ការណែនាំសម្រាប់កិច្ចប្រជុំកិច្ចបម្រើនិងជីវិតជាគ្រិស្តសាសនិក
មាតិកា
១. ការណែនាំក្នុងឯកសារនេះជាជំនួយសម្រាប់អស់អ្នកដែលមានផ្នែកក្នុងកិច្ចប្រជុំកិច្ចបម្រើនិងជីវិតជាគ្រិស្តសាសនិក។ មុនរៀបចំផ្នែករបស់ខ្លួន ពួកគេម្នាក់ៗគួរមើលសារឡើងវិញនូវការណែនាំដែលមានក្នុងកិច្ចបម្រើនិងជីវិត កំណត់សម្រាប់កិច្ចប្រជុំ និងក្នុងឯកសារនេះ។ សូមលើកទឹកចិត្តអ្នកផ្សាយទាំងអស់ឲ្យចុះឈ្មោះដើម្បីថ្លែងសុន្ទរកថាក្នុងកិច្ចប្រជុំ បើអាចធ្វើបាន។ អ្នកឯទៀតដែលចូលរួមយ៉ាងសកម្មជាមួយក្រុមជំនុំក៏អាចចុះឈ្មោះថ្លែងសុន្ទរកថា ប្រសិនបើពួកគេយល់ស្របនឹងសេចក្ដីបង្រៀនក្នុងគម្ពីរ និងមានរបៀបរស់នៅស្របតាមគោលការណ៍គ្រិស្តសាសនិក។ អ្នកត្រួតពិនិត្យកិច្ចប្រជុំកិច្ចបម្រើនិងជីវិតគួរពិគ្រោះអំពីតម្រូវការជាមួយបុគ្គលដែលមិនមែនជាអ្នកផ្សាយ តែចង់ចុះឈ្មោះ រួចប្រាប់បុគ្គលនោះថាគាត់មានគុណសម្បត្តិគ្រប់គ្រាន់ឬយ៉ាងណា។ ពេលមានការពិគ្រោះនេះ អ្នកដឹកនាំការសិក្សាជាមួយគាត់គួរមានវត្តមាននៅទីនោះដែរ (ឬគួរមានវត្តមានរបស់ឪពុកឬម្ដាយដែលជាអ្នកជឿ)។ តម្រូវការគឺដូចគ្នានឹងតម្រូវការសម្រាប់អ្នកដែលចង់ក្លាយជាអ្នកផ្សព្វផ្សាយដែលមិនទាន់ទទួលការជ្រមុជទឹក (od ជំ.៨ វ.៨)។
ពាក្យផ្ដើម
២. ១នាទី។ រាល់សប្ដាហ៍ ក្រោយបញ្ចប់ចម្រៀងនិងសេចក្ដីអធិដ្ឋានដំបូង អធិការីកិច្ចប្រជុំកិច្ចបម្រើនិងជីវិតនឹងជួយអ្នកចូលរួមឲ្យមានចិត្តរំភើបចំពោះកម្មវិធីបន្តបន្ទាប់។ អធិការីគួរផ្ដោតទៅលើចំណុចដែលនឹងផ្ដល់ប្រយោជន៍ច្រើនបំផុតដល់ក្រុមជំនុំ។
ចំណេះវិសេសពីបណ្ដាំរបស់ព្រះ
៣. សុន្ទរកថា៖ ១០នាទី។ មានប្រធាននិងគោលចំណុចពីរឬបីនៅក្នុងកិច្ចបម្រើនិងជីវិត កំណត់សម្រាប់កិច្ចប្រជុំ។ សុន្ទរកថានេះនឹងត្រូវថ្លែងដោយអ្នកចាស់ទុំម្នាក់ ឬជំនួយការខាងកិច្ចបម្រើម្នាក់ដែលមានគុណសម្បត្តិគ្រប់គ្រាន់។ ពេលចាប់ផ្ដើមអានសៀវភៅថ្មីសម្រាប់អំណានគម្ពីរប្រចាំសប្ដាហ៍ នោះវីដេអូមួយដែលរៀបរាប់អំពីសៀវភៅថ្មីនេះនឹងត្រូវបង្ហាញ។ អ្នកថ្លែងអាចលើកបញ្ជាក់អំពីចំណុចស្រដៀងគ្នារវាងវីដេអូនិងប្រធាននៃសុន្ទរកថា។ យ៉ាងណាក្ដី គាត់គួរធ្វើឲ្យប្រាកដថាគាត់លើកបញ្ជាក់ចំណុចដែលមានក្នុងកំណត់សម្រាប់កិច្ចប្រជុំ។ ម្យ៉ាងទៀត តាមពេលកំណត់ គាត់គួរប្រើរូបភាពដែលបានត្រូវរៀបចំដើម្បីជួយអ្នកស្ដាប់ឲ្យទទួលប្រយោជន៍ច្រើនបំផុត។ អ្នកថ្លែងក៏អាចប្រើព័ត៌មានពីឯកសារយោងផ្សេងទៀតដែរ ឲ្យតែព័ត៌មាននោះជួយពន្យល់ចំណុចដែលមានក្នុងកំណត់សម្រាប់កិច្ចប្រជុំ។
៤. ចូរខំស្វែងរកចំណេះវិសេសពីបណ្ដាំរបស់ព្រះ៖ ១០នាទី។ នេះជាផ្នែកសំណួរនិងចម្លើយ ដែលគ្មានពាក្យផ្ដើមឬពាក្យបញ្ចប់ទេ។ ផ្នែកនេះត្រូវដឹកនាំដោយអ្នកចាស់ទុំម្នាក់ ឬជំនួយការខាងកិច្ចបម្រើម្នាក់ដែលមានគុណសម្បត្តិគ្រប់គ្រាន់។ អ្នកដឹកនាំគួរសួរសំណួរទាំងពីរទៅអ្នកស្ដាប់។ ម្យ៉ាងទៀត គាត់អាចសម្រេចចិត្តថា គួរអានខគម្ពីរដែលជាមូលដ្ឋានសម្រាប់សំណួរ ឬមិនគួរអានវិញ។ ពួកអ្នកដែលចូលរួមឆ្លើយ គួរឆ្លើយត្រឹមតែ៣០វិនាទីឬខ្លីជាង។
៥. អំណានគម្ពីរ៖ ៤នាទី។ ផ្នែកនេះត្រូវថ្លែងដោយបងប្អូនប្រុសម្នាក់។ សិស្សគួរអានអំណានដែលបានត្រូវកំណត់ឲ្យ ដោយមិនមានពាក្យផ្ដើមឬពាក្យបញ្ចប់ទេ។ អធិការីកិច្ចប្រជុំនឹងយកចិត្តទុកដាក់ជួយសិស្សឲ្យរៀនអានឲ្យបានត្រឹមត្រូវ ស្ទាត់ ទាំងយល់ន័យ សង្កត់សំឡេងឲ្យយល់អត្ថន័យ ឡើងចុះសំឡេង ផ្អាកនៅកន្លែងត្រឹមត្រូវ និងអានដោយប្រើសំឡេងធម្មតា។ អំណានគម្ពីរខ្លះគឺខ្លី រីឯអំណានគម្ពីរខ្លះទៀតគឺវែង ដូច្នេះអ្នកត្រួតពិនិត្យកិច្ចប្រជុំកិច្ចបម្រើនិងជីវិតគួរតែគិតអំពីសមត្ថភាពរបស់សិស្សនីមួយៗពេលចាត់ចែងសិស្សអានអំណានគម្ពីរ។
ចូរខំព្យាយាមក្នុងកិច្ចបម្រើផ្សាយ
៦. ១៥នាទី។ ផ្នែកនេះបានត្រូវរៀបចំឡើងដើម្បីជួយបងប្អូនទាំងអស់ឲ្យមានឱកាសហាត់ពាក្យផ្សាយ និងបង្កើនសមត្ថភាពរបស់ពួកគេក្នុងការសន្ទនា ការផ្សព្វផ្សាយ និងការបង្រៀន។ បើចាំបាច់ សុន្ទរកថារបស់សិស្សក៏អាចថ្លែងដោយអ្នកចាស់ទុំដែរ។ សិស្សម្នាក់ៗគួរធ្វើតាមចំណុចហាត់រៀនពីសៀវភៅស្ដើងការបង្រៀន ឬសៀវភៅស្ដើងស្រឡាញ់មនុស្សដែលមានក្នុងវង់ក្រចកក្បែរសុន្ទរកថាក្នុងកិច្ចបម្រើនិងជីវិត កំណត់សម្រាប់កិច្ចប្រជុំ។ ជួនកាលនឹងមានផ្នែកមួយដែលជាការពិគ្រោះ។ ផ្នែកបែបនោះត្រូវដឹកនាំដោយអ្នកចាស់ទុំម្នាក់ ឬជំនួយការខាងកិច្ចបម្រើម្នាក់ដែលមានគុណសម្បត្តិគ្រប់គ្រាន់ (ស្ដីអំពីរបៀបដឹកនាំផ្នែកដែលជាការពិគ្រោះសូមមើលវគ្គ១៥)។
៧. ចាប់ផ្ដើមការសន្ទនា៖ បងប្អូនប្រុសឬបងប្អូនស្រីអាចថ្លែងសុន្ទរកថានេះ។ អ្នកជំនួយគួរតែមានភេទដូចគ្នានឹងអ្នកថ្លែង ឬជាសមាជិកក្រុមគ្រួសារគាត់។ សិស្សនិងអ្នកជំនួយអាចអង្គុយឬអាចឈរក៏បាន (សម្រាប់ព័ត៌មានបន្ថែមអំពីរបៀបថ្លែងនិងស្ថានភាពសម្រាប់សុន្ទរកថានេះ សូមមើលវគ្គ១២និង១៣)។
៨. ត្រឡប់ទៅជួប៖ បងប្អូនប្រុសឬបងប្អូនស្រីអាចថ្លែងសុន្ទរកថានេះ។ អ្នកជំនួយគួរតែមានភេទដូចគ្នានឹងអ្នកថ្លែង។ (km ១/០៦ ទំ.៥) សិស្សនិងអ្នកជំនួយអាចអង្គុយឬអាចឈរក៏បាន។ សិស្សគួរសម្ដែងអំពីរបៀបនិយាយពេលត្រឡប់ទៅជួបបុគ្គលដែលធ្លាប់ជួបពីមុន (សម្រាប់ព័ត៌មានបន្ថែមអំពីរបៀបថ្លែងនិងស្ថានភាពសម្រាប់សុន្ទរកថានេះ សូមមើលវគ្គ១២និង១៣)។
៩. ជួយគេឲ្យក្លាយជាអ្នកកាន់តាមគ្រិស្ត៖ បងប្អូនប្រុសឬបងប្អូនស្រីអាចថ្លែងសុន្ទរកថានេះ។ អ្នកជំនួយគួរតែមានភេទដូចគ្នានឹងអ្នកថ្លែង។ (km ១/០៦ ទំ.៥) សិស្សនិងអ្នកជំនួយអាចអង្គុយឬអាចឈរក៏បាន។ ផ្នែកនេះគួរបង្ហាញអំពីរបៀបបង្រៀនសិស្សគម្ពីរក្នុងអំឡុងការសិក្សា។ អ្នកថ្លែងមិនចាំបាច់ប្រើពាក្យផ្ដើមឬពាក្យបញ្ចប់ទេ លើកលែងតែពេលគាត់ត្រូវធ្វើតាមចំណុចហាត់រៀនទាំងនេះ។ មិនចាំបាច់អានប្រភពព័ត៌មានទាំងអស់ឲ្យឮៗទេ តែប្រសិនជាគាត់ចង់អាន នោះក៏បានដែរ។
១០. ពន្យល់អំពីជំនឿរបស់អ្នក៖ ពេលផ្នែកនេះជាសុន្ទរកថា បងប្អូនប្រុសម្នាក់គួរជាអ្នកថ្លែង។ ពេលផ្នែកនេះជាការសម្ដែង បងប្អូនប្រុសឬបងប្អូនស្រីអាចថ្លែងបាន។ អ្នកជំនួយគួរតែមានភេទដូចគ្នានឹងអ្នកថ្លែង ឬគួរជាសមាជិកក្រុមគ្រួសារគាត់។ សិស្សគួរតែផ្ដល់ចម្លើយដែលច្បាស់និងដែលមិនធ្វើឲ្យទើសចិត្ត ដោយប្រើព័ត៌មានក្នុងឯកសារយោងដែលបានផ្ដល់ឲ្យ។ សិស្សអាចសម្រេចចិត្តថាគួរឬមិនគួរប្រាប់អំពីឯកសារដែលជាមូលដ្ឋានចំពោះផ្នែករបស់គាត់។
១១. សុន្ទរកថា៖ សុន្ទរកថានេះគួរថ្លែងដោយបងប្អូនប្រុសម្នាក់ ហើយជាសុន្ទរកថាដែលថ្លែងជូនក្រុមជំនុំ។ ពេលសុន្ទរកថាមានមូលដ្ឋានលើចំណុចណាមួយក្នុងសេចក្ដីពន្យល់បន្ថែម ផ្នែកក នៃសៀវភៅស្ដើងស្រឡាញ់មនុស្ស សិស្សគួរតែលើកបញ្ជាក់អំពីរបៀបប្រើបទគម្ពីរពីចំណុចនោះក្នុងកិច្ចបម្រើផ្សាយ។ ជាឧទាហរណ៍ គាត់អាចពន្យល់អំពីពេលណាអាចប្រើបទគម្ពីរ បកស្រាយអត្ថន័យនៃបទគម្ពីរ ឬរបៀបប្រើបទគម្ពីរដើម្បីលើកហេតុផលទៅបុគ្គលម្នាក់។ ពេលសុន្ទរកថាមានមូលដ្ឋានលើចំណុចណាមួយពីមេរៀនក្នុងសៀវភៅស្ដើងស្រឡាញ់មនុស្ស សិស្សគួរតែផ្ដោតទៅលើរបៀបប្រើចំណុចនោះក្នុងកិច្ចបម្រើផ្សាយ។ គាត់ប្រហែលអាចលើកឡើងឧទាហរណ៍ដែលមាននៅចំណុចទី១ក្នុងមេរៀន ឬលើកបញ្ជាក់ខគម្ពីរបន្ថែមដែលមានក្នុងមេរៀន។
១២. របៀបថ្លែង៖ ព័ត៌មានក្នុងវគ្គនេះនិងវគ្គបន្ទាប់គឺសម្រាប់សុន្ទរកថាក្នុងផ្នែក«ចាប់ផ្ដើមការសន្ទនា» និងសុន្ទរកថាក្នុងផ្នែក«ត្រឡប់ទៅជួប»។ បើសុន្ទរកថានោះគ្មានការណែនាំផ្សេងទៀតទេ គោលដៅរបស់សិស្សគឺប្រាប់សេចក្ដីពិតពីគម្ពីរដែលស្រួលយល់និងដែលទាក់ទងនឹងបុគ្គលដែលគាត់កំពុងនិយាយ ព្រមទាំងលើកចំណុចមួយដើម្បីនិយាយលើកក្រោយ។ សិស្សគួរតែជ្រើសរើសប្រធានបទអំពីអ្វីដែលកំពុងកើតឡើងថ្មីៗ និងដែលមានប្រសិទ្ធភាពក្នុងតំបន់។ គាត់អាចសម្រេចចិត្តថា គួរបង្ហាញឬមិនបង្ហាញសៀវភៅឬវីដេអូពីឧបករណ៍ដើម្បីបង្រៀនគម្ពីរ។ ជាជាងទន្ទេញឲ្យចាំការសម្ដែង សិស្សគួរតែហាត់របៀបធ្វើការសន្ទនាដោយបង្ហាញការយកចិត្តទុកដាក់ចំពោះបុគ្គលឯទៀត ហើយនិយាយបែបធម្មជាតិ។
១៣. ស្ថានភាព៖ សិស្សគួរប្រើស្ថានភាពដែលបានផ្ដល់ឲ្យ តែគួរកែសម្រួលឲ្យស្របនឹងកាលៈទេសៈក្នុងតំបន់។ ជាឧទាហរណ៍៖
(១) ពីផ្ទះមួយទៅផ្ទះមួយ៖ ស្ថានភាពនេះរួមបញ្ចូលការផ្សព្វផ្សាយពីផ្ទះមួយទៅផ្ទះមួយ (មិនថាផ្សព្វផ្សាយដោយផ្ទាល់ តាមទូរស័ព្ទឬតាមសំបុត្រក្ដី) និងការធ្វើការត្រឡប់ទៅជួបបុគ្គលដែលបានជួបពេលផ្សព្វផ្សាយពីផ្ទះមួយទៅផ្ទះមួយ។
(២) ផ្សព្វផ្សាយក្រៅផ្លូវការ៖ ស្ថានភាពនេះបង្ហាញអំពីរបៀបឆ្លៀតឱកាសផ្សព្វផ្សាយដល់បុគ្គលដែលកំពុងសន្ទនាធម្មតាជាមួយយើង។ នេះអាចរួមបញ្ចូលការប្រាប់ចំណុចមួយពីគម្ពីរដល់អ្នកដែលជួបនៅកន្លែងធ្វើការ នៅសាលា អ្នកជិតខាង ពេលជិះឡានសាធារណៈ ឬនៅកន្លែងផ្សេងទៀតក្នុងសកម្មភាពប្រចាំថ្ងៃរបស់អ្នក។
(៣) ផ្សព្វផ្សាយសាធារណៈ៖ ស្ថានភាពនេះអាចរួមបញ្ចូលការផ្សព្វផ្សាយដោយប្រើរទេះ ឬការផ្សព្វផ្សាយនៅកន្លែងពាណិជ្ជកម្ម តាមផ្លូវ តាមសួនសាធារណៈ នៅចំណត ឬនៅកន្លែងណាដែលអាចជួបមនុស្សបាន។
១៤. ការប្រើវីដេអូនិងសៀវភៅ៖ អាស្រ័យលើកាលៈទេសៈ សិស្សអាចសម្រេចចិត្តប្រើវីដេអូឬសៀវភៅ។ បើសុន្ទរកថារួមបញ្ចូលវីដេអូ ឬបើសិស្សសម្រេចចិត្តប្រើវីដេអូ គាត់គួររៀបរាប់និងពិភាក្សាវីដេអូនោះតែមិនបង្ហាញវីដេអូទេ។
របៀបរស់នៅជាគ្រិស្តសាសនិក
១៥. ក្រោយពីច្រៀងចប់ ១៥នាទីដំបូងនឹងមានផ្នែកមួយឬពីរដែលនឹងជួយអ្នកស្ដាប់ឲ្យអនុវត្តអ្វីដែលបានរៀនពីបណ្ដាំរបស់ព្រះ។ បើគ្មានការណែនាំផ្សេងទៀតទេ អ្នកចាស់ទុំម្នាក់ឬជំនួយការខាងកិច្ចបម្រើម្នាក់ដែលមានគុណសម្បត្តិគ្រប់គ្រាន់នឹងដឹកនាំផ្នែកនេះ។ ពេលមានផ្នែកសេចក្ដីត្រូវការក្នុងក្រុមជំនុំ នោះអ្នកចាស់ទុំម្នាក់ត្រូវថ្លែង។ ចំពោះផ្នែកណាដែលជាការពិគ្រោះ អ្នកថ្លែងអាចសួរសំណួរដែលមាននៅក្នុងផ្នែកនោះហើយក៏អាចសួរសំណួរបន្ថែមទៀតដែរ។ គាត់គួរមានពាក្យផ្ដើមខ្លី ដើម្បីគាត់អាចផ្ចង់ទៅលើចំណុចសំខាន់ និងដើម្បីឲ្យអ្នកស្ដាប់មានពេលចូលរួមឆ្លើយ។ ប្រសិនបើមានការសម្ភាសន៍ បើអាចធ្វើបាន ជាការល្អដែលគាត់ប្រាប់ពីបទពិសោធន៍ផ្ទាល់ខ្លួនពីលើវេទិកា មិនមែនពីកៅអីអង្គុយទេ។
១៦. ការសិក្សាគម្ពីរជាក្រុមជំនុំ៖ ៣០នាទី។ ផ្នែកនេះត្រូវដឹកនាំដោយអ្នកចាស់ទុំដែលមានសមត្ថភាពគ្រប់គ្រាន់។ (ក្នុងក្រុមជំនុំដែលមិនសូវមានអ្នកចាស់ទុំ ជំនួយការខាងកិច្ចបម្រើដែលមានគុណសម្បត្តិគ្រប់គ្រាន់អាចដឹកនាំផ្នែកនេះបើចាំបាច់) ក្រុមអ្នកចាស់ទុំគួរសម្រេចចិត្តថា តើអ្នកណាមានសមត្ថភាពឬគុណសម្បត្តិគ្រប់គ្រាន់ដើម្បីដឹកនាំការសិក្សាគម្ពីរជាក្រុមជំនុំ។ បងប្អូនដែលបានត្រូវជ្រើសរើសដើម្បីដឹកនាំគួរមានសមត្ថភាពដឹកនាំតាមរបៀបដែលផ្ដល់ប្រយោជន៍ឲ្យអ្នកស្ដាប់។ នេះរួមបញ្ចូលការបញ្ចប់ការសិក្សាតាមពេលកំណត់ ការលើកបញ្ជាក់បទគម្ពីរសំខាន់ៗ និងការជួយបងប្អូនឲ្យទទួលស្គាល់ប្រយោជន៍ដែលមកពីការធ្វើតាមចំណុចផ្សេងៗដែលបានត្រូវពិគ្រោះ។ អ្នកដឹកនាំនឹងកាន់តែបង្រៀនដោយប្រសិទ្ធភាពបើគាត់ពិចារណាអត្ថបទស្ដីអំពីរបៀបដឹកនាំផ្នែកសំណួរនិងចម្លើយ។ (w២៣.០៤ ទំ.២៤, ប្រអប់) ក្រោយព័ត៌មានដែលបានកំណត់សម្រាប់សប្ដាហ៍បានត្រូវបកស្រាយច្បាស់លាស់អស់ហើយ អ្នកថ្លែងមិនចាំបាច់ពន្យារពេលការសិក្សាឲ្យគ្រប់៣០នាទីទេ។ បើអាចធ្វើបាន បងប្រុសផ្សេងៗគ្នាគួរដឹកនាំនិងអានជារៀងរាល់សប្ដាហ៍។ ប្រសិនបើអធិការីកិច្ចប្រជុំកិច្ចបម្រើនិងជីវិតសុំអ្នកដឹកនាំធ្វើការសិក្សាខ្លីជាង នោះអ្នកដឹកនាំការសិក្សានឹងសម្រេចចិត្តអំពីរបៀបធ្វើដូច្នោះ។ គាត់អាចសម្រេចចិត្តមិនអានវគ្គខ្លះ។
សេចក្ដីបញ្ចប់
១៧. ៣នាទី។ អធិការីកិច្ចប្រជុំកិច្ចបម្រើនិងជីវិតនឹងសើរើឡើងវិញនូវចំណុចសំខាន់ៗពីកិច្ចប្រជុំ។ គាត់ក៏គួរប្រាប់អំពីកម្មវិធីសប្ដាហ៍បន្ទាប់។ បើមានពេល គាត់អាចប្រាប់ឈ្មោះសិស្សដែលមានសុន្ទរកថានៅសប្ដាហ៍ក្រោយ។ បើគ្មានការណែនាំផ្សេងទៀតទេ អធិការីគួរជូនដំណឹងណានិងអានសំបុត្រណាដែលចាំបាច់ដល់ក្រុមជំនុំក្នុងអំឡុងសេចក្ដីបញ្ចប់។ ព័ត៌មានទូទៅ ដូចជាកម្មវិធីកិច្ចបម្រើផ្សាយធម្មតានិងកម្មវិធីសម្អាត មិនគួរប្រកាសពីលើវេទិកាទេ តែគួរបិទនៅលើក្ដារព័ត៌មានវិញ។ ប្រសិនបើអធិការីមិនអាចជូនដំណឹងឬអានសំបុត្រក្នុងពេលកំណត់សម្រាប់សេចក្ដីបញ្ចប់ គាត់គួរសុំបងប្អូនប្រុសដែលដឹកនាំកម្មវិធី ក្នុងផ្នែករបៀបរស់នៅជាគ្រិស្តសាសនិកឲ្យកាត់បន្ថយផ្នែករបស់ពួកគេឲ្យខ្លីជាង។ (សូមមើលវគ្គ១៦និង១៩) កិច្ចប្រជុំនឹងត្រូវបញ្ចប់ដោយចម្រៀងនិងសេចក្ដីអធិដ្ឋាន។
ការសរសើរនិងឱវាទ
១៨. ក្រោយពីសិស្សម្នាក់ៗថ្លែងចប់ អធិការីកិច្ចប្រជុំកិច្ចបម្រើនិងជីវិតមានពេលប្រហែលមួយនាទីដើម្បីសរសើរនិងជូនឱវាទដល់សិស្សដោយមានមូលដ្ឋានលើចំណុចដែលសិស្សបានហាត់រៀន។ ពេលអធិការីអញ្ជើញសិស្សឲ្យឡើងថ្លែងសុន្ទរកថាឬធ្វើការសម្ដែង គាត់នឹងមិនប្រាប់អំពីចំណុចដែលសិស្សកំពុងហាត់រៀនទេ។ ប៉ុន្តែ ក្រោយពីសិស្សថ្លែងចប់ អធិការីនឹងសរសើរសិស្សជាមុនសិនអំពីចំណុចល្អខ្លះដែលសិស្សបានធ្វើ ហើយបន្ទាប់មកគាត់អាចប្រាប់អំពីចំណុចដែលសិស្សកំពុងហាត់រៀន ព្រមទាំងប្រាប់នូវមូលហេតុនិងរបៀបដែលសិស្សធ្វើបានល្អចំពោះចំណុចនេះ ឬពន្យល់ដោយចិត្តសប្បុរសនូវមូលហេតុដែលសិស្សគួរយកចិត្តទុកដាក់ថែមទៀតចំពោះចំណុចនេះ។ អធិការីក៏អាចប្រាប់អំពីចំណុចផ្សេងទៀតក្នុងការសម្ដែងដែលគួរឲ្យកត់សម្គាល់ បើគាត់គិតថាចំណុចនេះអាចមានប្រយោជន៍សម្រាប់សិស្សឬអ្នកស្ដាប់។ ក្រោយកិច្ចប្រជុំចប់ឬនៅពេលផ្សេងទៀត អធិការីអាចជួបសិស្សដើម្បីជូនឱវាទថែមទៀតស្ដីអំពីចំណុចដែលសិស្សបានហាត់រៀនឬអំពីចំណុចហាត់រៀនផ្សេងទៀត ដោយប្រើសៀវភៅស្តើងស្រឡាញ់មនុស្សឬសៀវភៅស្ដើងការបង្រៀនជាមូលដ្ឋាន (សូមមើលវគ្គ១៩, ២៤និង២៥សម្រាប់ការណែនាំបន្ថែមស្ដីអំពីតួនាទីរបស់អធិការីកិច្ចប្រជុំកិច្ចបម្រើនិងជីវិត និងតួនាទីរបស់អ្នកជូនឱវាទរង)។
ពេលកំណត់
១៩. គ្មានសុន្ទរកថាណាដែលគួរថ្លែងលើសពេលកំណត់ទេ ហើយពាក្យរបស់អធិការីកិច្ចប្រជុំកិច្ចបម្រើនិងជីវិតក៏មិនគួរលើសពេលកំណត់ដែរ។ ទោះបីជាកិច្ចបម្រើនិងជីវិត កំណត់សម្រាប់កិច្ចប្រជុំបានកំណត់ម៉ោងសម្រាប់ផ្នែកនីមួយៗក៏ដោយ អ្នកថ្លែងមិនចាំបាច់និយាយបន្ថែមឲ្យគ្រប់ពេលកំណត់ទេ បើព័ត៌មានបានត្រូវថ្លែងគ្រប់គ្រាន់ហើយ។ បើអ្នកដឹកនាំថ្លែងលើសពេលកំណត់ អធិការីកិច្ចប្រជុំកិច្ចបម្រើនិងជីវិតឬអ្នកជូនឱវាទរងគួរជួបគាត់ដោយឡែកពីគេដើម្បីជូនឱវាទ។ (សូមមើលវគ្គ២៤និង២៥) កិច្ចប្រជុំទាំងមូលរួមទាំងចម្រៀងនិងសេចក្ដីអធិដ្ឋានគួរមានរយៈពេល១ម៉ោង៤៥នាទី។
ទស្សនកិច្ចរបស់អ្នកត្រួតពិនិត្យប្រចាំមណ្ឌល
២០. ពេលក្រុមជំនុំមានទស្សនកិច្ចរបស់អ្នកត្រួតពិនិត្យប្រចាំមណ្ឌល កម្មវិធីកិច្ចប្រជុំគួរធ្វើឡើងដូចដែលបានរៀបរាប់ក្នុងកិច្ចប្រជុំកិច្ចបម្រើនិងជីវិត កំណត់សម្រាប់កិច្ចប្រជុំ តែមានការផ្លាស់ប្ដូរដូចតទៅ៖ ការសិក្សាគម្ពីរជាក្រុមជំនុំក្នុងផ្នែករបៀបរស់នៅជាគ្រិស្តសាសនិក នឹងត្រូវជំនួសដោយសុន្ទរកថារបស់អ្នកត្រួតពិនិត្យប្រចាំមណ្ឌលសម្រាប់ក្រុមជំនុំ ដែលមានរយៈពេល៣០នាទី។ មុនសុន្ទរកថានេះ អធិការីកិច្ចប្រជុំកិច្ចបម្រើនិងជីវិតនឹងសើរើកម្មវិធីឡើងវិញ ប្រាប់អំពីកម្មវិធីសប្ដាហ៍បន្ទាប់ ជូនដំណឹងណានិងអានសំបុត្រណាដែលចាំបាច់ ហើយបន្ទាប់មកគាត់នឹងអញ្ជើញអ្នកត្រួតពិនិត្យប្រចាំមណ្ឌលឲ្យឡើងថ្លែងសុន្ទរកថា។ ក្រោយពីថ្លែងចប់ អ្នកត្រួតពិនិត្យប្រចាំមណ្ឌលនឹងបញ្ចប់កិច្ចប្រជុំដោយអញ្ជើញអ្នកចូលរួមឲ្យច្រៀងចម្រៀងមួយដែលគាត់បានជ្រើសរើស។ គាត់អាចសុំបងប្រុសម្នាក់ទៀតអធិដ្ឋានបញ្ចប់។ ក្នុងអំឡុងទស្សនកិច្ចរបស់អ្នកត្រួតពិនិត្យប្រចាំមណ្ឌល មិនគួរមានសាលាតូចឯទៀតជាភាសារបស់ក្រុមជំនុំទេ។ បើក្រុមជំនុំគាំទ្រក្រុមណាមួយ ក្រុមនោះអាចមានកិច្ចប្រជុំដូចធម្មតា ទោះជាក្រុមជំនុំដែលគាំទ្រមានទស្សនកិច្ចរបស់អ្នកត្រួតពិនិត្យប្រចាំមណ្ឌលក្ដី។ ក៏ប៉ុន្តែ ក្រុមនោះគួរមកចូលរួមជាមួយក្រុមជំនុំដែលគាំទ្រ ដើម្បីស្ដាប់សុន្ទរកថារបស់អ្នកត្រួតពិនិត្យប្រចាំមណ្ឌលសម្រាប់ក្រុមជំនុំ។
សប្ដាហ៍ដែលមានសន្និបាតឬមហាសន្និបាត
២១. ក្នុងអំឡុងសប្ដាហ៍ដែលមានសន្និបាតឬមហាសន្និបាត នោះក្រុមជំនុំគ្មានកិច្ចប្រជុំទេ។ សូមលើកទឹកចិត្តក្រុមជំនុំឲ្យពិចារណាព័ត៌មានក្នុងកម្មវិធីកិច្ចប្រជុំសម្រាប់សប្ដាហ៍នោះដោយខ្លួនឯង ឬជាក្រុមគ្រួសារ។
សប្ដាហ៍ដែលមានពិធីរំលឹក
២២. ពេលមានពិធីរំលឹកនៅរវាងថ្ងៃច័ន្ទដល់ថ្ងៃសុក្រ នោះគ្មានកិច្ចប្រជុំកិច្ចបម្រើនិងជីវិតនៅសប្ដាហ៍នោះទេ។
អ្នកត្រួតពិនិត្យកិច្ចប្រជុំកិច្ចបម្រើនិងជីវិត
២៣. អ្នកចាស់ទុំម្នាក់ដែលក្រុមអ្នកចាស់ទុំបានជ្រើសរើស នឹងបម្រើជាអ្នកត្រួតពិនិត្យកិច្ចប្រជុំកិច្ចបម្រើនិងជីវិត។ គាត់មានភារកិច្ចធ្វើឲ្យកិច្ចប្រជុំនេះមានរបៀបរៀបរយនិងមានដំណើរការស្របតាមការណែនាំក្នុងឯកសារនេះ។ គាត់គួររក្សាឲ្យមានការប្រាស្រ័យទាក់ទងល្អជាមួយនឹងអ្នកជូនឱវាទរង។ ពេលអ្នកត្រួតពិនិត្យកិច្ចប្រជុំកិច្ចបម្រើនិងជីវិតទទួលឯកសារកិច្ចបម្រើនិងជីវិត កំណត់សម្រាប់កិច្ចប្រជុំ គាត់នឹងចាត់ចែងអ្នកថ្លែងចំពោះគ្រប់ផ្នែកទាំងអស់ក្នុងកិច្ចប្រជុំកិច្ចបម្រើនិងជីវិតសម្រាប់ពីរខែនោះភ្លាមៗ។ នេះរួមបញ្ចូលការជ្រើសរើសអធិការីនិងអ្នកថ្លែងសម្រាប់ផ្នែកផ្សេងៗ ពីក្នុងចំណោមអ្នកដែលមានការយល់ព្រមពីក្រុមអ្នកចាស់ទុំ។ គាត់ក៏ត្រូវចាត់ចែងភារកិច្ចរបស់សិស្សផងដែរ។ (សូមមើលវគ្គ៣-១៦ និង២៤) ពេលរៀបចំសុន្ទរកថារបស់សិស្ស គាត់គួរគិតពិចារណាអំពីអាយុ បទពិសោធន៍ និងស្ថានភាពរបស់សិស្ស។ គាត់គួរប្រើសមត្ថភាពវែកញែកដូចគ្នាពេលចាត់ចែងអ្នកថ្លែងផ្សេងទៀតសម្រាប់កិច្ចប្រជុំ។ សិស្សម្នាក់ៗគួរទទួលភារកិច្ចរបស់គាត់តាមរយៈឯកសារភារកិច្ចសម្រាប់កិច្ចប្រជុំកិច្ចបម្រើនិងជីវិតជាគ្រិស្តសាសនិក (S-89) យ៉ាងហោចណាស់បីសប្ដាហ៍មុនថ្ងៃដែលគាត់ត្រូវថ្លែង។ អ្នកត្រួតពិនិត្យកិច្ចប្រជុំកិច្ចបម្រើនិងជីវិតគួរប្រាកដថាកាលវិភាគមួយច្បាប់ដែលគាត់បានរៀបចំសម្រាប់កិច្ចប្រជុំបានត្រូវបិទនៅលើក្ដារព័ត៌មាន។ ក្រុមអ្នកចាស់ទុំអាចជ្រើសរើសអ្នកចាស់ទុំម្នាក់ទៀតឬជំនួយការខាងកិច្ចបម្រើម្នាក់ឲ្យជួយគាត់។ ប៉ុន្តែ មានតែអ្នកចាស់ទុំប៉ុណ្ណោះដែលគួរជ្រើសរើសអធិការីឬអ្នកថ្លែងសម្រាប់ផ្នែកផ្សេងៗដែលមិនមែនជាភារកិច្ចរបស់សិស្ស។
អធិការីកិច្ចប្រជុំកិច្ចបម្រើនិងជីវិត
២៤. ជារៀងរាល់សប្ដាហ៍ អ្នកចាស់ទុំម្នាក់នឹងធ្វើជាអធិការីសម្រាប់កិច្ចប្រជុំកិច្ចបម្រើនិងជីវិត។ (ក្នុងក្រុមជំនុំដែលមិនសូវមានអ្នកចាស់ទុំ ជំនួយការខាងកិច្ចបម្រើដែលមានគុណសម្បត្តិគ្រប់គ្រាន់អាចបំពេញភារកិច្ចនេះបាន បើចាំបាច់) គាត់មានភារកិច្ចរៀបចំពាក្យផ្ដើម និងសេចក្ដីបញ្ចប់។ ម្យ៉ាងទៀត គាត់ក៏មានភារកិច្ចប្រាប់អ្នកស្ដាប់អំពីសុន្ទរកថាជាបន្តបន្ទាប់ហើយអញ្ជើញអ្នកថ្លែងម្នាក់ៗឲ្យឡើងវេទិកា តែគាត់គួររក្សាពាក្យណែនាំទាំងនេះឲ្យខ្លី។ អាស្រ័យលើចំនួនអ្នកចាស់ទុំ គាត់ប្រហែលជានឹងដឹកនាំផ្នែកខ្លះក្នុងកិច្ចប្រជុំដែរ ជាពិសេសផ្នែកដែលមានវីដេអូប៉ុន្តែមិនចាំបាច់ពិភាក្សាអំពីវីដេអូនោះទេ។ ក្រុមអ្នកចាស់ទុំនឹងជ្រើសរើសអ្នកចាស់ទុំណាដែលមានគុណសម្បត្តិគ្រប់គ្រាន់ដើម្បីបំពេញភារកិច្ចនេះ។ ពួកអ្នកចាស់ទុំដែលបានត្រូវជ្រើសរើសនឹងបម្រើជាអធិការីជាទៀងទាត់។ ស្របតាមស្ថានភាពក្នុងតំបន់ អ្នកត្រួតពិនិត្យកិច្ចប្រជុំកិច្ចបម្រើនិងជីវិត អាចបម្រើជាអធិការីញឹកញាប់ជាងអ្នកចាស់ទុំឯទៀតដែលមានគុណសម្បត្តិគ្រប់គ្រាន់។ បើអ្នកចាស់ទុំម្នាក់មានសមត្ថភាពគ្រប់គ្រាន់ដើម្បីដឹកនាំការសិក្សាគម្ពីរជាក្រុមជំនុំ នោះគាត់ទំនងជាមានសមត្ថភាពដើម្បីធ្វើជាអធិការីកិច្ចប្រជុំ។ សូមចាំថាពេលអ្នកចាស់ទុំដែលជាអធិការីផ្ដល់ការសរសើរគាត់គួរបង្ហាញសេចក្ដីស្រឡាញ់ហើយផ្ដល់ការសរសើរដែលមានប្រយោជន៍។ បើចាំបាច់ គាត់ក៏ត្រូវផ្ដល់ឱវាទដែរដល់បងប្អូនដែលបំពេញភារកិច្ចជាសិស្ស។ ម្យ៉ាងទៀត អធិការីមានភារកិច្ចធ្វើឲ្យប្រាកដថាកិច្ចប្រជុំចប់តាមពេលកំណត់។ (សូមមើលវគ្គ១៧និង១៩) បើមានកន្លែងគ្រប់គ្រាន់នៅលើវេទិកា អធិការីអាចសុំដាក់មេក្រូបញ្ឈរមួយលើវេទិកាដើម្បីគាត់អាចប្រើពេលអញ្ជើញអ្នកថ្លែងម្នាក់ៗ ហើយដំណាលគ្នានោះអ្នកថ្លែងអាចឡើងមកកាន់មេក្រូនៅតុវេទិកា។ ម្យ៉ាងទៀត អធិការីប្រហែលចង់អង្គុយនៅតុមួយលើវេទិកាក្នុងអំឡុងពេលដែលសិស្សអានអំណានគម្ពីរ ឬបំពេញភារកិច្ចក្នុងផ្នែកចូរខំព្យាយាមក្នុងកិច្ចបម្រើផ្សាយ។ ការធ្វើដូច្នេះអាចជួយសន្សំពេលវេលា។
អ្នកជូនឱវាទរង
២៥. បើអាចធ្វើបាន ជាការល្អដែលអ្នកចាស់ទុំដែលមានបទពិសោធន៍ក្នុងការថ្លែងសុន្ទរកថាធ្វើជាអ្នកជូនឱវាទរង។ អ្នកជូនឱវាទរងមានភារកិច្ចជូនឱវាទដែលចាំបាច់ដល់អ្នកចាស់ទុំនិងជំនួយការខាងកិច្ចបម្រើដែលថ្លែងសុន្ទរកថា ឬដឹកនាំផ្នែកណាក៏ដោយ មិនថាផ្នែកមួយក្នុងកិច្ចប្រជុំកិច្ចបម្រើនិងជីវិត សុន្ទរកថាសាធារណៈ ការអានឬការដឹកនាំការសិក្សាទស្សនាវដ្ដីប៉មយាម ឬការសិក្សាគម្ពីរជាក្រុមជំនុំ។ ប៉ុន្តែ គាត់មិនជូនឱវាទនេះពីវេទិកាទេ។ (សូមមើលវគ្គ១៩) ប្រសិនបើក្រុមជំនុំមានអ្នកចាស់ទុំមួយចំនួនដែលប៉ិនប្រសប់ក្នុងការថ្លែងនិងការបង្រៀន នោះអ្នកចាស់ទុំដែលមានគុណសម្បត្តិគ្រប់គ្រាន់អាចផ្លាស់ប្ដូរគ្នាធ្វើជាអ្នកជូនឱវាទរងមួយឆ្នាំម្ដង។ អ្នកជូនឱវាទរងមិនចាំបាច់ជូនឱវាទរាល់ដងក្រោយពីអ្នកចាស់ទុំឬជំនួយការខាងកិច្ចបម្រើថ្លែងនោះទេ។
សាលាតូចឯទៀត
២៦. អាស្រ័យទៅលើចំនួនសិស្ស ក្រុមជំនុំអាចរៀបចំសាលាតូចឯទៀត ដើម្បីឲ្យសិស្សថ្លែងសុន្ទរកថា។ សាលាតូចនីមួយៗគួរមានអ្នកជូនឱវាទដែលមានគុណសម្បត្តិគ្រប់គ្រាន់។ ជាការល្អដែលអ្នកចាស់ទុំម្នាក់បំពេញភារកិច្ចនេះ តែបើចាំបាច់ ជំនួយការខាងកិច្ចបម្រើដែលមានគុណសម្បត្តិគ្រប់គ្រាន់ក៏អាចធ្វើបានដែរ។ ក្រុមអ្នកចាស់ទុំគួរជ្រើសរើសអ្នកណាដែលអាចបំពេញភារកិច្ចនេះ ហើយសម្រេចចិត្តថាតើត្រូវប្ដូរវេនគ្នាឬយ៉ាងណា។ អ្នកជូនឱវាទគួរធ្វើតាមការណែនាំដែលបានត្រូវរៀបរាប់ក្នុងវគ្គ១៨។ បើមានសាលាតូចឯទៀត នោះក្រោយពីចប់ផ្នែកចូរខំស្វែងរកចំណេះវិសេសពីបណ្ដាំរបស់ព្រះ អធិការីគួរអញ្ជើញសិស្សដែលត្រូវថ្លែងសុន្ទរកថាក្នុងសាលាឯទៀតឲ្យទៅសាលានោះ។ សិស្សគួរត្រឡប់មកចូលរួមជាមួយនឹងក្រុមជំនុំវិញក្រោយផ្នែកចុងក្រោយរបស់សិស្សចប់។
វីដេអូ
២៧. ក្នុងកិច្ចប្រជុំនេះនឹងមានការបញ្ចាំងវីដេអូផ្សេងៗ។ វីដេអូដែលត្រូវបញ្ចាំងក្នុងកិច្ចប្រជុំសម្រាប់កិច្ចបម្រើនិងជីវិតនឹងមានក្នុងកម្មវិធីJWបណ្ណាល័យ® ដែលអាចមានក្នុងឧបករណ៍អេឡិចត្រូនិកផ្សេងៗ។
© 2023 Watch Tower Bible and Tract Society of Pennsylvania
S-38-CB 11/23