ក្រុមគ្រួសារគ្រិស្តសាសនិក ចូរនៅ‹ភ្ញាក់ជានិច្ច›
«ចូរឲ្យយើងភ្ញាក់ហើយដឹងខ្លួនជានិច្ច»។—១ថែ. ៥:៦
១, ២. ដើម្បីឲ្យក្រុមគ្រួសារនៅភ្ញាក់ជានិច្ចក្នុងការគោរពប្រណិប័តន៍ព្រះ តើសមាជិកម្នាក់ៗត្រូវធ្វើអ្វី?
ពេលសាវ័កប៉ូលបានសរសេរសំបុត្រទៅក្រុមជំនុំគ្រិស្តសាសនិកនៅក្រុងថែស្សាឡូនិច គាត់បានសំដៅទៅ«ថ្ងៃធំគួរស្ញែងខ្លាចរបស់ព្រះយេហូវ៉ា» ដោយប្រាប់ថា៖ «បងប្អូនអើយ! អ្នករាល់គ្នាមិននៅក្នុងភាពងងឹតទេ ដូច្នេះ ថ្ងៃនោះនឹងមិនមកដោយអ្នករាល់គ្នាមិនដឹងខ្លួន ដូចជាពន្លឺថ្ងៃមកដោយពួកចោរមិនដឹងខ្លួននោះទេ ព្រោះអ្នករាល់គ្នាជាកូននៃពន្លឺ និងជាកូននៃថ្ងៃ។ យើងមិនមែននៅខាងយប់ឬភាពងងឹតឡើយ»។ គាត់បានបន្ថែមថា៖ «ដូច្នេះ កុំឲ្យយើងដេកលង់លក់ដូចអ្នកឯទៀត តែចូរឲ្យយើងភ្ញាក់ហើយដឹងខ្លួនជានិច្ច»។—យ៉ូល. ២:៣១; ១ថែ. ៥:៤-៦
២ ឱវាទរបស់ប៉ូលទៅក្រុមជំនុំថែស្សាឡូនិចគឺមានប្រយោជន៍ជាពិសេស ចំពោះគ្រិស្តសាសនិកដែលកំពុងរស់នៅក្នុង«គ្រាចុងបំផុត»។ (ដាន. ១២:៤) កាលដែលទីបញ្ចប់នៃរបៀបរបបពិភពលោកអាក្រក់របស់សាថានជិតដល់ហើយ នោះវាតាំងចិត្តបញ្ឈប់ពួកអ្នកគោរពប្រណិប័តន៍ពិតពីការបម្រើព្រះ ឲ្យបានច្រើនបំផុត។ ដូច្នេះ ជាការល្អឲ្យយើងធ្វើតាមការដាស់តឿនរបស់ប៉ូលដែលឲ្យយើងយកចិត្តទុកដាក់យ៉ាងខ្លាំងចំពោះការគោរពប្រណិប័តន៍ព្រះ។ ប្រសិនបើក្រុមគ្រួសារគ្រិស្តសាសនិកចង់ទទួលជោគជ័យក្នុងការនៅភ្ញាក់ជានិច្ច នោះជាការសំខាន់ដែលសមាជិកម្នាក់ៗបំពេញតាមភារកិច្ចដែលព្រះយេហូវ៉ាប្រគល់ឲ្យពួកគាត់ដូចបានចែងក្នុងគម្ពីរ។ ដូច្នេះ ក្នុងការជួយឲ្យក្រុមគ្រួសាររបស់ពួកគេនៅ‹ភ្ញាក់ជានិច្ច› តើប្ដីទាំងឡាយ ប្រពន្ធទាំងឡាយ និងប្អូនៗវ័យក្មេងមានតួនាទីអ្វី?
ប្ដីទាំងឡាយ សូមយកតម្រាប់តាម«គង្វាលល្អប្រសើរ»
៣. ស្របទៅតាមធីម៉ូថេទី១ ៥:៨ តើភារកិច្ចរបស់បុរសជាប្រមុខនៃក្រុមគ្រួសាររួមបញ្ចូលអ្វីខ្លះ?
៣ គម្ពីរចែងថា៖ «ប្រមុខរបស់ស្ត្រីទាំងឡាយគឺបុរស»។ (១កូ. ១១:៣) តើភារកិច្ចរបស់បុរសជាប្រមុខនៃក្រុមគ្រួសាររួមបញ្ចូលអ្វីខ្លះ? គម្ពីររៀបរាប់អំពីផ្នែកមួយនៃភារកិច្ចជាប្រមុខថា៖ «ប្រសិនបើមានអ្នកណាដែលមិនទំនុកបម្រុងពួកអ្នកនៅក្នុងបន្ទុកខ្លួន ជាពិសេសសមាជិកក្រុមគ្រួសាររបស់ខ្លួន អ្នកនោះបានលះបង់ជំនឿ ហើយក៏អាក្រក់ជាងអ្នកដែលមិនជឿទៅទៀត»។ (១ធី. ៥:៨) ប្រាកដមែន ប្ដីត្រូវចិញ្ចឹមក្រុមគ្រួសាររបស់គាត់។ ប៉ុន្តែ បើគាត់ចង់ជួយក្រុមគ្រួសាររបស់គាត់ឲ្យភ្ញាក់ជានិច្ចក្នុងការគោរពប្រណិប័តន៍ព្រះ នោះគាត់មិនគ្រាន់តែចិញ្ចឹមក្រុមគ្រួសាររបស់គាត់តែប៉ុណ្ណោះទេ។ គាត់ត្រូវពង្រឹងជំនឿនៃសមាជិកក្រុមគ្រួសាររបស់គាត់ ហើយជួយសមាជិកទាំងអស់ឲ្យពង្រឹងចំណងមិត្តភាពរបស់ពួកគេជាមួយនឹងព្រះ។ (សុភ. ២៤:៣, ៤) តើគាត់អាចធ្វើដូច្នេះយ៉ាងដូចម្ដេច?
៤. តើអ្វីអាចជួយបុរសម្នាក់ឲ្យទទួលជោគជ័យក្នុងការពង្រឹងជំនឿនៃសមាជិកក្រុមគ្រួសាររបស់គាត់?
៤ ដោយសារ«ប្ដីជាប្រមុខរបស់ប្រពន្ធ ដូចគ្រិស្តជាប្រមុខនៃក្រុមជំនុំ» នោះបុរសដែលរៀបការរួចហើយ គួរពិនិត្យមើលនិងយកតម្រាប់តាមរបៀបដែលលោកយេស៊ូបានធ្វើជាប្រមុខនៃក្រុមជំនុំ។ (អេភ. ៥:២៣) សូមពិចារណាអំពីរបៀបដែលលោកយេស៊ូពណ៌នាចំណងមិត្តភាពរបស់លោកជាមួយនឹងពួកអ្នកកាន់តាមរបស់លោក។ (សូមអាន យ៉ូហាន ១០:១៤, ១៥) តើបុរសដែលចង់ពង្រឹងជំនឿនៃសមាជិកក្រុមគ្រួសាររបស់គាត់អាចធ្វើយ៉ាងណាដើម្បីទទួលជោគជ័យ? គឺឲ្យគាត់សិក្សាអំពីប្រសាសន៍និងការប្រព្រឹត្តរបស់លោកយេស៊ូក្នុងនាមជា«គង្វាលល្អប្រសើរ» ហើយក្រោយមក«ខំដើរតាមលំអានដានរបស់លោកឲ្យបានដិតដល់»។—១ពេ. ២:២១
៥. តើគង្វាលល្អប្រសើរស្គាល់អ្វីខ្លះអំពីក្រុមជំនុំ?
៥ ក្នុងន័យធៀប ចំណងមិត្តភាពរវាងគង្វាលនិងចៀមរបស់គាត់គឺពឹងផ្អែកលើការស្គាល់គ្នានិងទុកចិត្តគ្នា។ គង្វាលស្គាល់អ្វីៗទាំងអស់អំពីចៀមរបស់គាត់ ហើយចៀមក៏ស្គាល់គង្វាលនិងទុកចិត្តគាត់ ថែមទាំងស្គាល់សំឡេងនិងស្ដាប់តាមគាត់ដែរ។ លោកយេស៊ូបានមានប្រសាសន៍ថា៖ «ខ្ញុំស្គាល់ចៀមរបស់ខ្ញុំ ហើយចៀមរបស់ខ្ញុំក៏ស្គាល់ខ្ញុំដែរ»។ លោកមិនមែនស្គាល់ក្រុមជំនុំលំៗនោះទេ។ ពាក្យ«ស្គាល់»ក្នុងភាសាក្រិចរួមបញ្ចូលអត្ថន័យថា«ស្គាល់យ៉ាងច្បាស់និងល្អិតល្អន់»។ ពិតមែនហើយ គង្វាលល្អប្រសើរស្គាល់ចៀមរបស់លោកយ៉ាងល្អិតល្អន់។ លោកស្គាល់អំពីសេចក្ដីត្រូវការរបស់ចៀមនីមួយៗទាំងចំណុចខ្សោយ ទាំងចំណុចខ្លាំងរបស់ពួកគេ។ គ្មានចំណុចណាមួយរបស់ចៀមដែលលោកយេស៊ូមិនស្គាល់នោះទេ។ បន្ថែមទៅទៀត ចៀមស្គាល់គង្វាលយ៉ាងច្បាស់ ហើយក៏ទុកចិត្តចំពោះការដឹកនាំរបស់លោកដែរ។
៦. តើប្ដីអាចយកតម្រាប់តាមគង្វាលល្អប្រសើរយ៉ាងដូចម្ដេច?
៦ ដើម្បីធ្វើជាប្រមុខដូចគ្រិស្ត ប្ដីត្រូវចេះចាត់ទុកខ្លួនគាត់ប្រៀបដូចជាគង្វាលម្នាក់ ហើយចាត់ទុកអស់អ្នកដែលស្ថិតក្រោមការថែទាំរបស់គាត់ប្រៀបដូចជាចៀម។ គាត់គួរព្យាយាមស្គាល់ក្រុមគ្រួសាររបស់គាត់ឲ្យបានច្បាស់។ តើគាត់ពិតជាអាចធ្វើដូច្នេះបានឬទេ? គាត់អាចធ្វើបាន បើគាត់ប្រាស្រ័យទាក់ទងយ៉ាងល្អជាមួយនឹងសមាជិកទាំងអស់ ស្ដាប់កង្វល់របស់ពួកគេ នាំមុខក្នុងកិច្ចការផ្សេងៗរបស់ក្រុមគ្រួសារ ហើយយកចិត្តទុកដាក់ក្នុងការសម្រេចចិត្តឲ្យបានត្រឹមត្រូវអំពីរឿងដែលទាក់ទងនឹងការគោរពប្រណិប័តន៍ជាគ្រួសារ កិច្ចប្រជុំ កិច្ចការផ្សព្វផ្សាយ ការលំហែកាយ និងការកម្សាន្តជាដើម។ ពេលប្ដីដែលជាគ្រិស្តសាសនិកដឹកនាំក្រុមគ្រួសារដោយមានចំណេះអំពីបណ្ដាំរបស់ព្រះ ថែមទាំងស្គាល់សមាជិកក្រុមគ្រួសារឲ្យបានច្បាស់ នោះសមាជិកគ្រួសាររបស់គាត់ទំនងជាទុកចិត្តលើប្រមុខភាពរបស់គាត់ជាង ហើយគាត់ក៏នឹងពេញចិត្តដោយឃើញពួកគេរក្សាសាមគ្គីភាពក្នុងការគោរពប្រណិប័តន៍ពិតដែរ។
៧, ៨. តើប្ដីអាចយកតម្រាប់តាមគង្វាលល្អប្រសើរក្នុងការបង្ហាញសេចក្ដីស្រឡាញ់យ៉ាងដូចម្ដេចចំពោះអស់អ្នកដែលស្ថិតក្រោមការថែទាំរបស់គាត់?
៧ គង្វាលល្អម្នាក់ក៏ស្រឡាញ់ចៀមរបស់គាត់ដែរ។ ពេលយើងសិក្សាអំពីជីវិតនិងកិច្ចការផ្សាយរបស់លោកយេស៊ូពីកំណត់ហេតុក្នុងសៀវភៅដំណឹងល្អ នោះយើងមានចិត្តដឹងគុណចំពោះសេចក្ដីស្រឡាញ់ដែលលោកយេស៊ូបានបង្ហាញដល់ពួកអ្នកកាន់តាមលោក។ លោកក៏បាន«លះបង់ជីវិតដើម្បីចៀម»ដែរ។ ប្ដីគួរយកតម្រាប់តាមលោកយេស៊ូក្នុងការបង្ហាញសេចក្ដីស្រឡាញ់ចំពោះពួកអ្នកដែលនៅក្រោមការថែទាំរបស់គាត់។ ជាជាងគ្រប់គ្រងលើប្រពន្ធរបស់គាត់យ៉ាងឃោរឃៅ ប្ដីដែលចង់ធ្វើឲ្យព្រះយេហូវ៉ាពេញចិត្តត្រូវបន្តស្រឡាញ់ប្រពន្ធ«ដូចគ្រិស្តបានស្រឡាញ់ក្រុមជំនុំ»។ (អេភ. ៥:២៥) គាត់គួរសប្បុរសនិងចេះគិតពីអារម្មណ៍របស់ប្រពន្ធតាមរយៈពាក្យសម្ដី ពីព្រោះនាងសមទទួលកិត្ដិយស។—១ពេ. ៣:៧
៨ ក្នុងការបង្ហាត់បង្រៀនកូន នោះមេគ្រួសារគួរប្រកាន់ខ្ជាប់នឹងគោលការណ៍របស់ព្រះ។ ទោះជាយ៉ាងនេះក៏ដោយ គាត់ត្រូវបង្ហាញមនោសញ្ចេតនារបស់គាត់ចំពោះកូន ហើយពេលត្រូវប្រៀនប្រដៅកូន នោះគាត់ត្រូវធ្វើដោយសេចក្ដីស្រឡាញ់។ កូនខ្លះត្រូវការពេលវេលាយូរជាងកូនៗឯទៀតដើម្បីយល់ពីអ្វីដែលពួកគេគួរធ្វើ។ ក្នុងករណីនេះ ឪពុកគួរមានចិត្តអត់ធ្មត់ជាងចំពោះកូននោះ។ ដូច្នេះ ពេលប្ដីធ្វើតាមគំរូរបស់លោកយេស៊ូយ៉ាងទៀងទាត់ នោះពួកគាត់នឹងធ្វើឲ្យបរិយាកាសក្នុងផ្ទះក្លាយជាកន្លែងដែលមានសុវត្ថិភាពនិងមានសេចក្ដីសុខ។ ម្យ៉ាងទៀត ក្រុមគ្រួសាររបស់ពួកគាត់នឹងមានស្ថានភាពសុខសាន្តក្នុងការគោរពប្រណិប័តន៍ព្រះដូចអ្នកតែងទំនុកតម្កើងបានច្រៀង។—សូមអាន ទំនុកតម្កើង ២៣:១-៦
៩. ដូចណូអេដែលជាមេគ្រួសារម្នាក់ តើប្ដីដែលជាគ្រិស្តសាសនិកមានភារកិច្ចអ្វី? ហើយតើមានអ្វីដែលអាចជួយគាត់ឲ្យធ្វើដូច្នេះបាន?
៩ គំរូល្អមួយទៀតសម្រាប់មេគ្រួសារដែលជាគ្រិស្តសាសនិក គឺណូអេ។ ណូអេដែលជាមេគ្រួសារម្នាក់បានរស់នៅគ្រាចុងបញ្ចប់នៃសម័យរបស់គាត់។ ពេលដែលព្រះយេហូវ៉ា«ធ្វើឲ្យទឹកជន់លិចពិភពលោកនៃមនុស្សទុច្ចរិតទាំងនោះ» លោកបានសង្គ្រោះខ្លួនគាត់និង«មនុស្សប្រាំពីរនាក់ទៀត»។ (២ពេ. ២:៥) ណូអេមានភារកិច្ចជួយក្រុមគ្រួសាររបស់គាត់ឲ្យរួចរស់ជីវិតពីទឹកជំនន់នោះ។ មេគ្រួសារដែលជាគ្រិស្តសាសនិកក៏មានតួនាទីស្រដៀងនេះដែរនៅសព្វថ្ងៃនេះ។ (ម៉ាថ. ២៤:៣៧) ដូច្នេះ ជាការចាំបាច់ដែលពួកគាត់សិក្សាពីគំរូរបស់«គង្វាលល្អប្រសើរ»និងខំយកតម្រាប់តាមលោក!
ប្រពន្ធទាំងឡាយ សូម«សង់ផ្ទះរបស់ខ្លួនឡើង»
១០. តើការចុះចូលរបស់ប្រពន្ធចំពោះប្ដីមានន័យអ្វី?
១០ សាវ័កប៉ូលបានសរសេរថា៖ «ចូរឲ្យប្រពន្ធចុះចូលនឹងប្ដី ដូចចុះចូលនឹងលោកម្ចាស់»។ (អេភ. ៥:២២) ប្រយោគនេះមិនបញ្ជាក់ថាស្ត្រីមានឋានៈថោកទាបនោះទេ។ មុនព្រះបង្កើតនាងអេវ៉ាដែលជាស្ត្រីដំបូង លោកបានប្រកាសថា៖ «មនុស្សនេះនៅតែម្នាក់ឯង នោះមិនស្រួលទេ អញនឹងធ្វើឲ្យមានម្នាក់ជាជំនួយសំរាប់ជួយវា»។ (លោ. ២:១៨) តួនាទីរបស់«ជំនួយ»ជាតួនាទីដែលមានកិត្ដិយសមែន ពោលគឺគាំទ្រប្ដីពេលគាត់បំពេញភារកិច្ចក្នុងក្រុមគ្រួសារ។
១១. តើប្រពន្ធដែលជាគំរូល្អ«សង់ផ្ទះរបស់ខ្លួនឡើង»យ៉ាងដូចម្ដេច?
១១ ប្រពន្ធដែលជាគំរូល្អធ្វើអ្វីៗដែលជាប្រយោជន៍សម្រាប់អ្នកផ្ទះ។ (សូមអាន សុភាសិត ១៤:១) ផ្ទុយពីប្រពន្ធដែលល្ងីល្ងើដែលមិនគោរពការរៀបចំនៃប្រមុខភាព នោះប្រពន្ធដែលមានប្រាជ្ញាគោរពយ៉ាងខ្លាំងចំពោះការរៀបចំនេះ។ ជាជាងបង្ហាញចិត្តគំនិតដែលមិនស្ដាប់បង្គាប់និងមិនពឹងពាក់អ្នកឯទៀតដែលជាលក្ខណៈរបស់ពិភពលោកនេះ នោះនាងចុះចូលចំពោះប្ដីវិញ។ (អេភ. ២:២) ប្រពន្ធដែលល្ងីល្ងើមិនស្ទាក់ស្ទើរក្នុងការនិយាយអាក្រក់ពីប្ដីខ្លួនទេ តែប្រពន្ធដែលមានប្រាជ្ញាខំធ្វើអ្វីៗទាំងអស់ដើម្បីឲ្យកូននិងអ្នកឯទៀតគោរពប្ដីខ្លួនកាន់តែច្រើន។ ប្រពន្ធបែបនេះមិនចង់រំអុកប្ដី ឬមិនឈ្លោះប្រកែកជាមួយប្ដីទេ ព្រោះនេះអាចបង្ហាញថានាងមិនគោរពប្រមុខភាពរបស់ប្ដី ដែលអាចធ្វើឲ្យសមាជិកឯទៀតធ្វើដូចនាងដែរ។ រឿងសំខាន់មួយទៀតគឺទាក់ទងនឹងការចេះចាយវាយលុយកាក់។ ប្រពន្ធល្ងីល្ងើទំនងជាខ្ជះខ្ជាយលុយកាក់ដែលប្ដីខំរកបាន។ ប៉ុន្តែប្រពន្ធដែលចេះគាំទ្រប្ដីមិនធ្វើដូច្នេះទេ តែនាងសហការជាមួយប្ដីចំពោះរឿងនេះវិញ។ របៀបដែលនាងចាយវាយលុយកាក់បានត្រូវសម្គាល់ដោយការចេះទុកដាក់និងចេះសន្សំសំចៃ។ ម្យ៉ាងទៀត នាងក៏មិនបង្ខំប្ដីឲ្យធ្វើការថែមម៉ោងដែរ។
១២. តើប្រពន្ធអាចធ្វើយ៉ាងណាដើម្បីជួយសមាជិកគ្រួសាររបស់ខ្លួនឲ្យនៅ‹ភ្ញាក់ជានិច្ច›?
១២ ប្រពន្ធដែលជាគំរូល្អជួយសមាជិកគ្រួសាររបស់ខ្លួនឲ្យនៅ‹ភ្ញាក់ជានិច្ច›ដោយជួយប្ដីក្នុងការបង្រៀនកូនអំពីព្រះយេហូវ៉ា។ (សុភ. ១:៨) នាងគាំទ្រយ៉ាងសកម្មនូវការគោរពប្រណិប័តន៍ជាក្រុមគ្រួសារ។ ម្យ៉ាងទៀត នាងក៏គាំទ្រប្ដី ពេលដែលគាត់ឲ្យឱវាទនិងប្រៀនប្រដៅកូនដែរ។ នាងពិតជាខុសគ្នាឆ្ងាយមែនពីប្រពន្ធដែលមិនចេះសហការគ្នា! ព្រោះប្រពន្ធដែលមិនចេះសហការគ្នាបែបនេះអាចនាំឲ្យកូនៗពិបាកទាំងផ្លូវកាយទាំងក្នុងការគោរពប្រណិប័តន៍ព្រះ។
១៣. ហេតុអ្វីជាការសំខាន់ឲ្យប្រពន្ធគាំទ្រប្ដីពេលគាត់ជាប់រវល់ក្នុងកិច្ចការរបស់ក្រុមជំនុំនិងរបស់អង្គការព្រះ?
១៣ តើប្រពន្ធដែលគាំទ្រប្ដីមានអារម្មណ៍យ៉ាងណាពេលដែលគាត់បំពេញភារកិច្ចរបស់គាត់ក្នុងក្រុមជំនុំ? នាងពិតជាមានអំណរមែន! មិនថាប្ដីជាជំនួយការខាងកិច្ចបម្រើ ជាអ្នកចាស់ទុំ ឬប្រហែលជាសមាជិកនៃគណៈកម្មាធិការខាងសម្ព័ន្ធការពេទ្យ ឬគណៈកម្មាធិការខាងការសាងសង់តាមភូមិភាគក្ដី នោះនាងសប្បាយចិត្តណាស់ចំពោះឯកសិទ្ធិរបស់គាត់។ ការគាំទ្រប្ដីយ៉ាងសកម្មតាមរយៈពាក្យសម្ដីនិងការប្រព្រឹត្តពិតជានាំឲ្យនាងលះបង់ប្រយោជន៍របស់ខ្លួនខ្លះៗដែរ។ ប៉ុន្តែ នាងក៏ទទួលស្គាល់ដែរថាដោយសារប្ដីជាប់រវល់ក្នុងកិច្ចការរបស់ក្រុមជំនុំនិងរបស់អង្គការព្រះ នោះជួយក្រុមគ្រួសារទាំងមូលឲ្យនៅភ្ញាក់ក្នុងការគោរពប្រណិប័តន៍ព្រះជានិច្ច។
១៤. (ក) តើប្រហែលជាមានការពិបាកអ្វីសម្រាប់ប្រពន្ធដែលគាំទ្រប្ដី? ហើយតើនាងអាចយកឈ្នះការពិបាកនោះយ៉ាងដូចម្ដេច? (ខ) តើប្រពន្ធអាចជួយឲ្យក្រុមគ្រួសារទាំងមូលមានសុភមង្គលយ៉ាងដូចម្ដេច?
១៤ ការធ្វើជាគំរូល្អក្នុងការគាំទ្រប្ដី ប្រហែលជាពិបាកសម្រាប់នាងពេលប្ដីធ្វើការសម្រេចចិត្តណាមួយដែលនាងមិនឯកភាព។ ទោះជាយ៉ាងនោះក្ដី នាងបង្ហាញ«ចិត្តស្ងៀមស្ងាត់និងស្លូតបូត» និងសហការជាមួយប្ដីដើម្បីធ្វើឲ្យការសម្រេចចិត្តនោះទទួលជោគជ័យ។ (១ពេ. ៣:៤) ប្រពន្ធល្អខំធ្វើតាមគំរូរបស់ស្ត្រីដែលកោតខ្លាចព្រះពីសម័យបុរាណ ដូចជាសារ៉ា រូថ អ័ប៊ីកែល និងម៉ារៀដែលជាម្ដាយរបស់លោកយេស៊ូជាដើម។ (១ពេ. ៣:៥, ៦) ម្យ៉ាងទៀត នាងក៏យកតម្រាប់តាមស្ត្រីវ័យចាស់នៅសព្វថ្ងៃនេះដែរដែលបាន«ប្រព្រឹត្តឲ្យសមជាមនុស្សបរិសុទ្ធ»។ (ទីត. ២:៣, ៤) ដោយបង្ហាញសេចក្ដីស្រឡាញ់និងការគោរពចំពោះប្ដី នោះប្រពន្ធដែលជាគំរូល្អជួយឲ្យចំណងអាពាហ៍ពិពាហ៍ទទួលជោគជ័យ និងជួយឲ្យក្រុមគ្រួសារទាំងមូលមានសុភមង្គល។ ដោយធ្វើដូច្នេះ នាងធ្វើឲ្យបរិយាកាសក្នុងផ្ទះទៅជាកន្លែងមួយដែលគួរឲ្យចង់រស់នៅ។ ម្ល៉ោះហើយ ចំពោះបុរសដែលស្រឡាញ់ព្រះយេហូវ៉ានិងធ្វើការនឿយហត់សម្រាប់លោក នោះប្រពន្ធដែលគាំទ្រគាត់មានតម្លៃដែលកាត់ថ្លៃពុំបាន!—សុភ. ១៨:២២
ប្អូនៗវ័យក្មេង សូម‹ផ្ដោតអារម្មណ៍ទៅលើអ្វីដែលប្អូនមើលមិនឃើញ›
១៥. តើប្អូនៗវ័យក្មេងអាចសហការជាមួយឪពុកម្ដាយដើម្បីធ្វើឲ្យក្រុមគ្រួសារនៅ‹ភ្ញាក់ជានិច្ច›យ៉ាងដូចម្ដេច?
១៥ ប្អូនៗវ័យក្មេងអើយ! តើប្អូនអាចសហការជាមួយឪពុកម្ដាយដើម្បីធ្វើឲ្យក្រុមគ្រួសាររបស់ប្អូននៅ‹ភ្ញាក់ជានិច្ច›ក្នុងការគោរពប្រណិប័តន៍ព្រះយ៉ាងដូចម្ដេច? សូមគិតអំពីរង្វាន់ដែលប្អូនអាចទទួលពីព្រះយេហូវ៉ា។ ប្រហែលជាតាំងតែពីក្មេងមក ឪពុកម្ដាយរបស់ប្អូនបានបង្ហាញរូបភាពពីសួនឧទ្យានដល់ប្អូន ហើយពេលដែលប្អូនធំឡើង ពួកគាត់ទំនងជាប្រើគម្ពីរនិងសៀវភៅរបស់អង្គការយើងដើម្បីជួយប្អូនឲ្យស្រមៃគិតអំពីជីវិតដែលគ្មានទីបញ្ចប់នៅក្នុងពិភពលោកថ្មីរបស់ព្រះ។ ដូច្នេះ ការផ្ដោតអារម្មណ៍ក្នុងកិច្ចការបម្រើព្រះយេហូវ៉ា និងរៀបចំជីវិតរបស់ប្អូនឲ្យរស់នៅសមស្របតាមកិច្ចបម្រើនោះ នឹងជួយប្អូនឲ្យនៅ‹ភ្ញាក់ជានិច្ច›។
១៦, ១៧. ដើម្បីទទួលជោគជ័យក្នុងការរត់ប្រណាំងដែលនាំឲ្យបានជីវិត តើប្អូនៗវ័យក្មេងអាចធ្វើយ៉ាងណា?
១៦ សូមគិតអំពីពាក្យរបស់សាវ័កប៉ូលដែលមានក្នុងកូរិនថូសទី១ ៩:២៤។ (សូមអាន) សាវ័កប៉ូលបានប្រៀបធៀបកិច្ចបម្រើរបស់យើងចំពោះព្រះយេហូវ៉ាទៅនឹងការរត់ប្រណាំង ហើយប្រៀបធៀបជីវិតដែលគ្មានទីបញ្ចប់ទៅនឹងរង្វាន់។ ដូច្នេះ សូមរត់ក្នុងទីប្រណាំងនេះដើម្បីឲ្យបានជ័យជម្នះ ហើយសូមជ្រើសរើសផ្លូវដែលអាចនាំឲ្យប្អូនទទួលរង្វាន់នោះ។ មនុស្សជាច្រើនអនុញ្ញាតឲ្យការប្រមូលទ្រព្យសម្បត្ដិបំបែរអារម្មណ៍របស់ពួកគេពីរង្វាន់នោះ។ នេះពិតជាមិនចេះពិចារណាមែន! ពីព្រោះការរៀបចំជីវិតដែលផ្អែកលើការប្រមូលទ្រព្យសម្បត្ដិមិននាំឲ្យមានសុភមង្គលពិតទេ ហើយអ្វីដែលលុយអាចទិញជាអ្វីដែលមានតែបណ្ដោះអាសន្នប៉ុណ្ណោះ។ ប៉ុន្តែ ចំពោះប្អូនវិញ សូមផ្ដោតអារម្មណ៍ទៅលើ‹អ្វីដែលប្អូនមើលមិនឃើញ›។ ហេតុអ្វី? ពីព្រោះ‹អ្វីដែលប្អូនមើលមិនឃើញ នោះស្ថិតស្ថេរជារៀងរហូត›។—២កូ. ៤:១៨
១៧ ‹អ្វីដែលប្អូនមើលមិនឃើញ›រួមបញ្ចូលពរពីរាជាណាចក្ររបស់ព្រះ។ សូមរៀបចំឲ្យមានរបៀបរស់នៅដើម្បីទទួលពរទាំងនោះ។ ម្យ៉ាងទៀត ការប្រើជីវិតរបស់ប្អូនក្នុងការបម្រើព្រះយេហូវ៉ា នោះនាំឲ្យមានសុភមង្គលពិត។ ការបម្រើព្រះពិតនឹងផ្ដល់ឱកាសឲ្យប្អូនកំណត់គោលដៅដែលអាចសម្រេចបានក្នុងរយៈពេលខ្លី ថែមទាំងគោលដៅដែលអាចសម្រេចក្នុងរយៈពេលវែងដែរ។a ការកំណត់គោលដៅដែលប្អូនអាចសម្រេចបានក្នុងការគោរពប្រណិប័តន៍ព្រះ អាចជួយប្អូនឲ្យផ្ដោតអារម្មណ៍ជានិច្ចទៅលើការបម្រើលោកដោយមានចិត្តចង់ទទួលអំណោយដែលជាជីវិតដែលគ្មានទីបញ្ចប់។—១យ៉ូន. ២:១៧
១៨, ១៩. តើប្អូនៗវ័យក្មេងអាចដឹងយ៉ាងដូចម្ដេចថាខ្លួនបានបណ្ដុះឲ្យមានចំណងមិត្តភាពជាមួយនឹងព្រះយេហូវ៉ា?
១៨ ប្អូនៗវ័យក្មេងអើយ! អ្វីដែលប្អូនត្រូវធ្វើមុនគេក្នុងការរត់ប្រណាំងដើម្បីឲ្យបានជីវិត គឺបណ្ដុះឲ្យខ្លួនមានចំណងមិត្តភាពជាមួយនឹងព្រះយេហូវ៉ា។ តើប្អូនបានធ្វើដូច្នេះហើយឬនៅ? សូមដណ្ដឹងសួរខ្លួនថា‹តើខ្ញុំមានចំណងមិត្តភាពជិតស្និទ្ធជាមួយនឹងព្រះយេហូវ៉ាឬទេ? ឬក៏តើខ្ញុំធ្វើកិច្ចការបម្រើព្រះដោយសារឪពុកម្ដាយរបស់ខ្ញុំវិញ? តើខ្ញុំបណ្ដុះឲ្យមានគុណសម្បត្ដិដែលធ្វើឲ្យព្រះពេញចិត្តនឹងខ្ញុំឬយ៉ាងណា? តើខ្ញុំព្យាយាមដើម្បីរក្សាឲ្យមានទម្លាប់យ៉ាងទៀងទាត់ក្នុងសកម្មភាពដែលទាក់ទងនឹងការគោរពប្រណិប័តន៍ពិត ដូចជាការអធិដ្ឋាន ការសិក្សា កិច្ចផ្សព្វផ្សាយ និងទៅកិច្ចប្រជុំជាទៀងទាត់ឬទេ? តើខ្ញុំចូលទៅជិតព្រះដោយខំបណ្ដុះឲ្យខ្លួនមានចំណងមិត្តភាពជាមួយនឹងលោកឬទេ?›។—យ៉ា. ៤:៨
១៩ សូមប្អូនសញ្ជឹងគិតអំពីគំរូរបស់ម៉ូសេ។ ទោះជាម៉ូសេបានត្រូវអប់រំតាមទំនៀមទម្លាប់របស់ប្រទេសអេស៊ីបក្ដី គាត់បានសម្រេចចិត្តឲ្យគេសម្គាល់គាត់ជាអ្នកដែលគោរពប្រណិប័តន៍ព្រះយេហូវ៉ា ជាជាងជាកូនរបស់កូនស្រីផារ៉ូ។ (សូមអាន ហេប្រឺ ១១:២៤-២៧) ប្អូនៗគ្រិស្តសាសនិកអើយ! ប្អូនក៏ត្រូវតាំងចិត្តបម្រើព្រះយេហូវ៉ាយ៉ាងស្មោះត្រង់ដែរ។ ដោយធ្វើដូច្នេះ ប្អូននឹងមានសុភមង្គលពិត និងមានជីវិតដ៏ប្រសើរបំផុតនៅឥឡូវនេះ ថែមទាំងមានសេចក្ដីសង្ឃឹម«ចាប់យ៉ាងជាប់នូវជីវិតដ៏ពិតប្រាកដ»។—១ធី. ៦:១៩
២០. ក្នុងការរត់ប្រណាំងដើម្បីឲ្យបានជីវិត តើអ្នកណានឹងទទួលរង្វាន់?
២០ ក្នុងកីឡារត់ប្រណាំងនៅសម័យបុរាណ មានអ្នកឈ្នះតែម្នាក់ប៉ុណ្ណោះ។ ប៉ុន្តែ ការរត់ប្រណាំងដើម្បីឲ្យបានជីវិតមិនមែនដូច្នេះទេ។ បំណងប្រាថ្នារបស់ព្រះគឺ«ឲ្យមនុស្សគ្រប់ប្រភេទទទួលសេចក្ដីសង្គ្រោះ ហើយមានចំណេះត្រឹមត្រូវអំពីសេចក្ដីពិត»។ (១ធី. ២:៣, ៤) មនុស្សជាច្រើនបានរត់ក្នុងការប្រណាំងនេះដោយទទួលជោគជ័យមុនប្អូន ហើយមនុស្សជាច្រើនទៀតកំពុងរត់ដំណាលគ្នានឹងប្អូនដែរ។ (ហេ. ១២:១, ២) អស់អ្នកដែលមិនរសាយចិត្តក្នុងការរត់ប្រណាំងនេះនឹងទទួលរង្វាន់គ្រប់ៗគ្នា។ ដូច្នេះ សូមតាំងចិត្តរត់ឲ្យឈ្នះ!
២១. តើអត្ថបទបន្ទាប់នឹងពិចារណាអំពីអ្វី?
២១ «ថ្ងៃដ៏ធំហើយគួរស្ញែងខ្លាចរបស់ព្រះយេហូវ៉ា»នឹងមកដល់ជាក់ជាមិនខាន។ (ម៉ាឡ. ៤:៥) ក្រុមគ្រួសារគ្រិស្តសាសនិកគួរដឹងខ្លួនពេលថ្ងៃនោះមកដល់។ ហេតុនេះហើយ ជាការសំខាន់ណាស់ដែលសមាជិកទាំងអស់ក្នុងក្រុមគ្រួសារបំពេញតាមភារកិច្ចដែលព្រះយេហូវ៉ាប្រគល់ឲ្យពួកគាត់ដូចបានចែងក្នុងគម្ពីរ។ តើអ្នកអាចធ្វើអ្វីថែមទៀតដើម្បីយកចិត្តទុកដាក់ក្នុងការគោរពប្រណិប័តន៍ព្រះនិងពង្រឹងចំណងមិត្តភាពរបស់អ្នកជាមួយនឹងលោក? អត្ថបទបន្ទាប់នឹងពិចារណាអំពីចំណុចបីយ៉ាងដែលជះឥទ្ធិពលទៅលើក្រុមគ្រួសារទាំងមូលក្នុងការមានចំណងមិត្តភាពជាមួយនឹងព្រះ។
[កំណត់សម្គាល់]
a ដើម្បីទទួលព័ត៌មានបន្ថែម សូមមើលទស្សនាវដ្ដីប៉មយាម ថ្ងៃទី១ ខែវិច្ឆិកា ឆ្នាំ២០១០ ទំព័រ១៩-២៣។
តើអ្នកបានរៀនអ្វីខ្លះ?
• ហេតុអ្វីជាការសំខាន់ចាំបាច់ដែលក្រុមគ្រួសារគ្រិស្តសាសនិកនៅ‹ភ្ញាក់ជានិច្ច›?
• តើប្ដីអាចយកតម្រាប់តាមគង្វាលល្អប្រសើរយ៉ាងដូចម្ដេច?
• តើប្រពន្ធដែលជាគំរូល្អអាចធ្វើអ្វីដើម្បីគាំទ្រប្ដីនាង?
• តើប្អូនៗវ័យក្មេងអាចជួយក្រុមគ្រួសាររបស់ពួកគេឲ្យនៅភ្ញាក់ជានិច្ចយ៉ាងដូចម្ដេច?
[រូបភាពនៅទំព័រ១២]
ចំពោះបុរសដែលស្រឡាញ់ព្រះយេហូវ៉ានិងធ្វើការនឿយហត់សម្រាប់លោក នោះប្រពន្ធដែលគាំទ្រគាត់មានតម្លៃដែលកាត់ថ្លៃពុំបាន