ព្រះយេហូវ៉ាស្រឡាញ់យុត្ដិធម៌
«អញគឺព្រះយេហូវ៉ា អញស្រឡាញ់សេចក្ដីយុត្ដិធម៌»។—អេសាយ ៦១:៨
១, ២. (ក) តើពាក្យ«យុត្ដិធម៌»និង«អយុត្ដិធម៌»មានន័យអ្វី? (ខ) តើគម្ពីររៀបរាប់យ៉ាងណាអំពីព្រះយេហូវ៉ានិងភាពយុត្ដិធម៌របស់ទ្រង់?
យុត្ដិធម៌បានបកស្រាយជា‹ការគួរតាមច្បាប់ សេចក្ដីទៀងត្រង់និងការប្រព្រឹត្តត្រឹមត្រូវ›។ ការប្រព្រឹត្តដ៏អយុត្ដិធម៌ជាការអាក្រក់ដែលរួមបញ្ចូលចិត្តល្អៀង ការរើសមុខនិងការធ្វើបាបអ្នកដទៃដែលគ្មានកំហុស។
២ ជិត៣.៥០០ឆ្នាំមុន លោកម៉ូសេបានសរសេរអំពីព្រះយេហូវ៉ាជាព្រះមហាក្សត្រនៃសកលលោកថា៖ «អស់ទាំងផ្លូវទ្រង់សុទ្ធតែប្រកបដោយយុត្ដិធម៌។ ទ្រង់ជាព្រះដ៏ស្មោះត្រង់ ឥតមានសេចក្ដីទុច្ចរិតណាឡើយ»។ (ចោទិយកថា ៣២:៤) ជាង៧០០ឆ្នាំក្រោយនោះមក ព្រះយេហូវ៉ាបណ្ដាលឲ្យលោកអេសាយសរសេរពាក្យទាំងនេះថា៖ «អញគឺព្រះយេហូវ៉ា អញស្រឡាញ់សេចក្ដីយុត្ដិធម៌»។ (អេសាយ ៦១:៨) រួចមក នៅសតវត្សរ៍ទីមួយសាវ័កប៉ុលបានលាន់មាត់ថា៖ «តើព្រះមានសេចក្ដីទុច្ចរិត[ឬ«អយុត្ដិធម៌»]ឬអី? ទេ គ្មានសោះ!»។ (រ៉ូម ៩:១៤; ខ.ស.) នៅសម័យដដែលនោះ សាវ័កពេត្រុសក៏ប្រកាសថា៖ «ព្រះមិនរើសមុខអ្នកណាទេ គឺនៅក្នុងគ្រប់ទាំងសាសន៍ អស់អ្នកណាដែលកោតខ្លាចដល់ទ្រង់ ព្រមទាំងប្រព្រឹត្តសេចក្ដីសុចរិត នោះគាប់ដល់ព្រះហឫទ័យទ្រង់ដែរ»។ (កិច្ចការ ១០:៣៤, ៣៥) ត្រូវហើយ «ព្រះយេហូវ៉ាទ្រង់សព្វព្រះទ័យនឹងសេចក្ដីយុត្ដិធម៌»មែន!—ទំនុកដំកើង ៣៧:២៨; ម៉ាឡាគី ៣:៦
ពិភពលោកដ៏អយុត្ដិធម៌
៣. តើអំពើអយុត្ដិធម៌មានការផ្ដើមយ៉ាងណា?
៣ ក្នុងពិភពលោកនេះ យុត្ដិធម៌មានតិចណាស់! យើងអាចរងអំពើអយុត្ដិធម៌ក្នុងគ្រប់មជ្ឈដ្ឋានគ្រប់ស្រទាប់នៃវណ្ណៈ។ មិនថានៅកន្លែងធ្វើការ នៅឯសាលារៀន ពេលមានទំនាក់ទំនងជាមួយពួករាជការ ហើយសូម្បីតែក្នុងរង្វង់គ្រួសារក៏មានអយុត្ដិធម៌ដែរ។ តាមការពិត ពិភពលោកមានអំពើអយុត្ដិធម៌យូរយារមកហើយ។ ទេវតាបះបោរមួយរូបដែលហៅថា សាតាំងដ៏ជាមេកំណាច បានញុះញង់មនុស្សពីរនាក់ដំបូង ដែលជាមាតាបិតានៃមនុស្សជាតិ ឲ្យបះបោរប្រឆាំងនឹងព្រះដោយបំពានច្បាប់ទ្រង់។ តាំងពីនោះមក អំពើអយុត្ដិធម៌ចេះតែមានរហូត។ ព្រះយេហូវ៉ាបានប្រទានឲ្យទេវតានិងមនុស្សនូវអំណោយដ៏អស្ចារ្យមួយ គឺចិត្តសេរី។ ដូច្នេះ ពេលអ័ដាម អេវ៉ានិងសាតាំងបំពានសិទ្ធិព្រះ នោះហើយជាអំពើប្រាសចាកយុត្ដិធម៌។ កំហុសរបស់ពួកគេនាំឲ្យមនុស្សទាំងឡាយរងការឈឺចាប់ជាខ្លាំង ហើយបណ្ដាលឲ្យពួកគេស្លាប់បាត់បង់ជីវិតផង។—លោកុប្បត្តិ ៣:១-៦; រ៉ូម ៥:១២; ហេព្រើរ ២:១៤
៤. តើមនុស្សជាតិបានរងអំពើអយុត្ដិធម៌យូរប៉ុណ្ណា?
៤ តាំងពីការបះបោរដំបូងក្នុងសួនច្បារអេដែននោះ សង្គមមនុស្សបានពេញទៅដោយអយុត្ដិធម៌ អស់ប្រមាណ៦.០០០ឆ្នាំហើយ។ នេះមិនជាការចម្លែកអ្វីឡើយ ពីព្រោះសាតាំងជាព្រះនៃពិភពលោកនេះ។ (កូរិនថូសទី២ ៤:៤) សាតាំងជាអ្នកកុហក ហើយក៏ជាឪពុកឬមេផ្ដើមពាក្យកំភូត។ វាប្រឆាំងតទល់នឹងព្រះយេហូវ៉ា ហើយបាននិយាយបង្កាច់បង្ខូចទ្រង់ដែរ។ (យ៉ូហាន ៨:៤៤) សាតាំងចេះតែធ្វើអំពើអយុត្ដិធម៌ហួសល្បត់។ ជាឧទាហរណ៍ មុនទឹកជន់លិចផែនដីនាសម័យលោកណូអេ ព្រះយេហូវ៉ាកត់សម្គាល់ថា៖ «ការអាក្រក់របស់មនុស្សបានចំរើនជាច្រើនឡើងនៅផែនដី ហើយអស់ទាំងគំនិតក្នុងចិត្តគេក៏សុទ្ធតែអាក្រក់ជានិច្ច»។ (លោកុប្បត្តិ ៦:៥) មូលហេតុមួយដែលពិភពលោកនោះមានសភាពការណ៍អាក្រក់ គឺដោយសារឥទ្ធិពលរបស់សាតាំង។ មកដល់សម័យព្រះយេស៊ូ ពិភពលោកក៏មានស្ថានការណ៍ដូចគ្នាដែរ។ ព្រះយេស៊ូមានប្រសាសន៍ថា៖ «សេចក្ដីលំបាកនៅថ្ងៃណា នោះគឺល្មមត្រឹមថ្ងៃនោះហើយ» ដែលបានសេចក្ដីថា មនុស្សមិនអាចជៀសរួចពីទុក្ខលំបាកដូចជាការអយុត្ដិធម៌ឡើយ។ (ម៉ាថាយ ៦:៣៤) អ្វីដែលចែងទុកក្នុងគម្ពីរ គឺពិតជាត្រឹមត្រូវណាស់ថា៖ «ជីវិតទាំងឡាយក៏ថ្ងូរ ហើយឈឺចាប់ជាមួយគ្នា ដរាបដល់គ្រាឥឡូវនេះ»។—រ៉ូម ៨:២២
៥. នៅសព្វថ្ងៃនេះ ហេតុអ្វីក៏មានអំពើអយុត្ដិធម៌ច្រើនជាងសម័យមុនៗ?
៥ គឺច្បាស់ហើយថា ប្រវត្ដិសាស្ត្ររបស់មនុស្សជាតិពេញទៅដោយអំពើអាក្រក់ដ៏អយុត្ដិធម៌។ ប៉ុន្តែ ស្ថានភាពនាសម័យនេះ គឺរឹតតែអាក្រក់ជាងមុនៗទៅទៀត។ ហេតុអ្វី? ពីព្រោះជិត១០០ឆ្នាំហើយ របៀបរបបពិភពលោកនេះដែលពេញទៅដោយមនុស្សដែលមិនគោរពព្រះ បានចូលគ្រា«ជាន់ក្រោយបង្អស់»ជា«គ្រាលំបាកណាស់»ដែលជិតផុតកំណត់។ មានទំនាយក្នុងគម្ពីរថា នាសម័យនេះមនុស្សនឹង‹ស្រឡាញ់តែខ្លួនឯង ស្រឡាញ់ប្រាក់ អួតអាង មានឫកខ្ពស់ ប្រមាថមើលងាយ រមិលគុណ មានចិត្តមិនបរិសុទ្ធ មិនស្រឡាញ់គ្នាតាមធម្មតា គ្មាន[«អធ្យាស្រ័យ»] និយាយបង្កាច់គេ មិនចេះទប់ចិត្ត មានចិត្តសាហាវ មិនចូលចិត្តនឹងការល្អ ក្បត់គេ ឥតបើគិតនិងមានចិត្តធំ›។ (ធីម៉ូថេទី២ ៣:១-៥; ខ.ស.) លក្ខណៈអាក្រក់បែបនេះ រមែងនាំឲ្យមានអំពើអយុត្ដិធម៌។
៦, ៧. តើមនុស្សជាតិនាសម័យនេះបានរងអំពើអយុត្ដិធម៌ដ៏ហួសប្រមាណអ្វីខ្លះ?
៦ ក្នុងរយៈពេល១០០ឆ្នាំកន្លងទៅនេះ មនុស្សបានឆ្លងកាត់អំពើអយុត្ដិធម៌ហួសប្រមាណ ដែលមានច្រើនជាងសម័យមុនៗទៅទៀត។ មូលហេតុមួយ គឺដោយសារមានសង្គ្រាមច្រើនជាងគេក្នុងអំឡុងពេលនោះ។ ជាឧទាហរណ៍ អ្នកប្រវត្ដិវិទូខ្លះប៉ាន់ស្មានថា មនុស្សប្រមាណ៥០លានដល់៦០លាននាក់បានស្លាប់ក្នុងសង្គ្រាមលោកលើកទីពីរ។ ពួកគេភាគច្រើនក៏មិនមែនជាទាហានផង តែជាមនុស្សប្រុសស្រីនិងកូនក្មេងដែលមិនធ្វើសង្គ្រាមទេ។ តាំងពីសង្គ្រាមនោះចប់ មនុស្សរាប់លាននាក់ទៀតបានស្លាប់ក្នុងសង្គ្រាមផ្សេងៗ ហើយពួកគេភាគច្រើនក៏មិនមែនជាទាហានដែរ។ សាតាំងញុះញង់ឲ្យមានការអយុត្ដិធម៌បែបនេះ ពីព្រោះវាមានកំហឹងយ៉ាងខ្លាំង ដោយដឹងថាបន្ដិចទៀតព្រះយេហូវ៉ានឹងឈ្នះលើវាទាំងស្រុង។ ទំនាយក្នុងគម្ពីររៀបរាប់ថា មេកំណាច«បានចុះមកឯអ្នករាល់គ្នា ទាំងមានសេចក្ដីឃោរឃៅជាខ្លាំង ដោយវាដឹងថាពេលវេលាវាខ្លីណាស់ហើយ»។—វិវរណៈ ១២:១២
៧ នៅសព្វថ្ងៃនេះ បើគិតជាសរុបអំពីប្រាក់ចំណាយខាងយោធានៅទូទាំងពិភពលោក នោះគេចាយអស់ប្រមាណមួយលានលានដុល្លារអាម៉េរិករៀងរាល់ឆ្នាំ។ ប៉ុន្តែ មនុស្សរាប់រយលាននាក់ខ្វះអ្វីដែលពួកគេត្រូវការក្នុងជីវិត។ ដូច្នេះ សូមគិតអំពីប្រយោជន៍ដែលមនុស្សជាច្រើនអាចទទួលបាន បើគេយកលុយនោះទៅចាយក្នុងការដ៏ល្អវិញ។ មនុស្សប្រមាណមួយពាន់លាននាក់ខ្វះអាហារ តែមនុស្សឯទៀតមានច្រើនហួសពីអ្វីដែលពួកគេត្រូវការទៀត។ យោងទៅតាមព័ត៌មានពីផ្នែកមួយនៃអង្គការសហប្រជាជាតិ កូនក្មេងប្រមាណប្រាំលាននាក់ស្លាប់រៀងរាល់ឆ្នាំ ដោយព្រោះតែការអត់ឃ្លាន។ នេះពិតជាអយុត្ដិធម៌មែន! ណាមួយទៀត សូមគិតអំពីកូនជាច្រើនដែលម្ដាយពន្លូតចោល។ គេប៉ាន់ស្មានថា រៀងរាល់ឆ្នាំទូទាំងពិភពលោក ចំនួនកូនដែលម្ដាយពន្លូតចោលនោះ គឺមានរវាង៤០លានដល់៦០លាននាក់! នេះជាអំពើអយុត្ដិធម៌ដ៏អាក្រក់ហួសប្រមាណ!
៨. មនុស្សជាតិអាចមានយុត្ដិធម៌ពិតប្រាកដតាមរបៀបតែមួយគត់ តើតាមរបៀបណា?
៨ ពួកអ្នកគ្រប់គ្រងនៅសព្វថ្ងៃនេះ មិនបានរាវរកដំណោះស្រាយសម្រាប់បញ្ហាទាំងឡាយដែលយាយីមនុស្សជាតិទេ។ ហើយទោះបើពួកគេព្យាយាមយ៉ាងណាក៏ដោយ នេះក៏មិនអាចនាំឲ្យមានស្ថានភាពប្រសើរឡើងបានឡើយ។ មានទំនាយក្នុងបណ្ដាំព្រះអំពីសម័យនេះថា៖ «ពួកអាក្រក់នឹងពួកឆបោក គេនឹងមានជំនឿនជឿនទៅខាងសេចក្ដីអាក្រក់កាន់តែខ្លាំងឡើង ទាំងនាំមនុស្សឲ្យវង្វេង ហើយត្រូវវង្វេងខ្លួនឯងផង»។ (ធីម៉ូថេទី២ ៣:១៣) អំពើអយុត្ដិធម៌ទៅជាការធម្មតាក្នុងសង្គមមនុស្ស ដល់ម្ល៉េះបានជាមិនអាចទប់ស្កាត់បានឡើយ។ មានតែព្រះដែលស្រឡាញ់យុត្ដិធម៌ប៉ុណ្ណោះ អាចបំបាត់ចោលការដ៏អយុត្ដិធម៌វិញ។ មានតែព្រះយេហូវ៉ាទេ ដែលអាចដកសាតាំង ពួកវិញ្ញាណកំណាចនិងមនុស្សអាក្រក់ចេញ។—យេរេមា ១០:២៣, ២៤
កង្វល់ដែលមានមូលហេតុ
៩, ១០. ហេតុអ្វីបានជាអេសាភធ្លាក់ទឹកចិត្ត?
៩ នៅសម័យបុរាណ សូម្បីតែអ្នកដែលរួមដៃក្នុងការសរសេរគម្ពីរ ក៏បានឆ្ងល់អំពីមូលហេតុដែលព្រះមិនចាត់វិធានការភ្លាមដើម្បីជួយមនុស្ស ព្រមទាំងនាំឲ្យមានយុត្ដិធម៌ពិតនិងសេចក្ដីសុចរិត។ ជាឧទាហរណ៍ សូមគិតអំពីបុរសម្នាក់ដែលបានរស់នៅសម័យដែលគេសរសេរគម្ពីរ។ ក្នុងពាក្យផ្ដើមសម្រាប់បទទំនុកដំកើងទី៧៣ យើងឃើញឈ្មោះអេសាភ ដែលប្រហែលជាសំដៅទៅលើបុរសម្នាក់ពីកុលសម្ព័ន្ធលេវី ដែលបានលេងភ្លេងក្នុងអំឡុងការសោយរាជ្យរបស់ស្តេចដាវីឌ។ បើមិនដូច្នេះ ឈ្មោះនោះអាចសំដៅទៅលើក្រុមអ្នកលេងភ្លេងដែលជាកូនចៅរបស់អេសាភវិញ។ អេសាភនិងកូនចៅរបស់គាត់បានតែងបទចម្រៀងជាច្រើន ដែលបានច្រៀងពេលបណ្ដាជនជួបជុំគ្នាសម្រាប់ការថ្វាយបង្គំ។ ប៉ុន្តែ មានគ្រាមួយដែលអ្នកតែងបទទំនុកនោះបានធ្លាក់ទឹកចិត្តក្នុងការថ្វាយបង្គំ។ គាត់មើលភាពចម្រុងចម្រើនរបស់មនុស្សអាក្រក់ ហើយកត់សម្គាល់ថា ពួកគេច្រើនតែស្កប់ចិត្តនឹងជីវិត ហើយមិនសូវកើតទុក្ខប៉ុន្មានទេ។
១០ យើងអានថា៖ «ទូលបង្គំមានសេចក្ដីច្រណែនចំពោះមនុស្សអំនួត ដោយឃើញសេចក្ដីចំរើនរបស់មនុស្សអាក្រក់នោះ។ ពីព្រោះ[«ក្នុងមួយជីវិតរបស់ពួកគេ»] នោះគ្មានឈឺចាប់អ្វីសោះ គឺកំឡាំងគេនៅតែមាំមួនដដែល។ គេមិនមានទុក្ខដូចជាមនុស្សធម្មតាឡើយ ក៏មិនត្រូវវេទនាដូចមនុស្សដទៃដែរ»។ (ទំនុកដំកើង ៧៣:២-៨; ខ.ស.) ប៉ុន្តែក្រោយមក អ្នកតែងបទគម្ពីរនោះបានទទួលស្គាល់ថា របៀបគិតគូរបែបនោះមិនជាការត្រឹមត្រូវទេ ហើយក៏គ្មានប្រយោជន៍សោះ។ (ទំនុកដំកើង ៧៣:១៥, ១៦) ទោះជាអ្នកតែងបទទំនុកនោះខំកែប្រែគំនិតរបស់ខ្លួនក៏ដោយ គាត់នៅតែពិបាកយល់ហេតុដែលមើលទៅមនុស្សអាក្រក់រួចខ្លួនរហូតពេលធ្វើខុស តែមនុស្សល្អតែងតែរងទុក្ខលំបាកវិញ?
១១. នៅទីបំផុត តើអេសាភដែលជាអ្នកតែងបទទំនុកនោះបានយល់យ៉ាងណា?
១១ អេសាភជាមនុស្សស្មោះត្រង់នៅសម័យបុរាណ ដូច្នេះនៅទីបំផុតគាត់ក៏យល់ច្បាស់អំពីអ្វីដែលនឹងកើតឡើងដល់មនុស្សអាក្រក់ ពោលគឺ ព្រះយេហូវ៉ានឹងកាត់ក្ដីឲ្យពួកគេដោយយុត្ដិធម៌។ (ទំនុកដំកើង ៧៣:១៧-១៩) ដាវីឌជាអ្នកតែងបទទំនុកខ្លះដែរ ហើយគាត់សរសេរថា៖ «ចូររង់ចាំព្រះយេហូវ៉ា ហើយកាន់តាមផ្លូវទ្រង់ចុះ! នោះទ្រង់នឹងដំកើងអ្នកឲ្យបានផែនដីជាមរដក។ នៅគ្រាដែលមនុស្សអាក្រក់ត្រូវកាត់ចេញ នោះអ្នកនឹងបានឃើញហើយ»។—ទំនុកដំកើង ៣៧:៩, ១១, ៣៤
១២. (ក) តើព្រះយេហូវ៉ាមានគោលបំណងអ្វីស្តីអំពីការអាក្រក់និងអំពើអយុត្ដិធម៌? (ខ) តើអ្នកមានអារម្មណ៍យ៉ាងណាស្តីអំពីវិធីទប់ស្កាត់អំពើអយុត្ដិធម៌?
១២ គ្មានហេតុសង្ស័យអ្វីឡើយថា ស្របទៅតាមកំណត់ពេលរបស់ព្រះយេហូវ៉ា ទ្រង់មានគោលបំណងបំបាត់ចោលពីផែនដី នូវអំពើអាក្រក់និងការអយុត្ដិធម៌ដែលតែងតែដើរទន្ទឹមគ្នាជានិច្ច។ សូម្បីតែគ្រិស្តសាសនិកស្មោះត្រង់ក៏គួររំលឹកខ្លួនម្ដងម្កាលពីគោលបំណងនោះរបស់ព្រះយេហូវ៉ា។ ព្រះយេហូវ៉ានឹងដកចេញអស់អ្នកដែលធ្វើខុសពីឆន្ទៈទ្រង់ ហើយទ្រង់នឹងប្រទានរង្វាន់ដល់អស់អ្នកដែលធ្វើតាមឆន្ទៈទ្រង់វិញ។ «ព្រះនេត្រទ្រង់ទតមើល ត្របកព្រះនេត្រទ្រង់ពិចារណាមើលមនុស្សជាតិទាំងឡាយ។ ព្រះយេហូវ៉ាទ្រង់ល្បងលមនុស្សសុចរិត តែទ្រង់មានព្រះហឫទ័យស្អប់ដល់មនុស្សអាក្រក់ នឹងពួកអ្នកដែលចូលចិត្តខាងសេចក្ដីច្រឡោតវិញ។ ទ្រង់នឹងបង្អុរឲ្យភ្លៀងជាអន្ទាក់មកលើមនុស្សអាក្រក់ គឺជាភ្លើងឆេះនឹងស្ពាន់ធ័រ ហើយខ្យល់ក្ដៅក្រហាយ . . . ដ្បិតព្រះយេហូវ៉ាទ្រង់សុចរិត ទ្រង់ក៏ស្រឡាញ់សេចក្ដីសុចរិតដែរ»។—ទំនុកដំកើង ១១:៤-៧
ពិភពលោកថ្មីដ៏យុត្ដិធម៌
១៣, ១៤. ហេតុអ្វីបានជាពិភពលោកថ្មីនឹងពោរពេញទៅដោយភាពសុចរិតនិងយុត្ដិធម៌?
១៣ ព្រះយេហូវ៉ានឹងបំផ្លាញចោលរបៀបរបបនៃពិភពលោកដ៏អយុត្ដិធម៌នេះដែលស្ថិតក្រោមអំណាចសាតាំង ហើយក្រោយមកទ្រង់នឹងរៀបចំឲ្យមានពិភពលោកថ្មីដ៏អស្ចារ្យ។ ព្រះយេស៊ូបានបង្រៀនដល់អ្នកកាន់តាមទ្រង់ឲ្យអធិស្ឋានសូមឲ្យរាជាណាចក្ររបស់ព្រះយេហូវ៉ាឆាប់មកដល់ ហើយរាជាណាចក្រនោះឯងដែលនឹងគ្រប់គ្រងនៅលើពិភពលោកថ្មី។ ភាពសុចរិតនិងយុត្ដិធម៌ត្រូវជំនួសអំពើអាក្រក់និងការដ៏អយុត្ដិធម៌វិញ។ នៅគ្រានោះ ការអធិស្ឋាន«សូមឲ្យរាជ្យទ្រង់បានមកដល់» និង«សូមឲ្យព្រះហឫទ័យទ្រង់បានសំរេចនៅផែនដីដូចនៅស្ថានសួគ៌» នឹងសម្រេចយ៉ាងពេញលេញ។—ម៉ាថាយ ៦:១០
១៤ គម្ពីរពណ៌នាអំពីការគ្រប់គ្រងដែលនឹងមាននៅសម័យនោះ ថាមានលក្ខណៈស្របទៅតាមចំណង់ចំណូលចិត្តរបស់មនុស្សសុចរិតនាសម័យនេះ។ នៅគ្រានោះ បទទំនុកទី១៤៥:១៦ នឹងសម្រេចយ៉ាងពេញលេញ។ ទំនាយនោះចែងថា៖ «[ព្រះយេហូវ៉ានឹង]លាព្រះហស្ត ក៏បំពេញចិត្តប្រាថ្នានៃជីវិតទាំងឡាយ»។ ម្យ៉ាងទៀត សៀវភៅអេសាយ ៣២:១ ចែងថា៖ «មើល! នឹងមានស្តេច១អង្គ[គឺព្រះគ្រិស្តយេស៊ូនៅឯស្ថានសួគ៌ ដែលនឹង]សោយរាជ្យដោយសុចរិត។ ពួកចៅហ្វាយ[ជាពួកអ្នកនៅផែនដីដែលជាអ្នកតាងព្រះគ្រិស្ត] នឹងគ្រប់គ្រងដោយយុត្ដិធម៌»។ ស្តីអំពីព្រះយេស៊ូគ្រិស្តជាស្តេច សៀវភៅអេសាយ ៩:៧ ទាយថា៖ «ឯសេចក្ដីចំរើននៃរដ្ឋបាលទ្រង់នឹងសេចក្ដីសុខសាន្តរបស់ទ្រង់ នោះនឹងមិនចេះផុតពីបល្ល័ង្ករបស់ដាវីឌនឹងព្រះរាជាណាចក្រនៃទ្រង់ឡើយ ដើម្បីនឹងតាំងឡើងហើយទប់ទល់ដោយសេចក្ដីយុត្ដិធម៌នឹងសេចក្ដីសុចរិត ចាប់តាំងពីឥឡូវនេះជារៀងដរាបទៅ។ គឺសេចក្ដីឧស្សាហ៍របស់ព្រះយេហូវ៉ានៃពួកពលបរិវារ នឹងសម្រេចការនេះ»។ តើអ្នកអាចស្រមៃឃើញខ្លួនអ្នកកំពុងតែអរសប្បាយក្រោមការគ្រប់គ្រងនោះទេ?
១៥. នៅក្នុងពិភពលោកថ្មី តើព្រះយេហូវ៉ានឹងធ្វើអ្វីសម្រាប់មនុស្សជាតិ?
១៥ នៅក្នុងពិភពលោកថ្មីរបស់ព្រះយេហូវ៉ា យើងនឹងលែងពោលពាក្យដូចបានកត់ទុកក្នុងសៀវភៅសាស្ដា ៤:១ ដែលចែងថា៖ «យើងបានវិលមកពិចារណាមើលអស់ទាំងការសង្កត់សង្កិនដែលកើតមកនៅក្រោមថ្ងៃ ក៏ឃើញទឹកភ្នែករបស់ពួកអ្នកដែលត្រូវគេសង្កត់សង្កិន ហើយឃើញថាគេគ្មានអ្នកណានឹងជួយដោះទុក្ខឡើយ។ គេត្រូវរឹបជាន់ដោយពួកអ្នកមានអំណាច ឥតអ្នកណានឹងជួយដោះទុក្ខទេ»។ ដោយសារយើងមិនទាន់មានភាពល្អឥតខ្ចោះ គឺពិបាកបន្ដិចឲ្យយើងឃើញទិដ្ឋភាពច្បាស់លាស់ ពីសភាពការណ៍អស្ចារ្យដែលនឹងមានក្នុងពិភពលោកថ្មីដ៏សុចរិតនោះ។ អំពើអាក្រក់នឹងលែងមានទៀត ហើយមួយថ្ងៃៗនឹងមានពេញទៅដោយតែការល្អជានិច្ច។ អ្វីៗក៏ដោយដែលមិនល្អ ព្រះយេហូវ៉ានឹងកែប្រែឲ្យបានល្អឡើងវិញ ហើយទ្រង់នឹងសម្រេចការនោះហួសពីអ្វីដែលយើងអាចនឹកស្មានទៅទៀត។ គប្បីណាស់ដែលព្រះយេហូវ៉ាបានបណ្ដាលឲ្យសាវ័កពេត្រុសសរសេរថា៖ «តាមសេចក្ដីសន្យារបស់ទ្រង់ នោះយើងរាល់គ្នាទន្ទឹងចាំផ្ទៃមេឃថ្មីនិងផែនដីថ្មី ដែលមានសុទ្ធតែសេចក្ដីសុចរិត!»។—ពេត្រុសទី២ ៣:១៣
១៦. តើ«ផ្ទៃមេឃថ្មី»បានស្ថាបនារួចហើយក្នុងន័យអ្វី? នៅសព្វថ្ងៃនេះ តើ«ផែនដីថ្មី»កំពុងរៀបចំឡើងយ៉ាងណា?
១៦ តាមការពិត «ផ្ទៃមេឃថ្មី»ដែលតំណាងរាជរដ្ឋាភិបាលរបស់ព្រះក្រោមអំណាចព្រះគ្រិស្តនៅឯស្ថានសួគ៌ បានស្ថាបនាឡើងរួចហើយ។ «ផែនដីថ្មី»តំណាងសង្គមមនុស្សថ្មីដែលសុទ្ធតែមានលក្ខណៈល្អ។ ពួកអ្នកដែលជាមូលដ្ឋានសម្រាប់សង្គមថ្មីនោះកំពុងប្រមូលមកក្នុងអំឡុងគ្រាជាន់ក្រោយបង្អស់នេះ។ ក្រុមអ្នកទាំងនោះមានចំនួនជិត៧លាននាក់ហើយ ដែលរួមគ្នាក្នុងក្រុមជំនុំចំនួនប្រមាណមួយសែនក្រុមនៅនាប្រទេសផ្សេងៗប្រមាណ២៣៥ប្រទេស។ មនុស្សរាប់លាននាក់ទាំងនេះបានរៀនឲ្យចេះប្រព្រឹត្តដោយសុចរិតនិងយុត្ដិធម៌ ស្របទៅតាមតម្រូវការរបស់ព្រះយេហូវ៉ា ហើយជាលទ្ធផលពួកគេជាគ្រិស្តសាសនិកដែលស្រឡាញ់គ្នានិងមានសាមគ្គីភាពនៅទូទាំងពិភពលោក។ ក្នុងប្រវត្ដិសាស្ត្រពិភពលោក សាមគ្គីភាពរបស់អ្នកបម្រើព្រះបានស្ថិតស្ថេរយ៉ាងយូរ ហើយក៏លេចធ្លោច្បាស់ជាងគេផង។ ពួកអ្នកដែលចុះចូលក្រោមអំណាចសាតាំង មិនដែលមានសាមគ្គីភាពដូចនេះទាល់តែសោះ។ សេចក្ដីស្រឡាញ់និងសាមគ្គីភាពដែលរាស្ត្ររបស់ព្រះយេហូវ៉ាមានឥឡូវនេះ បង្ហាញអំពីស្ថានភាពដ៏អស្ចារ្យដែលនឹងមាននៅក្នុងពិភពលោកថ្មីរបស់ទ្រង់ ក្រោមការគ្រប់គ្រងដ៏សុចរិតនិងយុត្ដិធម៌។—អេសាយ ២:២-៤; យ៉ូហាន ១៣:៣៤, ៣៥; កូល៉ុស ៣:១៤
សាតាំងពាធា តែព្រះនឹងឈ្នះ
១៧. ពេលសាតាំងពាធារាស្ត្ររបស់ព្រះយេហូវ៉ាជាលើកចុងក្រោយនោះ ហេតុអ្វីបានជាវាមិនអាចមានជ័យជម្នះ?
១៧ មិនយូរប៉ុន្មានទៀត សាតាំងនិងគ្នីគ្នារបស់វានឹងពាធាអ្នកថ្វាយបង្គំព្រះយេហូវ៉ា ដោយមានបំណងបំផ្លាញពួកគេឲ្យអស់។ (អេសេគាល ៣៨:១៤-២៣) ការពាធានោះជាផ្នែកមួយនៃគ្រាដែលព្រះយេស៊ូហៅថា ជាគ្រា«វេទនាជាខ្លាំងណាស់ដល់ម្ល៉េះបានជាតាំងពីដើមកំណើតលោកីយដរាបមកដល់សព្វថ្ងៃនេះ មិនដែលមានយ៉ាងដូច្នោះឡើយ ហើយទៅមុខក៏មិនដែលមានដែរ»។ (ម៉ាថាយ ២៤:២១) តើសាតាំងនឹងមានជ័យជម្នះឬ? ទេ! បណ្ដាំរបស់ព្រះធានាថា៖ «ព្រះយេហូវ៉ាទ្រង់សព្វព្រះទ័យនឹងសេចក្ដីយុត្ដិធម៌ ក៏មិនដែលបោះបង់ចោលពួកបរិសុទ្ធរបស់ទ្រង់ឡើយ។ ទ្រង់ថែរក្សាគេអស់កល្បជានិច្ច តែពូជរបស់មនុស្សអាក្រក់នឹងត្រូវកាត់ចេញវិញ។ ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះជានិច្ច»។—ទំនុកដំកើង ៣៧:២៨, ២៩
១៨. (ក) ពេលសាតាំងពាធារាស្ត្ររបស់ព្រះនាអនាគតនេះ តើព្រះយេហូវ៉ានឹងមានប្រតិកម្មយ៉ាងណា? (ខ) តើអ្នកបានទទួលប្រយោជន៍អ្វីខ្លះ ពីការពិនិត្យមើលសាឡើងវិញ នូវព័ត៌មានស្តីអំពីគ្រាដែលយុត្ដិធម៌នឹងឈ្នះលើអយុត្ដិធម៌?
១៨ កាលដែលសាតាំងនិងគ្នីគ្នាយ៉ាងសន្ធឹករបស់វាពាធាអ្នកបម្រើរបស់ព្រះយេហូវ៉ា នោះហើយជាលើកចុងក្រោយបង្អស់ដែលវាអាចដៀមដាមទ្រង់។ តាមរយៈលោកសាការី ព្រះយេហូវ៉ាបានទាយថា៖ ‹អ្នកណាដែលពាល់អ្នករាល់គ្នា នោះគឺពាល់ដល់ប្រស្រីភ្នែកខ្ញុំហើយ›។ (សាការី ២:៨) នេះគឺហាក់ដូចជាមានគេយកម្រាមដៃទៅប៉ះភ្នែករបស់ព្រះយេហូវ៉ា។ ទ្រង់នឹងមានប្រតិកម្មភ្លាម ដោយកម្ចាត់ចោលអ្នកប្រឆាំងទាំងនោះ។ គ្មាននរណាទៀតនៅផែនដីដែលមានលក្ខណៈដូចអ្នកបម្រើរបស់ព្រះយេហូវ៉ា ដែលតែងតែធ្វើតាមច្បាប់ ពេញទៅដោយសេចក្ដីស្រឡាញ់ ហើយរកតែសេចក្ដីសុខនិងសាមគ្គីភាព។ ដូច្នេះ ការពាធាពួកគេគ្មានហេតុត្រឹមត្រូវទេ តែជាការដ៏អយុត្ដិធម៌ទាំងស្រុង។ ដូច្នេះ ព្រះយេហូវ៉ាដែល«សព្វព្រះទ័យនឹងសេចក្ដីយុត្ដិធម៌» នឹងមិនត្រាប្រណីឡើយ។ ពេលព្រះយេហូវ៉ាចាត់វិធានការ នោះខ្មាំងសត្រូវដែលប្រឆាំងនឹងរាស្ត្រទ្រង់នឹងវិនាសទៅជារៀងរហូត។ យ៉ាងនេះ យុត្ដិធម៌នឹងឈ្នះលើអយុត្ដិធម៌ ហើយពួកអ្នកដែលថ្វាយបង្គំព្រះពិតតែមួយអាចទទួលសេចក្ដីសង្គ្រោះបាន។ គឺច្បាស់ហើយថា ព្រឹត្ដិការណ៍ដែលនឹងមាននាអនាគតនេះ ពិតជាគួរឲ្យអស្ចារ្យណាស់!—សុភាសិត ២:២១, ២២
តើអ្នកនឹងឆ្លើយយ៉ាងណា?
• ហេតុអ្វីក៏មានអំពើអយុត្ដិធម៌ច្រើនម្ល៉េះ?
• តើព្រះយេហូវ៉ានឹងបំបាត់ចោលអំពើអយុត្ដិធម៌នៅផែនដីដោយរបៀបណា?
• តើអ្នកពេញចិត្តចំពោះចំណុចអ្វីខ្លះ ស្តីអំពីគ្រាដែលយុត្ដិធម៌ឈ្នះលើអយុត្ដិធម៌?
[រូបភាពនៅទំព័រ១៣]
ការអាក្រក់បានចម្រើនជាច្រើនឡើងមុនសម័យទឹកជន់លិចផែនដី ហើយនៅគ្រា«ជាន់ក្រោយបង្អស់»នេះក៏មានច្រើនផងដែរ
[រូបភាពនៅទំព័រ១៤]
ក្នុងពិភពលោកថ្មីរបស់ព្រះ យុត្ដិធម៌និងភាពសុចរិតត្រូវជំនួសអំពើអាក្រក់វិញ