គំរូដែលគួរធ្វើតាម យ៉ាកុប
យ៉ាកុបនិងបងប្រុសគាត់ឈ្មោះអេសាវ មិនបាននិយាយរកគ្នាអស់រាប់ឆ្នាំ។ តាមពិត អេសាវស្អប់យ៉ាកុបណាស់។ ទោះជាយ៉ាកុបមិនបានធ្វើខុសក៏ដោយ យ៉ាកុបជាអ្នកចាត់វិធានការជាមុនដើម្បីត្រូវគ្នាជាមួយបងគាត់។ យ៉ាកុបបានលះបង់អ្វីជាច្រើន មិនមែនដោយសារចង់ឈ្នះចាញ់ជាមួយបងគាត់ឡើយ តែដោយសារគាត់ស្រឡាញ់បងរបស់គាត់។ យ៉ាកុបមិនបានបំពានគោលការណ៍របស់ព្រះទេ ហើយក៏មិនបានទាមទារឲ្យបងប្រុសសុំទោសគាត់ជាមុន ទើបផ្សះផ្សាគ្នាជាក្រោយនោះដែរ។—ដើមកំណើត ២៥:២៧-៣៤; ២៧:៣០-៤១; ៣២:៣-២២; ៣៣:១-៩
តើធម្មតាប្អូនធ្វើយ៉ាងណាពេលឈ្លោះគ្នាជាមួយអ្នកណាម្នាក់ក្នុងក្រុមគ្រួសារ? ពេលខ្លះប្អូនប្រហែលជាមានអារម្មណ៍ថាខ្លួនត្រូវ ហើយថាបងប្អូនឬឪពុកម្ដាយខុស។ ក្នុងករណីបែបនេះ តើប្អូនរង់ចាំឲ្យគាត់មកផ្សះផ្សាជាមុនទេ? ឬមួយប្អូនចង់ធ្វើដូចយ៉ាកុប? ពេលដែលមិនខុសនឹងគោលការណ៍គម្ពីរ តើប្អូនសុខចិត្តលះបង់ប្រយោជន៍ខ្លួនដើម្បីត្រូវគ្នាវិញទេ? (ពេត្រុសទី១ ៣:៨, ៩) យ៉ាកុបមិនយកអំណួតជាត្រីមុខដែលធ្វើឲ្យក្រុមគ្រួសារបែកបាក់គ្នាឡើយ។ គាត់បានបន្ទាបខ្លួន ដូច្នេះគាត់មានទំនាក់ទំនងល្អឡើងវិញជាមួយបងប្រុសគាត់។ តើប្អូនអាចធ្វើដូចយ៉ាកុបចំពោះក្រុមគ្រួសាររបស់ប្អូនដែរឬទេ?