយជោគជ័យបានទេ។ សេចក្ដីប៉ុនប៉ងរបស់ពួកគេ បានបរាជ័យទាំងស្រុង។ មនុស្សលោកបានត្រូវរងទុក្ខវេទនាក្រៃលែង នៅក្រោមរដ្ឋាភិបាលរបស់មនុស្ស ដែលព្រះគម្ពីរបានបង្ហាញថា មានអារក្សជាអ្នកកាន់កាប់ដែលមើលមិនឃើញនោះ។ ម្យ៉ាងទៀត ការអនុញ្ញាតពេលវេលារបស់ព្រះបានបង្ហាញយ៉ាងច្បាស់ថា សាតាំងមិនអាចបំបែរមនុស្សទាំងអស់ចេញពីការថ្វាយបង្គំព្រះបានឡើយ។ គឺនៅតែមានអ្នកខ្លះស្មោះត្រង់ចំពោះការគ្រប់គ្រងរបស់ព្រះជារៀងដរាប។ ឧទាហរណ៍ អ្នកអាចអានក្នុងព្រះគម្ពីរ អំពីសាតាំងបានព្យាយាមបញ្ឈប់លោកយ៉ូបពីការបម្រើព្រះ ដោយគ្មានជោគជ័យ។—យ៉ូប ១:៦-១២
១៦ ហេតុដូច្នេះហើយ សេចក្ដីអះអាងរបស់អារក្សបានបង្ហាញឲ្យឃើញថា ខុសហើយ។ វាពិតជាសមនឹងទទួលនូវសេចក្ដីហិនវិនាស ដោយសារវាបានចាប់ផ្ដើមបះបោរប្រឆាំងយ៉ាងអាក្រក់ចំពោះព្រះ។ ជាការរីករាយណាស់ ដែលយើងឥឡូវនេះបានមកដល់សម័យ ដែលព្រះទ្រង់នឹងបញ្ចប់ការគ្រប់គ្រងរបស់សាតាំង។ ពិពណ៌នាអំពីជំហានទីមួយក្នុងការធ្វើកិច្ចការនេះ ព្រះគម្ពីរបានចែងពីការប្រយុទ្ធដ៏សំខាន់មួយនៅលើស្ថានសួគ៌ ដែលមនុស្សលោកនៅផែនដី មិនបានឃើញឬឮឡើយ។ សូមអញ្ជើញអានដោយយកចិត្តទុកដាក់នូវដំណើររឿងក្នុងព្រះគម្ពីរដូចតទៅ៖
១៧ (ក) តើព្រះគម្ពីរបានពណ៌នាយ៉ាងណាពីសង្គ្រាមនៅស្ថានសួគ៌? (ខ) តើមានលទ្ធផលយ៉ាងណាចំពោះពួកនៅស្ថានសួគ៌ ហើយចំពោះពួកនៅលើផែនដី?
១៧ «នោះមានចំបាំងនៅលើមេឃ គឺមីកែល[ជាព្រះយេស៊ូវគ្រីស្ទដែលទ្រង់មានព្រះជន្មរស់ឡើងវិញ]នឹងពួកទេវតារបស់លោកច្បាំងនឹងនាគ ហើយនាគ នឹងទេវតាវាក៏ច្បាំងនឹងលោកដែរ តែមិនបានឈ្នះទេ ក៏មិនឃើញមានកន្លែងណាឲ្យវា នៅលើមេឃទៀតផង នោះនាគធំត្រូវបោះទំលាក់ទៅ គឺជាពស់ពីបុរាណ ដែលឈ្មោះហៅថា អារក្ស ហើយសាតាំងផង ដែលបាននាំលោកីយ៍ទាំងមូលឲ្យវង្វេងចេញ វាត្រូវបោះទំលាក់ទៅផែនដីវិញ ព្រមទាំងពួកទេវតារបស់វាផង។ ដោយហេតុនោះ ឱស្ថានសួគ៌ នឹងពួកអ្នកដែលនៅស្ថាននោះអើយ ចូរអរសប្បាយឡើង តែវេទនាដល់ផែនដី នឹងសមុទ្រវិញ ពីព្រោះអារក្សបានចុះមកឯអ្នករាល់គ្នា ទាំងមានសេចក្ដីឃោរឃៅជាខ្លាំង ដោយវាដឹងថា ពេលវេលាវាខ្លីណាស់ហើយ»។—វិវរណៈ ១២:៧-៩, ១២
១៨ (ក) តើសង្គ្រាមនៅស្ថានសួគ៌បានកើតឡើងនៅពេលណា? (ខ) ចាប់តាំងពីពេលដែលសាតាំងបាន«ត្រូវទំលាក់»មក តើអ្វីបានកើតមានឡើងរហូតដល់សព្វថ្ងៃនេះ?
១៨ តើសង្គ្រាមនៅស្ថានសួគ៌នេះ បានកើតឡើងនៅពេលណា? ភស្តុតាងបង្ហាញឲ្យឃើញថា ការទាំងនេះបានកើតឡើងនៅពេលដែលសង្គ្រាមលោកលើកទីមួយបានផ្ទុះឡើង គឺចាប់ផ្ដើមនៅឆ្នាំ១៩១៤។ សៀវភៅវិវរណៈបានបង្ហាញថា សាតាំងបានត្រូវបណ្ដេញចេញពីស្ថានសួគ៌នៅពេលនោះឯង គឺបានសេចក្ដីថាយើងកំពុងតែរស់នៅក្នុង‹ពេលវេលាខ្លីណាស់›របស់វាចាប់តាំងពីពេលនោះមក។ ដូច្នេះហើយនេះជា«ជាន់ក្រោយបង្អស់» នៃលោកីយ៍របស់សាតាំង។ ការរីកចម្រើនឡើងនៃការទទឹងច្បាប់ ការភិតភ័យ សង្គ្រាមនានា ការខ្វះនូវគ្រឿងបរិភោគ ជម្ងឺផ្សេងៗ ហើយនឹងស្ថានភាពដែលធ្វើឲ្យមានទុក្ខព្រួយដទៃទៀត ដែលយើងមានការពិសោធន៍នោះ ជាភស្តុតាងយ៉ាងជាក់ស្តែងចំពោះហេតុការណ៍នេះ។—ម៉ាថាយ ២៤:៣-១២; លូកា ២១:២៦; ធីម៉ូថេទី២ ៣:១-៥
១៩ (ក) តើឥឡូវនេះសាតាំងខំប្រឹងយ៉ាងខ្លាំងដើម្បីធ្វើអ្វី? (ខ) តើយើងត្រូវធ្វើយ៉ាងណាដែរដើម្បីឲ្យសមជាមនុស្សមានប្រាជ្ញា?
១៩ ដោយសាតាំងដឹងថា «ពេលវេលាវាខ្លីណាស់» ជិតផុតហើយនោះ វារឹតតែខំខ្លាំងជាងពីមុនទៅទៀតក្នុងការបញ្ឈប់មនុស្សលោកកុំឲ្យបម្រើព្រះ។ វាចង់យកមនុស្សជាច្រើន ដែលវាអាចយកទៅបាន ឲ្យចូលទៅក្នុងសេចក្ដីមហន្តរាយជាមួយនឹងវា។ ដោយមានមូលហេតុដ៏ត្រឹមត្រូវ ព្រះគម្ពីរបានពណ៌នាអំពីវា ដូចជាសិង្ហដែលគ្រហឹមស្វែងរកត្របាក់អ្នកណាម្នាក់។ (ពេត្រុសទី១ ៥:៨, ៩) ប្រសិនបើយើងមិនចង់ឲ្យវាចាប់យកយើងទេនោះ យើងត្រូវតែរៀនជាចាំបាច់អំពីរបៀបដែលវាវាយលុក ហើយអំពីវិធីណាខ្លះដែលវាដឹកនាំមនុស្សលោកឲ្យវង្វេងចេញនោះ។—កូរិនថូសទី២ ២:១១
របៀបដែលសាតាំងធ្វើឲ្យមនុស្សលោកវង្វេងចេញ
២០ (ក) តើការវាយលុករបស់សាតាំងបានជោគជ័យយ៉ាងណាហើយ? (ខ) ហេតុអ្វីក៏យើងអាចឃើញថា កលល្បិចរបស់វាហាក់ដូចជាគ្មានគ្រោះថ្នាក់ទេ រហូតដល់ទៅគិតឃើញថានឹងបានផលប្រយោជន៍ទៀតផងនោះ?
២០ សូមកុំគិតថា មធ្យោបាយដែលសាតាំងប្រើដើម្បីដឹកនាំមនុស្សឲ្យដើរតាមវាតែងតែស្រួលមើលឃើញនោះឡើយ។ វាជាមេជំនាញក្នុងការធ្វើឲ្យមនុស្សលោកវង្វេងចេញ។ មធ្យោបាយដែលវាបានប្រើរាប់ពាន់ឆ្នាំមកហើយនោះ ឃើញថាប៉ិនប្រសប់ដល់ម្ល៉េះបានជាសព្វថ្ងៃនេះ មនុស្សភាគច្រើនរហូតដល់ទៅមិនជឿថាមានវាទៀត។ ចំពោះពួកគេ អំពើកំណាចនិងអំពើអាក្រក់ ជាស្ថានភាពធម្មតាដែលតែងតែធ្លាប់មានមក ហើយនឹងមានតទៅទៀតជានិច្ច។ សាតាំងធ្វើប្រតិបត្ដិការរបស់វាដូចគ្នានឹងពួកមេឧក្រិដ្ឋជនដែរ ដែលអាការខាងក្រៅមើលទៅគួរឲ្យគោរព ប៉ុន្តែនៅក្រោយវិការដ្ឋាន គេប្រព្រឹត្តអំពើអាក្រក់ជួជាតិវិញ។ ព្រះគម្ពីរបានពន្យល់ថា៖ «សាតាំងក៏ក្លែងខ្លួនធ្វើជាទេវតានៃពន្លឺ»។ (កូរិនថូសទី២ ១១:១៤) ដូច្នេះហើយ យើងអាចឃើញថា កលល្បិចរបស់វាដើម្បីធ្វើឲ្យមនុស្សវង្វេងចេញ មើលទៅហាក់ដូចជាគ្មានគ្រោះថ្នាក់ទេ រហូតដល់ទៅគិតឃើញថានឹងបានផលប្រយោជន៍ទៀតផង។
២១ តើផែនការមួយណាដែលសាតាំងបានប្រើ?
២១ សូមនឹកឡើងវិញ អំពីសាតាំងដែលតាំងខ្លួនជាមិត្តរបស់នាងអេវ៉ា។ បន្ទាប់មកវាបានបំភាន់នាងឲ្យប្រព្រឹត្តអ្វីដែលនាងបានគិតថាជាផលប្រយោជន៍ល្អចំពោះនាង។ (លោកុប្បត្តិ ៣:៤-៦) សព្វថ្ងៃនេះក៏ដូចគ្នាដែរ។ ឧទាហរណ៍ តាមរយៈពួកមនុស្សជាអ្នកតំណាងរបស់វា សាតាំងបានកំឡាចិត្តមនុស្សលោកយ៉ាងប្រសប់ ឲ្យយកចិត្តទុកដាក់ដល់រដ្ឋាភិបាលរបស់មនុស្សជាងការបម្រើព្រះទៅវិញ។ ការនេះបានបង្កើតនូវគំនិតជាតិនិយម ដែលបណ្ដាលឲ្យមានសង្គ្រាមយ៉ាងឃោរឃៅជាលទ្ធផល។ នៅពេលថ្មីៗនេះ សាតាំងបានដឹកនាំមនុស្សលោកឲ្យបង្កើតនូវផែនការផ្សេងៗជាច្រើនក្នុងការស្វែងរកសន្ដិភាពនិងសន្ដិសុខ។ ផែនការមួយក្នុងចំណោមនោះគឺជា អង្គការសហប្រជាជាតិ។ ប៉ុន្តែ តើអង្គការនេះ បានធ្វើឲ្យពិភពលោកពោរពេញទៅដោយសន្ដិភាពទេ? មិនមែនទេ! ផ្ទុយទៅវិញ នេះបានសម្ដែងឲ្យឃើញថា ជាមធ្យោបាយមួយដើម្បីបំបែរស្មារតីមនុស្សលោក ឲ្យងាកចេញពីការរៀបចំរបស់ព្រះ ក្នុងការផ្ដល់សន្ដិភាពដល់មនុស្សលោក តាមរយៈព្រះរាជាណាចក្ររបស់ទ្រង់ខាងមុខនេះ ដែលស្ថិតនៅក្រោមព្រះយេស៊ូវគ្រីស្ទជា«ម្ចាស់នៃមេត្រីភាព»នោះ។—អេសាយ ៩:៦; ម៉ាថាយ ៦:៩, ១០
២២ តើតម្រិះវិជ្ជាអ្វីដែលសាតាំងមិនចង់ឲ្យយើងទទួលយកនោះ?
២២ បើយើងចង់ទទួលជីវិតដ៏អស់កល្បជានិច្ចនោះ យើងត្រូវការជាចាំបាច់នូវតម្រិះវិជ្ជាដ៏ពិតអំពីព្រះ អំពីព្រះរាជបុត្រជាស្តេចរបស់ទ្រង់ និងអំពីរាជាណាចក្ររបស់ទ្រង់ដែរ។ (យ៉ូហាន ១៧:៣) លោកអ្នកអាចដឹងជាពិតប្រាកដថា អារក្សសាតាំងមិនចង់ឲ្យអ្នកទទួលនូវតម្រិះវិជ្ជានេះទេ ហើយវានឹងខំប្រឹងដោយអស់ពីសមត្ថភាពដើម្បីបញ្ឈប់លោកអ្នក។ តើវានឹងធ្វើតាមវិធីណាខ្លះ? វិធីមួយនោះ គឺធ្វើឲ្យអ្នកទទួលនូវការប្រឆាំងពីអ្នកដទៃ ប្រហែលជាសណ្ឋាននៃការសើចចំអក។ ព្រះគម្ពីរបានប្រាប់យើងថា៖ «ឯអស់អ្នកណាដែលចង់រស់ ដោយគោរពប្រតិបត្ដិដល់ព្រះគ្រីស្ទយេស៊ូវ នោះនឹងត្រូវមានសេចក្ដីបៀតបៀនដែរ»។—ធីម៉ូថេទី២ ៣:១២
២៣ (ក) តើរបៀបណាដែលសាតាំងអាចប្រើរហូតដល់មិត្តភក្ដិឬញាតិសន្ដានដើម្បីធ្វើឲ្យយើងស្រងាកចិត្តនោះ? (ខ) ហេតុអ្វីក៏អ្នកមិនត្រូវចុះចាញ់នឹងការប្រឆាំងនោះ?
២៣ ប្រហែលជាមិត្តភក្ដិដ៏ជិតស្និទ្ធ ឬក៏ញាតិសន្ដាននឹងប្រាប់អ្នកថា គេមិនចូលចិត្តអ្នកពិចារណាមើលព្រះគម្ពីរទេ។ សូម្បីតែព្រះយេស៊ូវទ្រង់ផ្ទាល់បានព្រមានថា៖ «ឯពួកសត្រូវរបស់អ្នកណា នោះគឺជាពួកអ្នកនៅផ្ទះជាមួយនឹងខ្លួននោះឯង អ្នកណាដែលស្រឡាញ់ឪពុក ឬម្ដាយជាជាងខ្ញុំ នោះមិនគួរនឹងខ្ញុំទេ ហើយអ្នកណាដែលស្រឡាញ់កូនប្រុស ឬកូនស្រីជាជាងខ្ញុំ នោះក៏មិនគួរនឹងខ្ញុំដែរ»។ (ម៉ាថាយ ១០:៣៦, ៣៧) ញាតិសន្ដានអាចព្យាយាមធ្វើឲ្យអ្នកស្រងាកចិត្តដោយគ្មានចេតនាអាក្រក់ ពីព្រោះពួកគេមិនដឹងនូវសេចក្ដីពិតដ៏អស្ចារ្យនៅក្នុងព្រះគម្ពីរទេ។ ប៉ុន្តែបើអ្នកបោះបង់ចោលនូវការសិក្សាបន្ទូលរបស់ព្រះ កាលណាមានការប្រឆាំងនោះ តើព្រះនឹងមានទស្សនៈយ៉ាងណាចំពោះអ្នក? ម្យ៉ាងទៀត បើសិនជាអ្នកលះបង់ចោលការសិក្សានោះ តើអ្នកអាចជួយមិត្តភក្ដិនិងអ្នកជាទីស្រឡាញ់របស់អ្នក ដើម្បីឲ្យគេយល់ថាតម្រិះវិជ្ជាដ៏ពិតនៃព្រះគម្ពីរជាការសំខាន់រហូតដល់ជីវិតនោះយ៉ាងណាបាន? កាលណាអ្នកកាន់បានខ្ជាប់ខ្ជួននឹងអ្វីៗដែលអ្នករៀនពីបន្ទូលព្រះ ប្រហែលក្រោយមក អ្នកអាចមានអានុភាពលើពួកគេឲ្យរៀនសេចក្ដីពិតនោះដែរ។
២៤ (ក) តើវិធីណាទៀត ដែលសាតាំងប្រើដើម្បីបញ្ឈប់មនុស្សលោកពីការទទួលនូវតម្រិះវិជ្ជាដែលផ្ដល់ជីវិតនេះ? (ខ) តើអ្នកគិតថា ការសិក្សាបន្ទូលរបស់ព្រះ ជាការសំខាន់យ៉ាងណាដែរ?
២៤ ម្យ៉ាងទៀត សាតាំងខ្លួនវាក៏អាចល្បួងអ្នកឲ្យមានចំណែកក្នុងអំពើអសីលធម៌ណាមួយដែរ ដែលជាទីមិនគាប់ព្រះហឫទ័យព្រះ។ (កូរិនថូសទី១ ៦:៩-១១) ឬក៏វាប្រហែលជានឹងធ្វើឲ្យអ្នកគិតថា អ្នកគ្មានពេលសិក្សាព្រះគម្ពីរទេ។ ប៉ុន្តែកាលណាលោកអ្នកគិតអំពីរឿងនេះទៅ តើអាចមានអ្វីណាទៀតដែលសំខាន់ជាងការទទួលនូវតម្រិះវិជ្ជាប្រភេទនេះទេ? សូមលោកអ្នកកុំបណ្ដោយឲ្យអ្វីមួយបញ្ឈប់អ្នក ពីការទទួលនូវតម្រិះវិជ្ជាដែលអាចនាំអ្នកឲ្យទទួលជីវិតដ៏អស់កល្បជានិច្ច ក្នុងសួនមនោរម្យនៅលើផែនដីឡើយ!
២៥ បើយើងខំប្រឆាំងនឹងអារក្សជារហូតនោះ តើវានឹងមិនអាចធ្វើអ្វីដល់យើង?
២៥ ព្រះគម្ពីរណែនាំយើងឲ្យ៖ «តស៊ូនឹងអារក្សវិញចុះ» បើអ្នកធ្វើដូចនេះ «នោះវានឹងរត់ចេញពីអ្នករាល់គ្នាទៅ»។ (យ៉ាកុប ៤:៧) តើនេះមានន័យថា កាលណាអ្នកទប់ទល់នឹងការវាយលុករបស់សាតាំង វានឹងលះបង់ចោល ហើយឈប់បង្កហេតុដល់អ្នកឬ? មិនមែនទេ វានឹងខំហើយខំទៀត ដើម្បីនាំអ្នកឲ្យធ្វើអ្វីតាមតែវាចង់។ ប៉ុន្តែ កាលណាអ្នកខំប្រឆាំងវាជានិច្ចនោះ វានឹងមិនអាចបណ្ដាលឲ្យអ្នកប្រព្រឹត្តអំពើអ្វីមួយដែលប្រឆាំងនឹងព្រះឡើយ។ ដូច្នេះហើយ សូមយកចិត្តទុកដាក់ក្នុងការយកតម្រិះវិជ្ជាដ៏សំខាន់បំផុតនៃព្រះគម្ពីរ ហើយអនុវត្តតាមអ្វីៗដែលអ្នកបានរៀនចុះ។ ដ្បិតនេះជាការសំខាន់ដល់ជីវិត ដើម្បីអាចបង្ការលោកអ្នកពីការបំភាន់នឹងកលល្បិចមួយទៀតរបស់សាតាំងដែលធ្វើឲ្យមនុស្សលោកវង្វេងចេញ គឺសាសនាមិនពិតនោះ។
[រូបភាពនៅទំព័រ១៦, ១៧]
តើសាតាំងអាចប្រគល់ឲ្យព្រះគ្រីស្ទនូវរដ្ឋាភិបាលនៃពិភពលោកទាំងអស់នេះបានទេ ប្រសិនបើនោះមិនមែនជារបស់ផងវា?
[រូបភាពនៅទំព័រ១៩]
ចោរនេះមិនបានកើតមកជាចោរទេ អារក្សក៏អញ្ចឹងដែរ មិនបានត្រូវបង្កើតមកជា«អារក្ស»ទេ
[រូបភាពនៅទំព័រ២០, ២១]
សង្គ្រាមនៅស្ថានសួគ៌បានបញ្ចប់ ដោយសាតាំងនិងព្រាយបិសាចរបស់វាបានត្រូវទម្លាក់មកលើផែនដី។ នៅសព្វថ្ងៃនេះ លោកអ្នកកំពុងតែមានការពិសោធន៍នូវឥទ្ធិពលទាំងនេះ
[រូបភាពនៅទំព័រ២៤]
អ្នកខ្លះប្រហែលជាប្រឆាំងនឹងអ្នក ដោយសារការបន្តការសិក្សាព្រះគម្ពីរ