ជំពូកទី៦

គ្រូដ៏ល្អប្រសើរបម្រើអ្នកឯទៀត

ពេលមានអ្នកណាម្នាក់ធ្វើអ្វីមួយល្អចំពោះកូន តើកូនចូលចិត្តទេ?— អ្នកឯទៀតក៏ចូលចិត្តពេលមានអ្នកណាម្នាក់ធ្វើល្អចំពោះពួកគេដែរ។ យើងទាំងអស់គ្នាចូលចិត្ត។ គ្រូដ៏ល្អប្រសើរដឹងច្បាស់អំពីរឿងនេះ ហើយលោកតែងតែជួយអ្នកឯទៀត។ លោកបាននិយាយថា៖ ‹ខ្ញុំមិនបានមកដើម្បីឲ្យគេបម្រើខ្ញុំទេ តែបានមកដើម្បីបម្រើគេវិញ›។—ម៉ាថាយ ២០:២៨

លោកយេស៊ូឃើញអ្នកកាន់តាមពីរនាក់ឈ្លោះប្រកែកគ្នា — តើអ្នកកាន់តាមលោកយេស៊ូបានប្រកែកគ្នាអំពីរឿងអ្វី?

ដូច្នេះ បើយើងចង់ដូចគ្រូដ៏ល្អប្រសើរ តើយើងត្រូវធ្វើអ្វី?— យើងត្រូវតែបម្រើអ្នកឯទៀត។ យើងត្រូវធ្វើល្អចំពោះពួកគេ។ ការពិត មនុស្សជាច្រើនមិនធ្វើដូច្នេះទេ។ ផ្ទុយទៅវិញ ពួកគេតែងតែចង់ឲ្យអ្នកឯទៀតបម្រើពួកគេវិញ។ នៅពេលមួយ សូម្បីតែអ្នកកាន់តាមលោកយេស៊ូក៏មានអារម្មណ៍ដូចនោះដែរ។ ម្នាក់ៗចង់ធ្វើធំជាងគេ ឬសំខាន់ជាងគេបំផុត។

នៅថ្ងៃមួយ លោកយេស៊ូធ្វើដំណើរជាមួយអ្នកកាន់តាមលោក។ ក្រោយពេលពួកគាត់បានចូលក្រុងកាពើណិម ដែលនៅជិតសមុទ្រកាលីឡេ ពួកគាត់បានចូលទៅក្នុងផ្ទះមួយ។ នៅទីនោះលោកយេស៊ូបានសួរពួកគាត់ថា៖ «តើនៅតាមផ្លូវអ្នករាល់គ្នាបានប្រកែកគ្នាអំពីរឿងអ្វី?»។ ពួកគាត់នៅស្ងៀមពីព្រោះនៅតាមផ្លូវពួកគាត់បានប្រកែកគ្នាថាអ្នកណាធំជាងគេ។—ម៉ាកុស ៩:៣៣, ៣៤

លោកយេស៊ូដឹងថា គឺមិនត្រឹមត្រូវទេដែលអ្នកកាន់តាមលោកណាម្នាក់គិតថាខ្លួនគាត់ធំជាងគេ។ ដូចយើងបានរៀននៅជំពូកទី១ក្នុងសៀវភៅនេះ លោកឲ្យកូនតូចឈរនៅកណ្ដាលពួកអ្នកកាន់តាមលោក ហើយប្រាប់ពួកគាត់ថាត្រូវមានចិត្តរាបទាបដូចកូនតូចនោះ។ ប៉ុន្តែ ពួកគាត់នៅតែមិនទាញមេរៀនអំពីរឿងនោះ។ ដូច្នេះ មិនយូរប៉ុន្មានមុនលោកយេស៊ូស្លាប់ លោកបង្រៀនពួកគាត់នូវមេរៀនដែលពួកគាត់មិនអាចបំភ្លេចបាន។ តើលោកបានធ្វើអ្វី?—

ពេលលោកយេស៊ូនិងអ្នកកាន់តាមលោកមកជួបជុំគ្នាដើម្បីពិសាអាហារ លោកយេស៊ូបានក្រោកពីតុ ហើយដោះសម្លៀកបំពាក់ក្រៅចេញ។ រួចមក លោកយកកន្សែងមកក្រវាត់ចង្កេះ។ បន្ទាប់មក លោកចាក់ទឹកក្នុងចានក្លាំធំមួយ។ អ្នកកាន់តាមលោកប្រហែលជាឆ្ងល់ថា តើលោកចង់ធ្វើអ្វី? ពួកគាត់តាមមើលលោកយេស៊ូពេលលោកលុតជង្គង់លាងជើងពួកគាត់ម្នាក់ម្ដងៗ។ បន្ទាប់មក លោកយកកន្សែងមកជូតជើងពួកគាត់ឲ្យស្ងួត។ សូមគិតអំពីរឿងនោះ! ចុះយ៉ាងណាបើកូននៅទីនោះ? តើកូនមានអារម្មណ៍យ៉ាងណា?—

លោកយេស៊ូលាងជើងឲ្យពួកអ្នកកាន់តាមលោក — តើលោកយេស៊ូបានបង្រៀនអ្នកកាន់តាមលោកនូវមេរៀនអ្វី?

អ្នកកាន់តាមលោកគិតថាមិនត្រឹមត្រូវទេដែលគ្រូដ៏ល្អប្រសើរធ្វើកិច្ចការបែបនេះ។ ពួកគាត់មានអារម្មណ៍ខ្មាសលោកយេស៊ូ។ តាមពិតពេត្រុសមិនចង់ឲ្យលោកយេស៊ូធ្វើកិច្ចការរបស់អ្នកបម្រើទេ។ ប៉ុន្តែ លោកយេស៊ូបានប្រាប់ថាគឺសំខាន់ឲ្យលោកធ្វើកិច្ចការនោះ។

សព្វថ្ងៃនេះ យើងមិនមានទម្លាប់លាងជើងឲ្យអ្នកឯទៀតឡើយ។ ប៉ុន្តែ នេះជាទំនៀមទម្លាប់របស់ពួកគេពេលលោកយេស៊ូនៅផែនដី។ តើកូនដឹងមូលហេតុអ្វីទេ?— នៅកន្លែងដែលលោកយេស៊ូនិងអ្នកកាន់តាមលោករស់នៅ មនុស្សពាក់ស្បែកជើងសង្រែក។ ដូច្នេះ ពេលពួកគេដើរតាមផ្លូវដី ជើងពួកគេប្រឡាក់។ ម្ល៉ោះហើយ ពេលមានភ្ញៀវមកលេងផ្ទះ ពួកគេបង្ហាញការគួរសម ដោយលាងជើងឲ្យភ្ញៀវ។

ប៉ុន្តែ ពេលនេះគ្មានអ្នកកាន់តាមលោកយេស៊ូណាម្នាក់ដែលសុខចិត្តលាងជើងឲ្យគ្នាទេ។ ដូច្នេះ លោកយេស៊ូសុខចិត្តលាងជើងឲ្យពួកគាត់។ ដោយធ្វើដូច្នេះ លោកយេស៊ូបានបង្រៀនអ្នកកាន់តាមលោកនូវមេរៀនដ៏សំខាន់មួយ។ ពួកគាត់ត្រូវរៀនមេរៀននេះ។ ម្យ៉ាងទៀត នេះជាមេរៀនដែលយើងត្រូវរៀននៅសព្វថ្ងៃនេះដែរ។

តើកូនដឹងមេរៀននោះជាអ្វីទេ?— ក្រោយលោកយេស៊ូពាក់សម្លៀកបំពាក់ក្រៅ ហើយត្រឡប់ទៅអង្គុយនៅឯតុវិញ លោកពន្យល់ថា៖ «តើអ្នករាល់គ្នាយល់អ្វីដែលខ្ញុំបានធ្វើដល់អ្នករាល់គ្នាទេ? អ្នករាល់គ្នាហៅខ្ញុំ‹លោកគ្រូ›និង‹លោកម្ចាស់› ហើយជាការត្រឹមត្រូវដែលអ្នករាល់គ្នាហៅខ្ញុំដូច្នេះ ព្រោះខ្ញុំជាគ្រូនិងជាម្ចាស់មែន។ ដូច្នេះ ប្រសិនបើខ្ញុំបានលាងជើងរបស់អ្នករាល់គ្នា ទោះបីខ្ញុំជាម្ចាស់និងជាគ្រូក៏ដោយ នោះអ្នករាល់គ្នាក៏ត្រូវលាងជើងឲ្យគ្នាទៅវិញទៅមកដែរ»។—យ៉ូហាន ១៣:២-១៤

កូនក្មេងម្នាក់យកឆ្នាំងមួយឲ្យស្ដ្រីពីរនាក់រៀបចំធ្វើម្ហូប — តើកូនអាចធ្វើអ្វីដើម្បីជួយអ្នកឯទៀត?

គ្រូដ៏ល្អប្រសើរបានបង្ហាញថាលោកចង់ឲ្យអ្នកកាន់តាមលោកបម្រើគ្នាទៅវិញទៅមក។ លោកមិនចង់ឲ្យពួកគាត់គិតតែពីខ្លួនឯងឡើយ។ លោកមិនចង់ឲ្យពួកគាត់គិតថាខ្លួនសំខាន់ដល់ម្ល៉េះ ដែលអ្នកឯទៀតគួរតែបម្រើពួកគាត់ជានិច្ចនោះទេ។ លោកចង់ឲ្យពួកគាត់ស្ម័គ្រចិត្តបម្រើអ្នកឯទៀត។

នោះជាមេរៀនដ៏ល្អមួយ មែនទេ?— តើកូនចង់ធ្វើដូចគ្រូដ៏ល្អប្រសើរហើយចង់បម្រើមនុស្សឯទៀតទេ?— យើងទាំងអស់គ្នាអាចធ្វើល្អចំពោះមនុស្សឯទៀត។ នេះធ្វើឲ្យពួកគេសប្បាយចិត្ត។ ប៉ុន្តែអ្វីដែលសំខាន់បំផុត នេះនឹងធ្វើឲ្យលោកយេស៊ូនិងបិតារបស់លោករីករាយចិត្ត។

មិនមែនជាការពិបាកទេដើម្បីបម្រើមនុស្សឯទៀត។ បើកូនសង្កេតមើល នោះកូននឹងឃើញមានអ្វីជាច្រើនដែលកូនអាចជួយពួកគេ។ ឥឡូវសូមកូនគិតមើល តើមានអ្វីខ្លះដែលកូនអាចជួយម្ដាយរបស់កូនបាន? កូនដឹងហើយថា ម្ដាយធ្វើកិច្ចការច្រើនសម្រាប់កូននិងសម្រាប់អ្នកឯទៀតក្នុងក្រុមគ្រួសារ។ តើកូនអាចជួយគាត់បានទេ?— សូមកូនសួរគាត់។

កូនប្រហែលជាអាចជួយរៀបតុមុនពេលបរិភោគអាហារ ឬប្រហែលជាកូនអាចជូតតុក្រោយពេលបរិភោគអាហារដែរ។ រៀងរាល់ថ្ងៃ កូនខ្លះជួយបោសសម្អាតនិងជូតផ្ទះ។ មិនថាអ្វីក៏ដោយដែលកូនអាចធ្វើបាន នោះកូនកំពុងបម្រើអ្នកឯទៀតដូចលោកយេស៊ូហើយ។

តើកូនមានប្អូនៗដែលកូនអាចបម្រើបានទេ? សូមចាំថា សូម្បីតែលោកយេស៊ូដែលជាគ្រូដ៏ល្អប្រសើរក៏បានបម្រើអ្នកកាន់តាមលោកដែរ។ បើកូនជួយប្អូនៗ នោះកូនកំពុងធ្វើតាមគំរូរបស់លោកយេស៊ូ។ តើកូនអាចធ្វើអ្វីខ្លះសម្រាប់ប្អូនៗ?— កូនប្រហែលជាអាចជួយប្អូនៗឲ្យប្រមូលប្រដាប់ប្រដាលេងទៅដាក់នៅកន្លែងដើមវិញក្រោយពីប្អូនៗឈប់លេង។ កូនក៏អាចជួយប្អូនៗឲ្យចេះស្លៀកពាក់ឬចេះរៀបចំកន្លែងគេងដែរ។ តើកូនគិតថា នៅមានអ្វីទៀតដែលកូនអាចធ្វើសម្រាប់ប្អូនៗទេ?— ពេលកូនធ្វើដូច្នេះ ប្អូនៗនឹងស្រឡាញ់កូន ដូចអ្នកកាន់តាមលោកយេស៊ូបានស្រឡាញ់លោកដែរ។

នៅសាលារៀនកូនក៏អាចបម្រើអ្នកឯទៀតដែរ។ ប្រហែលជាកូនអាចជួយសិស្សរួមថ្នាក់ឬគ្រូរបស់កូន។ បើអ្នកណាម្នាក់ជ្រុះសៀវភៅ ហើយកូនជួយរើសឲ្យគេ នោះបង្ហាញថាកូនមានចិត្តល្អ។ កូនអាចសុំជួយលុបក្ដារខៀនឬធ្វើអ្វីផ្សេងទៀតសម្រាប់គ្រូរបស់កូន។ សូម្បីតែកូនជួយបើកទ្វារឲ្យអ្នកណាម្នាក់ ក៏ជាការជួយអ្នកឯទៀតដែរ។

ក្មេងប្រុសម្នាក់ជួយសម្អាតក្ដារខៀនឲ្យគ្រូរបស់គាត់ ក្មេងស្រីម្នាក់យកម្ហូបឲ្យស្ដ្រីម្នាក់ដែលអង្គុយលើរទេះរុញ

ជួនកាល យើងសង្កេតឃើញថាមនុស្សជាទូទៅមិនអរគុណយើងទេពេលយើងបម្រើពួកគេ។ តើកូនគិតថានេះធ្វើឲ្យយើងឈប់ធ្វើល្អឬ?— អត់ទេ! មនុស្សជាច្រើនក៏មិនបានអរគុណលោកយេស៊ូចំពោះកិច្ចការល្អរបស់លោកដែរ។ ប៉ុន្តែ នោះមិនបានធ្វើឲ្យលោកឈប់ធ្វើល្អឡើយ។

ដូច្នេះសូមកុំឈប់បម្រើមនុស្សឯទៀតឲ្យសោះ។ សូមនឹកចាំអំពីលោកយេស៊ូដែលជាគ្រូដ៏ល្អប្រសើរ ហើយព្យាយាមធ្វើតាមគំរូរបស់លោកជានិច្ច។

បទគម្ពីរឯទៀតអំពីការជួយអ្នកដទៃមាន សុភាសិត ៣:២៧, ២៨ រ៉ូម ១៥:១, ២ និងកាឡាទី ៦:២។