ការពន្យល់បន្ថែម
តើព្រះយេស៊ូបានប្រសូតនៅខែធ្នូឬទេ?
ព្រះគម្ពីរមិនចែងថាព្រះយេស៊ូបានប្រសូតនៅថ្ងៃណាខែណានោះទេ។ ក៏ប៉ុន្តែព្រះគម្ពីរផ្ដល់មូលហេតុត្រឹមត្រូវឲ្យសន្និដ្ឋានថា ទ្រង់មិនបានប្រសូតនៅខែធ្នូទេ។
សូមគិតអំពីអាកាសធាតុខែធ្នូនៅភូមិបេថ្លេហិម ដែលជាកន្លែងព្រះយេស៊ូបានប្រសូតនោះ។ ខែឈីស្លេជាខែសាសន៍យូដា (ចាប់ពីចុងខែវិច្ឆិកាទៅដល់ដើមខែធ្នូ)។ ខែឈីស្លេមានអាកាសធាតុត្រជាក់ហើយជាខែភ្លៀងផង។ ខែបន្ទាប់ពីនោះគឺខែថេបិត (ចាប់ពីចុងខែធ្នូទៅដល់ដើមខែមករា)។ ខែនោះមានអាកាសធាតុត្រជាក់បំផុត ហើយជួនកាលនៅតំបន់ភ្នំក៏ធ្លាក់ទឹកកកទៀតផង។ សូមមើលអ្វីដែលព្រះគម្ពីរចែងអំពីអាកាសធាតុនៅតំបន់បេថ្លេហិម។
អែសរ៉ា អ្នកសរសេរព្រះគម្ពីរម្នាក់បានឲ្យដឹងថា ខែឈីស្លេពិតជាខែត្រជាក់និងខែភ្លៀងមែន។ អែសរ៉ារៀបរាប់ថា មនុស្សមួយហ្វូងបានជួបជុំគ្នានៅឯទីក្រុងយេរូសាឡិមនា«ថ្ងៃ២០ខែមិគសិរ[ខែឈីស្លេរបស់សាសន៍យូដា]» ហើយប្រជាជនកំពុងតែ«ញ័រ . . . ដោយព្រោះភ្លៀងធំ»។ ស្តីអំពីអាកាសធាតុនៅខែនោះ ប្រជាជនដែលបានជុំគ្នានៅទីនោះប្រាប់ថា៖ «នេះជារដូវភ្លៀងច្រើនផង យើងខ្ញុំឈរនៅខាងក្រៅពុំបានទេ»។ (អែសរ៉ា ១០:៩, ១៣; យេរេមា ៣៦:២២) ហេតុនេះពុំមែនជាការចម្លែកអ្វីឡើយដែលអ្នកគង្វាលនៅប្រទេសនោះទាំងហ្វូងសត្វរបស់ពួកគេ មិនបាននៅខាងក្រៅពេលយប់នៅខែធ្នូទេ!
ក៏ប៉ុន្តែព្រះគម្ពីររៀបរាប់ថា នៅយប់ដែលព្រះយេស៊ូប្រសូតនោះ ពួកអ្នកគង្វាលកំពុងតែថែហ្វូងសត្វនៅឯវាល។ តាមពិតលូកា អ្នកសរសេរព្រះគម្ពីរម្នាក់បានរៀបរាប់ថា អ្នកគង្វាលកំពុងតែ«ចាំយាម រក្សាហ្វូងចៀមរបស់ខ្លួន នៅឯវាលក្នុងវេលាយប់»នៅជិតភូមិបេថ្លេហិម។ (លូកា ២:៨-១២) សូមកត់សម្គាល់ថាពួកអ្នកគង្វាលកំពុងតែចាំយាមនៅឯវាល មិនមែនត្រឹមតែដើរអើតមើលហ្វូងសត្វម្ដងៗនៅថ្ងៃនោះទេ។ ហ្វូងសត្វរបស់ពួកគេនៅឯវាលនៅវេលាយប់។ តើស្ដាប់ទៅដូចជានោះបានកើតឡើងនៅភូមិបេថ្លេហិមក្នុងកំលុងខែធ្នូ ដែលជាខែត្រជាក់ហើយភ្លៀងទេ? មិនមែនទេ! ដូច្នេះព័ត៌មាននោះបានជួយឲ្យយើងដឹងថាព្រះយេស៊ូមិនបានប្រសូតនៅខែធ្នូឡើយ។a
ព្រះបន្ទូលរបស់ព្រះចែងយ៉ាងច្បាស់អំពីពេលដែលព្រះយេស៊ូបានសោយទិវង្គត តែមិនសូវឲ្យដឹងថាទ្រង់បានប្រសូតនៅពេលណាឡើយ។ នេះនាំឲ្យចាំអំពីបន្ទូលស្តេចសាឡូម៉ូនដែលថា៖ «នាមឈ្មោះល្អ នោះវិសេសជាងប្រេងក្រអូបដ៏មានដំឡៃ ហើយថ្ងៃមរណៈក៏វិសេសជាងថ្ងៃកើតដែរ»។ (សាស្ដា ៧:១) ដូច្នេះគ្មានអ្វីចម្លែកឡើយដែលព្រះគម្ពីរប្រាប់យ៉ាងល្អិតល្អន់អំពីកិច្ចបំរើនិងការសោយទិវង្គតរបស់ព្រះយេស៊ូ តែមិនសូវរៀបរាប់អំពីពេលដែលទ្រង់ប្រសូតនោះទេ។
[កំណត់សម្គាល់]
a ដើម្បីអានព័ត៌មានថែមទៀត សូមមើលសៀវភៅជាភាសាអង់គ្លេសចំណងជើងថាការវែកញែកពីបទគម្ពីរ ទំព័រ១៧៦-១៧៩ (Reasoning From the Scriptures pages 176-9) បោះពុម្ពដោយស្មរបន្ទាល់ព្រះយេហូវ៉ា។
[រូបភាពនៅទំព័រ២៥៣]
នៅពេលដែលព្រះយេស៊ូប្រសូត ពួកអ្នកគង្វាលនិងហ្វូងសត្វរបស់ពួកគេនៅឯវាលពេលយប់