សេចក្ដីពន្យល់បន្ថែម
ធាតុដែលចម្រាញ់ចេញពីឈាម និងបច្ចេកទេសវះកាត់ផ្សេងៗ
ធាតុផ្សេងៗដែលចម្រាញ់ចេញពីសមាសធាតុសំខាន់ៗនៃឈាម។ ធាតុផ្សេងៗទាំងនេះបានត្រូវចម្រាញ់ចេញពីសមាសធាតុសំខាន់ៗនៃឈាម ពោលគឺគោលិកាក្រហម គោលិកាស ប្លាកែត និងប្លាស្មា។ ជាឧទាហរណ៍ គោលិកាក្រហមមានអេម៉ូក្លូប៊ីនឬជាតិក្រហមនៃឈាម។ ផលិតផលដែលកើតចេញពីអេម៉ូក្លូប៊ីនរបស់មនុស្សឬសត្វអាចត្រូវយកទៅប្រើដើម្បីព្យាបាលអ្នកជំងឺដែលខ្វះខ្លាំងនូវឈាមក្រហម (acute anemia) ឬបាត់បង់ឈាមច្រើន។
ប្លាស្មាដែល៩០ភាគរយជាទឹក ក៏មានធាតុជាច្រើនទៀតដែរ ដូចជាអ័រម៉ូន ជាតិអំបិលផ្សេងៗ (inorganic salts) អង់ស៊ីម (enzymes) និងសារធាតុចិញ្ចឹម ដែលក្នុងនោះមានធាតុរ៉ែនិងជាតិស្ករជាដើម។ នៅក្នុងប្លាស្មាមានសារធាតុដែលធ្វើឲ្យឈាមកក អង់ទីគ័រប្រឆាំងរោគ ហើយប្រូតេអ៊ីនផ្សេងៗដូចជាអាល់ប៊ុយមីនជាដើម។ បើមនុស្សម្នាក់ស្ថិតក្នុងស្ថានភាពដែលអាចឆ្លងជំងឺណាមួយ នោះវេជ្ជបណ្ឌិតប្រហែលជាបង្គាប់ឲ្យចាក់ហ្គាម៉ាគ្លោប៊ុយលិន (gamma globulin) ដែលចម្រាញ់ចេញពីប្លាស្មាក្នុងឈាមរបស់មនុស្សដែលស៊ាំនឹងជំងឺនោះ។ គេអាចចម្រាញ់អ៊ីនធឺហ្វីរ៉ុន (interferons) និងអ៊ីធឺលូគិន (interleukins) ចេញពីគោលិកាសក្នុងឈាម ដែលគេប្រើក្នុងការព្យាបាលជំងឺមហារីកប្រភេទខ្លះនិងជំងឺខ្លះដែលបណ្ដាលមកពីវីរុស។
តើគ្រិស្តសាសនិកគួរព្រមទទួលវិធីព្យាបាលដែលរួមបញ្ចូល ធាតុផ្សេងៗដែលចម្រាញ់ចេញពីឈាមឬទេ? គម្ពីរមិនបញ្ជាក់យ៉ាងល្អិតល្អន់អំពីរឿងនេះទេ ដូច្នេះគ្រិស្តសាសនិកម្នាក់ៗត្រូវធ្វើការសម្រេចចិត្តផ្ទាល់ខ្លួនដោយផ្អែកលើសមត្ថភាពវិនិច្ឆ័យរបស់ខ្លួននៅចំពោះព្រះ។ បងប្អូនខ្លះមិនព្រមទទួលធាតុទាំងអស់ដែលចម្រាញ់ចេញពីឈាមទេ ដោយសន្និដ្ឋានថា ច្បាប់ដែលព្រះឲ្យជនជាតិអ៊ីស្រាអែលថាត្រូវចាក់ឈាម«ចោលទៅដី»។ (ចោទិយកថា ១២:២២-២៤) បងប្អូនឯទៀតមិនព្រមទទួលការចាក់បញ្ចូលឈាមសុទ្ធឬសមាសធាតុសំខាន់ទាំងបួននៃឈាមទេ ប៉ុន្តែពួកគេប្រហែលជាព្រមទទួលការព្យាបាលដែលប្រើធាតុផ្សេងៗដែលចម្រាញ់ចេញពីឈាម។ ពួកគេប្រហែលជាសន្និដ្ឋានថា ពេលដែលគេចម្រាញ់ឈាមដល់ដំណាក់កាលមួយ នោះធាតុផ្សេងៗដែលចម្រាញ់ចេញពីឈាមនឹងលែងជាតំណាងជីវិតរបស់បុគ្គលឬសត្វដែលជាប្រភពឈាមនោះទៀត។
កាលណាអ្នកធ្វើការសម្រេចចិត្តស្តីអំពីធាតុផ្សេងៗដែលចម្រាញ់ចេញពីឈាម សូមពិចារណាសំណួរដូចតទៅនេះ: តើខ្ញុំទទួលស្គាល់ថាបើខ្ញុំបដិសេធមិនព្រមទទួលធាតុផ្សេងៗទាំងអស់ ដែលចម្រាញ់ចេញពីសមាសធាតុសំខាន់នៃឈាម នោះមានន័យថាខ្ញុំនឹងមិនព្រមទទួលឱសថខ្លះដែលប្រយុទ្ធនឹងវីរុស ជំងឺផ្សេងៗ ឬក៏ឱសថដែលធ្វើឲ្យឈាមកកដើម្បីបញ្ឈប់ការហូរឈាមឬទេ? តើខ្ញុំអាចពន្យល់គ្រូពេទ្យអំពីមូលហេតុដែលខ្ញុំព្រមទទួលឬមិនព្រមទទួលនូវធាតុណាមួយដែលចម្រាញ់ចេញពីសមាសធាតុសំខាន់នៃឈាមឬទេ?
បច្ចេកទេសវះកាត់។ នេះរួមបញ្ចូលវិធីវះកាត់ដែលប្រើបច្ចេកទេសបំបែរឈាមចូលក្នុងប្លោក ហើយចាក់បញ្ចូលសូលុយស្យុងទៅក្នុងខ្លួនអ្នកជំងឺជំនួសវិញ (hemodilution)។ ក្រោយមកឈាមដែលនៅក្នុងប្លោកនោះ ត្រូវបញ្ចូលមកក្នុងខ្លួនអ្នកជំងឺវិញ។ វិធីមួយទៀតគឺការបូមឈាមដែលហូរចេញក្នុងអំឡុងពេលវះកាត់ចូលក្នុងម៉ាស៊ីនច្រោះ រួចបើកបង្ហូរទៅក្នុងខ្លួនអ្នកជំងឺវិញ (cell salvage)។ ដោយសាររបៀបអនុវត្តវិធីព្យាបាលទាំងនេះគឺខុសគ្នារវាងគ្រូពេទ្យនីមួយៗ គ្រិស្តសាសនិកគួរសុំឲ្យគ្រូពេទ្យរបស់គាត់ពន្យល់ឲ្យបានច្បាស់អំពីវិធីព្យាបាលដែលគាត់បានស្នើ។
កាលណាអ្នកធ្វើការសម្រេចចិត្តអំពីវិធីព្យាបាលទាំងនេះ សូមសួរខ្លួនអ្នកនូវសំណួរដូចតទៅនេះ: ‹បើឈាមខ្លះរបស់ខ្ញុំត្រូវបំបែរឲ្យរត់តាមប្រព័ន្ធមួយក្រៅរូបកាយខ្ញុំ ហើយអាចឈប់នៅកន្លែងផ្សេងទៀតមួយរយៈពេលសិនមុននឹងចូលក្នុងរូបកាយខ្ញុំវិញ តើសមត្ថភាពវិនិច្ឆ័យរបស់ខ្ញុំនឹងឲ្យខ្ញុំចាត់ទុកថាឈាមនេះមិនចាំបាច់ចាក់«ចោលទៅដី» ពីព្រោះហាក់ដូចជានៅតែរត់តាមប្រព័ន្ធមួយទៀតនៃរូបកាយខ្ញុំដដែលឬទេ? (ចោទិយកថា ១២:២៣, ២៤) តើសមត្ថភាពវិនិច្ឆ័យរបស់ខ្ញុំដែលបានត្រូវអប់រំតាមគម្ពីរនឹងផ្ដន្ទាទោសខ្ញុំឬទេ បើក្នុងអំឡុងពេលព្យាបាល គេបូមឈាមខ្លះរបស់ខ្ញុំចេញដើម្បីដកឬបន្ថែមសារធាតុខ្លះរួចមកបើកបញ្ចូលក្នុងរូបកាយខ្ញុំវិញ? តើខ្ញុំដឹងថាបើខ្ញុំបដិសេធវិធីព្យាបាលទាំងអស់ដែលប្រើឈាមខ្ញុំផ្ទាល់មានន័យថាខ្ញុំបដិសេធការព្យាបាលដូចជា ការបូមឈាមយកទៅពិសោធ ការច្រោះឈាមដោយប្រើម៉ាស៊ីនជំនួសតម្រងនោម ឬការប្រើម៉ាស៊ីនដែលធ្វើការជំនួសបេះដូងនិងសួតក្នុងពេលវះកាត់ដើម្បីបំបែរឈាមចេញពីបេះដូងឬទេ?›។
គ្រិស្តសាសនិកម្នាក់ៗត្រូវសម្រេចចិត្តដោយខ្លួនឯងអំពីអ្វីដែលគាត់នឹងឲ្យគ្រូពេទ្យធ្វើចំពោះឈាមរបស់គាត់ក្នុងអំឡុងពេលវះកាត់។ គាត់ក៏ត្រូវធ្វើការសម្រេចចិត្តដោយខ្លួនឯងដែរចំពោះការបូមឈាមបន្ដិចបន្តួចយកទៅពិសោធឬបន្ថែមសារធាតុខ្លះ រួចបើកបញ្ចូលក្នុងរូបកាយវិញ។