ព្រះគ្រីស្ទ គោលដៅសំខាន់បំផុតនៃទំនាយ
«ការធ្វើបន្ទាល់ពីព្រះយេស៊ូវ នោះហើយជាវិញ្ញាណនៃសេចក្ដីទំនាយ»។—វិវរណៈ ១៩:១០
១, ២. (ក) ចាប់ពីឆ្នាំ២៩ ស.យ. តើពួកអ៊ីស្រាអែលប្រឈមមុខនឹងការសម្រេចចិត្តអ្វី? (ខ) តើយើងនឹងពិនិត្យមើលអ្វីក្នុងអត្ថបទនេះ?
ឆ្នាំ២៩ ស.យ. ស្រុកអ៊ីស្រាអែលពេញទៅដោយមនុស្សដែលនិយាយយ៉ាងរំភើបអំពីព្រះមេស្ស៊ី។ កិច្ចបំរើផ្សាយរបស់យ៉ូហានបាទីស្ទ ក៏ធ្វើឲ្យមនុស្សប្រុងស្មារតីចាំមើលព្រះគ្រីស្ទកាន់តែច្រើនដែរ។ (លូកា ៣:១៥) យ៉ូហានបដិសេធថាគាត់មិនមែនជាព្រះគ្រីស្ទទេ។ ផ្ទុយទៅវិញ ដោយចង្អុលទៅព្រះយេស៊ូពីភូមិណាសារ៉ែត យ៉ូហានពោលថា៖ «[ខ្ញុំ]ធ្វើបន្ទាល់ពីព្រះអង្គនោះថា ទ្រង់ជាព្រះរាជបុត្រានៃព្រះពិតមែន»។ (យ៉ូហាន ១:២០, ៣៤) មិនយូរប៉ុន្មានទៀត មនុស្សជាច្រើនមកស្ដាប់ព្រះយេស៊ូបង្រៀន ហើយឲ្យទ្រង់ប្រោសពួកគេឲ្យបានជា។
២ ក្នុងកំឡុងប៉ុន្មានខែក្រោយមក នោះព្រះយេហូវ៉ាប្រទានភស្តុតាងយ៉ាងច្រើនស្តីអំពីរាជបុត្រារបស់ទ្រង់។ អស់អ្នកដែលបានសិក្សាបទគម្ពីរនិងសង្កេតមើលកិច្ចការរបស់ព្រះយេស៊ូ មានគ្រឹះមូលដ្ឋានរឹងមាំឲ្យមានជំនឿលើព្រះយេស៊ូ។ យ៉ាងណាក៏ដោយ រាស្ត្រដែលព្រះបានធ្វើកិច្ចព្រមព្រៀងជាមួយនោះ ភាគច្រើនមិនមានជំនឿលើព្រះយេស៊ូទេ។ ហើយមានតិចណាស់ដែលទទួលស្គាល់ព្រះយេស៊ូជាព្រះគ្រីស្ទ ជារាជបុត្រារបស់ព្រះ។ (យ៉ូហាន ៦:៦០-៦៩) បើអ្នកបានរស់នៅសម័យនោះ តើអ្នកនឹងធ្វើយ៉ាងណា? តើចិត្តអ្នកនឹងជំរុញឲ្យទទួលស្គាល់ព្រះយេស៊ូជាព្រះមេស្ស៊ី និងក្លាយទៅជាសិស្សស្មោះត្រង់របស់ទ្រង់ឬទេ? សូមពិចារណានូវភស្តុតាងស្តីពីអត្តសញ្ញាណរបស់ព្រះយេស៊ូដែលទ្រង់ប្រទានផ្ទាល់ នៅពេលដែលគេចោទប្រកាន់ថា ទ្រង់ធ្វើខុសនឹងច្បាប់ថ្ងៃឈប់សំរាក។ ហើយសូមកត់សម្គាល់ភស្តុតាងថែមទៀត ដែលទ្រង់ប្រទានក្រោយៗមក ដើម្បីពង្រឹងជំនឿនៃសិស្សដ៏ស្មោះត្រង់របស់ទ្រង់។
ព្រះយេស៊ូប្រទានភស្តុតាងដោយអង្គទ្រង់ផ្ទាល់
៣. តើកាលៈទេសៈអ្វីបានជំរុញឲ្យព្រះយេស៊ូប្រទាននូវភស្តុតាងអំពីអត្តសញ្ញាណរបស់ទ្រង់?
៣ នៅក្រុងយេរូសាឡិមនាបុណ្យរំលងនៅឆ្នាំ៣១ ស.យ. ព្រះយេស៊ូទើបតែបានប្រោសបុរសម្នាក់ឲ្យជាពីជំងឺ ដែលគាត់រងគ្រោះអស់៣៨ឆ្នាំមកហើយ។ ក៏ប៉ុន្តែ ពួកសាសន៍យូដាបៀតបៀនដល់ព្រះយេស៊ូដោយព្រោះទ្រង់ធ្វើការនោះនៅថ្ងៃឈប់សំរាក។ ពួកគេក៏ចោទថាទ្រង់ប្រមាថព្រះ ហើយស្វែងរកឱកាសសម្លាប់ទ្រង់ពីព្រោះទ្រង់ហៅព្រះយេហូវ៉ាជាបិតារបស់ទ្រង់។ (យ៉ូហាន ៥:១-៩, ១៦-១៨) បន្ទូលដែលព្រះយេស៊ូឆ្លើយតបដើម្បីបង្ហាញពីហេតុដែលទ្រង់ធ្វើដូច្នេះ បានបញ្ជាក់ហេតុផលបីយ៉ាងដែលអាចជួយជនជាតិយូដាដែលមានចិត្តស្មោះត្រង់ឲ្យជឿទៅលើអត្តសញ្ញាណពិតរបស់ព្រះយេស៊ូ។
៤, ៥. តើកិច្ចបំរើផ្សាយរបស់យ៉ូហានមានបំណងអ្វី? តើគាត់បានសម្រេចកិច្ចការនោះយ៉ាងណា?
៤ មុនដំបូង ព្រះយេស៊ូបញ្ជាក់អំពីសក្ខីភាពរបស់យ៉ូហានបាទីស្ទ ដែលបានធ្វើការប្រកាសផ្សាយមុនព្រះយេស៊ូ។ ព្រះយេស៊ូមានបន្ទូលថា៖ «អ្នករាល់គ្នាបានចាត់គេឲ្យទៅឯលោកយ៉ូហាន លោកក៏ធ្វើបន្ទាល់តាមសេចក្ដីពិត។ ឯលោកយ៉ូហាន លោកជាចង្កៀងដែលឆេះហើយភ្លឺ អ្នករាល់គ្នាក៏ចូលចិត្តឲ្យបានអរសប្បាយក្នុងពន្លឺរបស់លោកក្នុង១គ្រានោះដែរ»។—យ៉ូហាន ៥:៣៣, ៣៥
៥ យ៉ូហានបាទីស្ទ«ជាចង្កៀងដែលឆេះ»ក្នុងន័យថា មុនស្តេចហេរ៉ូឌបានចាប់យ៉ូហានដាក់គុកដោយឥតត្រឹមត្រូវ នោះគាត់បានសម្រេចនូវកិច្ចការពីព្រះ ដោយជួយមនុស្សត្រៀមលក្ខណៈទទួលព្រះមេស្ស៊ី។ យ៉ូហានបានពោលថា៖ «ខ្ញុំមកធ្វើបុណ្យជ្រមុជនេះ គឺដើម្បីនឹងសំដែងឲ្យសាសន៍អ៊ីស្រាអែលបានស្គាល់[ព្រះមេស្ស៊ី]ប៉ុណ្ណោះ។ . . . ខ្ញុំបានឃើញព្រះវិញ្ញាណយាងចុះពីលើមេឃ មានរូបដូចជាព្រាបមកសណ្ឋិតលើទ្រង់។ ខ្ញុំមិនបានស្គាល់ទ្រង់ទេ ប៉ុន្តែព្រះដែលចាត់ឲ្យខ្ញុំមកធ្វើបុណ្យជ្រមុជដោយទឹក ទ្រង់មានបន្ទូលមកខ្ញុំថា៖ ‹ដែលឯងឃើញព្រះវិញ្ញាណយាងចុះមកសណ្ឋិតលើអ្នកណា គឺអ្នកនោះហើយដែលធ្វើបុណ្យជ្រមុជដោយព្រះវិញ្ញាណបរិសុទ្ធ›។ ខ្ញុំបានឃើញមែន ហើយក៏ធ្វើបន្ទាល់ពីព្រះអង្គនោះថា ទ្រង់ជាព្រះរាជបុត្រានៃព្រះពិតមែន»។a (យ៉ូហាន ១:២៦-៣៧) យ៉ូហានបានប្រាប់យ៉ាងចំៗថាព្រះយេស៊ូជាព្រះរាជបុត្រានៃព្រះ ដែលជាព្រះមេស្ស៊ីដែលត្រូវបានសន្យាយូរមកហើយ។ យ៉ូហានបានផ្ដល់សក្ខីភាពដ៏ច្បាស់ដល់ម្ល៉េះ ដែលប្រាំបីខែក្រោយពីគាត់បានទទួលមរណភាព នោះពួកសាសន៍យូដាជាច្រើនដែលមានចិត្តស្មោះត្រង់បានសារភាពថា៖ «សេចក្ដីទាំងប៉ុន្មានដែលលោកមានប្រសាសន៍ពីអ្នកនេះ នោះសុទ្ធតែពិតទាំងអស់»។—យ៉ូហាន ១០:៤១, ៤២
៦. ហេតុអ្វីក៏កិច្ចការរបស់ព្រះយេស៊ូគួរបញ្ជាក់ឲ្យមនុស្សដឹងថា ព្រះកំពុងតែគាំទ្រទ្រង់?
៦ បន្ទាប់មក ព្រះយេស៊ូបានបញ្ជាក់ហេតុផលមួយទៀត ដើម្បីបញ្ជាក់អត្តសញ្ញាណរបស់ទ្រង់ជាព្រះមេស្ស៊ី។ ទ្រង់បានមានបន្ទូលប្រាប់អំពីកិច្ចការដ៏ល្អៗដែលទ្រង់ធ្វើជាភស្តុតាងថាព្រះកំពុងតែគាំទ្រទ្រង់។ ព្រះយេស៊ូមានបន្ទូលថា៖ «ខ្ញុំមានទីបន្ទាល់វិសេសជាងទីបន្ទាល់របស់លោកយ៉ូហានទៅទៀត ពីព្រោះការទាំងប៉ុន្មានដែលព្រះវរបិតាបានប្រគល់មកឲ្យខ្ញុំធ្វើបង្ហើយ គឺការដែលខ្ញុំធ្វើទាំងប៉ុន្មាននេះឯង នោះបានធ្វើបន្ទាល់ពីខ្ញុំហើយ ថាព្រះវរបិតាបានចាត់ឲ្យខ្ញុំមក»។ (យ៉ូហាន ៥:៣៦) សូម្បីតែពួកសត្រូវរបស់ព្រះយេស៊ូក៏ពុំអាចបដិសេធភស្តុតាងនេះ ដែលរួមបញ្ចូលការធ្វើអព្ភូតហេតុមួយចំនួន។ ក្រោយមក មនុស្សខ្លះសួរថា៖ «តើយើងត្រូវធ្វើដូចម្ដេច ព្រោះមនុស្សនេះធ្វើទីសំគាល់ច្រើនណាស់?»។ (យ៉ូហាន ១១:៤៧) ប៉ុន្តែ នៅក្នុងបណ្ដាមនុស្សនោះមានអ្នកខ្លះនិយាយថា៖ «កាលណាព្រះគ្រីស្ទយាងមក តើទ្រង់នឹងធ្វើទីសំគាល់ច្រើនជាងលោកនេះឬអី?»។ (យ៉ូហាន ៧:៣១) ពួកអ្នកដែលស្ដាប់ព្រះយេស៊ូក៏មានឱកាសល្អឲ្យត្រិះរិះយល់អំពីគុណសម្បត្ដិរបស់ព្រះវរបិតា ដោយពិនិត្យមើលគុណសម្បត្ដិរបស់ព្រះរាជបុត្រាទ្រង់។—យ៉ូហាន ១៤:៩
៧. តើបទគម្ពីរភាសាហេព្រើរធ្វើបន្ទាល់អំពីព្រះយេស៊ូយ៉ាងដូចម្ដេច?
៧ ទីបំផុត ព្រះយេស៊ូបានប្រមូលអារម្មណ៍លើភស្តុតាងដែលពុំអាចប្រកែកដោះសាបានឡើយ។ ទ្រង់មានបន្ទូលថា៖ «គម្ពីរនោះឯងដែលធ្វើបន្ទាល់ពីខ្ញុំ។ បើសិនជាអ្នករាល់គ្នាជឿដល់លោកម៉ូសេពិត នោះនឹងបានជឿដល់ខ្ញុំដែរ ពីព្រោះលោកបានចែងទុកពីខ្ញុំ»។ (យ៉ូហាន ៥:៣៩, ៤៦) មែនហើយ ម៉ូសេជាបុគ្គលតែម្នាក់ក្នុងចំណោមមនុស្សជាច្រើនមុនសម័យគ្រីស្ទានដែលបានសរសេរអំពីព្រះគ្រីស្ទ។ សំនេររបស់ពួកគេរួមបញ្ចូលរាប់រយទំនាយ និងប្រាប់យ៉ាងលំអិតអំពីវង្សត្រកូលដែលជួយសម្គាល់ព្រះមេស្ស៊ី។ (លូកា ៣:២៣-៣៨; ២៤:៤៤-៤៦; កិច្ចការ ១០:៤៣) ហើយចុះយ៉ាងណាក្រិត្យវិន័យម៉ូសេ? សាវ័កប៉ុលបានសរសេរថា៖ «ក្រិត្យវិន័យធ្វើជាអ្នកដឹកនាំយើងរាល់គ្នាទៅដល់ព្រះគ្រីស្ទ»។ (កាឡាទី ៣:២៤) មែនហើយ «ការធ្វើបន្ទាល់ពីព្រះយេស៊ូវ នោះហើយជាវិញ្ញាណ[ឬទំនោរ គោលដៅនិងបំណងទាំងស្រុង]នៃសេចក្ដីទំនាយ»។—វិវរណៈ ១៩:១០
៨. ហេតុអ្វីបានជាពួកសាសន៍យូដាជាច្រើនគ្មានជំនឿលើព្រះមេស្ស៊ី?
៨ ពេលមើលភស្តុតាងដែលរួមបញ្ចូលសក្ខីភាពដ៏ច្បាស់ពីយ៉ូហាន កិច្ចការដ៏អស្ចារ្យរបស់ព្រះយេស៊ូនិងគុណសម្បត្ដិដែលទ្រង់មានដូចព្រះយេហូវ៉ា ព្រមទាំងសក្ខីភាពជាច្រើនពីបទគម្ពីរ តើភស្តុតាងទាំងនេះជួយអ្នកឲ្យជឿថាព្រះយេស៊ូជាព្រះមេស្ស៊ីឬទេ? មនុស្សណាដែលមានសេចក្ដីស្រឡាញ់ដ៏ស្មោះចំពោះព្រះនិងព្រះបន្ទូលរបស់ទ្រង់ នឹងទទួលស្គាល់សក្ខីភាពទាំងនេះយ៉ាងឆាប់ ហើយនិងមានជំនឿលើព្រះយេស៊ូជាព្រះមេស្ស៊ីដែលបានត្រូវសន្យា។ ក៏ប៉ុន្តែ ពួកអ៊ីស្រាអែលភាគច្រើនគ្មានសេចក្ដីស្រឡាញ់ចំពោះព្រះឡើយ។ ព្រះយេស៊ូបានមានបន្ទូលទៅកាន់ពួកអ្នកដែលប្រឆាំងទ្រង់ថា៖ «ខ្ញុំស្គាល់អ្នករាល់គ្នាហើយ ថាគ្មានសេចក្ដីស្រឡាញ់របស់ព្រះនៅក្នុងខ្លួនអ្នករាល់គ្នាសោះ»។ (យ៉ូហាន ៥:៤២) ជាជាង«ស្វែងរកកិត្ដិសព្ទ ដែលមកពីព្រះអង្គដ៏ជាព្រះតែ១អង្គទ្រង់» ពួកគេ«ទទួលកិត្ដិសព្ទតែពីគ្នាឯង»។ ហេតុដូច្នេះហើយបានជាពួកគេបានជំទាស់នឹងព្រះយេស៊ូ ដ្បិតទ្រង់ស្អប់គំនិតបែបនោះដូចព្រះវរបិតារបស់ទ្រង់ដែរ!—យ៉ូហាន ៥:៤៣, ៤៤; កិច្ចការ ១២:២១-២៣
ចក្ខុនិមិត្តជាទំនាយបានពង្រឹងជំនឿ
៩, ១០. (ក) សញ្ញាសម្គាល់ពីស្ថានសួគ៌សំរាប់សិស្សព្រះយេស៊ូបានកើតឡើងត្រូវពេល តើហេតុអ្វី? (ខ) តើព្រះយេស៊ូមានបន្ទូលប្រាប់ពួកសិស្សនូវសេចក្ដីសន្យាដ៏អស្ចារ្យអ្វី?
៩ ជាងមួយឆ្នាំបានកន្លងទៅហើយតាំងតែពីព្រះយេស៊ូបានប្រទាននូវភស្តុតាងខាងលើនេះដែលបង្ហាញថាទ្រង់ជាព្រះមេស្ស៊ី។ បុណ្យរំលងនៅឆ្នាំ៣២ ស.យ.បានកន្លងផុតទៅដែរ។ មនុស្សជាច្រើនដែលបានជឿលើទ្រង់ក៏បានលែងកាន់តាមទ្រង់ទៀត ប្រហែលជាដោយសារវត្ថុនិយម កង្វល់កង្វាយនៃជីវិត ឬពួកគេបានទទួលការបៀតបៀន។ សិស្សឯទៀតប្រហែលជាឆ្ងល់ឬរហូតដល់អាក់អន់ចិត្តក៏មាន ពីព្រោះព្រះយេស៊ូមិនសព្វព្រះហឫទ័យឲ្យប្រជាជនលើកទ្រង់ឡើងជាស្តេច។ កាលដែលពួកមេដឹកនាំសាសនាយូដាសុំទីសំអាងអំពីអត្តសញ្ញាណរបស់ព្រះយេស៊ូ ទ្រង់មិនប្រទានសញ្ញាសម្គាល់ណាពីស្ថានសួគ៌ដើម្បីលើកតម្កើងសិរីរុងរឿងរបស់ទ្រង់ផ្ទាល់ឡើយ។ (ម៉ាថាយ ១២:៣៨, ៣៩) មនុស្សខ្លះប្រហែលជាឆ្ងល់ដែលទ្រង់បានបដិសេធនោះ។ ម្យ៉ាងវិញទៀត ព្រះយេស៊ូបានចាប់ផ្ដើមប្រាប់សិស្សទ្រង់អំពីរឿងដែលពួកគាត់ពិបាកយល់ណាស់ ពោលគឺ«ទ្រង់ត្រូវតែយាងទៅឯក្រុងយេរូសាឡិម ហើយត្រូវរងទុក្ខជាច្រើននៅដៃនៃពួកចាស់ទុំ ពួកសង្គ្រាជ នឹងពួកអាចារ្យ ហើយត្រូវគេធ្វើគុតផង»។—ម៉ាថាយ ១៦:២១-២៣
១០ ប្រហែលជាប្រាំបួនឬដប់ខែទៀត នោះគឺជាពេលដែល«[ព្រះយេស៊ូ]ត្រូវចេញពីលោកីយនេះទៅឯព្រះវរបិតាវិញ»។ (យ៉ូហាន ១៣:១) ព្រះយេស៊ូមានព្រះទ័យខ្វល់ខ្វាយយ៉ាងខ្លាំងចំពោះសិស្សស្មោះត្រង់របស់ទ្រង់ ដូច្នេះសន្យាដល់ពួកសិស្សខ្លះថាទ្រង់នឹងប្រទានសញ្ញាសម្គាល់ពីស្ថានសួគ៌ ជាអ្វីដែលទ្រង់មិនព្រមប្រទានដល់ពួកយូដាដែលគ្មានជំនឿ។ ព្រះយេស៊ូមានបន្ទូលថា៖ «ខ្ញុំប្រាប់អ្នករាល់គ្នាជាប្រាកដថា ក្នុងពួកអ្នកដែលឈរនៅទីនេះ មានអ្នកខ្លះមិនត្រូវភ្លក់សេចក្ដីស្លាប់ ទាល់តែបានឃើញកូនមនុស្សមកក្នុងនគររបស់លោក»។ (ម៉ាថាយ ១៦:២៨) យ៉ាងច្បាស់ណាស់ ព្រះយេស៊ូមិនមានបន្ទូលថា សិស្សខ្លះនឹងរស់នៅរហូតដល់ព្រះរាជាណាចក្រនៃព្រះមេស្ស៊ីត្រូវស្ថាបនាឡើងនៅឆ្នាំ១៩១៤នោះទេ។ ព្រះយេស៊ូមានគោលបំណងចង់ឲ្យសិស្សជិតស្និទ្ធបីនាក់មើលឃើញទុកជាមុននូវសិរីរុងរឿងរបស់ទ្រង់ពេលដែលទទួលអំណាចក្នុងព្រះរាជាណាចក្រ។ ចក្ខុនិមិត្តនេះហៅថាការផ្លាស់ប្រែទ្រង់ទ្រាយ។
១១. សូមរៀបរាប់ចក្ខុនិមិត្តអំពីការផ្លាស់ប្រែទ្រង់ទ្រាយ។
១១ ប្រាំមួយថ្ងៃក្រោយមក ព្រះយេស៊ូបានយកពេត្រុស យ៉ាកុបនិងយ៉ូហានឲ្យឡើងភ្នំដ៏ខ្ពស់មួយ ប្រហែលជានៅកំពូលភ្នំហ៊ើម៉ូន។ នៅទីនោះ ព្រះយេស៊ូ«បានផ្លាស់ប្រែនៅមុខអ្នកទាំងនោះ ព្រះភក្ដ្រទ្រង់បានភ្លឺដូចព្រះអាទិត្យ ហើយព្រះពស្ត្រទ្រង់ក៏ត្រឡប់ជាសដូចពន្លឺ»។ ហើយក៏ឃើញព្យាការីម៉ូសេនិងអេលីយ៉ាលេចមក ដែលកំពុងតែទូលជាមួយនឹងព្រះយេស៊ូ។ ព្រឹត្ដិការណ៍ដ៏អស្ចារ្យនេះ តាមមើលទៅបានកើតឡើងនៅពេលយប់ ដែលធ្វើឲ្យមានទិដ្ឋភាពកាន់តែភ្លឺចិញ្ចាច។ តាមពិត ចក្ខុនិមិត្តនេះមានទិដ្ឋភាពពិតដល់ម្ល៉េះបានជាសាវ័កពេត្រុសប្រាថ្នាចង់តម្លើងត្រសាលបី ម្នាក់មួយសំរាប់ព្រះយេស៊ូ ម៉ូសេ និងអេលីយ៉ា។ កាលដែលពេត្រុសកំពុងតែទូលនៅឡើយ នោះមានពពកយ៉ាងភ្លឺបានមកបាំងពួកគេ ហើយមានឮសម្លេងចេញពីពពកនោះថា៖ «នេះជាកូនស្ងួនភ្ងាអញ ជាទីពេញចិត្តអញណាស់ ចូរស្ដាប់តាមចុះ!»។—ម៉ាថាយ ១៧:១-៦
១២, ១៣. តើចក្ខុនិមិត្តអំពីការផ្លាស់ប្រែទ្រង់ទ្រាយមានអានុភាពយ៉ាងណាលើសិស្សរបស់ព្រះយេស៊ូ? ហេតុអ្វី?
១២ មិនយូរប៉ុន្មានមុនព្រឹត្ដិការណ៍នោះពេត្រុសបានធ្វើសក្ខីភាពថាព្រះយេស៊ូជា«ព្រះរាជបុត្រានៃព្រះដ៏មានព្រះជន្មរស់»។ (ម៉ាថាយ ១៦:១៦) ប៉ុន្តែសូមគិតពីភាពអស្ចារ្យនៃការឮព្រះយេហូវ៉ាអង្គទ្រង់ផ្ទាល់ផ្ដល់នូវសក្ខីភាពដែលបញ្ជាក់ពីអត្តសញ្ញាណនិងមុខតំណែងនៃបុត្រារបស់ទ្រង់! ចក្ខុនិមិត្តអំពីការផ្លាស់ប្រែទ្រង់ទ្រាយពិតជាបានពង្រឹងជំនឿរបស់ពេត្រុស យ៉ាកុបនិងយ៉ូហានមែន! ដោយសារពួកគាត់មានជំនឿបានត្រូវពង្រឹងយ៉ាងខ្លាំងនោះ ពួកគាត់បានត្រូវប្រុងប្រៀបចំពោះគ្រាលំបាកដែលនៅពីមុខគាត់នៅឡើយ និងចំពោះមុខនាទីដ៏សំខាន់ដែលពួកគាត់មានក្នុងក្រុមជំនុំនៅអនាគត។
១៣ ចក្ខុនិមិត្តអំពីការផ្លាស់ប្រែទ្រង់ទ្រាយបានដិតជាប់គំនិតរបស់ពួកសិស្ស។ ពេត្រុសសរសេរជាង៣០ឆ្នាំក្រោយមកថា៖ «[ព្រះយេស៊ូ]បានល្បីព្រះនាម នឹងសិរីល្អពីព្រះដ៏ជាព្រះវរបិតា ក្នុងកាលដែលមានឮសំឡេងពីសិរីល្អដ៏ប្រសើរឧត្តម មានបន្ទូលមកទ្រង់ថា៖ ‹នេះជាកូនស្ងួនភ្ងាអញ ជាទីគាប់ចិត្តអញណាស់›។ យើងខ្ញុំបានឮសំឡេងនោះមកពីលើមេឃ ក្នុងកាលដែលនៅលើភ្នំបរិសុទ្ធជាមួយនឹងទ្រង់»។ (ពេត្រុសទី២ ១:១៧, ១៨) ការផ្លាស់ប្រែទ្រង់ទ្រាយបានជំរុញចិត្តសាវ័កយ៉ូហានដូចគ្នាដែរ ដ្បិតជាង៦០ឆ្នាំក្រោយពីគាត់បានឃើញការផ្លាស់ប្រែនោះ គាត់បានសរសេរថា៖ «យើងរាល់គ្នាបានឃើញសិរីល្អទ្រង់ គឺជាសិរីល្អនៃព្រះរាជបុត្រាតែ១ ដែលមកពីព្រះវរបិតា»។ (យ៉ូហាន ១:១៤) ក៏ប៉ុន្តែ ចក្ខុនិមិត្តអំពីការផ្លាស់ប្រែទ្រង់ទ្រាយ មិនមែនជាចក្ខុនិមិត្តចុងក្រោយដែលព្រះយេស៊ូប្រទានដល់ពួកអ្នកកាន់តាមទ្រង់នោះឡើយ។
ការបំភ្លឺថែមទៀតសំរាប់ពួកអ្នកស្មោះទ្រង់របស់ព្រះ
១៤, ១៥. តើសាវ័កយ៉ូហានត្រូវនៅទាល់តែព្រះយេស៊ូយាងមក ក្នុងន័យអ្វី?
១៤ ក្រោយពីព្រះយេស៊ូបានរស់ឡើងវិញ នោះទ្រង់បានលេចខ្លួនឲ្យពួកសិស្សឃើញនៅឯសមុទ្រកាលីឡេ។ នៅទីនោះ ទ្រង់មានបន្ទូលប្រាប់ពេត្រុសថា៖ «បើសិនជាខ្ញុំចង់ឲ្យ[យ៉ូហាន]នៅទាល់តែខ្ញុំមក នោះតើអំពល់អ្វីដល់អ្នក?»។ (យ៉ូហាន ២១:១, ២០-២២, ២៤) តើនេះមានន័យថា យ៉ូហាននឹងរស់យូរជាងសាវ័កឯទៀតឬ? មើលទៅដូចជាមានន័យដូច្នេះមែន ដ្បិតយ៉ូហានបានបំរើព្រះយេហូវ៉ាយ៉ាងស្មោះភក្ដីអស់ប្រមាណ៧០ឆ្នាំ។ ក៏ប៉ុន្តែ បន្ទូលរបស់ព្រះយេស៊ូបង្កប់អត្ថន័យសំខាន់ជាងនោះទៅទៀត។
១៥ ពាក្យថា«ទាល់តែខ្ញុំមក»រំឭកយើងអំពីបន្ទូលរបស់ព្រះយេស៊ូដែលសំដៅទៅគ្រា«កូនមនុស្សមកក្នុងនគររបស់លោក»។ (ម៉ាថាយ ១៦:២៨) យ៉ូហានបាននៅទាល់តែព្រះយេស៊ូយាងមកក្នុងន័យថា ក្រោយៗមកយ៉ូហានបានទទួលចក្ខុនិមិត្តអំពីការយាងមករបស់ព្រះយេស៊ូជាអ្នកគ្រប់គ្រងក្នុងព្រះរាជាណាចក្រ។ នៅជិតចុងបញ្ចប់នៃជីវិតរបស់យ៉ូហាន ក្នុងកាលដែលគាត់ត្រូវបំបរបង់ឲ្យទៅនៅកោះប៉ាត់ម៉ុស នោះគាត់ទទួលចក្ខុនិមិត្តផ្សេងៗដែលគាត់សរសេរក្នុងសៀវភៅវិវរណៈ។ ចក្ខុនិមិត្តទាំងនោះមានទីសម្គាល់ដ៏អស្ចារ្យដែលជាទំនាយពីព្រឹត្ដិការណ៍ដែលត្រូវកើតឡើងក្នុងកំឡុង«ថ្ងៃនៃព្រះអម្ចាស់»។ ចក្ខុនិមិត្តដ៏អស្ចារ្យទាំងនេះបានជំរុញចិត្តយ៉ូហានដល់ម្ល៉េះបានជាពេលព្រះយេស៊ូមានបន្ទូលថា៖ «អើ! អញមកជាឆាប់» នោះយ៉ូហានលាន់មាត់ថា៖ «អាម៉ែន! ព្រះអម្ចាស់យេស៊ូអើយ! សូមយាងមក»។—វិវរណៈ ១:១, ១០; ២២:២០
១៦. ហេតុអ្វីក៏សំខាន់ដែលយើងបន្តពង្រឹងជំនឿរបស់យើង?
១៦ មនុស្សដែលមានចិត្តស្មោះត្រង់នៅសតវត្សរ៍ទីមួយបានទទួលព្រះយេស៊ូជាព្រះមេស្ស៊ីនិងមានជំនឿលើទ្រង់។ ដោយសារមនុស្សជាច្រើននៅជុំវិញពួកគេគ្មានជំនឿ ហើយដោយសារកិច្ចការដែលពួកគេត្រូវធ្វើ និងការសាកល្បងនៅថ្ងៃមុខ នោះពួកអ្នកដែលក្លាយជាអ្នកជឿទៅលើទ្រង់ត្រូវការជំនួយដើម្បីពង្រឹងជំនឿមែន។ ព្រះយេស៊ូបានប្រទាននូវភស្តុតាងជាច្រើនដែលបញ្ជាក់ថាទ្រង់ជាព្រះមេស្ស៊ី ហើយទ្រង់ក៏បានប្រទានចក្ខុនិមិត្តជាទំនាយដើម្បីលើកទឹកចិត្តពួកអ្នកកាន់តាមទ្រង់ដែលស្មោះភក្ដី។ សព្វថ្ងៃនេះ «ថ្ងៃនៃព្រះអម្ចាស់»ជិតផុតកំណត់ហើយ។ មិនយូរប៉ុន្មានទៀត ព្រះគ្រីស្ទនឹងបំផ្លាញចោលរបបលោកីយ៍ទាំងមូលរបស់សាតាំង និងរំដោះរាស្ត្ររបស់ព្រះ។ យើងក៏ត្រូវតែពង្រឹងជំនឿរបស់យើងដែរ ដោយឆ្លៀតយកប្រយោជន៍ពីសំវិធានការទាំងអស់ដែលព្រះយេហូវ៉ាប្រទានឲ្យយើងខាងវិញ្ញាណ។
រួចរស់ជីវិតពីភាពងងឹតនិងសេចក្ដីវេទនា
១៧, ១៨. នៅសតវត្សរ៍ទីមួយ តើសិស្សរបស់ព្រះយេស៊ូនិងអស់អ្នកដែលប្រឆាំងដំណឹងល្អមានភាពខុសគ្នាយ៉ាងណា? តើក្រុមនិមួយៗនេះទទួលលទ្ធផលអ្វី?
១៧ ក្រោយពីព្រះយេស៊ូសោយទិវង្គត ពួកសិស្សបានស្ដាប់បង្គាប់ទ្រង់ដោយក្លាហានក្នុងការធ្វើបន្ទាល់អំពីទ្រង់«នៅក្រុងយេរូសាឡិម ព្រមទាំងស្រុកយូដា នឹងស្រុកសាម៉ារីទាំងមូល ហើយរហូតដល់ចុងផែនដីបំផុតផង»។ (កិច្ចការ ១:៨) ទោះជាមានគ្រារងការបៀតបៀនយ៉ាងខ្លាំងម្ដងម្កាល ព្រះយេហូវ៉ានៅតែប្រទានពរដល់ក្រុមជំនុំគ្រីស្ទានថ្មីនោះដោយប្រទានពន្លឺខាងវិញ្ញាណនិងឲ្យមានសិស្សថ្មីៗជាច្រើន។—កិច្ចការ ២:៤៧; ៤:១-៣១; ៨:១-៨
១៨ ផ្ទុយទៅវិញ ចំពោះអស់អ្នកដែលប្រឆាំងនឹងដំណឹងល្អ នោះពួកគេមានស្ថានភាពកាន់តែអាក្រក់ឡើងៗ។ សុភាសិត ៤:១៩ ចែងថា៖ «ផ្លូវរបស់មនុស្សអាក្រក់ នោះធៀបដូចជាសេចក្ដីងងឹតវិញ គេមិនដឹងជាចំពប់នឹងអ្វីទេ»។ «សេចក្ដីងងឹត»នោះមានកាន់តែខ្លាំងឡើងនៅឆ្នាំ៦៦ ស.យ. នៅពេលដែលពួកទាហានរ៉ូមមកឡោមព័ទ្ធក្រុងយេរូសាឡិម។ ក្រោយពីពួកទាហានរ៉ូមបានដកទ័ពចេញវិញដោយគ្មានមូលហេតុអ្វីសោះ គេក៏បានត្រឡប់មកវិញនៅឆ្នាំ៧០ ស.យ. ហើយលើកនោះពួកគេបានកំទេចចោលទីក្រុងយេរូសាឡិមតែម្ដង។ យោងទៅតាមយ៉ូសេហ្វឺសជាអ្នកប្រវត្ដិសាស្ត្រជាតិយូដា នោះមានជនជាតិយូដាជាងមួយលាននាក់បានស្លាប់។ ប៉ុន្តែ ជនគ្រីស្ទានដែលមានចិត្តស្មោះភក្ដីបានរួចរស់ជីវិត។ ហេតុអ្វី? ពីព្រោះនៅពេលដែលពួកទាហានរ៉ូមបានដកទ័ពចេញពេលដំបូង នោះពួកគ្រីស្ទានបានស្ដាប់តាមបង្គាប់របស់ព្រះយេស៊ូឲ្យរត់ចេញពីក្រុងយេរូសាឡិម។—លូកា ២១:២០-២២
១៩, ២០. (ក) កាលដែលរបបលោកីយ៍នេះមកជិតដល់ទីបញ្ចប់ ហេតុអ្វីបានជារាស្ត្ររបស់ព្រះមិនចាំបាច់ខ្លាច? (ខ) ក្នុងកំឡុងប៉ុន្មានទសវត្សរ៍មុនឆ្នាំ១៩១៤ តើព្រះយេហូវ៉ាប្រទានឲ្យរាស្ត្រទ្រង់វិនិច្ឆ័យយល់អំពីអ្វី?
១៩ ស្ថានការណ៍របស់យើងសព្វថ្ងៃក៏ស្រដៀងនឹងគ្រានោះដែរ។ សេចក្ដីវេទនាជាខ្លាំងដែលនៅខាងមុខនេះនឹងនាំមុខទីបញ្ចប់នៃរបបលោកីយ៍អាក្រក់ទាំងមូលរបស់សាតាំង។ ប៉ុន្តែ រាស្ត្ររបស់ព្រះមិនចាំបាច់ខ្លាចទេ ដ្បិតព្រះយេស៊ូបានសន្យាថា៖ «មើល! ខ្ញុំក៏នៅជាមួយនឹងអ្នករាល់គ្នាជារាល់ថ្ងៃដែរ ដរាបដល់បំផុតកល្ប»។ (ម៉ាថាយ ២៨:២០) ដើម្បីពង្រឹងជំនឿនៃសិស្សដំបូងនិងជួយពួកគេឲ្យប្រុងប្រៀបខ្លួនចំពោះអ្វីដែលត្រូវកើតឡើងនៅថ្ងៃមុខ នោះព្រះយេស៊ូបានធ្វើឲ្យពួកគេឃើញនូវសិរីរុងរឿងរបស់ទ្រង់នៅស្ថានសួគ៌ជាព្រះមេស្ស៊ីដែលជាស្តេច។ ចុះយ៉ាងណានៅសព្វថ្ងៃនេះ? នៅឆ្នាំ១៩១៤ អ្វីដែលបានបង្ហាញនៅក្នុងចក្ខុនិមិត្តនោះបានកើតឡើងពិតមែន។ ហើយការសម្រេចនោះពិតជាពង្រឹងជំនឿរបស់រាស្ត្រព្រះមែន ដ្បិតនេះបញ្ជាក់ពីអនាគតដ៏ភ្លឺស្វាងនៅខាងមុខយើង! ហើយរាស្ត្ររបស់ព្រះយេហូវ៉ាបានទទួលការយល់ដឹងបន្ដិចម្ដងៗស្តីអំពីព្រះរាជាណាចក្ររបស់ព្រះមេស្ស៊ី។ នៅកណ្ដាលលោកីយ៍ដែលមានស្ថានការណ៍កាន់តែអាក្រក់ឡើងៗ នោះ«ផ្លូវរបស់មនុស្សសុចរិតធៀបដូចជាពន្លឺដែលកំពុងតែរះឡើង ដែលភ្លឺកាន់តែខ្លាំងឡើង ដរាបដល់ពេញកំឡាំង»។—សុភាសិត ៤:១៨
២០ សូម្បីតែមុនឆ្នាំ១៩១៤ នោះពួកគ្រីស្ទានចាក់ប្រេងតាំងមួយក្រុមតូចបានចាប់ផ្ដើមយល់នូវសេចក្ដីពិតអំពីការយាងត្រឡប់មកវិញរបស់ព្រះអម្ចាស់។ ជាឧទាហរណ៍ ពួកគេបានវិនិច្ឆ័យយល់ថាការយាងត្រឡប់មកវិញរបស់ទ្រង់ គឺជាការមើលមិនឃើញ ដូចនៅឆ្នាំ៣៣ស.យ.ពេលដែលទេវតាពីររូបបានលេចខ្លួនឲ្យសិស្សឃើញពេលដែលព្រះយេស៊ូបានយាងឡើងទៅស្ថានសួគ៌។ ក្រោយពីពពកបាំងព្រះយេស៊ូហើយពួកសិស្សលែងឃើញទ្រង់ នោះទេវតាបានពោលថា៖ «ព្រះយេស៊ូវនេះឯង ដែលព្រះបានលើកពីអ្នករាល់គ្នា ឡើងទៅលើស្ថានសួគ៌ ទ្រង់នឹងយាងមកវិញ តាមបែបដដែល ដូចជាអ្នករាល់គ្នាបានឃើញទ្រង់ទៅនោះដែរ»។—កិច្ចការ ១:៩-១១, កំណែជាអក្សរទ្រេត
២១. តើយើងនឹងពិគ្រោះអ្វីនៅក្នុងអត្ថបទជាបន្ទាប់?
២១ មានតែអ្នកកាន់តាមដ៏ស្មោះភក្ដីប៉ុណ្ណោះ ដែលបានមើលឃើញព្រះយេស៊ូចេញដំណើរនោះ។ ដូចការផ្លាស់ប្រែទ្រង់ទ្រាយ គឺគ្មានការបង្ហាញដ៏អស្ចារ្យនៅមុខសាធារណៈជនទាំងឡាយទេ។ មនុស្សទូទៅក្នុងលោកីយ៍មិនដឹងអំពីអ្វីដែលបានកើតឡើងទីនោះទេ។ នៅពេលដែលព្រះគ្រីស្ទយាងត្រឡប់មកវិញជាអ្នកគ្រប់គ្រងក្នុងព្រះរាជាណាចក្ររបស់ព្រះ ក៏ដូចគ្នាដែរ។ (យ៉ូហាន ១៤:១៩) មានតែសិស្សចាក់ប្រេងតាំងស្មោះត្រង់ប៉ុណ្ណោះ ដែលអាចត្រិះរិះយល់អំពីវត្តមានរបស់ព្រះយេស៊ូ។ នៅក្នុងអត្ថបទជាបន្ទាប់ យើងនឹងពិចារណាមើលថា ការយល់ឆ្លុះនេះត្រូវមានអានុភាពសំខាន់លើពួកគេ ដែលនាំឲ្យមានការប្រមូលមនុស្សច្រើនលាននាក់ ដែលនឹងក្លាយជាអនុរាស្ត្ររបស់ព្រះយេស៊ូនៅផែនដី។—វិវរណៈ ៧:៩, ១៤
[កំណត់សម្គាល់]
a តាមមើលទៅ នៅពេលដែលព្រះយេស៊ូទទួលបុណ្យជ្រមុជទឹក នោះមានតែយ៉ូហានទេដែលឮព្រះសូរសៀងរបស់ព្រះ។ ពួកសាសន៍យូដាដែលព្រះយេស៊ូមានបន្ទូលទៅកាន់«មិនដែលឮសំឡេង[ព្រះ]ឡើយ ក៏មិនដែលឃើញរូបអង្គទ្រង់ផង»។—យ៉ូហាន ៥:៣៧
តើអ្នកនៅចាំឬទេ?
• នៅពេលដែលព្រះយេស៊ូត្រូវគេចោទប្រឆាំងថា ទ្រង់ធ្វើខុសច្បាប់ថ្ងៃឈប់សំរាកនិងប្រមាថព្រះ តើទ្រង់ប្រទានភស្តុតាងអ្វីដើម្បីបង្ហាញថាទ្រង់ជាព្រះមេស្ស៊ី?
• តើសិស្សដំបូងរបស់ព្រះយេស៊ូទទួលប្រយោជន៍អ្វីពីចក្ខុនិមិត្តអំពីការផ្លាស់ប្រែទ្រង់ទ្រាយ?
• តើព្រះយេស៊ូចង់មានន័យយ៉ាងណា ពេលដែលទ្រង់មានបន្ទូលថា យ៉ូហានត្រូវនៅទាល់តែទ្រង់យាងមក?
• នៅឆ្នាំ១៩១៤ តើចក្ខុនិមិត្តអ្វីបានសម្រេចជាការពិត?
[រូបភាពនៅទំព័រ១៨]
ព្រះយេស៊ូបានបញ្ជាក់ ហេតុផលថាទ្រង់ជាព្រះមេស្ស៊ី
[រូបភាពនៅទំព័រ២០]
ចក្ខុនិមិត្តអំពីការផ្លាស់ប្រែទ្រង់ទ្រាយបានពង្រឹងជំនឿសិស្សទ្រង់
[រូបភាពនៅទំព័រ២១]
យ៉ូហានត្រូវនៅទាល់តែព្រះយេស៊ូយាង«មក»