ជំពូកទី១៤
លោកយេស៊ូចាប់ផ្ដើមមានអ្នកកាន់តាម
អ្នកកាន់តាមដំបូងរបស់លោកយេស៊ូ
ក្រោយពីនៅតំបន់ស្ងាត់ជ្រងំអស់៤០ថ្ងៃ លោកយេស៊ូមិនទាន់ត្រឡប់ទៅស្រុកកាលីឡេវិញទេ តែលោកទៅជួបយ៉ូហានដែលបានជ្រមុជទឹកឲ្យលោក។ ពេលលោកយេស៊ូទៅដល់ យ៉ូហានចង្អុលប្រាប់អ្នកឯទៀត ហើយប្រកាសថា៖ «មើលហ្ន៎! កូនចៀមរបស់ព្រះ ដែលដកយកភាពខុសឆ្គងរបស់ពិភពលោកចេញ! គឺអំពីលោកហើយដែលខ្ញុំបាននិយាយថា ក្រោយខ្ញុំនឹងមានបុរសម្នាក់មកដែលបានទៅមុខខ្ញុំហើយ ពីព្រោះលោករស់នៅមុនខ្ញុំ»។ (យ៉ូហាន ១:២៩, ៣០) ទោះបីជាយ៉ូហានចាស់ជាងលោកយេស៊ូក៏ដោយ តែគាត់ដឹងថាលោកយេស៊ូធ្លាប់មានជីវិតជាបុគ្គលវិញ្ញាណនៅស្ថានសួគ៌ជាយូរយារមកហើយ។
ប៉ុន្មានសប្ដាហ៍មុននោះ ពេលដែលលោកយេស៊ូមកទទួលការជ្រមុជទឹក យ៉ូហានមិនបានដឹងច្បាស់ថាលោកយេស៊ូជាមេស្ស៊ីនោះទេ។ យ៉ូហានទទួលស្គាល់ថា៖ «សូម្បីតែខ្ញុំក៏មិនបានស្គាល់លោកដែរ ប៉ុន្តែមូលហេតុដែលខ្ញុំបានមកជ្រមុជគេក្នុងទឹក គឺដើម្បីឲ្យអ៊ីស្រាអែលអាចឃើញលោកជាចំហ»។—យ៉ូហាន ១:៣១
យ៉ូហានបន្តរៀបរាប់ប្រាប់អ្នកស្ដាប់អំពីអ្វីដែលបានកើតឡើង ពេលគាត់ជ្រមុជទឹកឲ្យលោកយេស៊ូ ដោយនិយាយថា៖ «ខ្ញុំបានឃើញសកម្មពលរបស់ព្រះចុះពីស្ថានសួគ៌ដូចជាសត្វព្រាប ហើយសណ្ឋិតនៅលើលោក។ សូម្បីតែខ្ញុំក៏មិនបានស្គាល់លោកដែរ ប៉ុន្តែព្រះដែលបានចាត់ខ្ញុំឲ្យមកជ្រមុជគេក្នុងទឹក បានមានប្រសាសន៍មកខ្ញុំថា៖ ‹អ្នកឃើញសកម្មពលរបស់ខ្ញុំចុះមកសណ្ឋិតនៅលើអ្នកណា គឺអ្នកនោះហើយជាអ្នកជ្រមុជគេក្នុងសកម្មពលបរិសុទ្ធរបស់ខ្ញុំ› ហើយខ្ញុំបានឃើញការនោះ ក៏បានធ្វើការបញ្ជាក់ថា លោកនោះហើយជាបុត្ររបស់ព្រះ»។—យ៉ូហាន ១:៣២-៣៤
នៅថ្ងៃបន្ទាប់ លោកយេស៊ូក៏បានទៅជួបយ៉ូហានម្ដងទៀត។ ពេលនោះ យ៉ូហានមានអ្នកកាន់តាមពីរនាក់នៅជាមួយ។ យ៉ូហាននិយាយថា៖ «មើលហ្ន៎! កូនចៀមរបស់ព្រះ!»។ (យ៉ូហាន ១:៣៦) ភ្លាមនោះ អ្នកកាន់តាមពីរនាក់របស់យ៉ូហាន ក៏ចាប់ផ្ដើមដើរតាមលោកយេស៊ូ។ អ្នកកាន់តាមម្នាក់ឈ្មោះអនទ្រេ ហើយតាមមើលទៅអ្នកកាន់តាមម្នាក់ទៀតជាអ្នកដែលបានកត់កំណត់ហេតុនេះ គាត់ឈ្មោះយ៉ូហាន។ យ៉ូហាននេះទំនងជាបងប្អូនជីដូនមួយរបស់លោកយេស៊ូ ពីព្រោះគាត់ជាកូនសាឡូមេ។ សាឡូមេប្រហែលជាបងប្អូនស្រីបង្កើតរបស់ម៉ារៀ ហើយប្ដីរបស់នាងឈ្មោះសេបេដេ។
ពេលលោកយេស៊ូបែរទៅឃើញអនទ្រេនិងយ៉ូហានកំពុងដើរតាមលោក នោះលោកក៏សួរពួកគេថា៖ «តើអ្នករាល់គ្នាកំពុងរកអ្វី?»។
ពួកគេសួរលោកថា៖ «រ៉ាប៊ី តើលោកស្នាក់នៅឯណា?»។
លោកយេស៊ូឆ្លើយថា៖ «ចូរមក ហើយអ្នកនឹងឃើញ»។—យ៉ូហាន ១:៣៧-៣៩
ពេលនោះប្រហែលជាម៉ោងបួនរសៀលហើយ តែអនទ្រេនិងយ៉ូហានបន្តនៅជាមួយនឹងលោកយេស៊ូ។ អនទ្រេរំភើបចិត្តខ្លាំងដល់ម្ល៉េះបានជាគាត់ទៅរកបងប្រុសរបស់គាត់ឈ្មោះស៊ីម៉ូន ដែលគេហៅថាពេត្រុស រួចប្រាប់ថា៖ «យើងរកឃើញមេស្ស៊ីហើយ»។ (យ៉ូហាន ១:៤១) អនទ្រេនាំពេត្រុសទៅជួបលោកយេស៊ូ។ ក្រោយមក យ៉ូហានក៏ទំនងជាបានទៅរកយ៉ាកុបដែលជាបងប្រុសរបស់គាត់ ហើយនាំទៅជួបលោកយេស៊ូដែរ។ ប៉ុន្តែ យ៉ូហានមិនបានកត់រឿងនោះក្នុងសៀវភៅដំណឹងល្អដែលគាត់បានសរសេរទេ។
នៅថ្ងៃបន្ទាប់ លោកយេស៊ូបានជួបភីលីពដែលមកពីក្រុងបេតសេដា នៅជិតខាងជើងសមុទ្រកាលីឡេ ដែលជាស្រុកកំណើតរបស់អនទ្រេនិងពេត្រុស។ លោកយេស៊ូអញ្ជើញភីលីពថា៖ «ចូរមកតាមខ្ញុំចុះ»។—យ៉ូហាន ១:៤៣
ក្រោយមក ភីលីពទៅរកណាថាណែល ដែលគេហៅថាបាថូឡូម៉េ រួចនិយាយថា៖ «យើងបានរកឃើញលោកដែលច្បាប់ម៉ូសេនិងសេចក្ដីបង្រៀនរបស់ពួកអ្នកប្រកាសទំនាយចែងអំពីលោក គឺលោកយេស៊ូ ជាកូនយ៉ូសែប ពីក្រុងណាសារ៉ែត»។ ប៉ុន្តែ ណាថាណែលសង្ស័យ ហើយសួរភីលីពថា៖ «តើអាចមានអ្វីល្អចេញមកពីក្រុងណាសារ៉ែតឬ?»។
ភីលីពតឿនគាត់ថា៖ «សូមមកមើល»។ លោកយេស៊ូឃើញណាថាណែលចូលមកជួបលោក ដូច្នេះលោកមានប្រសាសន៍ថា៖ «មើលហ្ន៎! ជនជាតិអ៊ីស្រាអែលដ៏ពិតម្នាក់ ដែលគ្មានកិច្ចកលអ្វីសោះ»។
ណាថាណែលសួរលោកថា៖ «ហេតុអ្វីលោកស្គាល់ខ្ញុំ?»។
លោកយេស៊ូឆ្លើយថា៖ «មុនភីលីពហៅអ្នក កាលដែលអ្នកនៅក្រោមដើមល្វានៅឡើយ ខ្ញុំបានឃើញអ្នកហើយ»។
ណាថាណែលនិយាយដោយកោតស្ងើចថា៖ «រ៉ាប៊ី លោកជាបុត្ររបស់ព្រះ ហើយលោកជាស្តេចនៃអ៊ីស្រាអែល»។
លោកយេស៊ូសួរគាត់ថា៖ «តើអ្នកជឿពីព្រោះខ្ញុំប្រាប់អ្នកថា ខ្ញុំឃើញអ្នកនៅក្រោមដើមល្វាឬ? អ្នកនឹងឃើញការអស្ចារ្យជាងនេះទៅទៀត»។ បន្ទាប់មក លោកយេស៊ូសន្យាថា៖ «ខ្ញុំប្រាប់អ្នករាល់គ្នាការពិតថា អ្នករាល់គ្នានឹងឃើញស្ថានសួគ៌បើកឡើង ហើយបណ្ដាទេវតារបស់ព្រះឡើងទៅ ហើយចុះមកឯកូនមនុស្ស»។—យ៉ូហាន ១:៤៥-៥១
មិនយូរប៉ុន្មានក្រោយមក លោកយេស៊ូនិងពួកអ្នកកាន់តាមដំបូងរបស់លោកក៏ចាកចេញពីជ្រលងភ្នំយ៉ូដាន់ ហើយធ្វើដំណើរឆ្ពោះទៅស្រុកកាលីឡេ។