៣ រៀនឲ្យស្គាល់ការពិតអំពីលោកយេស៊ូ
«ព្រះស្រឡាញ់ពិភពលោកដល់ម្ល៉េះបានជាលោកបានឲ្យបុត្រតែមួយ របស់លោក ដើម្បីឲ្យអស់អ្នកដែលបង្ហាញជំនឿលើបុត្រនោះ អាចមានជីវិតដែលគ្មានទីបញ្ចប់ ហើយមិនត្រូវបំផ្លាញឡើយ»។—យ៉ូហាន ៣:១៦
ហេតុអ្វីពិបាកធ្វើ? មនុស្សខ្លះជឿថា លោកយេស៊ូមិនជាបុគ្គលដែលមានពិតមែនទេ។ មនុស្សឯទៀតទទួលស្គាល់ថាពិតជាមានលោកយេស៊ូមែន តែគេអះអាងថាលោកគ្រាន់តែជាមនុស្សធម្មតាដែលបានស្លាប់យូរយារណាស់មកហើយ។
តើលោកអ្នកអាចយកឈ្នះការពិបាកទាំងនេះដោយវិធីណា? សូមយកតម្រាប់តាមអ្នកកាន់តាមលោកយេស៊ូម្នាក់ឈ្មោះណាថាណែល។a មិត្តរបស់ណាថាណែលឈ្មោះភីលីពបានប្រាប់គាត់ថា បានរកឃើញលោកដែលជាមេស្ស៊ីហើយ គឺ«លោកយេស៊ូជាកូនយ៉ូសែប ពីក្រុងណាសារ៉ែត»។ ក៏ប៉ុន្តែ ណាថាណែលមិនមែនជឿដោយងងឹតងងុលទៅលើអ្វីដែលភីលីពអះអាងនោះឡើយ។ តាមពិត គាត់បានឆ្លើយតបថា៖ «តើអាចមានអ្វីល្អចេញមកពីក្រុងណាសារ៉ែតឬ?»។ ទោះបីណាថាណែលសង្ស័យក៏ដោយ គាត់ព្រមទទួលសេចក្ដីអញ្ជើញរបស់ភីលីពឲ្យ«មកមើល»ដោយខ្លួនឯង។ (យ៉ូហាន ១:៤៣-៥១) លោកអ្នកក៏នឹងទទួលប្រយោជន៍ដែរពីការពិនិត្យមើលទីសំអាងអំពីលោកយេស៊ូដោយខ្លួនឯង។ តើលោកអ្នកអាចធ្វើអ្វីខ្លះ?
ចូរស្រាវជ្រាវទីសំអាងពីប្រវត្ដិសាស្ត្រដែលបញ្ជាក់ថា លោកយេស៊ូជាបុគ្គលដែលមានពិតមែន។ នៅសតវត្សរ៍ទី១ យ៉ូសេហ្វឺសនិងថាស៊ីថឹសជាអ្នកប្រវត្ដិសាស្ត្រពីររូបដែលមានគេគោរព។ ពួកគាត់មិនមែនជាគ្រិស្តសាសនិកទេ តែបានរៀបរាប់ថាលោកយេស៊ូគ្រិស្តជាបុគ្គលដែលមានពិតមែន។ ថាស៊ីថឹសបានរៀបរាប់អំពីវិធីដែលអធិរាជរ៉ូមឈ្មោះនីរ៉ូ ទម្លាក់កំហុសទៅលើពួកគ្រិស្តសាសនិក អំពីរឿងអគ្គិភ័យដែលបានឆេះរង្គាលនៅទីក្រុងរ៉ូមនៅឆ្នាំ៦៤ គ.ស.។ ថាស៊ីថឹសបានសរសេរថា៖ «នីរ៉ូបានបន្ទោសនិងដាក់ទារុណកម្មយ៉ាងសាហាវទៅលើក្រុមមួយដែលគេស្អប់ ដោយសារទំនៀមទម្លាប់សាសនារបស់ពួកគាត់។ ប្រជាជនបានហៅក្រុមនេះថាពួកគ្រិស្តសាសនិក។ ឈ្មោះនេះមកពីគ្រិស្តុស[គ្រិស្ត] ដែលគាត់បានទទួលទណ្ឌកម្មដ៏ធ្ងន់បំផុតនៅក្នុងកណ្ដាប់ដៃលោកប៉ុនទាសពីឡាត ដែលជាអភិបាលខេត្តរបស់យើងក្នុងរាជ្យរបស់ទីប៊ែរ»។
ស្តីអំពីការរៀបរាប់របស់អ្នកប្រវត្ដិសាស្ត្រពីសតវត្សរ៍ទី១និងទី២ អំពីលោកយេស៊ូនិងពួកគ្រិស្តសាសនិកសម័យដើម នោះសព្វវចនាធិប្បាយមួយបានចែងថា៖ «កំណត់ហេតុផ្សេងៗដែលបានសរសេរដោយឡែកពីគ្នា ជាភ័ស្តុតាងដែលសឲ្យឃើញថា សត្រូវរបស់ពួកគ្រិស្តសាសនិកនៅសម័យបុរាណ មិនដែលសង្ស័យអំពីការពិតដែលថា លោកយេស៊ូជាបុគ្គលដែលមានពិតមែនទេ។ ប៉ុន្តែ ចំណុចនេះគេបានជំទាស់ដោយគ្មានទីសំអាង ជាលើកដំបូងនៅដំណាច់សតវត្សរ៍ទី១៨ ក្នុងអំឡុងសតវត្សរ៍ទី១៩ និងនៅដើមសតវត្សរ៍ទី២០»។ (Encyclopædia Britannica, 2002 Edition) នៅឆ្នាំ២០០២ អ្នកបោះពុម្ពផ្សាយក្នុងកាសែតមួយបានបញ្ចេញមតិថា៖ «បណ្ឌិតភាគច្រើនលើកលែងតែបុគ្គលខ្លះដែលមិនជឿថាមានព្រះ បានទទួលស្គាល់រួចទៅហើយថាលោកយេស៊ូពីក្រុងណាសារ៉ែត ជាបុគ្គលដែលមានពិតមែន» (The Wall Street Journal)។
ចូរពិចារណាទីសំអាងដែលបញ្ជាក់ថាលោកយេស៊ូបានត្រូវប្រោសឲ្យរស់ឡើងវិញ។ ពេលដែលអ្នកប្រឆាំងបានចាប់លោកយេស៊ូ នោះគូកនដ៏ជិតស្និទ្ធរបស់លោកបានរត់ចោលលោក។ ណាមួយទៀត ពេត្រុសដែលជាមិត្តរបស់លោក បានបដិសេធមិនទទួលស្គាល់លោកដោយសារភ័យខ្លាច។ (ម៉ាថាយ ២៦:៥៥, ៥៦, ៦៩-៧៥) ក្រោយពីពេលគេបានចាប់លោកយេស៊ូ នោះអ្នកកាន់តាមលោកបានត្រូវខ្ចាត់ខ្ចាយទៅកន្លែងផ្សេងៗ។ (ម៉ាថាយ ២៦:៣១) ស្រាប់តែក្រោយមក អ្នកកាន់តាមលោកបានចាប់ផ្ដើមមានសកម្មភាពយ៉ាងច្រើន។ ពេត្រុសនិងយ៉ូហានបានប្រឈមមុខយ៉ាងក្លាហាន នឹងបុរសដែលរៀបផែនការសម្លាប់លោកយេស៊ូ។ អ្នកកាន់តាមលោកយេស៊ូបានត្រូវជំរុញទឹកចិត្តខ្លាំងដល់ម្ល៉េះ ដែលពួកគាត់បានផ្សព្វផ្សាយសេចក្ដីបង្រៀនរបស់លោកនៅទូទាំងចក្រភពរ៉ូម ហើយពួកគាត់សុខចិត្តស្លាប់ជាជាងលះចោលជំនឿរបស់ខ្លួន។
តើអ្វីជាមូលហេតុមួយដែលពួកគាត់បានផ្លាស់ប្ដូរចិត្តគំនិតយ៉ាងលឿនដូច្នេះ? សាវ័កប៉ូលពន្យល់ថាលោកយេស៊ូបានត្រូវប្រោសឲ្យរស់ពីស្លាប់ឡើងវិញ ហើយបាន«លេចមកជួបកេផាស[ពេត្រុស] រួចសាវ័កទាំងដប់ពីរនាក់»។ ប៉ូលបន្តថា៖ «បន្ទាប់មក លោកលេចមកជួបបងប្អូនជាងប្រាំរយនាក់នៅពេលតែមួយ»។ សាក្សីភាគច្រើនដែលបានឃើញលោកយេស៊ូរស់ឡើងវិញ នៅរស់នៅឡើយពេលប៉ូលសរសេរពាក្យទាំងនេះ។ (កូរិនថូសទី១ ១៥:៣-៧) បើមានការបញ្ជាក់ពីសាក្សីម្នាក់ឬពីរនាក់ ប្រហែលជាងាយឲ្យអ្នកសង្ស័យបដិសេធ។ (លូកា ២៤:១-១១) ប៉ុន្តែ ការបញ្ជាក់ពីសាក្សីជាងប្រាំរយនាក់បង្ហាញថា លោកយេស៊ូពិតជាបានត្រូវប្រោសឲ្យរស់ពីស្លាប់ឡើងវិញមែន។
តើមានផលប្រយោជន៍អ្វី? អស់អ្នកដែលមានជំនឿទៅលើលោកយេស៊ូហើយស្ដាប់តាមលោក អាចទទួលការអភ័យទោសចំពោះអំពើខុសឆ្គង ព្រមទាំងមានចិត្តដែលមិនវិនិច្ឆ័យថាខ្លួនមានទោស។ (ម៉ាកុស ២:៥-១២; ធីម៉ូថេទី១ ១:១៩; ពេត្រុសទី១ ៣:១៦-២២) ប្រសិនបើពួកគាត់ស្លាប់ លោកយេស៊ូសន្យាថានឹងប្រោសពួកគាត់ឲ្យរស់ឡើងវិញនៅ«ថ្ងៃចុងក្រោយ»។—យ៉ូហាន ៦:៤០
ដើម្បីទទួលព័ត៌មានបន្ថែម សូមមើលសៀវភៅតើព្រះគម្ពីរ ពិតជាបង្រៀនយ៉ាងណា?b ជំពូកទី៤ដែលមានចំណងជើងថា «តើព្រះយេស៊ូគ្រីស្ទជាអ្នកណា?» និងជំពូកទី៥ដែលមានចំណងជើងថា «តម្លៃលោះរបស់ព្រះយេស៊ូជាអំណោយវិសេសបំផុតរបស់ព្រះ»។
[កំណត់សម្គាល់]
a តាមមើលទៅ អ្នកសរសេរសៀវភៅដំណឹងល្អម៉ាថាយ ម៉ាកុស និងលូកាហៅណាថាណែលថា បាថូឡូម៉េ។
b បោះពុម្ពដោយសាក្សីព្រះយេហូវ៉ា។
[រូបភាពនៅទំព័រ៧]
ដូចណាថាណែលដែរ សូមស្រាវជ្រាវទីសំអាងអំពីលោកយេស៊ូ