មេរៀនទី១៥
ជួយអ្នកឯទៀតឲ្យធ្វើតាមព្រះហឫទ័យនៃព្រះ
ហេតុអ្វីអ្នកគួរប្រាប់អ្នកឯទៀតអំពីអ្វីៗដែលអ្នកកំពុងរៀន? (១)
តើអ្នកអាចនិយាយប្រាប់ដំណឹងល្អនេះដល់អ្នកណាខ្លះ? (២)
តើគំនិតមារយាទរបស់អ្នកអាចមានអនុភាពយ៉ាងណាលើអ្នកឯទៀត? (២)
តើពេលណាទើបអ្នកអាចផ្សាយប្រកាសជាមួយក្រុមជំនុំ? (៣)
១. មកដល់ពេលនេះ អ្នកបានរៀនរបស់ល្អជាច្រើនពីព្រះគម្ពីរហើយ។ ចំណេះនេះគួរនាំអ្នកឲ្យបណ្ដុះបុគ្គលិកលក្ខណៈគ្រីស្ទាន។ (អេភេសូរ ៤:២២-២៤) ចំណេះបែបនេះគឺសំខាន់ណាស់ ដើម្បីឲ្យអ្នកទទួលជីវិតអស់កល្បជានិច្ច។ (យ៉ូហាន ១៧:៣) ប៉ុន្តែ មានអ្នកឯទៀតដែរ ដែលត្រូវការដឹងឮនូវដំណឹងល្អនេះ ដើម្បីគេអាចទទួលសេចក្ដីសង្គ្រោះផង។ គ្រីស្ទានពិតទាំងអស់គ្នាត្រូវតែធ្វើបន្ទាល់ដល់អ្នកឯទៀត។ នេះគឺជាបញ្ជានៃព្រះ។—រ៉ូម ១០:១០; កូរិនថូសទី១ ៩:១៦; ធីម៉ូថេទី១ ៤:១៦
២. អ្នកអាចចាប់ផ្ដើមដោយនិយាយប្រាប់ពួកអ្នកដែលនៅជិតអ្នកអំពីរបស់ដ៏ល្អដែលអ្នកកំពុងរៀន។ ប្រាប់របស់ទាំងនេះដល់គ្រួសារ មិត្តភក្ដិ សិស្សរួមសាលា និងអ្នកធ្វើការជាមួយគ្នារបស់អ្នក។ សូមមានចិត្តសប្បុរសនិងអត់ធ្មត់ពេលអ្នកនិយាយប្រាប់ពួកគេ។ (ធីម៉ូថេទី២ ២:២៤, ២៥) សូមចាំថា មនុស្សតែងតែសម្គាល់មើលគំនិតមារយាទរបស់អ្នកណាមួយជាងស្ដាប់សំដីរបស់គាត់។ ដូច្នេះ គំនិតមារយាទរបស់អ្នកអាចទាក់ទាញមនុស្សឯទៀតឲ្យព្រមស្ដាប់ដំណឹងដែលអ្នកផ្សាយប្រកាសប្រាប់ពួកគេ។—ម៉ាថាយ ៥:១៦; ពេត្រុសទី១ ៣:១, ២, ១៦
៣. ក្រោយមក អ្នកប្រហែលមានគុណសម្បត្ដិគ្រប់គ្រាន់ដើម្បីចាប់ផ្ដើមផ្សាយប្រកាសជាមួយក្រុមជំនុំស្មរបន្ទាល់ព្រះយេហូវ៉ាក្នុងតំបន់អ្នក។ នេះជាជំហានដ៏សំខាន់មួយក្នុងការចំរើនលូតលាស់របស់អ្នក។ (ម៉ាថាយ ២៤:១៤) ជាការរីករាយម្ល៉េះហ្ន៎ បើអ្នកអាចជួយអ្នកផ្សេងទៀត ឲ្យក្លាយទៅជាអ្នកបំរើព្រះយេហូវ៉ា ហើយឲ្យគេទទួលជីវិតអស់កល្បជានិច្ចផង!—ថែស្សាឡូនីចទី១ ២:១៩, ២០