ជំពូកទី៣២
តើព្រះបានការពារលោកយេស៊ូយ៉ាងដូចម្ដេច?
ពេលខ្លះព្រះយេហូវ៉ាធ្វើអ្វីមួយតាមរបៀបអស្ចារ្យដើម្បីការពារកូនក្មេងដែលមិនអាចការពារខ្លួនបាន។ បើកូនដើរលេងនៅជនបទ កូនប្រហែលជាឃើញរបៀបមួយដែលព្រះយេហូវ៉ាធ្វើដូច្នេះ។ ក៏ប៉ុន្តែ ពេលកូនឃើញភ្លាម កូនប្រហែលជាមិនយល់អ្វីដែលកំពុងកើតឡើងនោះទេ។
ឧបមាថា ថ្ងៃមួយកូនឃើញសត្វស្លាបមួយហោះចុះមកជិតកូន។ វាមើលទៅដូចជាមានរបួសស្លាប។ ពេលកូនខំចូលទៅជិត វាដើរចេញដោយអូសស្លាបម្ខាង។ រាល់ដងពេលកូនដើរចូលបន្ដិច វាដើរចេញបន្ដិចដែរ។ បន្ទាប់មក ស្រាប់តែសត្វស្លាបនោះហោះទៅ។ ស្លាបវាគ្មានរបួសទេ! តើកូនដឹងថាសត្វស្លាបនោះកំពុងធ្វើអ្វីទេ?—
ការពិត មេសត្វស្លាបនោះខ្លាចថា កូននឹងឃើញហើយធ្វើបាបកូនរបស់វាដែលវាបានលាក់ក្នុងគុម្ពោត ដូច្នេះវាហោះចុះមកក្បែរកូន ហើយធ្វើពុតជារបួសដើម្បីនាំកូនចេញឲ្យឆ្ងាយពីកូនរបស់វា។ ដូចជាមេសត្វស្លាបនេះការពារកូនរបស់វា តើអ្នកណាអាចការពារយើង? តើកូនដឹងទេ?— ក្នុងគម្ពីរបានប្រដូចព្រះយេហូវ៉ាទៅនឹងសត្វឥន្ទ្រី ដោយសារឥន្ទ្រីចេះជួយកូនរបស់វា។—ចោទិយកថា ៣២:១១, ១២
តើមេសត្វស្លាបនេះកំពុងការពារកូនៗរបស់វាយ៉ាងដូចម្ដេច?
កូនដ៏វិសេសបំផុតនិងជាទីស្រឡាញ់របស់ព្រះយេហូវ៉ា គឺលោកយេស៊ូ។ ពេលលោកយេស៊ូនៅស្ថានសួគ៌ លោកជាបុគ្គលវិញ្ញាណដែលមានឫទ្ធានុភាពដ៏ខ្លាំងក្លាដូចបិតារបស់លោកដែរ ដូច្នេះ លោកអាចមើលថែខ្លួនបាន។ ក៏ប៉ុន្តែ ពេលដែលលោកយេស៊ូបានកើតជាកូនង៉ែតនៅផែនដី លោកមិនអាចជួយខ្លួនឯងបានទេ។ ដូច្នេះលោកត្រូវការអ្នកជួយការពារ។
ដើម្បីឲ្យលោកយេស៊ូសម្រេចតាមបំណងប្រាថ្នារបស់ព្រះដែលឲ្យលោកមកផែនដី លោកត្រូវធំឡើងនិងទៅជាបុរសពេញវ័យដ៏ល្អឥតខ្ចោះ។ ប៉ុន្តែ សាថានបានព្យាយាមសម្លាប់លោកយេស៊ូមុនពេលដែលលោកធំឡើង។ របៀបដែលសត្រូវប៉ុនប៉ងសម្លាប់លោកយេស៊ូពេលលោកនៅជាកុមារ និងរបៀបដែលព្រះយេហូវ៉ាបានការពារលោក គឺពិតជារឿងអស្ចារ្យណាស់។ តើកូនចង់ស្ដាប់រឿងនេះឬទេ?—
បន្ដិចក្រោយពីលោកយេស៊ូកើតមក សាថានបានធ្វើឲ្យមនុស្សឃើញអ្វីមួយដូចជាផ្កាយភ្លឺនៅតំបន់ខាងកើត។ ពួកអ្នកចេះហោរាសាស្ត្រដែលជាអ្នកសិក្សាអំពីផ្កាយ បានធ្វើដំណើរតាមផ្កាយនោះអស់រាប់រយគីឡូម៉ែតទៅក្រុងយេរូសាឡិម។ ពេលទៅដល់ទីនោះ ពួកគេបានសួរថា តើស្តេចនៃជនជាតិយូដាដែលទើបតែកើតមកនោះនៅឯណា? ពួកបុរសដែលស្គាល់ទំនាយក្នុងគម្ពីរឆ្លើយថា៖ «នៅភូមិបេថ្លេហិម»។—ម៉ាថាយ ២:១-៦
ក្រោយពីពួកអ្នកចេះហោរាសាស្ត្របានទៅជួបកុមារយេស៊ូ តើព្រះបានព្រមានពួកគេយ៉ាងណាដើម្បីសង្គ្រោះកុមារយេស៊ូ?
នៅគ្រានោះ ហេរ៉ូឌដែលជាស្តេចអាក្រក់កំពុងគ្រប់គ្រងនៅក្រុងយេរូសាឡិម។ ក្រោយពីហេរ៉ូឌឮថាមានស្តេចថ្មីដែលទើបតែកើតមកនៅបេថ្លេហិមដែលជាកន្លែងមួយនៅក្បែរនោះ គាត់ប្រាប់ដល់ពួកអ្នកចេះហោរាសាស្ត្រថា៖‹ចូរទៅស្វែងរកកូននោះ ហើយត្រឡប់មកវិញប្រាប់ខ្ញុំផង›។ ហេតុអ្វីហេរ៉ូឌចង់ដឹងកន្លែងដែលលោកយេស៊ូនៅ? តើកូនដឹងទេ?— នេះគឺដោយសារហេរ៉ូឌមានចិត្តច្រណែនហើយចង់សម្លាប់លោកយេស៊ូ!
តើព្រះបានការពារលោកយេស៊ូដែលជាកូនរបស់លោកយ៉ាងដូចម្ដេច?— ពេលពួកអ្នកចេះហោរាសាស្ត្របានរកឃើញលោកយេស៊ូ ពួកគេឲ្យអំណោយដល់លោក។ ក្រោយមក ព្រះបានព្រមានពួកគេតាមរយៈសុបិនមិនឲ្យត្រឡប់ទៅជួបហេរ៉ូឌវិញទេ។ ដូច្នេះ ពួកគេបានត្រឡប់ទៅស្រុកខ្លួន តាមផ្លូវផ្សេងវិញ។ ពេលហេរ៉ូឌដឹងថាពួកអ្នកចេះហោរាសាស្ត្របានត្រឡប់ទៅវិញហើយ គាត់ខឹងខ្លាំងណាស់។ ដូច្នេះដើម្បីសម្លាប់លោកយេស៊ូ ហេរ៉ូឌបានបង្គាប់ឲ្យគេសម្លាប់ក្មេងប្រុសទាំងអស់នៅបេថ្លេហិមដែលមានអាយុក្រោមពីរឆ្នាំ។ ប៉ុន្តែ នៅពេលនោះ លោកយេស៊ូមិនបាននៅទីនោះទេ។
តើលោកយេស៊ូបានគេចខ្លួនយ៉ាងដូចម្ដេច? តើកូនដឹងទេ?— ក្រោយពីពួកអ្នកចេះហោរាសាស្ត្របានត្រឡប់ទៅស្រុកវិញ ព្រះយេហូវ៉ាបានព្រមានយ៉ូសែបជាប្ដីនាងម៉ារៀ ឲ្យនាំក្រុមគ្រួសាររត់ទៅឲ្យឆ្ងាយដល់ស្រុកអេស៊ីប។ នៅទីនោះ លោកយេស៊ូបានរួចជីវិតពីការតាមសម្លាប់របស់ស្តេចហេរ៉ូឌដ៏អាក្រក់។ ប៉ុន្មានឆ្នាំក្រោយមក យ៉ូសែបនិងនាងម៉ារៀនាំលោកយេស៊ូចេញពីស្រុកអេស៊ីបត្រឡប់មកវិញ ពេលនោះព្រះព្រមានយ៉ូសែបម្ដងទៀត។ លោកបានប្រាប់គាត់តាមរយៈសុបិនមួយឲ្យពួកគាត់ទៅរស់នៅក្រុងណាសារ៉ែត ហើយនៅទីនោះលោកយេស៊ូនឹងមានសុវត្ថិភាព។—ម៉ាថាយ ២:៧-២៣
តើព្រះបានសង្គ្រោះកុមារយេស៊ូម្ដងទៀតយ៉ាងដូចម្ដេច?
តើកូនឃើញរបៀបដែលព្រះយេហូវ៉ាបានការពារកូនរបស់លោកទេ?— តើអ្នកណាប្រៀបដូចលោកយេស៊ូពេលនៅតូច ឬដូចជាកូនសត្វស្លាបដែលមេវាបានលាក់ក្នុងគុម្ពោត? គឺកូន មែនទេ?— នៅសព្វថ្ងៃនេះ ក៏មានអ្នកខ្លះចង់ធ្វើបាបកូនដែរ។ តើកូនដឹងថាជាអ្នកណាទេ?—
គម្ពីរប្រាប់ថា សាថានគឺប្រៀបដូចជាសត្វតោដែលកំពុងគ្រហឹមចង់ចាប់យើងស៊ីជាចំណី។ ដូចសត្វតោដែលច្រើនតែធ្វើបាបសត្វតូចៗ សាថាននិងពួកវិញ្ញាណកំណាចក៏ច្រើនតែធ្វើបាបកូនក្មេងដែរ។ (ពេត្រុសទី១ ៥:៨) ប៉ុន្តែ ព្រះយេហូវ៉ាខ្លាំងជាងសាថាន។ ព្រះយេហូវ៉ាអាចការពារកូនៗរបស់លោក ហើយបើមានអ្វីអាក្រក់កើតឡើងចំពោះពួកគេ លោកអាចធ្វើឲ្យអ្វីនោះល្អឡើងវិញបាន។
នៅជំពូកទី១០ក្នុងសៀវភៅនេះ យើងបានរៀនថាសាថាននិងពួកវិញ្ញាណកំណាចព្យាយាមល្បួងយើងឲ្យធ្វើអ្វីមួយ តើកូននៅចាំទេ?— មែនហើយ ពួកវាព្យាយាមល្បួងយើងឲ្យធ្វើខុសច្បាប់ព្រះ ដោយរួមភេទជាមួយអ្នកឯទៀត។ តើច្បាប់របស់ព្រះអនុញ្ញាតឲ្យអ្នកណាប៉ុណ្ណោះរួមភេទជាមួយគ្នា?— មែនហើយ មានតែប្រុសនិងស្រីដែលពេញវ័យ និងដែលបានរៀបការហើយប៉ុណ្ណោះ ទើបអាចរួមភេទបាន។
ប៉ុន្តែ គួរឲ្យសោកស្ដាយណាស់ ដែលមនុស្សពេញវ័យខ្លះចូលចិត្តរួមភេទជាមួយកុមារ។ ពេលពួកគេធ្វើដូចនោះ កុមាររងគ្រោះប្រហែលជាចាប់ផ្ដើមធ្វើអំពើប្រាសចាកសីលធម៌ដែលពួកគេបានរៀនពីមនុស្សពេញវ័យទាំងនោះ។ កុមារទាំងនោះក៏ចាប់ផ្ដើមប្រើប្រដាប់បន្តពូជរបស់ពួកគេតាមរបៀបមិនត្រឹមត្រូវដែរ។ នោះជាអ្វីដែលបានកើតឡើងតាំងពីយូរមកហើយ នៅក្រុងសូដុម។ គម្ពីរប្រាប់ថាមនុស្សនៅទីនោះ«ទាំងក្មេងទាំងចាស់» បានព្យាយាមរួមភេទជាមួយនឹងពួកបុរសដែលបានមកលេងផ្ទះឡុត។—លោកុប្បត្តិ ១៩:៤, ៥
កូនបានរៀនហើយថា លោកយេស៊ូត្រូវការអ្នកជួយការពារ ដូចគ្នាដែរ កូនត្រូវការអ្នកជួយការពារកូនពីអ្នកដែលចង់រួមភេទជាមួយនឹងកូន ទោះជាអ្នកនោះជាមនុស្សពេញវ័យឬក្មេងឯទៀតក៏ដោយ។ តាមធម្មតា មនុស្សទាំងនេះធ្វើពុតជាមិត្តភក្ដិរបស់កូន។ ពួកគេអាចរហូតដល់ឲ្យកូនអ្វីមួយ បើកូនសន្យាថាកុំប្រាប់អ្នកឯទៀតអំពីរឿងដែលពួកគេចង់រួមភេទជាមួយនឹងកូន។ ដូចសាថាននិងពួកវិញ្ញាណកំណាចរបស់វា មនុស្សទាំងនេះគិតតែប្រយោជន៍ផ្ទាល់ខ្លួន ហើយពួកគេគ្រាន់តែចង់ឲ្យខ្លួនសប្បាយប៉ុណ្ណោះ។ ម្យ៉ាងទៀត ពួកគេខំរកការសប្បាយបែបនេះ ដោយរួមភេទជាមួយកុមារ។ នេះជាការប្រព្រឹត្តដ៏អាក្រក់ណាស់!
តើពួកគេប្រហែលជាធ្វើអ្វីដើម្បីឲ្យខ្លួនបានសប្បាយ? តើកូនដឹងទេ?— ពួកគេប្រហែលជាព្យាយាមស្ទាបអង្អែលប្រដាប់បន្តពូជរបស់កូន ឬក៏ពួកគេរហូតដល់ដាក់ប្រដាប់បន្តពូជរបស់ពួកគេទៅលើប្រដាប់បន្តពូជរបស់កូនទៀតផង។ ប៉ុន្តែ កូនមិនគួរឲ្យអ្នកណាលេងប្រដាប់បន្តពូជរបស់កូនឡើយ ទោះជាបងប្អូនបង្កើត ឬឪពុក ឬម្ដាយរបស់កូនក៏ដោយ។
បើអ្នកណាម្នាក់ព្យាយាមប៉ះពាល់កូនតាមរបៀបមិនត្រឹមត្រូវ តើកូនគួរនិយាយអ្វី ហើយគួរធ្វើយ៉ាងណា?
តើកូនអាចការពាររាងកាយរបស់កូនពីមនុស្សដែលធ្វើអាក្រក់នេះយ៉ាងដូចម្ដេច?— សំខាន់បំផុត កុំឲ្យនរណាម្នាក់លេងប្រដាប់បន្តពូជរបស់កូនឲ្យសោះ។ បើអ្នកណាម្នាក់ព្យាយាមធ្វើដូចនេះ កូនត្រូវនិយាយខ្លាំងៗនិងម៉ឺងម៉ាត់ថា៖ «ឈប់ភ្លាម! ខ្ញុំនឹងប្រាប់គេអំពីអ្វីដែលអ្នកធ្វើ!»។ ណាមួយទៀត បើបុគ្គលនោះនិយាយថារឿងនេះគឺមកតែពីកូន កូនកុំជឿឲ្យសោះ។ អ្វីដែលគាត់និយាយគឺមិនពិតទេ។ ទោះជាបុគ្គលដែលធ្វើបាបកូនជាអ្នកណាក៏ដោយ កូនត្រូវតែទៅប្រាប់អ្នកឯទៀតឲ្យដឹងអំពីរឿងនោះកុំខាន! ម្យ៉ាងទៀត សូម្បីតែបុគ្គលនោះប្រាប់កូនថា នេះជារឿងសម្ងាត់រវាងគាត់និងកូនក៏ដោយ កូនក៏ត្រូវតែប្រាប់អ្នកឯទៀតឲ្យដឹងដែរ។ បន្ថែមទៅទៀត ទោះបើបុគ្គលនោះសន្យាថាឲ្យអំណោយល្អៗដល់កូន ឬគំរាមធ្វើបាបកូនក្ដី កូនត្រូវរត់ចេញពីគាត់ ហើយទៅប្រាប់អ្នកឯទៀតឲ្យដឹង។
កូនមិនចាំបាច់ខ្លាចទេ តែកូនត្រូវប្រុងប្រយ័ត្ន។ ពេលដែលឪពុកម្ដាយព្រមានកូនអំពីមនុស្សឬកន្លែងដែលអាចមានគ្រោះថ្នាក់ កូនត្រូវស្ដាប់តាមពួកគាត់។ បើកូនស្ដាប់តាម កូននឹងមិនឲ្យមនុស្សអាក្រក់ណាម្នាក់មានឱកាសធ្វើបាបកូននោះទេ។
សូមអានអំពីការការពារខ្លួនពីការប្រព្រឹត្តខុសឆ្គងណាដែលទាក់ទងនឹងការរួមភេទនៅ លោកុប្បត្តិ ៣៩:៧-១២ សុភាសិត ៤:១៤-១៦; ១៤:១៥, ១៦ កូរិនថូសទី១ ៦:១៨ និងពេត្រុសទី២ ២:១៤។