ខ្ញុំមានចិត្តលើមនុស្សភេទដូចខ្ញុំ តើនេះមានន័យថាខ្ញុំស្រឡាញ់ភេទដូចគ្នាឬ?
មិនមែនទេ!
ការពិត៖ ក្នុងករណីជាច្រើន ការមានចិត្តលើមនុស្សភេទដូចគ្នា គឺគ្រាន់តែមួយឆាវប៉ុណ្ណោះ។
ប្អូនស្រីលីសេតដែលមានអាយុ១៦ឆ្នាំ ធ្លាប់មានអារម្មណ៍ដូចនេះ។ នាងធ្លាប់មានចិត្តលើក្មេងស្រីម្នាក់។ នាងបានប្រាប់ថា៖«ពេលរៀនមុខវិជ្ជាជីវ ខ្ញុំបានដឹងថា ពេលដល់វ័យជំទង់កម្រិតអ័រម៉ូនក្នុងខ្លួនឡើងចុះខ្លាំង។ ដូច្នេះ ខ្ញុំជឿថាបើយុវវ័យយល់ដឹងច្បាស់ជាងអំពីការប្រែប្រួលនៃរូបកាយរបស់គេ នោះពួកគេនឹងមិនគិតថាការមានចិត្តលើភេទដូចគ្នាជាសញ្ញាសម្គាល់ថាពួកគេជាមនុស្សស្រឡាញ់ភេទដូចគ្នានោះទេ ព្រោះអារម្មណ៍បែបនោះមានតែមួយរយៈពេលខ្លីប៉ុណ្ណោះ»។
យុវវ័យទាំងអស់ត្រូវជ្រើសរើសថាធ្វើតាមទស្សនៈស្មោកគ្រោកក្នុងពិភពលោកនេះ ឬធ្វើតាមខ្នាតតម្រាខ្ពង់ខ្ពស់ខាងសីលធម៌ដែលមានក្នុងគម្ពីរ
ចុះបើអារម្មណ៍ដែលអ្នកមានលើមនុស្សដែលមានភេទដូចគ្នាហាក់ដូចជាមិនបាត់ទៅវិញ? តើព្រះគ្មានធម៌មេត្តាឬ ដែលហាមពួកអ្នកដែលមានអារម្មណ៍ដូចនោះ មិនឲ្យស្រឡាញ់មនុស្សភេទដូចគ្នា?
បើអ្នកឆ្លើយថាមែនចំពោះសំណួរចុងក្រោយ នោះមានន័យថាអ្នកឲ្យការវែកញែកដែលផ្អែកលើទស្សនៈមិនត្រឹមត្រូវរបស់មនុស្សមានឥទ្ធិពលមកលើអ្នកហើយ ពោលគឺបណ្ដោយតាមចំណង់ផ្លូវភេទរបស់ខ្លួន។ គម្ពីរផ្ដល់ការធានាថា មនុស្សអាចសម្រេចចិត្តមិនបណ្ដោយតាមចំណង់ផ្លូវភេទមិនត្រឹមត្រូវរបស់ខ្លួនបាន។—កូឡុស ៣:៥
ខ្នាតតម្រាក្នុងគម្ពីរគឺសមហេតុសមផល។ ខ្នាតតម្រានោះមិនគ្រាន់តែណែនាំអស់អ្នកដែលស្រឡាញ់មនុស្សភេទផ្ទុយគ្នាឲ្យ«រត់ចេញពីអំពើប្រាសចាកសីលធម៌ខាងផ្លូវភេទ»ប៉ុណ្ណោះទេ តែក៏លើកទឹកចិត្តអស់អ្នកដែលស្រឡាញ់ភេទដូចគ្នាឲ្យធ្វើដូច្នោះដែរ។ (កូរិនថូសទី១ ៦:១៨) តាមពិត មនុស្សរាប់លាននាក់ដែលស្រឡាញ់ភេទផ្ទុយគ្នា បានយកឈ្នះការល្បួងឲ្យប្រព្រឹត្តអំពើប្រាសចាកសីលធម៌ខាងផ្លូវភេទ ដោយធ្វើតាមខ្នាតតម្រាក្នុងគម្ពីរទាក់ទងនឹងការចេះទប់ចិត្ត។ ដូច្នេះ អស់អ្នកដែលមានទំនោរចិត្តស្រឡាញ់ភេទដូចគ្នា ក៏អាចធ្វើដូចគ្នាដែរបើពួកគេពិតចង់ធ្វើឲ្យព្រះពេញចិត្ត។—ការបំភ្លឺច្បាប់ ៣០:១៩