គំរូដ៏ល្អ តើអ្នកកំពុងតែទទួលប្រយោជន៍ពីគំរូទាំងនោះទេ?
«អ្នករាល់គ្នាបានត្រឡប់ជាគំរូ ដល់អស់អ្នកដែលជឿនៅស្រុកម៉ាសេដូន នឹងស្រុកអាខៃ»។ សាវ័កប៉ុលបានសរសេរពាក្យនេះទៅកាន់គ្រីស្ទានស្មោះត្រង់ ដែលកំពុងតែរស់នៅថែស្សាឡូនីច។ គេបានធ្វើជាគំរូដ៏គួរឲ្យសរសើរមួយដល់អ្នកជឿគ្នីគ្នា។ ក៏ប៉ុន្តែ ពួកថែស្សាឡូនីចផ្ទាល់បានធ្វើតាមគំរូរបស់សាវ័កប៉ុលនិងពួកសហការីរបស់គាត់។ ប៉ុលបាននិយាយថា៖ «ដ្បិតដំណឹងល្អរបស់យើងខ្ញុំ មិនបានផ្សាយមកដល់អ្នករាល់គ្នា ដោយពាក្យសំដីតែប៉ុណ្ណោះទេ គឺដោយព្រះចេស្ដា នឹងព្រះវិញ្ញាណបរិសុទ្ធដែរ ហើយដោយសេចក្ដីជំនឿដ៏មោះមុតជាខ្លាំងថែមទៀតផង ដូចជាអ្នករាល់គ្នាដឹងហើយ ពីដំណើរយើងខ្ញុំ ដែលនៅក្នុងពួកអ្នករាល់គ្នាជាយ៉ាងណា សំរាប់នឹងជួយដល់អ្នករាល់គ្នា អ្នករាល់គ្នាក៏បានត្រាប់តាមយើងខ្ញុំ»។—ថែស្សាឡូនីចទី១ ១:៥-៧
ត្រូវហើយ ប៉ុលបានធ្វើច្រើនជាង មិនគ្រាន់តែផ្សព្វផ្សាយប៉ុណ្ណោះទេ។ ជីវិតរបស់គាត់ផ្ទាល់គឺប្រៀបដូចជាធម្មទាន គឺជាគំរូពីជំនឿ ការស៊ូទ្រាំ និងការធ្វើពលិកម្មខ្លួន។ ហេតុនេះហើយ ប៉ុលនិងសហការីរបស់គាត់បានទៅជាឥទ្ធិពលដ៏ខ្លាំងមួយ ទៅលើជីវិតរបស់ពួកថែស្សាឡូនីច ទាំងជំរុញឲ្យគេទទួលសេចក្ដីពិត«ក្នុងកាលដែលកំពុងតែកើតទុក្ខលំបាកជាខ្លាំងផង»។ ក៏ប៉ុន្តែ ប៉ុលនិងអ្នករួមធ្វើការជាមួយគាត់មិនមែនជាឥទ្ធិពលដ៏វិជ្ជមានតែមួយគត់ ទៅលើពួកអ្នកជឿនោះទេ។ គំរូរបស់អ្នកឯទៀតដែលបានស៊ូទ្រាំនឹងការលំបាក គឺបានជាគ្រឿងលើកទឹកចិត្តដែរ។ ប៉ុលបានសរសេរថា៖ «ដ្បិតបងប្អូនអើយ អ្នករាល់គ្នាបានត្រាប់តាមអស់ទាំងពួកជំនុំនៃព្រះ ដែលនៅក្នុងព្រះគ្រីស្ទយេស៊ូវ នៅស្រុកយូដា ពីព្រោះបានរងទុក្ខ នៅដៃនៃពួកអ្នកស្រុករបស់អ្នករាល់គ្នា ដូចជាពួកជំនុំទាំងនោះបានរងទុក្ខ នៅដៃនៃពួកសាសន៍យូដាដែរ»។—ថែស្សាឡូនីចទី១ ២:១៤
ព្រះយេស៊ូគ្រីស្ទ ទ្រង់ជាគំរូចំបង
ទោះបីប៉ុលបានធ្វើជាគំរូមួយដែលគួរឲ្យត្រាប់តាមក៏ដោយ គាត់មិនបានខានចង្អុលប្រាប់ពីព្រះយេស៊ូគ្រីស្ទជាគំរូចំបង ដែលពួកគ្រីស្ទានគួរត្រាប់តាមនោះឡើយ។ (ថែស្សាឡូនីចទី១ ១:៦) ព្រះគ្រីស្ទជាគំរូចំបងរបស់យើង។ សាវ័កពេត្រុសបានសរសេរថា៖ «ដ្បិតទ្រង់បានហៅអ្នករាល់គ្នា មកឯសេចក្ដីនោះឯង ពីព្រោះព្រះគ្រីស្ទក៏បានរងទុក្ខជំនួសយើងដែរទាំងទុកដំរាប់ ឲ្យយើងរាល់គ្នាដើរតាមលំអានដាននៃទ្រង់»។—ពេត្រុសទី១ ២:២១
ក៏ប៉ុន្តែ ព្រះយេស៊ូបានលែងមានព្រះជន្មជាមនុស្សជិត២.០០០ឆ្នាំទៅហើយ។ ឥឡូវ ទ្រង់«នៅក្នុងពន្លឺ ដែលរកចូលទៅជិតមិនបាន» ជាបុគ្គលវិញ្ញាណដ៏អមតៈ។ អ៊ីចឹងហើយ «គ្មានមនុស្សណាដែលឃើញទ្រង់ឡើយ ក៏មើលទ្រង់មិនឃើញផង»។ (ធីម៉ូថេទី១ ៦:១៦) ដូច្នេះ តើយើងអាចធ្វើតម្រាប់តាមទ្រង់យ៉ាងដូចម្ដេចទៅ? វិធីមួយគឺដោយការសិក្សាដំណើររឿងបួនក្នុងព្រះគម្ពីរ អំពីព្រះជន្មរបស់ព្រះយេស៊ូ។ សៀវភៅដំណឹងល្អនោះ ផ្ដល់នូវការយល់ធ្លុះជ្រៅពីបុគ្គលិកលក្ខណៈរបស់ទ្រង់ ដំណើរព្រះជន្មរបស់ទ្រង់ និង«គំនិតគិត»របស់ទ្រង់។ (ភីលីព ២:៥-៨) ពត៌មានថែមទៀតអាចត្រូវទទួលដោយការសិក្សាយ៉ាងហ្មត់ចត់នូវសៀវភៅ បុរសដ៏ឧត្តមបំផុតម្នាក់ដែលធ្លាប់មានព្រះជន្មរស់នៅ ដែលលំអិតយ៉ាងច្បាស់អំពីព្រឹត្ដិការណ៍ក្នុងព្រះជន្មរបស់ព្រះយេស៊ូ តាមលំដាប់លំដោយពេល។a
គំរូរបស់ព្រះយេស៊ូដែលបង្ហាញការពលីអង្គទ្រង់ បានមានឥទ្ធិពលយ៉ាងខ្លាំងទៅលើសាវ័កប៉ុល។ គាត់បានប្រាប់ពួកគ្រីស្ទាននៅកូរិនថូសថា៖ «ឯខ្ញុំៗសុខចិត្តនឹងចែកចាយ ហើយនឹងត្រូវហិនអស់រលីងទៅចុះ ដោយព្រោះព្រលឹងរបស់អ្នករាល់គ្នា»។ (កូរិនថូសទី២ ១២:១៥) នេះជាអាកប្បកិរិយាដូចព្រះគ្រីស្ទម្ល៉េះហ្ន៎! ពេលដែលយើងពិចារណាគំរូដ៏គ្រប់ល័ក្ខណ៍របស់ព្រះគ្រីស្ទ យើងក៏គួរត្រូវជំរុញឲ្យត្រាប់តាមទ្រង់ក្នុងជីវិតរបស់យើងដែរ។
ជាឧទាហរណ៍ ព្រះយេស៊ូបានបង្រៀនថា យើងគួរពឹងផ្អែកទៅលើសេចក្ដីសន្យារបស់ព្រះ ដែលថាទ្រង់នឹងផ្គត់ផ្គង់អ្វីៗខាងសំភារៈ។ ក៏ប៉ុន្តែ ព្រះយេស៊ូបានធ្វើច្រើនជាងនេះទៅទៀត។ ទ្រង់បានបង្ហាញជំនឿនិងទំនុកចិត្តបែបនេះទៅលើព្រះយេហូវ៉ាជារៀងរាល់ថ្ងៃ។ ទ្រង់បានមានបន្ទូលថា៖ «កញ្ជ្រោងមានរូងវា ហើយសត្វហើរលើអាកាស ក៏មានសំបុក តែកូនមនុស្សគ្មានកន្លែងណានឹងកើយក្បាលទេ»។ (ម៉ាថាយ ៦:២៥; ៨:២០) តើការខ្វល់ខ្វាយពីទ្រព្យសម្បត្ដិកាន់កាប់គំនិតនិងការប្រព្រឹត្តរបស់អ្នកទេ? ឬក៏តើជីវិតរបស់អ្នកផ្ដល់ភស្តុតាងថា អ្នកកំពុងតែស្វែងរកព្រះរាជាណាចក្រជាមុនសិន? ចុះយ៉ាងណាវិញ ចំពោះអាកប្បកិរិយារបស់អ្នកនឹងកិច្ចបំរើព្រះយេហូវ៉ា? តើនោះដូចជាអាកប្បកិរិយារបស់ព្រះយេស៊ូដ៏ជាគំរូរបស់យើងទេ? ព្រះគម្ពីរបង្ហាញថា ព្រះយេស៊ូមិនគ្រាន់តែបានផ្សព្វផ្សាយអំពីការមានចិត្តខ្នះខ្នែងទេ ក៏ប៉ុន្តែទ្រង់ក៏បានបង្ហាញការខ្នះខ្នែងយ៉ាងខ្លាំងជាច្រើនដងច្រើនគ្រា។ (យ៉ូហាន ២:១៤-១៧) បន្ថែមទៅទៀត ព្រះយេស៊ូជាគំរូដ៏ប្រសើរណាស់ហ្ន៎! ចំពោះការបង្ហាញសេចក្ដីស្រឡាញ់។ នេះជាមូលហេតុល្អមែន! ដែលទ្រង់បានបូជារហូតដល់ព្រះជន្មទ្រង់ផ្ទាល់សំរាប់ពួកសិស្សរបស់ទ្រង់។ (យ៉ូហាន ១៥:១៣) តើអ្នកកំពុងតែធ្វើតម្រាប់តាមព្រះយេស៊ូដោយបង្ហាញសេចក្ដីស្រឡាញ់ដល់បងប្អូនគ្រីស្ទានរបស់អ្នកទេ? ឬក៏តើអ្នកឲ្យភាពមិនគ្រប់ល័ក្ខណ៍របស់អ្នកខ្លះធ្វើការរារាំងចំពោះសេចក្ដីស្រឡាញ់របស់អ្នកចំពោះពួកគេ?
ជាញឹកញយយើងមិនដល់កំរិតកំណត់ ក្នុងការខិតខំធ្វើតាមគំរូរបស់ព្រះគ្រីស្ទនោះទេ។ ក៏ប៉ុន្តែ ព្រះយេហូវ៉ាពិតជាពេញព្រះហឫទ័យដោយការខិតខំរបស់យើង ដើម្បី«ប្រដាប់ខ្លួន ដោយព្រះអម្ចាស់យេស៊ូវគ្រីស្ទ»។—រ៉ូម ១៣:១៤
«ធ្វើជាគំរូដល់ហ្វូងចៀម»
តើមានមនុស្សក្នុងក្រុមជំនុំសព្វថ្ងៃនេះដែលអាចជាគំរូដល់យើងទេ? ប្រាកដជាមានមែន! ជាពិសេស បងប្អូនប្រុសដែលជាអ្នកតែងតាំងឲ្យទទួលខុសត្រូវ ត្រូវតែធ្វើជាគំរូល្អ។ ប៉ុលបានប្រាប់ទីតុស ដែលបានបំរើក្រុមជំនុំទាំងប៉ុន្មាននៅកោះក្រេត និងអ្នកត្រួតពិនិត្យដែលបានត្រូវតែងតាំងថា អ្នកចាស់ទុំនិមួយៗដែលបានត្រូវតែងតាំង ត្រូវជាបុរស«ដែលរកចាប់ទោសមិនបាន»។ (ទីតុស ១:៥, ៦) ស្រដៀងគ្នាដែរ សាវ័កពេត្រុសបានដាស់តឿន«ពួកចាស់ទុំ»ឲ្យទៅជា«គំរូដល់ហ្វូងចៀម»។ (ពេត្រុសទី១ ៥:១-៣) ចុះយ៉ាងណាចំពោះអ្នកដែលបំរើជាអ្នកងារជំនួយ? ពួកគាត់ក៏ត្រូវជា«អ្នកដែលបានជួយយ៉ាងល្អ»ដែរ។—ធីម៉ូថេទី១ ៣:១៣
ពិតមែន គឺមិនសមហេតុសមផលទេ ដែលសង្ឃឹមថាអ្នកចាស់ទុំនិងអ្នកងារជំនួយគ្រប់ៗរូប នឹងមានការប៉ិនប្រសប់យ៉ាងប្រសើរក្នុងកិច្ចបំរើគ្រីស្ទានគ្រប់ផ្នែកនោះ។ ប៉ុលបានប្រាប់ពួកគ្រីស្ទាននៅទីក្រុងរ៉ូមថា៖ ‹យើងមានអំណោយទានផ្សេងពីគ្នា តាមព្រះគុណដែលផ្ដល់មកយើង›។ (រ៉ូម ១២:៦) បងប្អូនប្រុសផ្សេងៗមានការប៉ិនប្រសប់ផ្សេងគ្នា។ គឺមិនសមហេតុសមផលទេ ដែលសង្ឃឹមថាអ្នកចាស់ទុំនឹងប្រព្រឹត្តហើយនិងនិយាយតាមរបៀបល្អឥតខ្ចោះនោះ។ ក្នុងព្រះគម្ពីរនៅ យ៉ាកុប ៣:២ ចែងថា៖ «ដ្បិតយើងទាំងអស់គ្នាក៏ជំពប់ជាញយៗដែរ បើអ្នកណាមិនបានជំពប់ដោយពាក្យសំដី នោះជាមនុស្សគ្រប់លក្ខណ៍ហើយ ដែលអាចនឹងទប់រូបកាយទាំងមូលបានដែរ»។ ក៏ប៉ុន្តែ ថ្វីបើអ្នកចាស់ទុំមានភាពមិនគ្រប់ល័ក្ខណ៍ក៏ដោយ ពួកគាត់នៅតែអាចធ្វើដូចជាធីម៉ូថេ នឹង«ធ្វើជាគំរូដល់ពួកអ្នកជឿ ដោយពាក្យសំដី កិរិយាប្រព្រឹត្ត សេចក្ដីស្រឡាញ់ សេចក្ដីជំនឿ នឹងសេចក្ដីបរិសុទ្ធ»។ (ធីម៉ូថេទី១ ៤:១២) ពេលអ្នកចាស់ទុំធ្វើអ៊ីចឹង នោះអស់អ្នកក្នុងហ្វូងចៀមនឹងអនុវត្តយ៉ាងឆាប់រហ័ស តាមការដាស់តឿនក្នុងហេព្រើរ ១៣:៧ ដែលថា៖ «ចូរនឹកចាំពីពួកអ្នកនាំមុខ ដែលបានផ្សាយព្រះបន្ទូលមកអ្នករាល់គ្នា . . . ត្រាប់តាមសេចក្ដីជំនឿរបស់អ្នកទាំងនោះ ទាំងពិចារណាមើលចុងបំផុតនៃកិរិយាគេផង»។
គំរូផ្សេងទៀតនៅសម័យបច្ចុប្បន្ន
ក្នុងកំឡុងពីរបីទសវត្សកន្លងទៅនេះ មនុស្សជាច្រើនឥតគណនាបានសម្ដែងខ្លួនជាគំរូល្អ។ ចូរគិតពីរាប់ពាន់នាក់ជាសាសនទូតដែលបានធ្វើពលិកម្មខ្លួន និង«លះចោលផ្ទះសំបែង ឬបងប្អូនប្រុសស្រី ឪពុកម្ដាយ ប្រពន្ធកូន ឬស្រែចំការ»ដើម្បីបំពេញកិច្ចការគ្រីស្ទាននៅប្រទេសផ្សេង។ (ម៉ាថាយ ១៩:២៩) ចូរពិចារណាដែរនូវអ្នកត្រួតពិនិត្យដែលធ្វើដំណើរនិងប្រពន្ធរបស់គាត់ បុរសនិងស្ត្រីដែលបំរើស្ម័គ្រចិត្តនៅឯការិយាល័យសមាគមប៉មយាម និងអ្នកត្រួសត្រាយដែលបំរើក្នុងក្រុមជំនុំ។ តើគំរូបែបនេះអាចជំរុញទឹកចិត្តអ្នកដទៃទៀតទេ? អ្នកផ្សាយដំណឹងល្អជាគ្រីស្ទានម្នាក់នៅទ្វីបអាស៊ីនឹករឭកដល់សាសនទូតម្នាក់ពីក្រុមទីប្រាំបីនៃសាលាប៉មយាមនៃគីលាតខាងព្រះគម្ពីរ។ គាត់បានប្រាប់ថា បងប្រុសដ៏ស្មោះត្រង់នេះធ្លាប់«សុខចិត្តទ្រាំនឹងមូសទាំងហ្វូងៗ និងអាកាសធាតុដ៏ក្ដៅ . . . មួយទៀតដែលគួរឲ្យកោតសរសើរគឺថា គាត់មានសមត្ថភាពផ្សព្វផ្សាយជាភាសាចិននិងភាសាម៉ាឡេ ទោះបីគាត់មកពីប្រទេសអង់គ្លេសក៏ដោយ»។ តើអ្វីជាឥទ្ធិពលនៃគំរូដ៏ល្អនេះ? បងប្រុសនោះបានប្រាប់ថា៖ «ចិត្តសុភាពរបស់គាត់និងជំនឿរបស់គាត់បានជំរុញទឹកចិត្តខ្ញុំឲ្យចង់ទៅជាសាសនទូតម្នាក់ដែរ ពេលខ្ញុំធំឡើង»។ មិនគួរឲ្យភ្ញាក់ផ្អើលទេ ដែលបងប្រុសនេះបានទៅជាសាសនទូតមែន។
លិបិក្រមប្រកាសនវត្ថុប៉មយាម មានរៀបរាប់នូវរឿងជាច្រើនអំពីជីវប្រវត្ដិ ដែលបានត្រូវបោះពុម្ពចេញក្នុងទស្សនាវដ្ដីប៉មយាមនិងភ្ញាក់រឭក! រឿងនេះប្រាប់ពីមនុស្សដែលបានលះចោលអាជីព និងគោលដៅក្នុងលោកីយ៍នេះ បានពុះពារភាពទន់ខ្សោយ បានកែប្រែទាំងស្រុងនូវបុគ្គលិកលក្ខណៈ បានរក្សាជំហរវិជ្ជមានពេលប្រឈមមុខនឹងការពិបាក ថែមទាំងបង្ហាញចិត្តឧស្សាហ៍ ការស៊ូទ្រាំ ភាពស្មោះត្រង់ និងការធ្វើពលិកម្មខ្លួន។ អ្នកអានម្នាក់បានសរសេរស្តីអំពីរឿងជីវប្រវត្ដិនេះថា៖ «នេះធ្វើឲ្យខ្ញុំជាគ្រីស្ទានម្នាក់ដែលមានចិត្តសុភាពជាងនិងមានអំណរគុណច្រើនឡើង ពេលខ្ញុំអានអំពីអ្វីដែលគេបានពិសោធន៍ និងនេះបានជួយខ្ញុំមិនឲ្យគិតគូរហួសហេតុអំពីខ្លួនខ្ញុំឬក៏មានគំនិតអត្តទត្ថភាពឡើយ»។
ម្ល៉ោះហើយ កុំភ្លេចពីគំរូល្អៗដែលមានក្នុងក្រុមជំនុំរបស់អ្នក ដូចជាមេគ្រួសារដែលថែរក្សាទាំងសេចក្ដីត្រូវការខាងវិញ្ញាណនិងខាងសំភារៈរបស់គ្រួសារគេដោយមិនខកខានសោះ។ ក៏មានបងប្អូនស្រី រួមបញ្ចូលមាតាដែលគ្មានគូ ដែលស៊ូទ្រាំនូវក្រោមការបង្ខិតបង្ខំចំពោះការចិញ្ចឹមកូន ពេលដែលគេចូលរួមយ៉ាងសកម្មក្នុងកិច្ចបំរើ។ ក៏មានអ្នកចាស់វ័យនិងអ្នកពិការដែលនៅស្មោះត្រង់ ថ្វីបើសុខភាពរបស់គេកាន់តែអន់ថយ និងរាងកាយរបស់គេកាន់តែខ្សោយក៏ដោយ។ តើគំរូទាំងនេះជំរុញចិត្តអ្នកឬទេ?
ពិតមែន លោកីយ៍នេះគឺពោរពេញទៅដោយគំរូអាក្រក់។ (ធីម៉ូថេទី២ ៣:១៣) យ៉ាងណាក៏ដោយ សូមពិចារណាសេចក្ដីដាស់តឿនរបស់ប៉ុលទៅកាន់គ្រីស្ទាននៅស្រុកយូដា។ បន្ទាប់ពីគាត់បានរៀបរាប់ពីចរិយាដ៏ជាគំរូល្អរបស់បុរសនិងស្ត្រីពីបុរាណដែលមានជំនឿ នោះសាវ័កប៉ុលបានលើកទឹកចិត្តពួកគេថា៖ «ដូច្នេះ ដែលមានស្មរបន្ទាល់១ហ្វូងធំម្ល៉េះនៅព័ទ្ធជុំវិញយើង នោះត្រូវឲ្យយើង . . . រត់ក្នុងទីប្រណាំង ដែលនៅមុខយើង ដោយអំណត់ ទាំងរំពឹងមើលដល់ព្រះយេស៊ូវដ៏ជាមេផ្ដើម ហើយជាមេសំរេចសេចក្ដីជំនឿរបស់យើង»។ (ហេព្រើរ ១២:១, ២) ពួកគ្រីស្ទានសព្វថ្ងៃនេះត្រូវព័ទ្ធជុំវិញដោយគំរូល្អ‹មួយហ្វូងធំ› ទាំងពីសម័យបុរាណនិងនៅសម័យនេះ។ តើអ្នកពិតជាទទួលប្រយោជន៍ពីគំរូទាំងនោះទេ? អ្នកអាចទទួលប្រយោជន៍មែន បើសិនជាអ្នកតាំងចិត្ត«ត្រាប់តាមសេចក្ដីល្អ កុំឲ្យតាមសេចក្ដីអាក្រក់ឲ្យសោះ»។—យ៉ូហានទី៣ ១១
[កំណត់សម្គាល់]
a បោះពុម្ពដោយសមាគមប៉មយាមខាងព្រះគម្ពីរនិងខិត្តប័ណ្ណនៃរដ្ឋញូវយ៉ក
[ឃ្លាអក្សរធំនៅទំព័រ២០]
គឺមិនសមហេតុសមផលទេ ដែលសង្ឃឹមថាអ្នកចាស់ទុំនិងអ្នកងារជំនួយគ្រប់ៗរូប នឹងមានការប៉ិនប្រសប់ក្នុងគ្រប់វិស័យនៃកិច្ចបំរើគ្រីស្ទាន។
[រូបភាពនៅទំព័រ២១]
អ្នកចាស់ទុំត្រូវជា«គំរូដល់ហ្វូងចៀម»