២ ក្រេបយកចំណេះត្រឹមត្រូវអំពីព្រះ
«ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយ ឲ្យបានច្បាស់»។—យ៉ូហាន ១៧:៣
ហេតុអ្វីពិបាកធ្វើ? មនុស្សខ្លះនិយាយថា មិនមានព្រះទេ។ ខ្លះទៀតជឿថាព្រះមិនមែនជាបុគ្គលទេ តែជាថាមពលដ៏ខ្លាំងក្លាមួយវិញ។ អ្នកដែលជឿថាមានព្រះ បង្រៀនលទ្ធិខុសៗគ្នាអំពីសំណួរដែលថា តើព្រះជានរណា? ហើយតើអ្វីជាគុណសម្បត្ដិរបស់លោក?
តើលោកអ្នកអាចយកឈ្នះការពិបាកទាំងនេះដោយវិធីណា? វិធីមួយដើម្បីក្រេបយកចំណេះអំពីព្រះគឺដោយមើលអ្វីៗដែលលោកបានបង្កើត។ សាវ័កប៉ូលបាននិយាយថា៖ «គុណសម្បត្ដិរបស់[ព្រះ] ដែលមនុស្សមើលមិនឃើញ ពោលគឺឫទ្ធានុភាពដែលស្ថិតស្ថេរជារៀងរហូត និងឋានៈរបស់លោកជាព្រះ នោះបានសឲ្យឃើញច្បាស់តាំងពីពេលដែលលោកបង្កើតពិភពលោកមក ពេលដែលពិចារណាអ្វីៗដែលលោកបានបង្កើត»។ (រ៉ូម ១:២០) ដោយពិចារណាមើលយ៉ាងដិតដល់អំពីអ្វីៗដែលព្រះបានបង្កើត លោកអ្នកអាចរៀនច្រើនអំពីប្រាជ្ញានិងឫទ្ធានុភាពរបស់អ្នកបង្កើតយើង។—ទំនុកតម្កើង ១០៤:២៤; អេសាយ ៤០:២៦
យ៉ាងណាក៏ដោយ ដើម្បីក្រេបយកចំណេះត្រឹមត្រូវអំពីបុគ្គលិកលក្ខណៈរបស់ព្រះ យើងម្នាក់ៗត្រូវបើកគម្ពីរដែលជាបណ្ដាំរបស់លោក ហើយពិនិត្យមើលដោយខ្លួនឯង។ កុំឲ្យគំនិតរបស់អ្នកដទៃមានឥទ្ធិពលទៅលើការគិតគូររបស់លោកអ្នក។ ផ្ទុយទៅវិញ សូមធ្វើតាមឱវាទដែលមានក្នុងគម្ពីរដែលថា៖ «ឈប់យកតម្រាប់តាមរបៀបរបបពិភពលោកនេះ តែចូរទទួលការកែប្រែទាំងស្រុង ដោយផ្លាស់ប្ដូរជាថ្មីនូវរបៀបគិតគូររបស់អ្នករាល់គ្នាវិញ ដើម្បីឲ្យអ្នករាល់គ្នាពិសោធមើលដោយខ្លួនអ្នកឲ្យដឹងនូវបំណងប្រាថ្នាដ៏ប្រសើរ សមរម្យ និងល្អឥតខ្ចោះរបស់ព្រះ»។ (រ៉ូម ១២:២) ជាឧទាហរណ៍ សូមគិតអំពីការពិតដែលគម្ពីរបង្ហាញអំពីព្រះដូចតទៅនេះ។
ព្រះមានឈ្មោះ។ ពេលគម្ពីរបានត្រូវសរសេរក្នុងភាសាដើម ឈ្មោះរបស់ព្រះមានរាប់ពាន់ដង។ សេចក្ដីបកប្រែជាច្រើនបានកត់ទុកឈ្មោះរបស់ព្រះនៅសៀវភៅទំនុកតម្កើង ៨៣:១៨ ដែលអានថា៖ «ដើម្បីឲ្យគេបានដឹងថា គឺទ្រង់តែ១អង្គ ព្រះនាមជាយេហូវ៉ា ដែលជាព្រះដ៏ខ្ពស់បំផុតលើផែនដីទាំងមូល»។
ការប្រព្រឹត្តរបស់មនុស្សប៉ះពាល់ដល់អារម្មណ៍របស់ព្រះ។ ក្រោយពីព្រះយេហូវ៉ាបានរំដោះបណ្ដាជនអ៊ីស្រាអែលចេញពីទាសភាពក្នុងស្រុកអេស៊ីប ពួកគាត់ជួនកាលមិនអើពើនឹងឱវាទរបស់លោក។ ពេលពួកគាត់បះបោរប្រឆាំង នោះធ្វើឲ្យព្រះយេហូវ៉ា«ព្រួយព្រះហឫទ័យ»។ ការប្រព្រឹត្តរបស់ពួកគាត់ធ្វើឲ្យ«ព្រះដ៏វិសុទ្ធរបស់ជនជាតិអ៊ីស្រាអែលទាស់ព្រះហឫទ័យ»។—ទំនុកតម្កើង ៧៨:៤០, ៤១; ខ.ស.
យើងម្នាក់ៗមានតម្លៃចំពោះព្រះ។ លោកយេស៊ូមានប្រសាសន៍ទៅអ្នកកាន់តាមលោកថា៖ «គេលក់ចាបពូកពីរក្បាលថ្លៃមួយសេន មែនទេ? ប៉ុន្តែ គ្មានចាបណាមួយធ្លាក់ដល់ដី ដែលបិតារបស់អ្នកដែលស្ថិតនៅស្ថានសួគ៌មិនជ្រាបឡើយ។ សូម្បីតែចំនួនសរសៃសក់នៅលើក្បាលអ្នករាល់គ្នា ក៏លោកជ្រាបដែរ។ ដូច្នេះ កុំខ្លាចឡើយ ព្រោះអ្នករាល់គ្នាមានតម្លៃជាងចាបពូកជាច្រើនទៅទៀត»។—ម៉ាថាយ ១០:២៩-៣១
ព្រះមិនមែនពេញចិត្តសាសន៍មួយជាងសាសន៍មួយទៀតទេ។ សាវ័កប៉ូលបានប្រាប់ជនជាតិក្រិចនៅក្រុងអាថែនថា ព្រះ«បានបង្កើតជនជាតិទាំងឡាយពីបុរសតែមួយ ដើម្បីឲ្យអាស្រ័យនៅពេញផែនដី»។ ប៉ូលក៏បានចែងថា ព្រះ«មិននៅឆ្ងាយពីយើងម្នាក់ៗ»ទេ។ (សកម្មភាព ១៧:២៦, ២៧) សាវ័កពេត្រុសបាននិយាយថា៖ «ព្រះមិនរើសមុខទេ តែនៅគ្រប់ជាតិសាសន៍ លោកពេញចិត្តនឹងអ្នកណាដែលកោតខ្លាចលោកហើយប្រព្រឹត្តអំពើសុចរិត»។—សកម្មភាព ១០:៣៤, ៣៥
តើមានផលប្រយោជន៍អ្វី? មនុស្សខ្លះមាន«ចិត្តខ្នះខ្នែងក្នុងការបម្រើព្រះ តែដោយគ្មានចំណេះត្រឹមត្រូវ»។ (រ៉ូម ១០:២) ប្រសិនបើលោកអ្នកដឹងអ្វីដែលគម្ពីរពិតជាបង្រៀនអំពីព្រះ នោះគ្មាននរណានឹងអាចបញ្ឆោតលោកអ្នកបាន ហើយលោកអ្នកក៏អាច«ចូលទៅជិតព្រះ»ដែរ។—យ៉ាកុប ៤:៨
ដើម្បីទទួលព័ត៌មានបន្ថែម សូមមើលសៀវភៅតើព្រះគម្ពីរ ពិតជាបង្រៀនយ៉ាងណា?a ជំពូកទី១ដែលមានចំណងជើងថា «តើអ្វីជាសេចក្ដីពិតអំពីព្រះ?»។
[កំណត់សម្គាល់]
a បោះពុម្ពដោយសាក្សីព្រះយេហូវ៉ា។
[រូបភាពនៅទំព័រ៦]
វិធីមួយដើម្បីក្រេបយកចំណេះអំពីព្រះ គឺដោយមើលអ្វីៗដែលលោកបានបង្កើត