២ ព្រះមិនយកចិត្តទុកដាក់នឹងយើងសោះ តើពិតឬទេ?
អ្វីដែលលោកអ្នកប្រហែលជាធ្លាប់ឮ: «បើព្រះពិតជាយកចិត្តទុកដាក់នឹងមនុស្សជាតិ លោកនឹងបំបាត់អំពើអាក្រក់ និងទុក្ខវេទនាដែលមានក្នុងពិភពលោកនេះចោល។ ហើយបើទោះជាលោកយកចិត្តទុកដាក់នឹងមនុស្សទូទៅមែន ក៏លោកមិនចាប់អារម្មណ៍នឹងអ្វីដែលកើតឡើងចំពោះរូបខ្ញុំដែរ»។
អ្វីដែលគម្ពីរបង្រៀន: ព្រះយេហូវ៉ាមិនមែនជាអ្នកដែលបណ្ដាលឲ្យមានអំពើអាក្រក់ទេ។ (យ៉ាកុប ១:១៣) លោកអាចបំបាត់អំពើអាក្រក់ចោលនៅពេលណាក៏បាន ប៉ុន្តែមូលហេតុដែលលោកអនុញ្ញាតឲ្យមានសង្គមមនុស្សទុច្ចរិតរហូតមកដល់សព្វថ្ងៃនេះ គឺដើម្បីដោះស្រាយការចោទប្រកាន់ដែលកើតមាននៅគ្រាដើមដំបូងនៃប្រវត្ដិសាស្ត្រមនុស្សជាតិ។ នៅទីបំផុត លោកនឹងសង្គ្រោះមនុស្សជាតិ និងបំបាត់បញ្ហាទាំងអស់ដែលកើតឡើងដោយសារពួកអ្នកដែលបានបដិសេធការគ្រប់គ្រងរបស់លោក។—លោកុប្បត្តិ ៣:១-៦; អេសាយ ៦៥:១៧a
លោកមិនត្រឹមតែយកចិត្តទុកដាក់ចំពោះមនុស្សទូទៅប៉ុណ្ណោះទេ តែលោកក៏បង្ហាញការយកចិត្តទុកដាក់យ៉ាងខ្លាំងចំពោះយើងម្នាក់ៗដែរ។ ម៉ាថាយ ១០:២៩-៣១បង្ហាញថាលោកកត់សម្គាល់អំពីព័ត៌មានល្អិតល្អន់របស់យើង ដែលសូម្បីតែយើងក៏មិនដឹងផង។ ខនោះសរសេរថា៖ «គេលក់ចាបពូកពីរក្បាលថ្លៃមួយសេន មែនទេ? ប៉ុន្តែ គ្មានចាបណាមួយធ្លាក់ដល់ដី ដែលបិតារបស់អ្នកដែលស្ថិតនៅស្ថានសួគ៌មិនជ្រាបឡើយ។ សូម្បីតែចំនួនសរសៃសក់នៅលើក្បាលអ្នករាល់គ្នា ក៏លោកជ្រាបដែរ។ ដូច្នេះ កុំខ្លាចឡើយ ព្រោះអ្នករាល់គ្នាមានតម្លៃជាងចាបពូកជាច្រើនទៅទៀត»។
ការស្គាល់សេចក្ដីពិតជួយលោកអ្នក: ធម្មតា យើងចង់គេចពីមនុស្សដែលកាចសាហាវឬមនុស្សដែលមិនចេះយកចិត្តទុកដាក់។ ដូច្នេះ គ្មានអ្វីចម្លែកទេដែលពាក្យកុហកដែលថាព្រះមិនចេះយកចិត្តទុកដាក់នោះ បានធ្វើឲ្យមនុស្សជាច្រើនមិនចង់ស្គាល់លោក ឬក៏ធ្វើឲ្យពួកគេអធិដ្ឋានទៅព្រះនៅពេលដែលពួកគេគ្មានជម្រើសតែប៉ុណ្ណោះ។ ការដឹងថាព្រះយេហូវ៉ាពិតជាយកចិត្តទុកដាក់នឹងយើងអាចនាំឲ្យយើងចង់រៀនថែមទៀតអំពីលោក ហើយក៏ចង់បង្កើតឲ្យមានចំណងមិត្តភាពជាមួយលោកដែរ។
ជាឧទាហរណ៍ លោកអ្នកប្រហែលជាបានអធិដ្ឋានទៅព្រះទាំងឆ្ងល់ថា តើលោកនឹងស្ដាប់ការអធិដ្ឋាននោះឬទេ? ហើយបើលោកស្ដាប់មែន តើលោកនឹងធ្វើតាមសំណូមពររបស់លោកអ្នកឬក៏អត់? គម្ពីរបានធានាយើងថា«ព្រះដែលស្ដាប់សេចក្ដីអធិស្ឋាន»នឹងតែងតែប្រុងស្ដាប់ពួកអ្នកដែលអធិដ្ឋានទៅលោកយ៉ាងស្មោះអស់ពីចិត្ត។—ទំនុកតម្កើង ៦៥:២
ព្រះបានអញ្ជើញលោកអ្នកឲ្យ«ផ្ទេរកង្វល់ទាំងអស់ទៅ[លោក] ពីព្រោះលោករមែងគិតអំពីអ្នករាល់គ្នា»។ (ពេត្រុសទី១ ៥:៧) យើងអាចពឹងផ្អែកទៅលើលោកជានិច្ច ទោះជាក្នុងពេលដែលមានទុក្ខកង្វល់យ៉ាងខ្លាំងក៏ដោយ ព្រោះបណ្ដាំរបស់លោកបានចែងថា៖ «ព្រះយេហូវ៉ាទ្រង់គង់ជិតបង្កើយនឹងអស់អ្នកដែលមានចិត្តសង្រេង ហើយទ្រង់ជួយសង្គ្រោះដល់អស់អ្នកដែលមានវិញ្ញាណទន់ទាប»។—ទំនុកតម្កើង ៣៤:១៨
[កំណត់សម្គាល់]
a ដើម្បីទទួលព័ត៌មានបន្ថែមអំពីមូលហេតុដែលព្រះអនុញ្ញាតឲ្យមនុស្សរងទុក្ខវេទនា សូមមើលជំពូកទី១១ក្នុងសៀវភៅតើព្រះគម្ពីរពិតជាបង្រៀនយ៉ាងណា?
[ឃ្លាអក្សរធំនៅទំព័រ៥]
បើព្រះមិនយកចិត្ត ទុកដាក់នឹងយើង ហេតុអ្វីលោក អញ្ជើញយើងឲ្យអធិដ្ឋានទៅលោក?