ជំពូកទី៦៦
ចូលរួមបុណ្យរោងនៅក្រុងយេរូសាឡិម
លោកយេស៊ូបង្រៀននៅឯវិហារ
ក្នុងអំឡុងប៉ុន្មានឆ្នាំតាំងពីលោកយេស៊ូបានទទួលការជ្រមុជទឹក លោកបានទៅជាល្បីសុសសាយ។ ជនជាតិយូដារាប់ពាន់នាក់ធ្លាប់ឃើញអព្ភូតហេតុផ្សេងៗដែលលោកបានធ្វើ ហើយកិច្ចការរបស់លោកក៏បានត្រូវផ្សព្វផ្សាយនៅពេញតំបន់។ ហេតុនេះ មនុស្សជាច្រើនដែលមកចូលរួមបុណ្យរោង (ឬបុណ្យខ្ទម) ដែលកំពុងធ្វើឡើងនៅក្រុងយេរូសាឡិម កំពុងរកមើលលោក។
មនុស្សមានទស្សនៈខុសៗគ្នាអំពីលោកយេស៊ូ មនុស្សខ្លះបាននិយាយថា៖ «បុរសនោះជាមនុស្សល្អ» ប៉ុន្តែ អ្នកខ្លះទៀតបាននិយាយថា៖ «បុរសនោះមិនមែនល្អទេ គាត់បំភាន់បណ្ដាជន»។ (យ៉ូហាន ៧:១២) ក្នុងអំឡុងប៉ុន្មានថ្ងៃដំបូងនៃពិធីបុណ្យ មានការនិយាយខ្សឹបខ្សៀវជាច្រើនអំពីរឿងនេះ។ ប៉ុន្តែ គ្មានអ្នកណាម្នាក់ហ៊ាននិយាយជាចំហអំពីលោកយេស៊ូទេ ពីព្រោះពួកគេខ្លាចពួកមេដឹកសាសនាយូដា។
នៅពាក់កណ្ដាលពិធីបុណ្យនោះលោកយេស៊ូបានទៅឯវិហារដើម្បីបង្រៀនបណ្ដាជន។ មនុស្សជាច្រើនដែលនៅទីនោះពិតជាស្ញប់ស្ញែងនឹងសមត្ថភាពបង្រៀនរបស់លោក។ តាមពិត លោកយេស៊ូមិនដែលរៀននៅសាលាសាសនាយូដាទេ ម្ល៉ោះហើយ ជនជាតិយូដាក៏តាំងឆ្ងល់ថា៖ «បុរសនេះមិនដែលរៀននៅសាលាសាសនាទេ ចុះហេតុអ្វីបានជាគាត់មានចំណេះដឹងយ៉ាងនេះ?»។—យ៉ូហាន ៧:១៥
លោកយេស៊ូបានពន្យល់ពួកគេថា៖ «អ្វីដែលខ្ញុំបង្រៀន មិនមែនជាសេចក្ដីបង្រៀនរបស់ខ្ញុំទេ តែជាសេចក្ដីបង្រៀនរបស់លោកដែលបានចាត់ខ្ញុំឲ្យមក។ ប្រសិនបើអ្នកណាចង់ធ្វើតាមបំណងប្រាថ្នារបស់លោក អ្នកនោះនឹងដឹងថានេះជាសេចក្ដីបង្រៀនមកពីព្រះ ឬក៏ជាសេចក្ដីបង្រៀនដែលខ្ញុំនិយាយចេញពីខ្លួនខ្ញុំ»។ (យ៉ូហាន ៧:១៦, ១៧) សេចក្ដីបង្រៀនរបស់លោកយេស៊ូគឺស្របតាមច្បាប់របស់ព្រះ។ ហេតុនេះ បណ្ដាជនគួរតែឃើញថាលោកយេស៊ូពិតជាចង់ផ្ដល់សិរីរុងរឿងដល់ព្រះ មិនមែនដល់ខ្លួនលោកទេ។
បន្ទាប់មក លោកក៏មានប្រសាសន៍បន្ថែមទៀតថា៖ «ម៉ូសេបានឲ្យច្បាប់ដល់អ្នករាល់គ្នា មែនទេ? ប៉ុន្តែគ្មានអ្នកណាម្នាក់ក្នុងចំណោមអ្នករាល់គ្នាធ្វើតាមច្បាប់នោះសោះ។ ហេតុអ្វីអ្នករាល់គ្នាខំរកវិធីសម្លាប់ខ្ញុំ?»។ ក៏ប៉ុន្តែ អ្នកខ្លះដែលនៅក្នុងចំណោមក្រុមមនុស្ស ប្រហែលជាអ្នកដែលមកពីក្រៅក្រុង ដូច្នេះពួកគេមិនបានដឹងអំពីរឿងនេះឡើយ។ ម្យ៉ាងទៀត ពួកគេគិតថាការដែលមានមនុស្សចង់សម្លាប់លោកយេស៊ូដែលជាគ្រូដ៏ល្អប្រសើរបែបនេះគឺពិតជាមិនគួរឲ្យជឿទេ ហេតុនេះ ពួកគេបានគិតថាលោកយេស៊ូច្បាស់ជាវង្វេងស្មារតីហើយដែលនិយាយដូច្នោះ។ រួចពួកគេនិយាយថា៖ «អ្នកមានវិញ្ញាណកំណាចចូលហើយ។ តើអ្នកណាកំពុងរកវិធីសម្លាប់អ្នក?»។—យ៉ូហាន ៧:១៩, ២០
កាលពីមួយឆ្នាំកន្លះមុននេះ មេដឹកនាំសាសនាយូដាបានចង់សម្លាប់លោកយេស៊ូដោយសារលោកបានធ្វើឲ្យបុរសម្នាក់ជាសះស្បើយនៅថ្ងៃឈប់សម្រាក។ ឥឡូវនេះ លោកយេស៊ូប្រើការវែកញែកដែលនាំឲ្យពួកគេពិចារណា ហើយលោកក៏បានបង្ហាញពីគំនិតមិនសមហេតុសមផលរបស់ពួកគេ។ លោកបានលើកបញ្ជាក់ថា តាមច្បាប់ម៉ូសេ ទារកប្រុសត្រូវទទួលការកាត់ចុងស្បែកនៅថ្ងៃទី៨ ទោះបីជាថ្ងៃនោះចំនឹងថ្ងៃឈប់សម្រាកក៏ដោយ។ ដូច្នេះលោកសួរពួកគេថា៖ «ប្រសិនបើបុរសម្នាក់ទទួលការកាត់ចុងស្បែកនៅថ្ងៃឈប់សម្រាកដើម្បីកុំឲ្យបំពានច្បាប់ម៉ូសេ ហេតុដូចម្ដេចបានជាអ្នករាល់គ្នាក្ដៅចិត្តនឹងខ្ញុំ ព្រោះតែខ្ញុំបានធ្វើឲ្យបុរសម្នាក់ជាសះស្បើយនៅថ្ងៃឈប់សម្រាក? ឈប់វិនិច្ឆ័យដោយមើលតែសម្បកក្រៅប៉ុណ្ណោះ ប៉ុន្តែចូរវិនិច្ឆ័យដោយសេចក្ដីសុចរិតវិញ»។—យ៉ូហាន ៧:២៣, ២៤
មនុស្សនៅក្រុងយេរូសាឡិមដែលដឹងអំពីរឿងនេះ បាននិយាយថា៖ «នេះជាបុរសដែលពួកគេ[អ្នកគ្រប់គ្រង]កំពុងរកវិធីសម្លាប់ មែនទេ? តែមើល! គាត់កំពុងនិយាយជាសាធារណៈ ហើយពួកគេមិនថាអ្វីសោះ។ ប្រហែលជាពួកអ្នកគ្រប់គ្រងដឹងច្បាស់ថាបុរសនេះជាគ្រិស្តទេដឹង?»។ បើពួកគេដឹងដូច្នេះមែន ហេតុអ្វីពួកគេមិនបានជឿថាលោកយេស៊ូគឺជាគ្រិស្ត? ពួកគេប្រាប់មូលហេតុមួយថា៖ «ចំណែកយើងវិញ យើងដឹងថាបុរសនេះមកពីណា តែពេលគ្រិស្តមកដល់ គ្មានអ្នកណាអាចដឹងថាលោកមកពីណាឡើយ»។—យ៉ូហាន ៧:២៥-២៧
ពេលនោះកាលលោកនៅឯវិហារនៅឡើយ លោកយេស៊ូបានតបឆ្លើយថា៖ «អ្នករាល់គ្នាស្គាល់ខ្ញុំ ក៏ដឹងថាខ្ញុំមកពីណាដែរ។ ម្យ៉ាងទៀត ខ្ញុំមិនមែនមកដោយគំនិតខ្ញុំទេ ប៉ុន្តែមានលោកដែលបានចាត់ខ្ញុំឲ្យមកមែន ហើយអ្នករាល់គ្នាមិនស្គាល់លោកទេ។ ខ្ញុំស្គាល់លោក ពីព្រោះខ្ញុំជាតំណាងម្នាក់ដែលមកពីលោក ហើយលោកបានចាត់ខ្ញុំឲ្យមក»។ (យ៉ូហាន ៧:២៨, ២៩) ក្រោយពីស្ដាប់ប្រសាសន៍ដ៏ច្បាស់របស់លោកយេស៊ូហើយ ពួកគេបានប៉ុនប៉ងចាប់លោកយេស៊ូដាក់គុក ឬក៏សម្លាប់លោកតែម្ដង។ ប៉ុន្តែ ការប៉ុនប៉ងនោះមិនបានសម្រេចទេ ពីព្រោះមិនទាន់ដល់ពេលដែលលោកយេស៊ូត្រូវស្លាប់ឡើយ។
ទោះជាយ៉ាងនោះក៏ដោយ មានមនុស្សជាច្រើនក្នុងចំណោមបណ្ដាជនចាប់ផ្ដើមជឿលើលោកយេស៊ូ ពួកគេគួរជឿលើលោកមែន ពីព្រោះលោកយេស៊ូបានដើរលើទឹក ធ្វើឲ្យខ្យល់ស្ងប់ទៅវិញ ធ្វើអព្ភូតហេតុចម្អែតមនុស្សរាប់ពាន់នាក់ដោយនំប៉័ងពីរបីដុំនិងត្រីពីរបីកន្ទុយ ធ្វើឲ្យមនុស្សឈឺជាសះស្បើយ ធ្វើឲ្យអ្នកពិការដើរបាន ធ្វើឲ្យអ្នកងងឹតភ្នែកមើលឃើញឡើងវិញ ធ្វើឲ្យអ្នកមានជំងឺឃ្លង់ជាស្អាត ព្រមទាំងបានប្រោសមនុស្សស្លាប់ឲ្យរស់ឡើងវិញទៀតផង។ ដូច្នេះ ពួកគេមានមូលហេតុត្រឹមត្រូវដែលសួរថា៖ «នៅពេលដែលគ្រិស្តមកដល់ លោកនឹងមិនធ្វើសញ្ញាសម្គាល់ច្រើនជាងបុរសនេះទេ មែនទេ?»។—យ៉ូហាន ៧:៣១
នៅពេលដែលពួកផារិស៊ីឮបណ្ដាជននិយាយដូច្នេះ ពួកគេនិងពួកសង្ឃនាយកបានបញ្ជូនពួកអាជ្ញាធរឲ្យទៅចាប់លោកយេស៊ូ។