ជំពូកទី៦៥
លោកបង្រៀនក្នុងពេលទៅក្រុងយេរូសាឡិម
ម៉ាថាយ ៨:១៩-២២ លូកា ៩:៥១-៦២ យ៉ូហាន ៧:២-១០
ទស្សនៈប្អូនប្រុសៗរបស់លោកយេស៊ូចំពោះលោក
ហេតុអ្វីកិច្ចបម្រើរាជាណាចក្រសំខាន់ម្ល៉េះ?
អស់មួយរយៈពេល លោកយេស៊ូបានបំពេញកិច្ចបម្រើតែក្នុងស្រុកកាលីឡេប៉ុណ្ណោះ ពីព្រោះនៅទីនោះមានមនុស្សចាប់អារម្មណ៍ចំពោះដំណឹងដែលលោកផ្សាយច្រើនជាងនៅស្រុកយូឌា។ បន្ថែមទៅទៀត ពេលលោកនៅក្រុងយេរូសាឡិម លោកបានធ្វើឲ្យបុរសម្នាក់ជាសះស្បើយក្នុងថ្ងៃឈប់សម្រាក។ ម្ល៉ោះហើយ «ជនជាតិយូដាបានខំប្រឹងខ្លាំងជាងមុនដើម្បីរកវិធីសម្លាប់លោក»។—យ៉ូហាន ៥:១៨; ៧:១
ឥឡូវជារដូវស្លឹកឈើជ្រុះ នាឆ្នាំ៣២ គ.ស. ហើយជិតដល់ពេលដែលមានពិធីបុណ្យរោង (ឬបុណ្យខ្ទម)។ បុណ្យនេះមានរយៈពេល៧ថ្ងៃ ហើយនៅថ្ងៃទី៨ក៏មានបុណ្យដ៏ឱឡារិកដែរ។ បុណ្យនេះធ្វើឡើងនៅពេលបញ្ចប់រដូវប្រមូលផល។ នៅពេលនោះគឺជាគ្រាដ៏សប្បាយរីករាយក្រៃលែង និងជាគ្រាថ្លែងអំណរគុណព្រះ។
ពេលនោះប្អូនប្រុសៗរបស់លោកយេស៊ូឈ្មោះយ៉ាកុប ស៊ីម៉ូន យ៉ូសែប និងយូដាស បានជំរុញលោកថា៖ «សូមចេញពីទីនេះទៅតំបន់យូឌា»។ នៅពេលនោះក្រុងយេរូសាឡិមក្នុងតំបន់យូឌាគឺជាមណ្ឌលសាសនានៃស្រុកអ៊ីស្រាអែល។ ជាធម្មតាពេលមានបុណ្យប្រចាំឆ្នាំបីដងក្នុងមួយឆ្នាំ នៅក្រុងនោះមានមនុស្សច្រើនកុះករ។ ហេតុនេះហើយបានជាប្អូនប្រុសៗរបស់លោកយេស៊ូវែកញែកជាមួយនឹងលោកថា៖ «គ្មានអ្នកណាធ្វើអ្វីដោយសម្ងាត់ទេ ប្រសិនបើអ្នកនោះចង់ឲ្យគេស្គាល់ខ្លួនជាសាធារណៈ។ បើបងធ្វើការទាំងនេះ សូមបង្ហាញខ្លួនឲ្យពិភពលោកទាំងមូលឃើញ»។—យ៉ូហាន ៧:៣, ៤
តាមពិត ប្អូនប្រុសទាំងបួននាក់របស់លោកយេស៊ូ«មិនជឿលើលោក»ថាជាមេស្ស៊ីទេ។ ទោះជាយ៉ាងនោះក៏ដោយ ពួកគេចង់ឲ្យបណ្ដាជនដែលទៅចូលរួមបុណ្យនោះឃើញលោកធ្វើការអស្ចារ្យ។ ប៉ុន្តែ លោកយេស៊ូជ្រាបអំពីគ្រោះថ្នាក់ដែលអាចកើតឡើងចំពោះលោក ដូច្នេះលោកមានប្រសាសន៍ទៅពួកគេថា៖ «ពិភពលោកគ្មានហេតុស្អប់ប្អូនៗទេ តែចំណែកខ្ញុំវិញ គេស្អប់ខ្ញុំ ពីព្រោះខ្ញុំបញ្ជាក់ថាការប្រព្រឹត្តរបស់គេគឺទុច្ចរិត។ សូមប្អូនៗឡើងទៅបុណ្យនោះចុះ។ ខ្ញុំមិនទាន់ឡើងទៅបុណ្យនោះទេ ពីព្រោះពេលកំណត់របស់ខ្ញុំមិនទាន់មកដល់នៅឡើយ»។—យ៉ូហាន ៧:៥-៨
ប៉ុន្មានថ្ងៃក្រោយពីប្អូនប្រុសៗរបស់លោកយេស៊ូឡើងទៅធ្វើបុណ្យនោះជាមួយនឹងអ្នកឯទៀត នោះលោកនិងអ្នកកាន់តាមក៏បានធ្វើដំណើរទៅបុណ្យនោះដែរ តែដោយសម្ងាត់វិញ។ ជាជាងទៅតាមផ្លូវជិតទន្លេយ៉ូដាន់ ដែលមនុស្សច្រើនតែធ្វើដំណើរនោះ ពួកគាត់បានទៅតាមផ្លូវមួយកាត់តាមស្រុកសាម៉ារីវិញ។ លោកយេស៊ូនិងពួកអ្នកកាន់តាមត្រូវការកន្លែងស្នាក់នៅពេលទៅដល់ស្រុកសាម៉ារី ដូច្នេះលោកបានចាត់អ្នកនាំពាក្យឲ្យទៅមុនដើម្បីរៀបចំកន្លែងឲ្យពួកគាត់។ ប៉ុន្តែ មនុស្សនៅកន្លែងនោះមិនទទួលស្វាគមន៍ពួកគាត់តាមទម្លាប់ដែលពួកគេទទួលភ្ញៀវឡើយ។ ហេតុអ្វី? ពីព្រោះលោកយេស៊ូធ្វើដំណើរឆ្ពោះទៅក្រុងយេរូសាឡិមដើម្បីចូលរួមពិធីបុណ្យសាសនារបស់ជនជាតិយូដា។ ឃើញដូច្នេះ យ៉ាកុប និងយ៉ូហានខឹងយ៉ាងខ្លាំង ក៏សួរលោកយេស៊ូថា៖ «លោកម្ចាស់ តើចង់ឲ្យយើងហៅភ្លើងឲ្យធ្លាក់ពីលើមេឃមកបំផ្លាញពួកគេចោលឬទេ?»។ (លូកា ៩:៥៤) ឮដូច្នេះ លោកយេស៊ូស្តីបន្ទោសពួកគាត់ដែលមានចិត្តគំនិតបែបនោះ។ រួចមក ពួកគាត់ក៏បន្តដំណើរទៅមុខទៀត។
ពេលកំពុងធ្វើដំណើរ មានអ្នកជំនាញខាងច្បាប់ម្នាក់បានមកឯលោក ហើយជម្រាបថា៖ «លោកគ្រូ! ខ្ញុំនឹងទៅតាមលោក ទោះជាលោកទៅទីណាក៏ដោយ»។ លោកមានប្រសាសន៍ទៅគាត់ថា៖ «កញ្ជ្រោងមានរូង ហើយសត្វស្លាបលើមេឃមានទ្រនំ តែកូនមនុស្សគ្មានកន្លែងស្នាក់នៅទេ»។ (ម៉ាថាយ ៨:១៩, ២០) លោកយេស៊ូចង់បញ្ជាក់ប្រាប់បុរសនោះថាបើគាត់ក្លាយទៅជាអ្នកកាន់តាមលោក នោះគាត់នឹងជួបការពិបាកផ្សេងៗ។ តាមមើលទៅអ្នកជំនាញខាងច្បាប់នោះមានអំនួតខ្លាំងណាស់បានជាគាត់មិនព្រមមានរបៀបរស់នៅបែបនោះឡើយ។ ដូច្នេះ យើងម្នាក់ៗគួរសួរខ្លួនថា៖ ‹តើខ្ញុំសុខចិត្តទទួលការពិបាកដើម្បីធ្វើជាអ្នកកាន់តាមលោកយេស៊ូឬទេ?›។
រួចមក លោកមានប្រសាសន៍ទៅបុរសម្នាក់ទៀតថា៖ «ចូរមកតាមខ្ញុំចុះ»។ បុរសនោះជម្រាបលោកថា៖ «សូមអនុញ្ញាតឲ្យខ្ញុំចេញទៅបញ្ចុះសពឪពុកខ្ញុំសិន»។ លោកយេស៊ូជ្រាបអំពីកាលៈទេសៈរបស់គាត់ ដូច្នេះលោកមានប្រសាសន៍ទៅគាត់ថា៖ «ទុកឲ្យមនុស្សស្លាប់បញ្ចុះសពគ្នាគេទៅ តែអ្នកវិញ ចូរទៅប្រកាសអំពីរាជាណាចក្ររបស់ព្រះនៅគ្រប់ទីកន្លែង»។ (លូកា ៩:៥៩, ៦០) តាមពិត ឪពុករបស់បុរសនោះមិនទាន់ស្លាប់ទេ បើឪពុកគាត់ស្លាប់មែន គាត់ទំនងជាមិននៅទីនេះនិយាយជាមួយនឹងលោកយេស៊ូឡើយ។ មូលហេតុដែលបុរសនោះនិយាយដូច្នោះគឺដោយសារគាត់មិនទាន់ត្រៀមខ្លួនដើម្បីចាត់ទុករាជាណាចក្រព្រះជាអ្វីដែលសំខាន់បំផុតក្នុងជីវិតរបស់គាត់។
កាលដែលពួកគាត់កំពុងធ្វើដំណើរឆ្ពោះទៅក្រុងយេរូសាឡិម នោះមានបុរសម្នាក់ទៀតមកជម្រាបលោកយេស៊ូថា៖ «លោកម្ចាស់ ខ្ញុំនឹងទៅតាមលោក ប៉ុន្តែសូមអនុញ្ញាតឲ្យខ្ញុំទៅលាពួកអ្នកផ្ទះរបស់ខ្ញុំសិន»។ លោកយេស៊ូមានប្រសាសន៍ទៅគាត់ថា៖ «អ្នកណាដែលចាប់កាន់នង្គ័ល តែបែរទៅមើលអ្វីនៅខាងក្រោយ អ្នកនោះមិនសមនឹងរាជាណាចក្ររបស់ព្រះឡើយ»។—លូកា ៩:៦១, ៦២
អ្នកដែលចង់ធ្វើជាអ្នកកាន់តាមពិតរបស់លោកយេស៊ូ ពួកគេត្រូវតែផ្ដោតអារម្មណ៍ទៅលើកិច្ចបម្រើរាជាណាចក្រប៉ុណ្ណោះ។ ជាឧទាហរណ៍ ពេលអ្នកភ្ជួររាស់មិនមើលទៅត្រង់ទេ នោះគាត់ទំនងជាភ្ជួរខុសគន្លងនង្គ័ល។ ម្យ៉ាងទៀត បើគាត់ដាក់នង្គ័លចុះ ហើយបែរទៅមើលអ្វីនៅខាងក្រោយ នោះគាត់មិនអាចភ្ជួរស្រែរបស់គាត់ឲ្យរួចទេ។ ស្រដៀងគ្នាដែរ បើអ្នកណាម្នាក់ដែលមើលទៅក្រោយក្នុងរបៀបរបបពិភពលោកនេះ អ្នកនោះប្រហែលជាជំពប់ដួលចេញពីផ្លូវដែលនាំទៅដល់ជីវិតដែលគ្មានទីបញ្ចប់។