មេរៀនទី៤
ចាយវាយដោយចេះគិត
«អស់ទាំងគំនិតដែលចង់ធ្វើ នោះបានសំរេចមែនទែន ដោយសារការប្រឹក្សាគ្នា»។—សុភាសិត ២០:១៨
យើងទាំងអស់គ្នាត្រូវការលុយដើម្បីផ្ដល់នូវអ្វីដែលក្រុមគ្រួសារយើងត្រូវការ។ (សុភាសិត ៣០:៨) ម្ល៉ោះហើយ លុយឬ‹ប្រាក់ជាគ្រឿងការពារខ្លួន›។ (សាស្ដា ៧:១២) ប្ដីប្រពន្ធប្រហែលជាពិបាកនិយាយគ្នាអំពីរឿងលុយកាក់ ទោះជាយ៉ាងនោះក៏ដោយ សូមកុំឲ្យរឿងលុយកាក់ធ្វើឲ្យមានបញ្ហាដល់អាពាហ៍ពិពាហ៍របស់អ្នកឡើយ។ (អេភេសូរ ៤:៣២) ដូច្នេះ ប្ដីប្រពន្ធគួរតែទុកចិត្តគ្នា ហើយសម្រេចចិត្តរួមគ្នាថា អ្នកទាំងពីរនឹងចាយវាយយ៉ាងណា។
១ គិតមុនគូរ
គម្ពីររៀបរាប់ថា: «ក្នុងចំណោមអ្នករាល់គ្នា បើចង់សង់ប៉មមួយ តើមានអ្នកណាមិនអង្គុយគិតគូរជាមុនសិនឲ្យដឹងថា ខ្លួនមានប្រាក់គ្រប់គ្រាន់ដើម្បីសង់ឲ្យបានរួចរាល់ឬទេ?»។ (លូកា ១៤:២៨) ជាការចាំបាច់ដែលអ្នកទាំងពីរត្រូវគិតជាមួយគ្នាថា អ្នកទាំងពីរនឹងប្រើប្រាស់លុយតាមរបៀបណា។ (អេម៉ុស ៣:៣) សូមសម្រេចថា អ្នកត្រូវទិញអ្វីខ្លះ ហើយលុយប៉ុន្មានដែលអ្នកអាចចំណាយបាន។ (សុភាសិត ៣១:១៦) សូម្បីតែអ្នកមានលុយគ្រប់គ្រាន់ដើម្បីទិញអ្វីណាមួយក៏ដោយ នេះមិនមានន័យថាអ្នកគួរតែទិញនោះទេ។ សូមព្យាយាមកុំឲ្យជំពាក់បំណុលគេ។ សូមចំណាយត្រឹមតែលុយដែលអ្នកមានប៉ុណ្ណោះ។—សុភាសិត ២១:៥; ២២:៧
សូមសាកធ្វើតាមយោបល់នេះ:
ក្រោយពីចំណាយទៅលើអ្វីដែលចាំបាច់រួចហើយ បើនៅសល់លុយខ្លះ សូមសម្រេចថាអ្នកទាំងពីរនឹងធ្វើយ៉ាងណាចំពោះលុយនោះ
បើអ្នកទាំងពីរមានការខ្វះខាត សូមរៀបចំគម្រោងចំណាយឲ្យបានច្បាស់លាស់ ដើម្បីកាត់បន្ថយការចំណាយណាដែលមិនចាំបាច់។ ជាឧទាហរណ៍ អ្នកអាចចម្អិនម្ហូបដោយខ្លួនឯងវិញ ជាជាងទៅញ៉ាំខាងក្រៅ
២ និយាយគ្នាដោយឥតលាក់លៀម និងមានទស្សនៈសមហេតុផល
គម្ពីររៀបរាប់ថា: «ចាត់ចែងកិច្ចការដោយទៀងត្រង់ មិនគ្រាន់តែនៅចំពោះមុខព្រះ តែនៅចំពោះមុខមនុស្សដែរ»។ (កូរិនថូសទី២ ៨:២១) សូមប្រាប់គូយ៉ាងស្មោះត្រង់ថា អ្នកមានចំណូលនិងចំណាយប៉ុន្មាន។
សូមពិគ្រោះជាមួយគូរបស់អ្នកជានិច្ច ពេលដែលអ្នកចង់សម្រេចចិត្តរឿងសំខាន់ ដែលទាក់ទងនឹងរឿងលុយកាក់។ (សុភាសិត ១៥:២២) បើអ្នកពិគ្រោះគ្នារឿងលុយកាក់ នោះនឹងជួយរក្សាសេចក្ដីសុខសាន្តក្នុងរង្វង់គ្រួសាររបស់អ្នក។ សូមចាត់ទុកលុយរបស់អ្នក ជាលុយរបស់គ្រួសារ មិនមែនជាលុយផ្ទាល់ខ្លួនរបស់អ្នកទេ។—ធីម៉ូថេទី១ ៥:៨
សូមសាកធ្វើតាមយោបល់នេះ:
សូមព្រមព្រៀងគ្នាកំណត់ចំនួនលុយដែលអ្នកទាំងពីរអាចចំណាយបាន ដោយមិនចាំបាច់ពិគ្រោះគ្នា
សូមកុំចាំដល់បញ្ហាកើតឡើង ទើបអ្នកទាំងពីរនិយាយគ្នាអំពីរឿងលុយកាក់