តើចម្លើយអំពីរឿងនេះសំខាន់ឬទេ?
«ខ្ញុំមានសង្សារតាំងពីខ្ញុំអាយុ១០ឆ្នាំ។ មុនដំបូង យើងគ្រាន់តែកាន់ដៃនិងថើបគ្នាប៉ុណ្ណោះ។ ប៉ុន្តែ យូរៗទៅ យើងចាប់ផ្ដើមលូកលាន់គ្នាទៅវិញទៅមក និងធ្វើសកម្មភាពផ្សេងៗខាងផ្លូវភេទ។ ពេលដែលខ្ញុំអាយុ១៥ឆ្នាំ ខ្ញុំចាប់ផ្ដើមចូលធ្វើការ ហើយប្រុសៗនៅកន្លែងធ្វើការនោះមកសុំរួមដំណេកជាមួយខ្ញុំ។ ខ្ញុំចង់សាកអ្វីៗដែលថ្មីនិងធ្វើតាមអ្វីដែលអ្នករួមការងារធ្វើដែរ។ ដោយសារខ្ញុំចង់ឲ្យអ្នកដែលនៅជុំវិញខ្ញុំរាប់អានខ្ញុំ នោះនាំឲ្យខ្ញុំប្រឡូកនឹងការរួមភេទកាន់តែច្រើន»។—សារ៉ាa ពីប្រទេសអូស្ដ្រាលី
ពេលអ្នកដឹងថាសារ៉ាបានធំឡើងក្នុងក្រុមគ្រួសារដែលមានជំនឿស៊ប់លើរឿងសាសនា នេះនឹងធ្វើឲ្យអ្នកភ្ញាក់ផ្អើល មែនទេ? ឪពុកម្ដាយរបស់គាត់ខំចិញ្ចឹមអប់រំគាត់ទៅតាមខ្នាតតម្រាសីលធម៌ក្នុងគម្ពីរ។ ប៉ុន្តែ សារ៉ាបានជ្រើសរើសផ្លូវជីវិតផ្សេងទៅវិញ។
មនុស្សជាច្រើនប្រហែលជាជ្រើសរើសផ្លូវជីវិតដូចសារ៉ាដែរ។ ពួកគេជឿថាទស្សនៈរបស់ព្រះដែលមានក្នុងគម្ពីរស្តីអំពីរឿងរួមភេទជាអ្វីដែលហួសសម័យហើយ។ អ្នកឯទៀតគិតថាការកាន់តាមសាសនានិងការប្រឡូកនឹងការរួមភេទមិនមែនជាអ្វីដែលខុសទេ។
តើការដឹងនិងរស់នៅតាមអ្វីដែលគម្ពីរបង្រៀនស្តីអំពីរឿងរួមភេទជាអ្វីដែលសំខាន់ឬទេ? គម្ពីរជាសៀវភៅមួយដែល«បានត្រូវសរសេរក្រោមការដឹកនាំរបស់ព្រះ ហើយមានប្រយោជន៍សម្រាប់បង្រៀន»។ (ធីម៉ូថេទី២ ៣:១៦) បើលោកអ្នកជឿថាព្រះជាអ្នកបង្កើតមនុស្សជាតិ និងជឿថាគម្ពីរបានត្រូវសរសេរក្រោមការដឹកនាំរបស់លោក នោះអ្វីដែលគម្ពីរចែងអំពីរឿងនេះជាអ្វីដែលគួរតែយកមកពិចារណាមែន។
គួរឲ្យសោកស្ដាយណាស់ មនុស្សជាច្រើនយល់ច្រឡំអ្វីដែលគម្ពីរបង្រៀនអំពីរឿងរួមភេទ។ ពួកមេដឹកនាំសាសនាអះអាងថាពួកគេគោរពគម្ពីរ តែពួកគេបែរជាបង្រៀនខុសៗពីគ្នាអំពីរឿងនេះទៅវិញ។ តាមពិត និកាយធំៗនៃពិភពគ្រិស្តសាសនាបានបែកបាក់គ្នាដោយសាររឿងនេះ។
ជាជាងពឹងផ្អែកទៅលើពាក្យសម្ដីរបស់អ្នកឯទៀត យើងសូមលើកទឹកចិត្តលោកអ្នកឲ្យចំណាយពេលខ្លះដើម្បីពិចារណាអំពីរឿងនេះដោយខ្លួនលោកអ្នកផ្ទាល់។ អត្ថបទបន្ទាប់នឹងពិចារណាសំណួរ១០ដែលមនុស្សច្រើនតែសួរអំពីអ្វីដែលគម្ពីរបង្រៀនស្តីពីការរួមភេទ។ ក្នុងអត្ថបទនោះលោកអ្នកនឹងរកឃើញចម្លើយច្បាស់ៗដែលមានមូលដ្ឋានលើអ្វីដែលគម្ពីរពិតជាបង្រៀន។ អត្ថបទទី៣ក្នុងទស្សនាវដ្ដីនេះនឹងពិចារណាអំពីមូលហេតុដែលជម្រើសរបស់យើងស្តីអំពីការរួមភេទជាអ្វីដ៏សំខាន់។
[កំណត់សម្គាល់]
a ឈ្មោះបានត្រូវផ្លាស់ប្ដូរ។