មេរៀនទី៣
តើដំណឹងល្អនេះពិតជាមកពីព្រះមែនឬ?
១. តើអ្នកណាជាអ្នកនិពន្ធគម្ពីរបរិសុទ្ធ?
ក្នុងគម្ពីរបរិសុទ្ធមានដំណឹងល្អស្តីអំពីមនុស្សនឹងរស់ជារៀងរហូតនៅផែនដី។ (ទំនុកតម្កើង ៣៧:២៩) គម្ពីរបរិសុទ្ធមានសៀវភៅតូចៗចំនួន៦៦ក្បាល។ ព្រះបានប្រើមនុស្សស្មោះត្រង់ប្រហែល៤០នាក់ដើម្បីសរសេរគម្ពីរបរិសុទ្ធ។ ប្រហែល៣.៥០០ឆ្នាំមុន បុរសម្នាក់ឈ្មោះម៉ូសេបានសរសេរសៀវភៅប្រាំក្បាលដំបូងក្នុងគម្ពីរ ហើយជាង១.៩០០ឆ្នាំមុន សាវ័កយ៉ូហានបានសរសេរសៀវភៅចុងក្រោយ។ តើអ្នកសរសេរគម្ពីរបានសរសេរគំនិតរបស់អ្នកណា? ព្រះបានប្រើវិញ្ញាណឬសកម្មពលបរិសុទ្ធរបស់លោកដើម្បីទាក់ទងជាមួយនឹងអ្នកដែលសរសេរគម្ពីរ។ (សាំយូអែលទី២ ២៣:២) ពួកគេបានសរសេរគំនិតរបស់ព្រះ មិនមែនគំនិតរបស់ខ្លួនទេ។ ដូច្នេះអ្នកនិពន្ធគម្ពីរគឺព្រះយេហូវ៉ា។—សូមអាន ធីម៉ូថេទី២ ៣:១៦; ពេត្រុសទី២ ១:២០, ២១
សូមមើលវីដេអូ តើអ្នកណាជាអ្នកនិពន្ធគម្ពីរបរិសុទ្ធ?
២. ហេតុអ្វីយើងអាចប្រាកដថាគម្ពីរបរិសុទ្ធគឺមកពីព្រះ?
យើងដឹងថាគម្ពីរបរិសុទ្ធគឺមកពីព្រះ ដោយសារគម្ពីរបរិសុទ្ធបានទាយប្រាប់យ៉ាងល្អិតល្អន់និងយ៉ាងត្រឹមត្រូវអំពីអនាគត។ គ្មានមនុស្សណាម្នាក់អាចធ្វើកិច្ចការដូចនេះបានទេ។ (យ៉ូស្វេ ២៣:១៤) មានតែព្រះដែលមានឫទ្ធានុភាពខ្លាំងក្លាបំផុតប៉ុណ្ណោះ ដែលអាចទាយប្រាប់អំពីអនាគតរបស់មនុស្សជាតិបានយ៉ាងត្រឹមត្រូវ។—សូមអាន អេសាយ ៤២:៩; ៤៦:១០
បើគម្ពីរបរិសុទ្ធមកពីព្រះមែន នោះយើងរំពឹងថាគម្ពីរជាសៀវភៅពិសេសមួយ។ តាមពិត គម្ពីរគឺពិសេសមែន។ ព្រោះគម្ពីរបរិសុទ្ធបានត្រូវបោះពុម្ពរាប់ពាន់លានក្បាលនិងរាប់រយភាសា។ ទោះជាគម្ពីរបានត្រូវសរសេរនៅសម័យបុរាណក៏ពិតមែន តែគម្ពីរបរិសុទ្ធគឺស្របគ្នានឹងវិទ្យាសាស្ត្រដែលមានទីសម្អាងត្រឹមត្រូវ។ គម្ពីរបរិសុទ្ធបានត្រូវសរសេរដោយមនុស្សចំនួន៤០នាក់ តែគម្ពីរបរិសុទ្ធមានសាច់រឿងស្របគ្នា។ បន្ថែមទៅទៀត អ្វីដែលគម្ពីររៀបរាប់អំពីសេចក្ដីស្រឡាញ់បញ្ជាក់ច្បាស់ថាគម្ពីរមកពីព្រះពិតមែន។ គម្ពីរនៅតែមានឫទ្ធានុភាពជួយមនុស្សឲ្យកែប្រែរបៀបរស់នៅឲ្យកាន់តែប្រសើរជាង។ ហេតុការណ៍ពិតទាំងនេះធ្វើឲ្យមនុស្សរាប់លាននាក់ជឿជាក់ថា គម្ពីរជាបណ្ដាំរបស់ព្រះ។—សូមអាន ថែស្សាឡូនិចទី១ ២:១៣
សូមមើលវីដេអូ ហេតុអ្វីយើងអាចប្រាកដថាគម្ពីរបរិសុទ្ធគឺមកពីព្រះ?
៣. តើគម្ពីរបរិសុទ្ធរៀបរាប់អំពីអ្វី?
ដំណឹងល្អដែលសំខាន់បំផុតក្នុងគម្ពីរបរិសុទ្ធ គឺព្រះមានគោលបំណងចំពោះមនុស្សជាតិ។ គោលបំណងនោះបង្ហាញអំពីសេចក្ដីស្រឡាញ់របស់លោក។ បទគម្ពីររៀបរាប់អំពីរបៀបដែលមនុស្សដំបូងបានបាត់បង់ឯកសិទ្ធិរស់ជារៀងរហូតនៅផែនដីដែលជាសួនឧទ្យាន និងអំពីរបៀបដែលផែនដីនឹងក្លាយទៅជាសួនឧទ្យានម្ដងទៀត។—សូមអាន ការបើកបង្ហាញ ២១:៤, ៥
បណ្ដាំរបស់ព្រះមានចែងអំពីច្បាប់ និងដំបូន្មានជាច្រើន។ បន្ថែមទៅទៀត ក្នុងគម្ពីរក៏រៀបរាប់អំពីរបៀបដែលព្រះបានប្រព្រឹត្តទៅលើមនុស្សជាតិ។ តាមរយៈកំណត់ហេតុទាំងនេះ យើងអាចរៀនអំពីគុណសម្បត្ដិរបស់ព្រះ។ ដូច្នេះ គម្ពីរអាចជួយលោកអ្នកឲ្យស្គាល់ព្រះ។ គម្ពីរក៏ពន្យល់អំពីរបៀបដែលលោកអ្នកអាចធ្វើជាមិត្តសម្លាញ់របស់ព្រះដែរ។—សូមអាន ទំនុកតម្កើង ១៩:៧, ១១; យ៉ាកុប ២:២៣; ៤:៨
៤. តើលោកអ្នកអាចយល់អត្ថន័យក្នុងគម្ពីរយ៉ាងដូចម្ដេច?
សៀវភៅនេះនឹងជួយលោកអ្នកឲ្យយល់អត្ថន័យក្នុងគម្ពីរ ដោយប្រើវិធីដូចដែលលោកយេស៊ូធ្លាប់ប្រើ។ លោកបានលើកខគម្ពីរផ្សេងៗ ហើយពន្យល់«អត្ថន័យនៃបទគម្ពីរ»ទាំងនោះ។—សូមអាន លូកា ២៤:២៧, ៤៥
មិនសូវមានអ្វីដែលនាំឲ្យយើងរំភើបចិត្តខ្លាំងជាងការឮដំណឹងល្អពីព្រះឡើយ។ ប៉ុន្តែ មនុស្សខ្លះមិនចាប់អារម្មណ៍នឹងដំណឹងនោះទេ ហើយមនុស្សខ្លះទៀតបែរជាខឹងទៅវិញ។ ទោះជាយ៉ាងនោះក៏ដោយ កុំឲ្យប្រតិកម្មរបស់ពួកគេធ្វើឲ្យលោកអ្នកធ្លាក់ទឹកចិត្តឡើយ។ លោកអ្នកត្រូវស្គាល់ព្រះឲ្យបានច្បាស់ ទើបលោកអ្នកមានសេចក្ដីសង្ឃឹមទទួលជីវិតដែលគ្មានទីបញ្ចប់។—សូមអាន យ៉ូហាន ១៧:៣