តួនាទីនៃសកម្មពលបរិសុទ្ធក្នុងការសម្រេចគោលបំណងរបស់ព្រះយេហូវ៉ា
‹ពាក្យអញដែលចេញពីមាត់អញទៅ នឹងធ្វើឲ្យសំរេចតាមសេចក្ដីប៉ងប្រាថ្នានៅក្នុងចិត្តអញ›។—អេ. ៥៥:១១
១. សូមពន្យល់ភាពខុសគ្នារវាងគម្រោងនិងគោលបំណង។
សូមនឹកគិតថា បុរសពីរនាក់កំពុងរៀបចំធ្វើដំណើរទៅកន្លែងឆ្ងាយមួយដោយរថយន្ត។ បុរសម្នាក់បានគ្រោងទុកយ៉ាងល្អិតល្អន់អំពីផ្លូវដែលគាត់ត្រូវធ្វើដំណើរដើម្បីទៅដល់កន្លែងដែលគាត់ចង់ទៅ។ រីឯបុរសម្នាក់ទៀតមិនបានគ្រោងទុកយ៉ាងល្អិតល្អន់អំពីផ្លូវដែលគាត់ត្រូវធ្វើដំណើរទេ តែគាត់ដឹងច្បាស់កន្លែងដែលគាត់ចង់ទៅ ហើយគាត់ក៏ស្គាល់ផ្លូវជាច្រើនដែលគាត់អាចធ្វើដំណើរដើម្បីទៅដល់កន្លែងនោះដែរ។ គាត់បានត្រៀមខ្លួនថាបើមានបញ្ហាណាមួយកើតឡើង គាត់នឹងទៅផ្លូវផ្សេង។ វិធីផ្សេងពីគ្នាដែលបុរសទាំងពីរនេះបានជ្រើសរើសបង្ហាញឲ្យឃើញច្បាស់នូវភាពខុសគ្នារវាងគម្រោងនិងគោលបំណង។ គម្រោងអាចប្រៀបទៅនឹងការរៀបចំដ៏ជាក់លាក់មួយ រីឯគោលបំណងវិញប្រហែលជាទាក់ទងនឹងការមានគោលដៅមួយ តែមិនចាំបាច់មានវិធីជាក់លាក់ដើម្បីសម្រេចគោលដៅនោះទេ។
២, ៣. (ក) តើគោលបំណងរបស់ព្រះយេហូវ៉ារួមបញ្ចូលអ្វី? ហើយតើលោកបានធ្វើអ្វីពេលអាដាមនិងអេវ៉ាបានប្រព្រឹត្តអំពើខុសឆ្គង? (ខ) ហេតុអ្វីយើងត្រូវដឹងរបៀបដែលព្រះសម្រេចគោលបំណងរបស់លោក ហើយប្រព្រឹត្តឲ្យសមស្របតាមគោលបំណងនោះ?
២ ដើម្បីបំពេញបំណងប្រាថ្នារបស់លោក ព្រះយេហូវ៉ាមិនមានគម្រោងដែលលោកកំណត់ជាក់លាក់ជាមុនទេ តែលោកមានគោលបំណងដែលនឹងសម្រេចបន្ដិចម្ដងៗវិញ។ (អេភ. ៣:១១) គោលបំណងនេះរួមបញ្ចូលគោលដៅរបស់លោកនៅដើមដំបូងសម្រាប់មនុស្សជាតិនិងផែនដី ពោលគឺផែនដីត្រូវក្លាយទៅជាសួនឧទ្យានដែលមនុស្សល្អឥតខ្ចោះអាចរស់នៅដោយមានសេចក្ដីសុខសាន្តនិងសុភមង្គលជារៀងរហូត។ (លោ. ១:២៨) ពេលអាដាមនិងអេវ៉ាប្រព្រឹត្តអំពើខុសឆ្គង ព្រះយេហូវ៉ាមិននៅស្ងៀមទេ តែបានចាត់វិធានការដើម្បីប្រាកដថាគោលបំណងរបស់លោកនឹងសម្រេច។ (សូមអាន លោកុប្បត្តិ ៣:១៥) ព្រះយេហូវ៉ាបានសម្រេចចិត្តថា ស្ត្រីក្នុងន័យធៀបរបស់លោកនឹងបង្កើត«ពូជ»ឬបុត្រមួយ ដែលនៅទីបំផុតនឹងបំផ្លាញចោលសាថានដែលបាននាំឲ្យអាដាមនិងអេវ៉ាប្រព្រឹត្តអំពើខុសឆ្គង ហើយបំបាត់ចោលអន្តរាយទាំងអស់ដែលវាបានបង្កឡើង។—ហេ. ២:១៤; ១យ៉ូន. ៣:៨
៣ គ្មានអ្វីនៅស្ថានសួគ៌ឬនៅផែនដីអាចរារាំងព្រះយេហូវ៉ាមិនឲ្យសម្រេចអ្វីដែលលោកបានសន្យាឡើយ។ (អេ. ៤៦:៩-១១) ហេតុអ្វីយើងអាចថាដូច្នេះ? ពីព្រោះសកម្មពលរបស់ព្រះយេហូវ៉ាជាប់ទាក់ទងនឹងរឿងនេះ។ កម្លាំងនេះដែលគ្មាននរណាអាចទប់ទល់បាន ធានាថាគោលបំណងរបស់ព្រះ‹នឹងសំរេចតាមសេចក្ដីប៉ងប្រាថ្នា›របស់លោក។ (អេ. ៥៥:១០, ១១) យើងត្រូវដឹងរបៀបដែលព្រះសម្រេចគោលបំណងរបស់លោក ហើយប្រព្រឹត្តឲ្យសមស្របតាមគោលបំណងនោះ។ សេចក្ដីសង្ឃឹមទទួលជីវិតនៅថ្ងៃអនាគតពឹងផ្អែកលើការសម្រេចនៃគោលបំណងនោះ។ បន្ថែមទៅទៀត ដោយឃើញរបៀបដែលព្រះយេហូវ៉ាប្រើសកម្មពលបរិសុទ្ធ នេះពិតជាពង្រឹងជំនឿយើងមែន។ ដូច្នេះ សូមឲ្យយើងពិចារណាតួនាទីនៃសកម្មពលក្នុងការសម្រេចគោលបំណងរបស់ព្រះយេហូវ៉ានៅអតីតកាល នៅសព្វថ្ងៃនេះ និងនៅអនាគត។
តួនាទីនៃសកម្មពលបរិសុទ្ធនៅអតីតកាល
៤. តើព្រះយេហូវ៉ាបានបង្ហាញគោលបំណងរបស់លោកបន្ដិចម្ដងៗយ៉ាងដូចម្ដេច?
៤ នៅសម័យគម្ពីរ ព្រះយេហូវ៉ាបានបង្ហាញគោលបំណងរបស់លោកបន្ដិចម្ដងៗ។ នៅដើមដំបូង អត្តសញ្ញាណនៃពូជដែលបានត្រូវសន្យាគឺជា«អាថ៌កំបាំងដ៏ពិសិដ្ឋ»។ (១កូ. ២:៧) ព្រះយេហូវ៉ាមិនបានមានប្រសាសន៍អំពីពូជ រហូតដល់ប្រហែលពីរពាន់ឆ្នាំក្រោយមក។ (សូមអាន លោកុប្បត្តិ ១២:៧; ២២:១៥-១៨) ព្រះយេហូវ៉ាមានសន្យាមួយជាមួយអាប្រាហាំដែលនឹងមានការសម្រេចធំជាង។ ពាក្យរបស់ព្រះទៅកាន់អាប្រាហាំថា«ដោយសារពូជឯង» បញ្ជាក់ច្បាស់ថាពូជនោះនឹងកើតមកជាមនុស្ស ជាកូនចៅរបស់អាប្រាហាំ។ (លោ. ១២:៧; ២២:១៥-១៨) យើងអាចប្រាកដថាសាថានសង្កេតមើលដោយមានចំណាប់អារម្មណ៍យ៉ាងខ្លាំង កាលដែលអត្តសញ្ញាណនៃពូជបានត្រូវបើកបង្ហាញ។ សត្រូវនោះពិតជាចង់បំផ្លាញចោលវង្សត្រកូលរបស់អាប្រាហាំ ឬរារាំងមិនឲ្យពូជនោះកើតក្នុងវង្សត្រកូលនោះ ហើយយ៉ាងនេះនឹងធ្វើឲ្យគោលបំណងរបស់ព្រះមិនបានសម្រេច។ ប៉ុន្តែ អ្វីនេះមិនអាចកើតឡើងបានទេ ពីព្រោះសកម្មពលរបស់ព្រះដែលមនុស្សមើលមិនឃើញកំពុងមានសកម្មភាព។ តើកំពុងមានសកម្មភាពតាមរបៀបណាខ្លះ?
៥, ៦. តើតាមរបៀបណាដែលព្រះយេហូវ៉ាបានប្រើសកម្មពលរបស់លោកដើម្បីការពារបុគ្គលផ្សេងៗដែលជាវង្សត្រកូលដែលពូជនោះត្រូវកើតមក?
៥ ព្រះយេហូវ៉ាបានប្រើសកម្មពលរបស់លោកដើម្បីការពារបុគ្គលផ្សេងៗដែលជាវង្សត្រកូលដែលពូជនោះត្រូវកើតមក។ ព្រះយេហូវ៉ាបានមានប្រសាសន៍ទៅកាន់អាប់រ៉ាម(អាប្រាហាំ)ថា៖ «អញជាខែល . . . របស់ឯង»។ (លោ. ១៥:១) ពាក្យទាំងនេះមិនមែនជាពាក្យដែលគ្មានន័យទេ។ ជាឧទាហរណ៍ សូមពិចារណាអំពីអ្វីដែលបានកើតឡើងប្រហែលនៅឆ្នាំ១៩១៩មុនគ.ស. កាលដែលអាប្រាហាំនិងសារ៉ាតាំងទីលំនៅនៅកេរ៉ា។ ដោយមិនដឹងថាសារ៉ាជាប្រពន្ធរបស់អាប្រាហាំ នោះអាប៊ីម៉ាឡិចជាស្តេចកេរ៉ាបានយកសារ៉ាមកក្នុងបំណងយកធ្វើជាភរិយារបស់គាត់។ តើក្នុងរឿងនេះ សាថានកំពុងប្រើកលល្បិចដោយខំរារាំងមិនឲ្យសារ៉ាមានកូនដែលជាពូជរបស់អាប្រាហាំឬ? គម្ពីរមិនបានប្រាប់ថាសាថានបានធ្វើដូច្នេះឡើយ តែបានប្រាប់យើងថាព្រះយេហូវ៉ាបានធ្វើអន្តរាគមន៍ក្នុងរឿងនេះ។ លោកបានព្រមានអាប៊ីម៉ាឡិចក្នុងសុបិនមិនឲ្យប៉ះពាល់សារ៉ាទេ។—លោ. ២០:១-១៨
៦ ព្រះយេហូវ៉ាបានការពារពួកគាត់មិនមែនតែមួយដងទេ។ លោកបានសង្គ្រោះអាប្រាហាំនិងក្រុមគ្រួសាររបស់គាត់ជាច្រើនលើកមកហើយ។ (លោ. ១២:១៤-២០; ១៤:១៣-២០; ២៦:២៦-២៩) ដូច្នេះ អ្នកតែងទំនុកតម្កើងអាចពោលអំពីអាប្រាហាំនិងកូនចៅរបស់គាត់ថា៖ «ទ្រង់[ព្រះយេហូវ៉ា]មិនបើកឲ្យអ្នកណាសង្កត់សង្កិនគេឡើង អើ ទ្រង់បានផ្ចាលទាំងពួកស្តេចដោយយល់ដល់គេ ដោយថា កុំឲ្យប៉ះពាល់នឹងអ្នកដែលអញបានចាក់ប្រេងតាំងឲ្យ ហើយកុំឲ្យប្រទូសរ៉ាយដល់ពួកហោរារបស់អញឡើយ»។—ទំនុក. ១០៥:១៤, ១៥
៧. តើព្រះយេហូវ៉ាបានការពារប្រជាជាតិអ៊ីស្រាអែលតាមរបៀបណាខ្លះ?
៧ តាមរយៈសកម្មពលរបស់លោក ព្រះយេហូវ៉ាបានការពារប្រជាជាតិអ៊ីស្រាអែលពីបុរាណ ជាប្រជាជាតិដែលពូជដែលលោកសន្យាថានឹងកើតមក។ តាមរយៈសកម្មពលរបស់លោក ព្រះយេហូវ៉ាបានឲ្យច្បាប់ដល់ជនជាតិអ៊ីស្រាអែលដែលជួយពួកគេឲ្យរក្សាការគោរពប្រណិប័តន៍ពិត ហើយការពារជនជាតិយូដាពីភាពមិនស្អាតស្អំខាងសីលធម៌ ខាងរូបកាយ និងខាងចំណងមេត្រីភាពរបស់ពួកគេជាមួយនឹងព្រះយេហូវ៉ា។ (និក្ខ. ៣១:១៨; ២កូ. ៣:៣) នៅសម័យពួកចៅក្រម សកម្មពលព្រះយេហូវ៉ាបានផ្ដល់កម្លាំងឲ្យបុរសខ្លះសង្គ្រោះជនជាតិអ៊ីស្រាអែលពីសត្រូវរបស់ពួកគេ។ (ចៅ. ៣:៩, ១០) ក្នុងអំឡុងជាច្រើនសតវត្សរ៍រហូតដល់កំណើតលោកយេស៊ូ ដែលជាបុគ្គលសំខាន់ជាងគេនៃពូជអាប្រាហាំ សកម្មពលបរិសុទ្ធពិតជាបានចូលរួមការពារក្រុងយេរូសាឡិម បេថ្លេហិម និងវិហារ។ អ្វីៗទាំងនោះមានតួនាទីក្នុងការសម្រេចទំនាយអំពីលោកយេស៊ូ។
៨. តើអ្វីបង្ហាញថាសកម្មពលបរិសុទ្ធបានជួយបុត្ររបស់ព្រះក្នុងជីវិតលោក និងក្នុងកិច្ចបម្រើផ្សាយ?
៨ សកម្មពលបរិសុទ្ធបានជួយលោកយេស៊ូក្នុងជីវិតលោក និងក្នុងកិច្ចបម្រើផ្សាយដែរ។ ក្នុងផ្ទៃនាងម៉ារៀជាក្រមុំបរិសុទ្ធ សកម្មពលបរិសុទ្ធបានសម្រេចអ្វីមួយដែលមិនដែលធ្លាប់ធ្វើពីមុន ឬតាំងពីពេលនោះមកក៏មិនដែលមានទៀតដែរ។ សកម្មពលបរិសុទ្ធបានជួយស្ត្រីមិនល្អឥតខ្ចោះម្នាក់ឲ្យបង្កើតកូនប្រុសមួយដែលល្អឥតខ្ចោះ ហើយដែលមិនមានទោសដល់ស្លាប់ឡើយ។ (លូក. ១:២៦-៣១, ៣៤, ៣៥) ក្រោយមក សកម្មពលបរិសុទ្ធបានការពារកុមារយេស៊ូពីការស្លាប់មុនអាយុ។ (ម៉ាថ. ២:៧, ៨, ១២, ១៣) ពេលដែលលោកយេស៊ូមានអាយុ៣០ឆ្នាំ ព្រះបានរើសតាំងលោកដោយសកម្មពលបរិសុទ្ធ។ តាមរយៈសកម្មពលបរិសុទ្ធ លោកបានទទួលបង្គាប់ឲ្យផ្សព្វផ្សាយ ហើយបានត្រូវតែងតាំងឲ្យធ្វើជាអ្នកដែលទទួលបល្ល័ង្ករបស់ដាវីឌជាមត៌ក។ (លូក. ១:៣២, ៣៣; ៤:១៦-២១) ដោយសារសកម្មពលបរិសុទ្ធ លោកយេស៊ូបានទទួលឫទ្ធានុភាពឲ្យធ្វើការអស្ចារ្យផ្សេងៗដែលរួមបញ្ចូលការធ្វើឲ្យមនុស្សឈឺបានជាសះស្បើយ ផ្ដល់អាហារឲ្យក្រុមមនុស្សជាច្រើន និងការប្រោសមនុស្សស្លាប់ឲ្យរស់ឡើងវិញ។ កិច្ចការដែលប្រកបដោយឫទ្ធានុភាពនេះជាការបង្ហាញឲ្យឃើញជាមុននូវពរដែលយើងអាចទទួលក្រោមការគ្រប់គ្រងរបស់លោកយេស៊ូ។
៩, ១០. (ក) នៅសតវត្សរ៍ទី១ តើសកម្មពលបរិសុទ្ធច្បាស់ជាបានសណ្ឋិតលើពួកអ្នកកាន់តាមលោកយេស៊ូយ៉ាងដូចម្ដេច? (ខ) នៅសតវត្សរ៍ទី១ គ.ស. តើអ្វីបង្ហាញថាព្រះយេហូវ៉ាប្រើរបៀបថ្មីមួយដើម្បីសម្រេចគោលបំណងរបស់លោក?
៩ ចាប់តាំងពីបុណ្យថ្ងៃទី៥០ ឆ្នាំ៣៣ គ.ស. ព្រះយេហូវ៉ាបានប្រើសកម្មពលរបស់លោកដើម្បីរើសតាំងផ្នែកទី២នៃពូជរបស់អាប្រាហាំ ដែលពួកគេជាច្រើននាក់មិនមែនជាកូនចៅរបស់អាប្រាហាំទេ។ (រ៉ូម ៨:១៥-១៧; កាឡ. ៣:២៩) សកម្មពលបរិសុទ្ធច្បាស់ជាបានសណ្ឋិតលើពួកអ្នកកាន់តាមលោកយេស៊ូនៅសតវត្សរ៍ទី១ ដោយបានជួយពួកគេឲ្យផ្សព្វផ្សាយដោយចិត្តខ្នះខ្នែង ហើយបានផ្ដល់ឫទ្ធានុភាពឲ្យពួកគេធ្វើការអស្ចារ្យផ្សេងៗ។ (សកម្ម. ១:៨; ២:១-៤; ១កូ. ១២:៧-១១) ដោយសារពួកគេបានទទួលអំណោយជាសមត្ថភាពធ្វើការអស្ចារ្យ នេះបង្ហាញឲ្យឃើញរបៀបថ្មីមួយដែលព្រះយេហូវ៉ានឹងសម្រេចគោលបំណងរបស់លោក។ ព្រះយេហូវ៉ាមិនចង់ឲ្យមនុស្សគោរពប្រណិប័តន៍លោកតាមរបៀបដដែល ដែលលោកបានរៀបចំឡើងច្រើនសតវត្សរ៍មកហើយនោះទៀតទេ ហើយដែលជាការគោរពប្រណិប័តន៍ដែលផ្ដោតអារម្មណ៍ទៅលើវិហារនៅក្រុងយេរូសាឡិម។ លោកលែងពេញចិត្តនឹងការគោរពប្រណិប័តន៍បែបនោះ តែពេញចិត្តនឹងក្រុមជំនុំគ្រិស្តសាសនិកដែលទើបតែបានបង្កើតវិញ។ តាំងពីពេលនោះមក ព្រះយេហូវ៉ាបានប្រើក្រុមជំនុំនោះដែលលោកបានរើសតាំងដោយសកម្មពលបរិសុទ្ធ ដើម្បីបំពេញគោលបំណងរបស់លោក។
១០ ដូច្នេះ នៅសម័យគម្ពីរ វិធីខ្លះៗដែលព្រះយេហូវ៉ាបានប្រើសកម្មពលបរិសុទ្ធដើម្បីធានាថាគោលបំណងរបស់លោកនឹងសម្រេចបាន គឺដោយការពារ ផ្ដល់ឫទ្ធានុភាព និងដោយរើសតាំង។ ចុះយ៉ាងណានៅសព្វថ្ងៃនេះ? តើព្រះយេហូវ៉ាកំពុងប្រើសកម្មពលបរិសុទ្ធយ៉ាងដូចម្ដេចដើម្បីគាំទ្រគោលបំណងរបស់លោក? យើងត្រូវដឹងរបៀបដែលព្រះកំពុងប្រើសកម្មពលបរិសុទ្ធ ពីព្រោះយើងចង់ប្រព្រឹត្តសមស្របតាមសកម្មពលនោះ។ ដូច្នេះ សូមឲ្យយើងពិចារណាវិធីបួនយ៉ាងដែលព្រះយេហូវ៉ាកំពុងប្រើសកម្មពលរបស់លោកនៅសព្វថ្ងៃនេះ។
តួនាទីនៃសកម្មពលបរិសុទ្ធនៅសព្វថ្ងៃនេះ
១១. តើអ្វីបង្ហាញថាសកម្មពលបរិសុទ្ធជួយរាស្ត្ររបស់ព្រះឲ្យមានភាពស្អាតស្អំ? ហើយតើអ្នកអាចបង្ហាញថាអ្នកឲ្យសកម្មពលនោះមានឥទ្ធិពលខ្លាំងក្នុងជីវិតរបស់អ្នកយ៉ាងដូចម្ដេច?
១១ ទី១ សកម្មពលបរិសុទ្ធជួយរាស្ត្ររបស់ព្រះឲ្យមានភាពស្អាតស្អំ។ ពួកអ្នកដែលបម្រើព្រះយេហូវ៉ាស្របតាមគោលបំណងរបស់លោកត្រូវស្អាតស្អំខាងសីលធម៌។ (សូមអាន កូរិនថូសទី១ ៦:៩-១១) អ្នកខ្លះដែលបានក្លាយទៅជាគ្រិស្តសាសនិកពិតធ្លាប់ប្រព្រឹត្តអំពើប្រាសចាកសីលធម៌ដូចជា អំពើផិតក្បត់ ការរួមដំណេកជាមួយនឹងមនុស្សដែលមានភេទដូចគ្នា ឬ អំពើប្រាសចាកសីលធម៌ខាងផ្លូវភេទ។ សេចក្ដីប៉ងប្រាថ្នាដែលសម្រាលចេញជាអំពើខុសឆ្គងអាចចាក់ឫសយ៉ាងជ្រៅ។ (យ៉ា. ១:១៤, ១៥) ក៏ប៉ុន្តែ បុគ្គលបែបនោះបានត្រូវ«លាងសម្អាត» ហើយនេះបង្ហើបឲ្យដឹងថាពួកគេបានធ្វើការកែប្រែដែលចាំបាច់ក្នុងជីវិតដើម្បីធ្វើឲ្យព្រះពេញចិត្ត។ តើអ្វីអាចជួយអ្នកដែលស្រឡាញ់ព្រះឲ្យទប់ទល់នឹងការប្រព្រឹត្តតាមសេចក្ដីប៉ងប្រាថ្នាខុសឆ្គងដោយជោគជ័យ? បទគម្ពីរនៅកូរិនថូសទី១ ៦:១១ចែងថា៖ «សកម្មពលនៃព្រះរបស់យើង»។ ដោយរក្សាឲ្យមានភាពស្អាតស្អំខាងសីលធម៌ អ្នកបង្ហាញថាអ្នកឲ្យសកម្មពលនោះមានឥទ្ធិពលខ្លាំងក្នុងជីវិតរបស់អ្នក។
១២. (ក) យោងទៅតាមការឃើញក្នុងគំនិតរបស់អេសេគាល តើព្រះយេហូវ៉ាដឹកនាំអង្គការរបស់លោកយ៉ាងដូចម្ដេច? (ខ) តើអ្នកអាចបង្ហាញយ៉ាងដូចម្ដេចថាអ្នកកំពុងប្រព្រឹត្តសមស្របតាមសកម្មពលរបស់លោក?
១២ ទី២ ព្រះយេហូវ៉ាប្រើសកម្មពលដើម្បីដឹកនាំអង្គការរបស់លោកទៅតាមបំណងរបស់លោក។ តាមរយៈការឃើញក្នុងគំនិតរបស់អេសេគាល អង្គការរបស់ព្រះយេហូវ៉ានៅស្ថានសួគ៌បានត្រូវពណ៌នាជារទេះមួយដែលកំពុងឆ្ពោះទៅរកការសម្រេចគោលបំណងរបស់ព្រះយេហូវ៉ាដោយគ្មានអ្វីអាចរារាំងបាន។ តើអ្វីធ្វើឲ្យរទេះនេះទៅទិសណាមួយ? គឺសកម្មពលបរិសុទ្ធ។ (អេស. ១:២០, ២១) សូមឲ្យយើងចាំថា អង្គការរបស់ព្រះមានពីរផ្នែក មួយនៅស្ថានសួគ៌ ហើយមួយទៀតនៅផែនដី។ បើអង្គការរបស់ព្រះនៅស្ថានសួគ៌បានត្រូវដឹកនាំដោយសកម្មពលបរិសុទ្ធ នោះអង្គការរបស់ព្រះនៅផែនដីក៏ដូចគ្នាដែរ។ ដោយស្ដាប់បង្គាប់ ហើយស្មោះត្រង់ចំពោះការណែនាំដែលអ្នកទទួលពីអង្គការរបស់ព្រះនៅផែនដី នោះអ្នកបង្ហាញថាអ្នកកំពុងជឿនទៅមុខទាន់រទេះរបស់ព្រះនៅស្ថានសួគ៌ ហើយក៏បង្ហាញថាអ្នកកំពុងប្រព្រឹត្តសមស្របតាមសកម្មពលរបស់លោកដែរ។—ហេ. ១៣:១៧
១៣, ១៤. (ក) តើនរណាស្ថិតក្នុងចំណោម«ជំនាន់នេះ» ដែលលោកយេស៊ូបានរៀបរាប់? (ខ) សូមលើកឧទាហរណ៍មួយដើម្បីបង្ហាញថាព្រះយេហូវ៉ាប្រើសកម្មពលបរិសុទ្ធដើម្បីជួយយើងឲ្យយល់សេចក្ដីពិតក្នុងគម្ពីរ។ (សូមមើលប្រអប់«តើអ្នកជឿនទៅមុខទាន់ការយល់ដឹងរបស់យើងដែលកាន់តែច្បាស់ឡើងអំពីសេចក្ដីពិតក្នុងគម្ពីរឬទេ?»នៅទំព័រ២២)
១៣ ទី៣ ព្រះយេហូវ៉ាប្រើសកម្មពលបរិសុទ្ធដើម្បីជួយយើងឲ្យយល់សេចក្ដីពិតក្នុងគម្ពីរ។ (សុភ. ៤:១៨) ក្រុមនៃ«ខ្ញុំបម្រើដ៏ស្មោះត្រង់ហើយចេះពិចារណា»បានប្រើទស្សនាវដ្ដីនេះយូរយារមកហើយជាឧបករណ៍ចម្បងដើម្បីបើកបង្ហាញសេចក្ដីពិតក្នុងគម្ពីរបន្ដិចម្ដងៗ។ (ម៉ាថ. ២៤:៤៥) ជាឧទាហរណ៍ សូមពិចារណាការយល់ដឹងរបស់យើងអំពីពួកអ្នកដែលស្ថិតក្នុងចំណោម«ជំនាន់នេះ» ដែលលោកយេស៊ូបានរៀបរាប់។ (សូមអាន ម៉ាថាយ ២៤:៣២-៣៤) តើលោកយេស៊ូសំដៅទៅជំនាន់ណា? អត្ថបទដែលមានចំណងជើង«សារៈសំខាន់នៃវត្តមានរបស់ព្រះគ្រិស្ត» បានពន្យល់ថាលោកយេស៊ូសំដៅទៅពួកអ្នកកាន់តាមលោក ដែលមិនយូរទៀតនឹងត្រូវរើសតាំងដោយសកម្មពលបរិសុទ្ធ មិនមែនសំដៅទៅមនុស្សទុច្ចរិតឡើយ។a ពួកអ្នកកាន់តាមដែលបានត្រូវរើសតាំងរបស់លោកយេស៊ូនៅសតវត្សរ៍ទី១ និងនៅសព្វថ្ងៃនេះ នឹងជាបុគ្គលដែលនឹងឃើញមិនត្រឹមតែសញ្ញាសម្គាល់ប៉ុណ្ណោះទេ តែពួកគេក៏នឹងយល់អត្ថន័យនៃសញ្ញាសម្គាល់នោះផងដែរ ដែលថាលោកយេស៊ូ«នៅជិតមាត់ទ្វារហើយ»។
១៤ តើការពន្យល់នេះមានន័យអ្វីសម្រាប់យើង? ទោះជាយើងមិនអាចកំណត់ថា«ជំនាន់នេះ»មានរយៈពេលប៉ុន្មានក៏ដោយ ជាការល្អឲ្យយើងចាំចំណុចខ្លះៗអំពីពាក្យ«ជំនាន់»។ ធម្មតាពាក្យនេះសំដៅទៅមនុស្សដែលមានវ័យខុសគ្នាដែលរស់នៅគ្រាណាមួយ ដូចជាឪពុកនិងកូន ឬតានិងចៅ។ គ្រានោះមិនវែងពេកទេ ហើយមានទីបញ្ចប់។ (និក្ខ. ១:៦) បើដូច្នេះ តើលោកយេស៊ូចង់មានន័យអ្វីពេលលោកមានប្រសាសន៍អំពី«ជំនាន់នេះ»? លោកចង់មានន័យថា ក្នុងចំណោមពួកអ្នកដែលបានត្រូវរើសតាំងដែលបានឃើញសញ្ញាសម្គាល់ដែលចាប់ផ្ដើមនៅឆ្នាំ១៩១៤ នោះអ្នកខ្លះនឹងនៅរស់ ពេលដែលពួកអ្នករើសតាំងឯទៀតដែលនឹងឃើញការចាប់ផ្ដើមនៃគ្រាទុក្ខវេទនាដ៏ខ្លាំង នឹងកើតមក។ ជំនាន់នោះមានទីចាប់ផ្ដើម ហើយនឹងពិតជាមានទីបញ្ចប់ដែរ។ ការសម្រេចនៃលក្ខណៈផ្សេងៗនៃសញ្ញាសម្គាល់បង្ហាញច្បាស់ថា គ្រាទុក្ខវេទនាដ៏ខ្លាំងជិតដល់ហើយ។ ដោយជឿជាក់ថាគ្រានោះជិតមកដល់ ហើយខំចាំយាមជានិច្ច នោះអ្នកបង្ហាញថាអ្នកជឿនទៅមុខទាន់ការយល់ដឹងរបស់យើងដែលកាន់តែច្បាស់ឡើងអំពីសេចក្ដីពិតក្នុងគម្ពីរ ថែមទាំងបង្ហាញថាអ្នកឲ្យសកម្មពលបរិសុទ្ធដឹកនាំអ្នក។—ម៉ាក. ១៣:៣៧
១៥. តើអ្វីបង្ហាញថាយើងទទួលឫទ្ធានុភាពពីសកម្មពលបរិសុទ្ធដើម្បីប្រកាសដំណឹងល្អ?
១៥ ទី៤ តាមរយៈសកម្មពលបរិសុទ្ធ យើងទទួលឫទ្ធានុភាពដើម្បីប្រកាសដំណឹងល្អ។ (សកម្ម. ១:៨) គ្មានអ្វីទៀតដែលអាចជួយយើងឲ្យផ្សព្វផ្សាយដំណឹងល្អទូទាំងពិភពលោកទេ មែនទេ? សូមគិតអំពីចំណុចនេះ។ ដោយសារមានការអៀនខ្មាសឬការភ័យខ្លាចខ្លាំង អ្នកប្រហែលជានៅក្នុងចំណោមពួកអ្នកដែលធ្លាប់គិតថា‹ខ្ញុំមិនអាចទៅផ្សព្វផ្សាយពីផ្ទះមួយទៅផ្ទះមួយទេ!›។ ក៏ប៉ុន្តែ ឥឡូវអ្នកចូលរួមយ៉ាងខ្នះខ្នែងក្នុងកិច្ចការនោះ។ សាក្សីព្រះយេហូវ៉ាដ៏ស្មោះត្រង់ជាច្រើននាក់បានបន្តផ្សព្វផ្សាយ ទោះជាជួបប្រទះនឹងការប្រឆាំងឬការបៀតបៀនក៏ដោយ។ មានតែសកម្មពលបរិសុទ្ធរបស់ព្រះប៉ុណ្ណោះដែលអាចផ្ដល់ឫទ្ធានុភាពឲ្យយើងយកឈ្នះឧបសគ្គដែលមើលទៅមិនអាចឈ្នះបាន ហើយជួយឲ្យយើងធ្វើអ្វីដែលយើងមិនអាចធ្វើបានបើពឹងលើកម្លាំងរបស់យើង។ (មីកា ៣:៨; ម៉ាថ. ១៧:២០) បើអ្នកចូលរួមយ៉ាងពេញលេញក្នុងការផ្សព្វផ្សាយ នោះអ្នកបង្ហាញថាអ្នកឲ្យសកម្មពលបរិសុទ្ធមានឥទ្ធិពលក្នុងជីវិតរបស់អ្នក។
តួនាទីនៃសកម្មពលបរិសុទ្ធនៅអនាគត
១៦. ហេតុអ្វីយើងអាចមានទំនុកចិត្តថាព្រះយេហូវ៉ានឹងការពាររាស្ត្ររបស់លោកក្នុងអំឡុងគ្រាវេទនាដ៏ខ្លាំង?
១៦ នៅថ្ងៃអនាគត ព្រះយេហូវ៉ានឹងប្រើសកម្មពលបរិសុទ្ធតាមរបៀបដ៏អស្ចារ្យដើម្បីសម្រេចគោលបំណងរបស់លោក។ មុនដំបូងសូមពិចារណាអំពីការការពារ។ ដូចយើងបានឃើញរួចហើយ នៅអតីតកាល ព្រះយេហូវ៉ាបានប្រើសកម្មពលដើម្បីការពារបុគ្គលផ្សេងៗ ព្រមទាំងការពារប្រជាជាតិអ៊ីស្រាអែលទាំងមូលដែរ។ ហេតុនេះ ក្នុងអំឡុងគ្រាវេទនាដ៏ខ្លាំងដែលជិតមកដល់ យើងអាចជឿជាក់ថាលោកនឹងប្រើសកម្មពលដ៏ខ្លាំងក្លានោះដើម្បីការពាររាស្ត្ររបស់លោក។ យើងមិនត្រូវប៉ាន់ស្មានអំពីរបៀបជាក់លាក់ណាមួយដែលព្រះយេហូវ៉ានឹងថែរក្សាយើងនៅគ្រានោះទេ។ ផ្ទុយទៅវិញ យើងអាចទន្ទឹងរង់ចាំអនាគតដោយមានទំនុកចិត្តថា ព្រះយេហូវ៉ានឹងមើលឃើញពួកអ្នកដែលស្រឡាញ់លោក ហើយសកម្មពលបរិសុទ្ធនឹងជួយយើងទោះជាយើងនៅទីណាឬនៅក្នុងកាលៈទេសៈណាក៏ដោយ។—២រប. ១៦:៩; ទំនុក. ១៣៩:៧-១២
១៧. នៅពិភពលោកថ្មី តើព្រះយេហូវ៉ានឹងប្រើសកម្មពលបរិសុទ្ធរបស់លោកយ៉ាងណា?
១៧ នៅពិភពលោកថ្មីដែលជិតមកដល់ តើព្រះយេហូវ៉ានឹងប្រើសកម្មពលបរិសុទ្ធរបស់លោកយ៉ាងណា? លោកនឹងប្រើសកម្មពលនោះដើម្បីបង្កើតរមូរថ្មីផ្សេងៗដែលត្រូវបើកឡើងនៅពេលនោះ។ (បប. ២០:១២) តើនឹងមានអ្វីខ្លះក្នុងរមូរថ្មីទាំងនោះ? តាមមើលទៅ រមូរថ្មីទាំងនោះមានតម្រូវការល្អិតល្អន់របស់ព្រះយេហូវ៉ាសម្រាប់យើងក្នុងអំឡុងគ្រាមួយពាន់ឆ្នាំ។ តើអ្នកទន្ទឹងរង់ចាំពិនិត្យមើលព័ត៌មានក្នុងរមូរទាំងនោះឬទេ? យើងរង់ចាំពិភពលោកថ្មីនោះដោយចិត្តរំភើប។ យើងមិនអាចនឹកក្នុងចិត្តថាការរស់នៅនឹងទៅជាយ៉ាងណាទេនៅគ្រាដ៏អស្ចារ្យនោះ ពេលព្រះយេហូវ៉ានឹងប្រើសកម្មពលបរិសុទ្ធដើម្បីសម្រេចគោលបំណងរបស់លោកសម្រាប់ផែនដីនិងមនុស្សជាតិ។
១៨. តើអ្នកតាំងចិត្តយ៉ាងម៉ឺងម៉ាត់ធ្វើអ្វី?
១៨ សូមឲ្យយើងចាំមិនភ្លេចថា ព្រះយេហូវ៉ាមានគោលបំណងដែលនឹងសម្រេចបន្ដិចម្ដងៗ តែនៅទីបំផុតគោលបំណងនោះនឹងពិតជាបានជោគជ័យ ពីព្រោះលោកប្រើសកម្មពលបរិសុទ្ធ ដែលជាឫទ្ធានុភាពខ្លាំងក្លាបំផុតក្នុងសកលលោក ដើម្បីបំពេញគោលបំណងនោះ។ គោលបំណងនោះជាប់ទាក់ទងនឹងរូបអ្នក។ ដូច្នេះ សូមឲ្យអ្នកតាំងចិត្តយ៉ាងម៉ឺងម៉ាត់អង្វរព្រះយេហូវ៉ាសុំសកម្មពលរបស់លោក ហើយប្រព្រឹត្តស្របតាមការដឹកនាំរបស់សកម្មពលនោះ។ (លូក. ១១:១៣) ដោយធ្វើដូច្នេះ អ្នកអាចមានសេចក្ដីសង្ឃឹមរស់នៅតាមរបៀបដែលព្រះយេហូវ៉ាមានបំណងឲ្យមនុស្សរស់នៅ ពោលគឺរស់នៅជារៀងរហូតក្នុងសួនឧទ្យាននៅផែនដី។
[កំណត់សម្គាល់]
តើអ្នកចាំឬទេ?
• តើព្រះយេហូវ៉ាបានប្រើសកម្មពលបរិសុទ្ធយ៉ាងដូចម្ដេចដើម្បីធានាថាគោលបំណងរបស់លោកនឹងសម្រេចបាន?
• សព្វថ្ងៃនេះ តើព្រះយេហូវ៉ាកំពុងប្រើសកម្មពលរបស់លោកយ៉ាងដូចម្ដេច?
• នៅអនាគត តើព្រះយេហូវ៉ានឹងប្រើសកម្មពលរបស់លោកយ៉ាងដូចម្ដេចដើម្បីសម្រេចគោលបំណងរបស់លោក?
[ប្រអប់នៅទំព័រ២២]
តើអ្នកជឿនទៅមុខទាន់ការយល់ដឹង របស់យើងដែលកាន់តែច្បាស់ឡើង អំពីសេចក្ដីពិតក្នុងគម្ពីរឬទេ?
ព្រះយេហូវ៉ាបន្តបំភ្លឺសេចក្ដីពិតក្នុងគម្ពីរ ឲ្យរាស្ត្ររបស់លោក។ តើមានសេចក្ដីបង្រៀន ណាខ្លះដែលទស្សនាវដ្ដីប៉មយាម បានពន្យល់កាន់តែច្បាស់?
▪ តើឧទាហរណ៍របស់លោកយេស៊ូអំពីដំបែ បង្ហាញមេរៀនល្អអ្វីស្តីអំពីរបៀបដែលបុគ្គលម្នាក់បណ្ដុះឲ្យមានចំណងមេត្រីភាពជាមួយនឹងព្រះយេហូវ៉ា? (ម៉ាថ. ១៣:៣៣) ថ្ងៃទី១ ខែកក្កដា ឆ្នាំ២០០៨ ទំព័រ២៣-២៤
▪ តើមនុស្ស១៤៤.០០០នាក់បានត្រូវប្រមូលគ្រប់ចំនួននៅពេលណា? ថ្ងៃទី១ ខែមករា ឆ្នាំ២០០៨ ទំព័រ២៧
▪ តើការគោរពប្រណិប័តន៍ព្រះយេហូវ៉ា«ដោយមានការដឹកនាំពីសកម្មពល»មានន័យអ្វី? (យ៉ូន. ៤:២៤) ថ្ងៃទី១ ខែតុលា ឆ្នាំ២០០២ ទំព័រ២៣
▪ តើមនុស្សមួយក្រុមធំបម្រើនៅទីលានមួយណាក្នុងវិហារ? (បប. ៧:១៥) ថ្ងៃទី១ ខែមីនា ឆ្នាំ២០១០ ទំព័រ២៤
▪ តើការញែកមនុស្សចេញពីគ្នា ដូចគង្វាលម្នាក់ញែកចៀមចេញពីពពែកើតឡើងនៅពេលណា? (ម៉ាថ. ២៥:៣១-៣៣) ថ្ងៃទី១ ខែមករា ឆ្នាំ១៩៩៦ ទំព័រ២២-៣២