សូមទុក
ដឹកនាំការសិក្សាព្រះគម្ពីរដែលរីកចំរើន
សន្លឹកបន្ថែមនេះសង្ខេបនូវគោលចំណុចពីអត្ថបទកិច្ចបំរើព្រះរាជាណាចក្រយើងស្តីអំពីការដឹកនាំការសិក្សាព្រះគម្ពីរដែលរីកចំរើន។ យើងសូមលើកទឹកចិត្តបងប្អូនទាំងឡាយឲ្យរក្សាទុកសន្លឹកបន្ថែមនេះសំរាប់ប្រើជាឯកសារយោងពេលដឹកនាំការសិក្សា។ ម្យ៉ាងទៀត ចំណុចផ្សេងៗក្នុងសន្លឹកបន្ថែមនេះអាចត្រូវលើកបញ្ជាក់នៅពេលប្រជុំផ្សព្វផ្សាយ។ អ្នកត្រួតពិនិត្យកិច្ចបំរើក៏អាចប្រើចំណុចទាំងនេះជាមូលដ្ឋាននៃសុន្ទរកថាដែលគាត់ថ្លែងសំរាប់ក្រុមសិក្សាសៀវភៅនីមួយៗ។
ភាគទី១: តើការសិក្សាព្រះគម្ពីរជាអ្វី?
ប្រសិនបើអ្នកមានការពិគ្រោះអំពីបទគម្ពីរ ដោយប្រើព្រះគម្ពីរជាមួយនឹងប្រកាសនវត្ថុដែលត្រូវបានណែនាំឲ្យប្រើ ទោះជាការពិគ្រោះនោះខ្លីក៏ដោយឲ្យតែទៀងទាត់ នោះអ្នកកំពុងតែដឹកនាំការសិក្សាព្រះគម្ពីរហើយ។ យើងអាចរាប់ការសិក្សានោះ បើបានសិក្សាពីរដងក្រោយបានបង្ហាញអំពីរបៀបសិក្សា ហើយបើយើងគិតថា បុគ្គលនោះនឹងបន្តសិក្សា។—km ៧/០៤ ទំព័រ១
ប្រកាសនវត្ថុដែលត្រូវប្រើសំរាប់ការសិក្សា
◼ តើព្រះតម្រូវអ្វីពីយើង?
◼ ចំណេះដែលនាំទៅដល់ជីវិតអស់កល្បជានិច្ច
◼ ចូរថ្វាយបង្គំព្រះពិតតែមួយ
◼ អាចប្រើសៀវភៅលោកអ្នកអាចធ្វើជាមិត្តសំឡាញ់របស់ព្រះ! ដើម្បីបង្រៀនមនុស្សដែលមានកំរិតវប្បធម៌ទាបឬក៏មិនសូវចេះអក្សរ។
ភាគទី២: រៀបចំដឹកនាំការសិក្សា
យើងត្រូវការពន្យល់ព័ត៌មានតាមរបៀបដែលអាចមានអានុភាពជ្រួតជ្រាបដល់ចិត្តរបស់សិស្ស។ នេះតម្រូវឲ្យយើងរៀបចំឲ្យបានហ្មត់ចត់ដោយគិតពីសេចក្ដីត្រូវការរបស់សិស្សនោះ។—km ៨/០៤ ទំព័រ១
វិធីរៀបចំ
◼ ចូរឆ្លៀតពេលពិនិត្យមើលចំណងជើងនៃមេរៀនក្នុងជំពូកនោះ ចំណងជើងតូច និងរូបភាពផ្សេងៗក្នុងជំពូកឬមេរៀន។
◼ ចូររកចម្លើយចំពោះសំនួរដែលមានស្រាប់ក្នុងអត្ថបទ ដោយគូសតែពាក្យនិងល្បះសំខាន់ៗតែប៉ុណ្ណោះ។
◼ ចូរសម្រេចចិត្តថាត្រូវអានបទគម្ពីរណាខ្លះក្នុងកំឡុងពេលសិក្សា។ ចូរកត់សរសេរបទគម្ពីរនោះយ៉ាងសង្ខេបនៅរឹមទំព័រនៃសៀវភៅសិក្សា។
◼ ចូររៀបចំដើម្បីពិនិត្យមើលគោលចំណុចឡើងវិញដោយសង្ខេបជាមួយសិស្សក្រោយសិក្សាចប់។
ចូរសម្របសម្រួលមេរៀននោះទៅតាមតម្រូវការរបស់សិស្ស
◼ ចូរអធិស្ឋានអំពីសិស្សនោះនឹងតម្រូវការរបស់គាត់។
◼ ចូរព្យាយាមគិតទុកជាមុនអំពីចំណុចណាខ្លះដែលគាត់ពិបាកយល់ឬពិបាកជឿ។
◼ ចូរពិចារណាថា៖ ‹តើគាត់ត្រូវយល់ចំណុចអ្វីឬតើគាត់ត្រូវធ្វើអ្វីដើម្បីឲ្យបានរីកចំរើនខាងវិញ្ញាណ? តើខ្ញុំអាចបង្រៀនឲ្យជ្រួតជ្រាបដល់ចិត្តគាត់បានយ៉ាងដូចម្ដេច?›។
◼ តាមតម្រូវការរបស់សិស្ស ចូររៀបចំទុកជាមុននូវឧទាហរណ៍ វិធីពន្យល់ ឬសំនួរមួយចំនួនដើម្បីជួយសិស្សនោះឲ្យយល់ចំណុចណាមួយឬបទគម្ពីរណាមួយ។
ភាគទី៣: ការប្រើបទគម្ពីរដោយប្រសិទ្ធភាព
យើងដឹកនាំការសិក្សាព្រះគម្ពីរក្នុងបំណង«បញ្ចុះបញ្ចូលឲ្យមានសិស្ស» ដោយជួយឲ្យមនុស្សយល់និងជឿតាមសេចក្ដីបង្រៀនក្នុងព្រះបន្ទូលរបស់ព្រះ ហើយអនុវត្តតាមក្នុងជីវិតរបស់ពួកគេ។ (ម៉ាថ. ២៨:១៩, ២០; ១ថែ. ២:១៣) ដូច្នេះ ការសិក្សានោះគួរមានមូលដ្ឋានទៅលើបទគម្ពីរ។—km ១១/០៤ ទំព័រ៤
ចូរបង្រៀនដោយផ្អែកលើព្រះបន្ទូលរបស់ព្រះ
◼ បង្ហាញសិស្សពីរបៀបបើកព្រះគម្ពីររបស់ខ្លួន។
◼ ចូរអាននិងពិភាក្សាបទគម្ពីរដែលបង្ហាញមូលដ្ឋានសំរាប់ជំនឿរបស់យើង។
◼ ចូរប្រើសំនួរ។ ជាជាងពន្យល់បទគម្ពីរជូនសិស្សរបស់អ្នក ចូរឲ្យគាត់ពន្យល់អ្នកវិញ។
◼ ចូរបង្រៀនឲ្យស្រួលយល់។ មិនត្រូវខំពន្យល់បទគម្ពីរនីមួយៗក្នុងមេរៀនយ៉ាងល្អិតល្អន់នោះទេ។ ចូរលើកឡើងតែអ្វីដែលចាំបាច់ដើម្បីបញ្ជាក់ចំណុច។
◼ ចូរបញ្ជាក់វិធីដែលអាចអនុវត្តតាមបទគម្ពីរ។ ចូរជួយឲ្យសិស្សយល់នូវមូលហេតុដែលបទគម្ពីរនោះទាក់ទងនឹងគាត់។
ភាគទី៤: ការបង្រៀនសិស្សឲ្យចេះរៀបចំមេរៀន
សិស្សណាដែលអានមេរៀនទុកជាមុន គូសចម្លើយ ហើយខំឆ្លើយចេញពីចិត្ត សិស្សនោះរីកចំរើនយ៉ាងលឿនខាងវិញ្ញាណ។ ហេតុនេះហើយ ក្រោយពីអ្នកចាប់ផ្ដើមបង្រៀនសិស្សម្នាក់ជាទៀងទាត់នោះ ចូររៀបចំមេរៀនមួយជាមួយនឹងគាត់ ដើម្បីបង្រៀនវិធីរៀបចំ។ សំរាប់សិស្សភាគច្រើន ជាការល្អបើរៀបចំជំពូកមួយទាំងមូលឬមេរៀនមួយទាំងមូលជាមួយគ្នា។—km ១២/០៤ ទំព័រ១
ការគូសចម្លើយហើយសរសេរកំណត់
◼ ចូរពន្យល់នូវវិធីរកចម្លើយដែលចំនឹងសំនួរសំរាប់វគ្គនោះ។
◼ ចូរបង្ហាញសៀវភៅសិក្សារបស់អ្នកឲ្យសិស្សឃើញថា ក្នុងនោះអ្នកបានគូសតែពាក្យឬល្បះសំខាន់ៗ។
◼ ចូរជួយឲ្យសិស្សយល់ថា បទគម្ពីរនីមួយៗគាំទ្រចំណុចមួយដែលមាននៅក្នុងវគ្គនោះហើយចូរបង្ហាញសិស្សនូវវិធីសរសេរកំណត់ខ្លីៗនៅរឹមទំព័រក្នុងសៀវភៅរបស់គាត់។
ការមើលត្រួសៗហើយការរៀនសាឡើងវិញ
◼ ចូរបង្ហាញសិស្សរបៀបមើលព័ត៌មាននោះត្រួសៗដោយអានចំណងជើងមេរៀនឬជំពូក ចំណងជើងតូច ហើយមើលរូបភាពមុនដែលរៀបចំមេរៀន។
◼ ចូរលើកទឹកចិត្តសិស្សឲ្យ ឆ្លៀតពេលបន្ដិចដើម្បីមើលចំណុចសំខាន់ៗឡើងវិញ ពេលដែលរៀបចំចប់ហើយនោះ។
ភាគទី៥: របៀបដឹងថាត្រូវសិក្សាប៉ុន្មានវគ្គ
ចំនួនវគ្គដែលអាចសិក្សាអាស្រ័យទៅលើសមត្ថភាពនិងកាលៈទេសៈរបស់អ្នកបង្រៀនផងនិងសិស្សផង។—km ១/០៥ ទំព័រ១
ពង្រឹងជំនឿឲ្យរឹងមាំ
◼ ការជួយឲ្យសិស្សរបស់យើងយល់ច្បាស់គឺសំខាន់ជាងការរៀនច្រើនវគ្គ។
◼ ចូរចំណាយពេលតាមដែលត្រូវការ ដើម្បីជួយឲ្យសិស្សយល់និងជឿលើអ្វីដែលគាត់កំពុងតែរៀន។
◼ ទុកពេលឲ្យបានគ្រប់គ្រាន់ដើម្បីបញ្ជាក់ទៅលើបទគម្ពីរសំខាន់ៗដែលជាមូលដ្ឋាននៃអ្វីដែលត្រូវបង្រៀន។
កុំនិយាយចាកសាច់រឿង
◼ បើសិស្សរបស់យើងចូលចិត្តនិយាយយូរអំពីរឿងផ្ទាល់ខ្លួននោះ ប្រហែលជាយើងត្រូវរៀបចំនិយាយជាមួយនឹងគាត់អំពីរឿងទាំងនោះបន្ទាប់ពីសិក្សាចប់ហើយ។
◼ កុំនិយាយច្រើនពេកក្នុងកំឡុងការសិក្សា។ មិនគួររៀបរាប់ចំណុចនិងបទពិសោធន៍បន្ថែមច្រើនពេករហូតដល់សិស្សមិនអាចទទួលបានចំណេះពិតអំពីសេចក្ដីបង្រៀនបឋមក្នុងព្រះគម្ពីរនោះឡើយ។
ភាគទី៦: តើគួរធ្វើយ៉ាងណាពេលដែលសិស្សសួរសំនួរ?
ពេលដែលចាប់ផ្ដើមបង្រៀនសិស្សព្រះគម្ពីរជាទៀងទាត់នោះ យកល្អយើងសិក្សាមេរៀនតាមលំដាប់លំដោយ ជាជាងរៀនមេរៀនណាក៏បានតាមតែចិត្តចង់។ នេះនឹងជួយឲ្យសិស្សចាប់ផ្ដើមកសាងមូលដ្ឋានលើចំណេះពិត ហើយរីកចំរើនខាងវិញ្ញាណ។—km ២/០៥ ទំព័រ៦
ចូរគិតពិចារណាមុននឹងឆ្លើយ
◼ ធម្មតា សំនួរណាដែលទាក់ទងនឹងសាច់រឿងដែលកំពុងតែសិក្សានោះ អ្នកអាចឆ្លើយបាននៅពេលនោះឯង។
◼ សំនួរណាដែលមិនទាក់ទងនឹងសាច់រឿងដែលកំពុងតែរៀន ឬក៏តម្រូវឲ្យធ្វើការស្រាវជ្រាវថែមទៀត អាចឆ្លើយបាននៅពេលផ្សេងទៀត។ ជាការល្អបើកត់សរសេរសំនួរទាំងនោះ។
◼ បើសិស្សពិបាកជឿសេចក្ដីបង្រៀនណាមួយ ចូរមើលព័ត៌មានបន្ថែមជាមួយគ្នា ដែលអាចពន្យល់ឲ្យបានស៊ីជំរៅនូវសេចក្ដីបង្រៀននោះ។
◼ ប្រសិនបើសិស្សនៅតែមិនជឿ ចូរទុករឿងនោះសំរាប់ការបង្រៀននៅពេលក្រោយ រួចបន្តការសិក្សាដូចធម្មតាវិញ។
ចូរបង្រៀនដោយចិត្តរាបទាប
◼ បើអ្នកមិនដឹងច្បាស់អំពីចម្លើយចំពោះសំនួររបស់សិស្ស កុំប្រថុយឆ្លើយតាមគំនិតអ្នកឡើយ។
◼ បន្ដិចម្ដងៗចូរបង្រៀនសិស្សនូវវិធីធ្វើការស្រាវជ្រាវដោយខ្លួនឯង។
ភាគទី៧: ការអធិស្ឋានពេលចាប់ផ្ដើមនិងបញ្ចប់ការសិក្សា
បើគ្មានជំនួយពីព្រះយេហូវ៉ា នោះសិស្សព្រះគម្ពីរពុំអាចរីកចំរើនបានឡើយ។ ហេតុនេះហើយ គឺជាការសមរម្យដែលអធិស្ឋានពេលដែលចាប់ផ្ដើមនិងបញ្ចប់ការសិក្សា។—km ៣/០៥ ទំព័រ៦
តើគួរអធិស្ឋានចាប់ពីពេលណា?
◼ យើងអាចអធិស្ឋានចាប់ពីលើកទីមួយដែលយើងបង្រៀនសិស្ស បើសិស្សនោះធ្លាប់ដឹងអំពីរបៀបគ្រីស្ទានអធិស្ឋាន។
◼ ចំណែកសិស្សឯទៀតវិញ យើងប្រហែលជាត្រូវពិចារណាថា ពេលណាគឺសមរម្យសំរាប់ចាប់ផ្ដើមអធិស្ឋាននៅឯការសិក្សា។
◼ អ្នកអាចអានទំនុកដំកើង ២៥:៤, ៥ និងយ៉ូហានទី១ ៥:១៤ ដើម្បីជួយឲ្យសិស្សយល់នូវមូលហេតុដែលគួរអធិស្ឋាន។
◼ អ្នកអាចអានយ៉ូហាន ១៥:១៦ ដើម្បីពន្យល់នូវសារៈសំខាន់នៃការអធិស្ឋានទូលព្រះយេហូវ៉ាតាមព្រះយេស៊ូគ្រីស្ទ។
អ្វីដែលសេចក្ដីអធិស្ឋាននោះអាចរួមបញ្ចូល
◼ ជាការសមរម្យ ដែលសរសើរព្រះយេហូវ៉ាដោយសារទ្រង់ជាប្រភពនៃការណែនាំនោះ។
◼ ចូរទូលដោយប្រើសំដីដែលសឲ្យឃើញថា យើងយកចិត្តទុកដាក់យ៉ាងស្មោះចំពោះសិស្ស។
◼ ចូរទូលបញ្ជាក់នូវកតញ្ញូធម៌ចំពោះអង្គការរបស់ព្រះយេហូវ៉ា។
◼ ចូរសុំព្រះយេហូវ៉ាប្រទានពរទៅលើការព្យាយាមរបស់សិស្សក្នុងការអនុវត្តតាមអ្វីដែលគាត់កំពុងតែរៀន។
ភាគទី៨: បង្ហាញឲ្យស្គាល់អង្គការរបស់ព្រះ
គោលដៅក្នុងការដឹកនាំការសិក្សាព្រះគម្ពីរ មិនត្រឹមតែបង្រៀនព័ត៌មានខាងលទ្ធិសាសនាប៉ុណ្ណោះទេ ប៉ុន្តែក៏ជួយបណ្ដាសិស្សព្រះគម្ពីរឲ្យទៅជាសមាជិកក្រុមជំនុំគ្រីស្ទានផងដែរ។ សូមចំណាយពេលពីរបីនាទីរាល់សប្ដាហ៍នៅឯការសិក្សាដើម្បីប្រាប់អំពីអង្គការព្រះយេហូវ៉ា។—km ៤/០៥ ទំព័រ៨
កិច្ចប្រជុំនៃក្រុមជំនុំ
◼ ពណ៌នាអំពីកិច្ចប្រជុំប្រចាំសប្ដាហ៍ទាំងប្រាំ ម្ដងមួយៗ។ សូមអញ្ជើញពួកគេឲ្យចូលរួមកិច្ចប្រជុំចាប់តាំងពីការសិក្សាលើកដំបូងនោះឯង។
◼ សូមប្រាប់ពីចំណុចលេចធ្លោជាងគេដែលត្រូវបានថ្លែងនៅឯកិច្ចប្រជុំ។
◼ នៅពេលដែលមានបុណ្យរំឭក សន្និបាតនានា ទស្សនកិច្ចអ្នកត្រួតពិនិត្យតាមមណ្ឌលជិតមកដល់នោះ សូមយកពេលដើម្បីបង្កើនចិត្តសាទរចំពោះសំវិធានការទាំងនេះ។
◼ សូមប្រើរូបភាពនៅក្នុងប្រកាសនវត្ថុរបស់យើងដើម្បីជួយសិស្សឲ្យមើលឃើញក្នុងគំនិតរបស់គេនូវអ្វីៗដែលកើតមានឡើងនៅឯកិច្ចប្រជុំ។
◼ លើកទឹកចិត្តពួកគេឲ្យអានសៀវភៅស្មរបន្ទាល់ព្រះយេហូវ៉ា តើពួកគេជាអ្នកណា? តើគេជឿអ្វីខ្លះ?
ចូរប្រើកាសែតវីដេអូដើម្បីបង្កើតឲ្យសិស្សមានកតញ្ញូធម៌
◼ ស្មរបន្ទាល់ព្រះយេហូវ៉ា អង្គការដែលគាំទ្រឈ្មោះនោះ
◼ ភាតរភាពទាំងមូលរបស់យើង
◼ មានសាមគ្គីភាពដោយសារការបង្រៀនពីព្រះ
◼ រហូតដល់ចុងផែនដីបំផុត
ភាគទី៩: រៀបចំសិស្សព្រះគម្ពីរដើម្បីឲ្យធ្វើបន្ទាល់ក្រៅផ្លូវការ
ពេលដែលសិស្សព្រះគម្ពីរចាប់ផ្ដើមជឿទៅលើអ្វីដែលពួកគេកំពុងតែរៀននោះ នោះជំរុញឲ្យពួកគេប្រាប់អ្នកឯទៀត។—km ៥/០៥ ទំព័រ១
លើកទឹកចិត្តពួកគេឲ្យធ្វើបន្ទាល់
◼ តើសិស្សមានមិត្តភក្ដិឬសមាជិកក្នុងក្រុមគ្រួសារដែលគាត់អាចអញ្ជើញឲ្យចូលរួមការសិក្សាផងដែរឬទេ?
◼ តើមានអ្នកធ្វើការជាមួយ សិស្សរួមថ្នាក់ ឬអ្នកស្និទ្ធស្នាលឯទៀតណាបានបង្ហាញនូវចំណាប់អារម្មណ៍ឬទេ?
ការបង្ហាត់សិស្សឲ្យចេះប្រាប់ពីជំនឿរបស់ពួកគេ
◼ ក្នុងកំឡុងការសិក្សា ចូររើសចំណុចផ្សេងៗសំរាប់សួរសិស្សថា : «តើអ្នកនឹងប្រើព្រះគម្ពីរដើម្បីពន្យល់ចំណុចនេះដល់ក្រុមគ្រួសារអ្នកយ៉ាងដូចម្ដេច?»។
◼ ជួយសិស្សឲ្យយល់ពីភាពចាំបាច់នៃការនិយាយដោយគោរពនិងប្រើសំដីដ៏សប្បុរសពេលនិយាយជាមួយអ្នកឯទៀតអំពីព្រះនិងគោលបំណងរបស់ទ្រង់។
◼ សិស្សអាចប្រើសៀវភៅស្តើង ស្មរបន្ទាល់ព្រះយេហូវ៉ា តើពួកគេជាអ្នកណា? តើគេជឿអ្វីខ្លះ? ដើម្បីជួយមិត្តភក្ដិនិងសមាជិកក្រុមគ្រួសារឲ្យយល់អំពីជំនឿនិងសកម្មភាពរបស់យើងដែលមានមូលដ្ឋានលើព្រះគម្ពីរនោះ។
ភាគទី១០: បង្ហាត់សិស្សក្នុងកិច្ចបំរើផ្សាយពីផ្ទះមួយទៅផ្ទះមួយ
កាលណាបណ្ដាអ្នកចាស់ទុំកំណត់ថាសិស្សព្រះគម្ពីរណាម្នាក់មានលក្ខណៈគ្រប់គ្រាន់ដើម្បីក្លាយជាអ្នកផ្សព្វផ្សាយដែលមិនទាន់ធ្វើបុណ្យជ្រមុជទឹកនោះ គាត់អាចចាប់ផ្ដើមទៅផ្សព្វផ្សាយជាសាធារណៈជាមួយនឹងក្រុមជំនុំ។—km ៦/០៥ ទំព័រ១
វិធីរៀបចំជាមួយគ្នា
◼ ចូរប្រាប់សិស្សនូវរបៀបដែលគាត់អាចរកឃើញពាក្យផ្សាយផ្សេងៗ។
◼ ជួយគាត់ជ្រើសរើសពាក្យផ្ដើមដែលស្រួលហើយដែលជាប្រយោជន៍សំរាប់តំបន់ផ្សាយ។
◼ ចូរលើកទឹកចិត្តសិស្សឲ្យអានបទគម្ពីរនៅក្នុងកិច្ចបំរើផ្សាយ។
◼ ចូរហាត់ជាមួយគ្នា។ ចូរបង្ហាញសិស្សរបៀបប្រឈមនឹងការតបឆ្លើយដោយប៉ិនប្រសប់។
ការផ្សព្វផ្សាយជាមួយគ្នា
◼ សូមឲ្យសិស្សសង្កេតមើលពេលដែលអ្នកប្រើពាក្យផ្សាយដែលទាំងពីរនាក់បានរៀបចំជាមួយគ្នានោះ។
◼ សូមយោគយល់នឹងបុគ្គលិកលក្ខណៈនិងសមត្ថភាពរបស់សិស្ស។ ក្នុងករណីខ្លះ ប្រហែលជាល្អជាងបើឲ្យសិស្សនោះប្រាប់តែមួយផ្នែកនៃពាក្យផ្សាយនោះ។
◼ ជួយអ្នកផ្សាយថ្មីនោះរៀបចំកាលវិភាគទៀងទាត់មួយសំរាប់ចូលរួមកិច្ចផ្សព្វផ្សាយ។
ភាគទី១១: ការជួយអ្នកផ្សព្វផ្សាយថ្មីឲ្យធ្វើការត្រឡប់ទៅជួប
ការរៀបចំសំរាប់ត្រឡប់ទៅជួបចាប់ផ្ដើមពេលជួបម្ចាស់ផ្ទះជាលើកដំបូង។ លើកទឹកចិត្តសិស្សឲ្យយកចិត្តទុកដាក់ដោយស្មោះនឹងអ្នកដែលគាត់និយាយជាមួយ។ បន្ដិចម្ដងៗ សូមបង្ហាត់សិស្សឲ្យអញ្ជើញម្ចាស់ផ្ទះឲ្យបញ្ចេញយោបល់ ឲ្យស្ដាប់អ្វីដែលគាត់និយាយហើយកត់សំគាល់អ្វីៗដែលធ្វើឲ្យគាត់ចាប់អារម្មណ៍។—km ៧/០៥ ទំព័រ១
រៀបចំដើម្បីត្រឡប់ទៅវិញ
◼ មើលសាឡើងវិញនូវព័ត៌មានដែលបានកត់ពេលដែលជួបម្ចាស់ផ្ទះលើកដំបូង និងបង្ហាញសិស្សវិធីជ្រើសរើសប្រធានមួយដែលនឹងទាក់ទាញចិត្តម្ចាស់ផ្ទះ។
◼ រៀបចំពាក្យផ្សាយយ៉ាងខ្លីដែលមានបទគម្ពីរមួយព្រមទាំងវគ្គមួយក្នុងប្រកាសនវត្ថុ។
◼ រៀបចំសំនួរមួយដែលអាចលើកឡើងនៅទីបញ្ចប់នៃការពិភាក្សា។
ចូរយកចិត្តទុកដាក់ត្រឡប់ទៅជួប
◼ ចូរលើកទឹកចិត្តសិស្សត្រឡប់ទៅជួបអ្នកមានចំណាប់អារម្មណ៍ទាំងអស់យ៉ាងឆាប់រហ័ស។
◼ ចូរជួយសិស្សយល់ថាត្រូវព្យាយាមទៅម្ដងហើយម្ដងទៀតប្រសិនបើម្ចាស់ផ្ទះកម្រនៅផ្ទះ។
◼ ចូរបង្រៀនសិស្សថ្មីអំពីរបៀបណាត់ពេល ហើយជួយគាត់ឲ្យយល់ថាត្រូវត្រឡប់ទៅជួបដូចបានសន្យា។
ភាគទី១២: ការជួយសិស្សឲ្យចាប់ផ្ដើមដឹកនាំការសិក្សាព្រះគម្ពីរ
ការយកតម្រាប់តាមព្រះយេស៊ូដោយតាំងគំរូល្អ ក្នុងកិច្ចបំរើផ្សាយរបស់អ្នកផ្ទាល់គឺជាការចាំបាច់។ ពេលដែលសិស្សរបស់អ្នកសង្កេតមើលគំរូរបស់អ្នកក្នុងកិច្ចបំរើផ្សាយ គាត់នឹងយល់ថា គោលដៅរបស់យើងក្នុងការត្រឡប់ទៅជួបគឺចង់ចាប់ផ្ដើមការសិក្សាព្រះគម្ពីរ។—km ៨/០៥ ទំព័រ១
របៀបស្នើការសិក្សា
◼ ពន្យល់ឲ្យសិស្សដឹងថា តាមធម្មតា មិនចាំបាច់ពណ៌នាអំពីរបៀបសិក្សាយ៉ាងល្អិតល្អន់នោះទេ។
◼ ជារឿយៗ ជាការល្អបំផុតបើគ្រាន់តែបង្ហាញរបៀបសិក្សាដោយប្រើប្រហែលមួយឬពីរវគ្គនៃប្រកាសនវត្ថុដែលនឹងសិក្សា។
◼ ចូរមើលសាឡើងវិញនិងហាត់យោបល់មួយសំរាប់ចាប់ផ្ដើមការសិក្សា។—km ៨/០៥ ទំព័រ៨
ការបង្ហាត់សិស្សឲ្យធ្វើជាអ្នកបង្រៀន
◼ លើកទឹកចិត្តសិស្សឲ្យចុះឈ្មោះក្នុងសាលាកិច្ចបំរើព្រះធិបតេយ្យ។
◼ រៀបចំឲ្យអ្នកផ្សាយថ្មីទៅការសិក្សាឯទៀតជាមួយនឹងអ្នក បើអាចចូលរួមក្នុងការបង្រៀនបន្ដិចបន្តួចបាន។