ជំពូកទី២៣
តើតាមរបៀបណាខ្ញុំអាចពន្យល់ទស្សនៈក្នុងគម្ពីរអំពីការស្រឡាញ់ភេទដូចគ្នា?
នៅក្នុងកម្មវិធីប្រគល់ពានរង្វាន់មួយ តារាស្រីពីរដួងថើបគ្នាយ៉ាងផ្អែមល្ហែមនៅលើឆាក នោះបានធ្វើឲ្យទស្សនិកជនភ្ញាក់ផ្អើល ហើយស្រែកហ៊ោយ៉ាងកងរំពង! អស់អ្នកដែលស្រឡាញ់ភេទដូចគ្នាចាត់ទុកថា នេះគឺជាមោទនភាពខ្លាំងណាស់សម្រាប់ពួកគេ។ ចំណែកអ្នកខ្លះទៀតគិតថា នេះគ្រាន់តែជាការសម្ដែងដើម្បីទាក់ទាញចំណាប់អារម្មណ៍ប៉ុណ្ណោះ។ ប៉ុន្មានថ្ងៃក្រោយមក វីដេអូឃ្លីបដែលតារាស្រីទាំងពីរដួងនោះថើបគ្នា បានត្រូវចាក់ផ្សាយនៅលើកញ្ចក់ទូរទស្សន៍ម្ដងហើយម្ដងទៀត និងបានទាក់ទាញអ្នកទស្សនារាប់លាននាក់នៅលើបណ្ដាញអ៊ីនធឺណិត។
ដូចទិដ្ឋភាពដែលបានរៀបរាប់ខាងលើ ព័ត៌មានមួយចំនួនបានបង្កឲ្យមានភាពរំជើបរំជួល ដូចជានៅពេលដែលតារាល្បីម្នាក់និយាយបញ្ឆិតបញ្ឆៀង ឬនិយាយដោយបើកចំហថាខ្លួនជាខ្ទើយ ឬជាអ្នកស្រឡាញ់ភេទដូចគ្នា ឬថាខ្លួនអាចស្រឡាញ់ភេទមួយណាក៏បាន។ មនុស្សខ្លះកោតសរសើរថាតារាទាំងនោះមានចិត្តក្លាហាន រីឯមនុស្សខ្លះទៀតនិយាយថាតារាទាំងនោះគ្មានភាពអៀនខ្មាសសោះ។ ប៉ុន្តែ មនុស្សជាច្រើនទៀតគិតថានោះគ្មានអ្វីខុសទេ វាគ្រាន់តែជាការផ្លាស់ប្ដូររបៀបរស់នៅប៉ុណ្ណោះ។ ប្អូនដានីយ៉ែល អាយុ២១ឆ្នាំ និយាយថា៖ «ពេលខ្ញុំរៀននៅសាលា សូម្បីតែកូនសិស្សដែលមិនស្រឡាញ់ភេទដូចគ្នាក៏គិតថា បើអ្នកចាត់ទុកការស្រឡាញ់ភេទដូចគ្នាជារឿងមិនប្រក្រតី នោះអ្នកកំពុងមានការរើសអើង និងមានចិត្តចង្អៀតចង្អល់»។
ផ្នត់គំនិតអំពីការស្រឡាញ់ភេទដូចគ្នា ប្រហែលជាខុសគ្នាពីជំនាន់មួយទៅជំនាន់មួយ ឬពីប្រទេសមួយទៅប្រទេសមួយ។ ប៉ុន្តែ សម្រាប់គ្រិស្តសាសនិកមិនត្រូវ«បក់ផាត់ទៅនេះទៅនោះដោយខ្យល់នៃសេចក្ដីបង្រៀនគ្រប់បែបយ៉ាង»ឡើយ។ (អេភេសូរ ៤:១៤) ផ្ទុយទៅវិញ ពួកគេត្រូវធ្វើតាមគោលការណ៍គម្ពីរយ៉ាងដិតដល់។
តើគម្ពីរមានទស្សនៈយ៉ាងណាអំពីការស្រឡាញ់ភេទដូចគ្នា? បើប្អូនកំពុងរស់នៅស្របតាមខ្នាតតម្រាសីលធម៌ក្នុងគម្ពីរ តើប្អូនអាចពន្យល់យ៉ាងណាចំពោះអស់អ្នកដែលនិយាយថាប្អូនជាមនុស្សរើសអើង ចង្អៀតចង្អល់ ឬមិនចេះយោគយល់ចំពោះអ្នកដែលស្រឡាញ់ភេទដូចគ្នា? សូមពិចារណាសំណួរមួយចំនួន និងពាក្យតបឆ្លើយដែរ។
«តើគម្ពីរចែងយ៉ាងណាអំពីការស្រឡាញ់ភេទដូចគ្នា?»
«គម្ពីរចែងយ៉ាងច្បាស់ថា ព្រះអនុញ្ញាតឲ្យមានការរួមភេទរវាងតែបុរសនិងស្ត្រីដែលបានរៀបការប៉ុណ្ណោះ។ (ដើមកំណើត ១:២៧, ២៨; ច្បាប់លេវី ១៨:២២; សុភាសិត ៥:១៨, ១៩) ពេលគម្ពីរផ្ដន្ទាទោសអំពើប្រាសចាកសីលធម៌ខាងផ្លូវភេទ នេះរួមបញ្ចូលទាំងការរួមភេទជាមួយមនុស្សដែលមានភេទដូចគ្នា និងការរួមភេទជាមួយមនុស្សដែលមិនបានរៀបការតាមផ្លូវច្បាប់»។a—កាឡាទី ៥:១៩-២១
«តើប្អូនមានទស្សនៈយ៉ាងណាចំពោះការស្រឡាញ់ភេទដូចគ្នា?»
«ខ្ញុំមិនស្អប់មនុស្សដែលស្រឡាញ់ភេទដូចគ្នាទេ តែខ្ញុំមិនយល់ស្របនឹងការប្រព្រឹត្តរបស់ពួកគេ»។
សូមចាំថា៖ បើប្អូនធ្វើតាមខ្នាតតម្រាសីលធម៌ក្នុងគម្ពីរ នោះគឺជារបៀបរស់នៅដែលប្អូនបានជ្រើសរើស ដូច្នេះប្អូនមានសិទ្ធិធ្វើតាមជម្រើសរបស់ប្អូន។ (យ៉ូស្វេ ២៤:១៥) កុំខ្មាសនឹងគោលជំហររបស់ខ្លួនឡើយ។—ចម្រៀងសរសើរព្រះ ១១៩:៤៦
«តើគ្រិស្តសាសនិកគួរបង្ហាញការគោរពចំពោះមនុស្សទាំងអស់ មិនថាពួកគេមានទំនោរផ្លូវភេទបែបណាឬទេ?»
«ប្រាកដណាស់។ គម្ពីរចែងថា៖ ‹ចូរគោរពមនុស្សគ្រប់ប្រភេទ›។ (ពេត្រុសទី១ ២:១៧) ដូច្នេះ គ្រិស្តសាសនិកមិនរើសអើងមនុស្សដែលស្រឡាញ់ភេទដូចគ្នាឡើយ។ ពួកគេបង្ហាញចិត្តសប្បុរសចំពោះមនុស្សទាំងអស់ រួមទាំងមនុស្សខ្ទើយដែរ»។—ម៉ាថាយ ៧:១២
«តើទស្សនៈរបស់អ្នកចំពោះការស្រឡាញ់ភេទដូចគ្នាធ្វើឲ្យមានការរើសអើងប្រឆាំងមនុស្សដែលស្រឡាញ់ភេទដូចគ្នាឬទេ?»
«មិនដូច្នេះទាល់តែសោះ។ ខ្ញុំបដិសេធទង្វើស្រឡាញ់ភេទដូចគ្នា មិនមែនមនុស្សដែលស្រឡាញ់ភេទដូចគ្នាឡើយ»។
ប្អូនអាចនិយាយថែមទៀតថា៖ «ជាឧទាហរណ៍ ខ្ញុំមិនជក់បារី។ គ្រាន់តែគិតអំពីបារីធ្វើឲ្យខ្ញុំមានអារម្មណ៍មិនស្រួលសោះ។ ប៉ុន្តែ បើអ្នកជក់បារី អ្នកប្រហែលជាមានអារម្មណ៍ខុសគ្នា។ ខ្ញុំមិនរើសអើងអ្នកដោយសារអ្នកគិតបែបនោះទេ ហើយអ្នកក៏ប្រាកដជាមិនរើសអើងខ្ញុំដោយសារខ្ញុំគិតបែបនេះដែរ មែនទេ? នេះដូចគ្នាចំពោះទស្សនៈអំពីការស្រឡាញ់ភេទដូចគ្នា»។
«លោកយេស៊ូបង្រៀនយើងឲ្យបើកចិត្តទទួលយកមនុស្សគ្រប់ប្រភេទ។ បើដូច្នេះ អ្នកកាន់តាមលោកក៏គួរទទួលយកការស្រឡាញ់ភេទដូចគ្នាដែរ មែនទេ?»
«លោកយេស៊ូមិនបានលើកទឹកចិត្តពួកអ្នកកាន់តាមលោកឲ្យទទួលយករបៀបរស់នៅបែបណាក៏បាននោះឡើយ។ ផ្ទុយទៅវិញ លោកយេស៊ូបានបង្រៀនថា ផ្លូវដែលនាំទៅដល់សេចក្ដីសង្គ្រោះ គឺបើកចំហសម្រាប់‹អស់អ្នកដែលបង្ហាញជំនឿលើលោក›។ (យ៉ូហាន ៣:១៦) ការបង្ហាញជំនឿលើលោកយេស៊ូ រួមបញ្ចូលការរស់នៅស្របតាមខ្នាតតម្រាសីលធម៌របស់ព្រះ។ ព្រះបានហាមឃាត់ការប្រព្រឹត្តមួយចំនួន រួមទាំងការស្រឡាញ់ភេទដូចគ្នា»។—រ៉ូម ១:២៦, ២៧
«អារម្មណ៍ស្រឡាញ់ភេទដូចគ្នាគឺមិនអាចកែប្រែបានទេ ព្រោះវាមានតាំងពីកំណើតមក»
«គម្ពីរមិនមានការពន្យល់អំពីវេជ្ជសាស្ត្រនៃការស្រឡាញ់ភេទដូចគ្នាឡើយ។ ប៉ុន្តែ គម្ពីរទទួលស្គាល់ថាមានលក្ខណៈខ្លះបានចាក់ឫសយ៉ាងជ្រៅ។ (កូរិនថូសទី២ ១០:៤, ៥) ទោះជាមនុស្សខ្លះមានទំនោរចិត្តស្រឡាញ់ភេទដូចគ្នាក៏ដោយ គម្ពីរដាស់តឿនគ្រិស្តសាសនិកឲ្យជៀសឆ្ងាយពីការប្រព្រឹត្តបែបនោះ»។
យោបល់៖ ជាជាងជជែកតវ៉ាអំពីមូលហេតុដែលនាំឲ្យមានសេចក្ដីប៉ងប្រាថ្នាស្រឡាញ់ភេទដូចគ្នា សូមប្រាប់ពួកគេថាគម្ពីរហាមឃាត់ចំពោះទង្វើនៃការស្រឡាញ់ភេទដូចគ្នា។ ជាឧទាហរណ៍ ប្អូនអាចនិយាយថា៖ «មនុស្សជាច្រើនអះអាងថា អ្នកដែលប្រើអំពើហិង្សាគឺមកពីហ្សែនឬតំណពូជរបស់គាត់ នេះជាមូលហេតុដែលមនុស្សខ្លះមានទំនោរចិត្តធ្វើដូច្នោះ។ (សុភាសិត ២៩:២២) តើនេះជាការពិតទេ? អ្នកប្រហែលជាដឹងថា គម្ពីរផ្ដន្ទាទោសការផ្ទុះកំហឹង។ (ចម្រៀងសរសើរព្រះ ៣៧:៨; អេភេសូរ ៤:៣១) តើខ្នាតតម្រាក្នុងគម្ពីរមិនល្អដោយសារមានអ្នកខ្លះចូលចិត្តប្រើអំពើហិង្សាឬ?»។
«បើមនុស្សម្នាក់មានអារម្មណ៍ស្រឡាញ់ភេទដូចគ្នា ហេតុអ្វីបានជាព្រះហាមគាត់មិនឲ្យធ្វើដូច្នោះ? មើលទៅព្រះគ្មានចិត្តមេត្តាសោះ!»
«ការវែកញែកបែបនេះគឺកើតចេញពីការយល់ខុសថា មនុស្សត្រូវតែធ្វើតាមចំណង់ផ្លូវភេទរបស់ខ្លួន។ គម្ពីរបង្ហាញថាព្រះឲ្យកិត្តិយសដល់មនុស្ស លោកបានមានប្រសាសន៍ថា បើមនុស្សពិតជាចង់ ពួកគេអាចជ្រើសរើសមិនធ្វើតាមចំណង់ផ្លូវភេទមិនត្រឹមត្រូវរបស់ខ្លួនបាន»។—កូឡុស ៣:៥
«ទោះជាប្អូនមិនមែនស្រឡាញ់ភេទដូចគ្នាក៏ដោយ ប្អូនគួរផ្លាស់ប្ដូរទស្សនៈចំពោះការស្រឡាញ់ភេទដូចគ្នា»
«ឧទាហរណ៍ ខ្ញុំគិតថាការលេងល្បែងស៊ីសងគឺខុស តែអ្នកមិនគិតដូច្នោះឡើយ។ តើសមហេតុផលទេដែលអ្នកទាមទារឲ្យខ្ញុំផ្លាស់ប្ដូរទស្សនៈ ដោយសារអ្នកឃើញមនុស្សរាប់លាននាក់យល់ថាការលេងល្បែងស៊ីសងគឺគ្មានបញ្ហា?»។
សូមចាំថា៖ មនុស្សជាច្រើនរួមទាំងអ្នកដែលស្រឡាញ់ភេទដូចគ្នា ក៏មានរឿងខ្លះដែលពួកគេមិនចូលចិត្តដែរ ដូចជាការបោកបញ្ឆោត អំពើអយុត្តិធម៌ ឬសង្គ្រាម។ គម្ពីរហាមប្រាមចំពោះការប្រព្រឹត្តបែបនោះ ហើយក៏ផ្ដន្ទាទោសទង្វើផ្លូវភេទមួយចំនួន រួមទាំងការស្រឡាញ់ភេទដូចគ្នាជាដើម។—កូរិនថូសទី១ ៦:៩, ១០
គម្ពីរគឺសមហេតុសមផល ហើយក៏មិនលើកស្ទួយឲ្យមានការរើសអើងដែរ។ គម្ពីរផ្ដល់ដំបូន្មានដូចគ្នាដល់អ្នកដែលស្រឡាញ់ភេទដូចគ្នា និងអ្នកដែលស្រឡាញ់ភេទផ្ទុយគ្នាថា៖ «ចូររត់ចេញពីអំពើប្រាសចាកសីលធម៌ខាងផ្លូវភេទ!»។—កូរិនថូសទី១ ៦:១៨
ជាការពិតណាស់ មនុស្សរាប់លាននាក់ដែលស្រឡាញ់ភេទផ្ទុយ ក៏ព្យាយាមគ្រប់គ្រងអារម្មណ៍របស់ខ្លួនដែរ ពីព្រោះពួកគេចង់រស់នៅស្របតាមខ្នាតតម្រាក្នុងគម្ពីរ។ ក្នុងចំណោមពួកគេ មានអ្នកនៅលីវជាច្រើនដែលពិបាករកគូដើម្បីរៀបការ ហើយអ្នកខ្លះទៀតដែលបានរៀបការហើយ គូរបស់ខ្លួនបែរជាអសមត្ថភាពខាងផ្លូវភេទ។ ប៉ុន្តែ ពួកគេទាំងនោះនៅតែអាចរស់នៅដោយសប្បាយរីករាយ ទោះជាមិនអាចបំពេញតម្រូវការផ្លូវភេទរបស់ខ្លួនក្ដី។ ដូច្នេះ អស់អ្នកដែលមានទំនោរចិត្តស្រឡាញ់ភេទដូចគ្នាក៏អាចធ្វើដូចអ្នកទាំងនោះដែរ បើពួកគេពិតជាចង់ធ្វើឲ្យព្រះពេញចិត្ត។—ការបំភ្លឺច្បាប់ ៣០:១៩
សូមអានប្រធានបទនេះថែមទៀត ក្នុងជំពូកទី២៨ ក្បាលទី២
ក្មេងស្រីខ្លះជឿថា ការរួមភេទជាមួយសង្សារនឹងធ្វើឲ្យស្នេហាពួកគេកាន់តែស្អិតរមួត។ នោះជាការច្រឡំធំហើយ! សូមឲ្យយើងស្វែងយល់មូលហេតុ។
[កំណត់សម្គាល់]
a ក្នុងគម្ពីរ ពាក្យ«អំពើប្រាសចាកសីលធម៌ខាងផ្លូវភេទ»មិនគ្រាន់តែសំដៅលើការរួមភេទដែលមិនបានរៀបការប៉ុណ្ណោះទេ តែក៏សំដៅលើសកម្មភាពមួយចំនួន ដូចជាការរួមភេទតាមមាត់ ការរួមភេទតាមផ្លូវបាត និងការស្ទាបអង្អែលអវយវៈភេទរបស់អ្នកឯទៀតជាដើម។
បទគម្ពីរសំខាន់
«ដូច្នេះ ចូររម្ងាប់ភាពទោរទន់ដែលមាននៅក្នុងអវយវៈរូបកាយរបស់អ្នករាល់គ្នា គឺភាពទោរទន់ទៅរកអំពើប្រាសចាកសីលធម៌ខាងផ្លូវភេទ អំពើស្មោកគ្រោក ការមិនគ្រប់គ្រងលើចំណង់ផ្លូវភេទ សេចក្ដីប៉ងប្រាថ្នាអាក្រក់ និងការលោភលន់ដែលប្រៀបដូចជាការគោរពបូជារូបព្រះ»។—កូឡុស ៣:៥
យោបល់
បើទោះជាប្អូនមិនយល់ស្របចំពោះទង្វើរបស់អ្នកឯទៀតក្ដី សូមកុំរើសអើងឬមើលងាយពួកគេ ពីព្រោះដូចប្អូនដែរពួកគេមានសេរីភាពជ្រើសរើសផ្លូវរបស់ខ្លួន។
តើប្អូនដឹងទេ . . . ?
គ្រិស្តសាសនិកខ្លះនៅសតវត្សរ៍ទី១ដែលធ្លាប់ជាមនុស្សស្រឡាញ់ភេទដូចគ្នា ពួកគេអាចកែប្រែរបៀបរស់នៅមិនស្អាតស្អំរបស់ខ្លួនបាន ហើយព្រះបានចាត់ទុកពួកគេថា«បានត្រូវលាងសម្អាត»។—កូរិនថូសទី១ ៦:៩-១១
គម្រោងអនុវត្ត!
បើអ្នកណាម្នាក់និយាយថាទស្សនៈក្នុងគម្ពីរអំពីការស្រឡាញ់ភេទដូចគ្នាគឺហួសសម័យ នោះខ្ញុំនឹងតបវិញថា ․․․․․
ដើម្បីបញ្ជាក់ឲ្យច្បាស់ថា ខ្ញុំមិនយល់ស្របចំពោះទង្វើស្រឡាញ់ភេទដូចគ្នា តែខ្ញុំមិនស្អប់មនុស្សបែបនោះឡើយ នោះខ្ញុំនឹងនិយាយថា ․․․․․
អ្វីដែលខ្ញុំចង់សួរឪពុកម្ដាយរបស់ខ្ញុំអំពីរឿងនេះគឺ ․․․․․
តើប្អូនគិតយ៉ាងណា?
● ហេតុអ្វីព្រះមានសិទ្ធិកំណត់ខ្នាតតម្រាសីលធម៌សម្រាប់មនុស្ស?
● តើការធ្វើតាមខ្នាតតម្រាសីលធម៌ក្នុងគម្ពីរមានប្រយោជន៍អ្វីខ្លះ?
[ឃ្លាអក្សរធំនៅទំព័រ១៧០]
«ប្អូនអូប្រី ប្រាប់ថា៖ ‹ក្មេងប្រុសម្នាក់នៅសាលាធ្លាប់គិតថាខ្ញុំអាក្រក់ណាស់ ដោយសារខ្ញុំមិនយល់ស្របនឹងរបៀបរស់នៅរបស់គាត់។ ប៉ុន្តែ ខ្ញុំបានពន្យល់គាត់ថា ខ្ញុំមិនស្អប់គាត់ទេ តែខ្ញុំមិនទទួលយកអំពើប្រាសចាកសីលធម៌គ្រប់ប្រភេទ រួមទាំងការស្រឡាញ់ភេទដូចគ្នាដែរ។ ក្រោយមក គាត់ចាប់ផ្ដើមគោរពខ្ញុំ ហើយការពារខ្ញុំពេលខ្ញុំជួបបញ្ហា›»
[ប្រអប់នៅទំព័រ១៦៨]
ចុះបើស្រឡាញ់ទាំងពីរភេទ?
មានប្រុសនិងស្រីដែលស្រឡាញ់ទាំងពីរភេទ។ ប៉ុន្តែ តាមមើលទៅមានស្រីៗកាន់តែច្រើនមានចំណង់ចំណូលចិត្តបែបនេះ។ មូលហេតុខ្លះអាចមកពីការចង់ដឹងចង់ឃើញ។ នារីម្នាក់ឈ្មោះលីសា អាយុ២៦ឆ្នាំ ប្រាប់ថា៖ «នៅពេលមើលភាពយន្ត កម្មវិធីទូរទស្សន៍ ឬចម្រៀងវីដេអូដែលបង្ហាញពីស្រីៗថើបគ្នា នោះបានទាក់ទាញចិត្តយុវវ័យឲ្យចង់សាកល្បង ជាពិសេសបើពួកគេគិតថាវាមិនខុសទេ»។
សម្រាប់អ្នកខ្លះទៀត ហាក់ដូចជាចូលចិត្តភេទទាំងពីរ។ ក្មេងស្រីឈ្មោះវីកគី អាយុ១៣ឆ្នាំ និយាយថា៖ «ក្នុងពិធីជប់លៀងមួយ ខ្ញុំបានជួបក្មេងស្រីពីរនាក់។ រួចមក មិត្តម្នាក់បានប្រាប់ខ្ញុំថា ក្មេងស្រីពីរនាក់នោះចូលចិត្តខ្ញុំ។ បន្តិចម្ដងៗ ខ្ញុំចាប់ផ្ដើមផ្ញើសារទៅក្មេងស្រីម្នាក់ ហើយក៏កើតមានអារម្មណ៍ស្នេហាចំពោះនាង»។
តើប្អូនធ្លាប់មានអារម្មណ៍ដូចវីកគីទេ? មនុស្សជាច្រើនប្រហែលជានឹងប្រាប់ប្អូនថា‹បើអ្នកមានទំនោរស្រឡាញ់ភេទមួយណា អ្នកត្រូវបញ្ចេញឲ្យអ្នកឯទៀតដឹង›។ ក៏ប៉ុន្តែ ប្អូនគួរដឹងថាការទាក់ទាញឲ្យស្រឡាញ់ភេទដូចគ្នា ជាញឹកញយវាគ្រាន់តែជាអារម្មណ៍បណ្ដោះអាសន្នប៉ុណ្ណោះ។ នោះជាអ្វីដែលវីកគីបានជួបប្រទះ។ ដូចគ្នាដែរ ប្អូនស្រីឈ្មោះលីសេត អាយុ១៦ឆ្នាំ បានពោលថា៖ «គ្រាន់តែនិយាយប្រាប់ប៉ាម៉ាក់ខ្ញុំអំពីរឿងនោះ ខ្ញុំក៏មានអារម្មណ៍ប្រសើរឡើងវិញ។ បន្ថែមទៀត ពេលរៀនម៉ោងជីវវិទ្យា ខ្ញុំបានដឹងថាក្នុងវ័យជំទង់ កម្រិតអ័រម៉ូនប្រែប្រួលខ្លាំងខុសពីធម្មតា។ បើយុវវ័យមានចំណេះថែមទៀតពីរាងកាយរបស់ខ្លួន ពួកគេនឹងដឹងថាការទាក់ទាញឲ្យស្រឡាញ់ភេទដូចគ្នាគឺជាអារម្មណ៍តែមួយរយៈទេ។ ដូច្នេះ ពួកគេមិនចាំបាច់មានសម្ពាធថាខ្លួនត្រូវតែស្រឡាញ់ភេទដូចគ្នានោះឡើយ»។
ទោះជាប្អូនគិតថាប្អូនពិតជាចូលចិត្តភេទទាំងពីរយ៉ាងខ្លាំងក្ដី វាមិនមែនជាអារម្មណ៍ដែលនៅជាប់យូរទេ។ សូមជឿជាក់លើពាក្យដែលគម្ពីរធានាថា ប្អូនអាចធ្វើបាន គឺប្អូនអាចជ្រើសរើសមិនធ្វើតាមបំណងប្រាថ្នាខុសឆ្គងរបស់ខ្លួន។
[រូបភាពនៅទំព័រ១៦៩]
គ្រិស្តសាសនិកក្លាហានដើរចេញពីចំណោមមនុស្សដែលធ្វើតាមមតិដ៏ពេញនិយម