អត្ថបទអំពីក្របទស្សនាវដ្ដី
រូបអាសអាភាស តើមានគ្រោះថ្នាក់ឬគ្មានគ្រោះថ្នាក់?
ពិភពលោកសព្វថ្ងៃនេះពោរពេញទៅដោយរូបអាសអាភាស។a មិនថាយើងទៅកន្លែងណាទេ យើងងាយនឹងឃើញរូបអាសអាភាសដូចជា នៅក្នុងការផ្សាយពាណិជ្ជកម្ម ការបង្ហាញម៉ូត ភាពយន្ត ចម្រៀង ទស្សនាវដ្ដី នៅលើកញ្ចក់ទូរទស្សន៍ ក្នុងវីដេអូហ្គេម ក្នុងទូរស័ព្ទទំនើប ក្នុងគ្រឿងអេឡិចត្រូនិក ក្នុងគេហទំព័រ និងក្នុងបណ្ដាញចែករំលែករូបថតតាមអ៊ីនធឺណិតជាដើម។ តាមមើលទៅ រូបអាសអាភាសកំពុងក្លាយទៅជាអ្វីមួយដ៏ពេញនិយមក្នុងសង្គមសម័យថ្មីនេះ។ មានមនុស្សកាន់តែច្រើននៅកន្លែងផ្សេងៗដែលមើលរូបអាសអាភាស ច្រើនជាងពេលណាទាំងអស់ក្នុងប្រវត្តិសាស្ត្រមនុស្សជាតិ (សូមមើលប្រអប់ដែលមានចំណងជើងថា«ការពិតអំពីរូបអាសអាភាស»)។
លក្ខណៈនៃរូបអាសអាភាសក៏បានត្រូវផ្លាស់ប្ដូរដែរ។ សាស្ត្រាចារ្យម្នាក់ឈ្មោះគែល ឌីន បានសរសេរថា៖«សព្វថ្ងៃនេះ រូបអាសអាភាសមានលក្ខណៈស្រើបស្រាលខ្លាំងណាស់ដែលនៅសម័យមុនគេចាត់ទុកថាជារឿងស្មោកគ្រោកបំផុត បែរជានៅសម័យនេះគេចាត់ទុកថារឿងធម្មតាទៅវិញ»។
តើអ្នកមានទស្សនៈយ៉ាងណាអំពីរឿងទាំងនោះ? តើការមើលរូបអាសអាភាសនាំឲ្យមានគ្រោះថ្នាក់ ឬគ្មានគ្រោះថ្នាក់ ឬគ្រាន់តែជាការកម្សាន្ត? លោកយេស៊ូបានមានប្រសាសន៍ថា៖«ដើមឈើល្អ បង្កើតផលល្អ ប៉ុន្តែ ដើមឈើមិនល្អ បង្កើតផលមិនល្អ»។ (ម៉ាថាយ ៧:១៧) តើការមើលរូបអាសអាភាសនាំឲ្យមានលទ្ធផលបែបណា? ដើម្បីដឹងចម្លើយ សូមយើងពិចារណាចំណុចខ្លះដូចតទៅ៖
តើរូបអាសអាភាសមានឥទ្ធិពលយ៉ាងណាលើមនុស្សម្នាក់ៗ?
ទស្សនៈរបស់អ្នកជំនាញ: រូបអាសអាភាសងាយនឹងធ្វើឲ្យញៀនខ្លាំង។ អ្នកស្រាវជ្រាវខ្លះនិងអ្នកព្យាបាលរោគមួយចំនួនបានចាត់ទុកការមើលរូបអាសអាភាសថា ប្រៀបដូចជាការប្រើគ្រឿងញៀនកូកាអ៊ីន។
បុរសម្នាក់ឈ្មោះប្រាយអេនbដែលធ្លាប់ញៀនមើលរូបអាសអាភាសក្នុងអ៊ីនធឺណិត បាននិយាយថា៖«គ្មានអ្វីអាចបញ្ឈប់ខ្ញុំបានទេ។ ខ្ញុំមានអារម្មណ៍ថាដូចជាកំពុងនៅក្នុងការស្រមើស្រមៃ។ ខ្ញុំញ័រពេញខ្លួន ហើយឈឺក្បាលខ្ទោកៗ។ ខ្ញុំបានព្យាយាមឈប់មើល តែច្រើនឆ្នាំកន្លងទៅ ខ្ញុំនៅតែមិនអាចឈប់បាន»។
ជាញឹកញយ មនុស្សដែលញៀនមើលរូបអាសអាភាសមិនបង្ហាញឲ្យអ្នកណាដឹងទេ។ ពួកគេលួចមើលរូបអាសអាភាសដោយសម្ងាត់ ហើយក៏ទៅជាមនុស្សកុហកនិងបោកបញ្ឆោតដែរ។ មិនមែនជារឿងភ្ញាក់ផ្អើលទេ ដែលមនុស្សជាច្រើនមានអារម្មណ៍ឯកោ ខ្មាស ព្រួយបារម្ភ បាក់ទឹកចិត្ត ហើយខឹងខ្លួនឯង ដោយសារការមើលរូបអាសអាភាស។ អ្នកខ្លះថែមទាំងគិតចង់សម្លាប់ខ្លួនទៀតផង។ បុរសម្នាក់ឈ្មោះសឺចធ្លាប់ថតចម្លងរូបអាសអាភាសដាក់ក្នុងទូរស័ព្ទរបស់គាត់ស្ទើរតែរាល់ថ្ងៃ។ គាត់បាននិយាយថា៖«ខ្ញុំមានអារម្មណ៍ថាខ្លួនគ្មានតម្លៃ ជាមនុស្សដែលមានពិរុទ្ធ ឯកោ និងជាប់អន្ទាក់។ ខ្ញុំខ្មាសខ្លាំងណាស់ រហូតដល់មិនហ៊ានសុំជំនួយពីអ្នកឯទៀតឡើយ»។
សូម្បីតែមើលរូបអាសអាភាសមួយរយៈ ឬឃើញដោយចៃដន្យក៏អាចជះឥទ្ធិពលមិនល្អដែរ។ បណ្ឌិតជូឌិត រ៉េសមេន ដែលជាអ្នកស្រាវជ្រាវដ៏ល្បីម្នាក់ខាងរូបអាសអាភាស បានបញ្ជាក់ប្រាប់គណៈកម្មាធិការសភាអាម៉េរិកថា៖«រូបអាសអាភាសដក់ជាប់នៅក្នុងខួរក្បាល ហើយផ្លាស់ប្ដូរដំណើរការរបស់ខួរក្បាល។ រូបភាពទាំងនេះបានត្រូវរក្សាទុកភ្លាមៗដោយស្វ័យប្រវត្តិនៅក្នុងការចងចាំ ហើយនៅជាប់យូរអង្វែង។ រូបទាំងនេះជះឥទ្ធិពលដល់ជីវគីមីរបស់ខួរក្បាលដែលពិបាកលុបចោល ឬមិនអាចលុបបានជារៀងរហូត»។ នារីម្នាក់ឈ្មោះស៊ូសាន អាយុ១៩ឆ្នាំ ដែលបានមើលគេហទំព័រដែលមានរូបអាសអាភាសដោយចៃដន្យ បាននិយាយថា៖«រូបភាពទាំងនោះដក់ជាប់ក្នុងចិត្តខ្ញុំយ៉ាងខ្លាំង។ ពេលខ្លះស្រាប់តែលេចមកក្នុងគំនិតរបស់ខ្ញុំដោយមិនដឹងខ្លួន។ ខ្ញុំមានអារម្មណ៍ថា ខ្ញុំគ្មានថ្ងៃអាចលុបរូបភាពទាំងនោះចេញបានទេ»។
សរុបសេចក្ដី: រូបអាសអាភាសធ្វើឲ្យអ្នកដែលមើលក្លាយទៅជាទាសករ និងទៅជាមនុស្សដែលមានវិបត្តិផ្លូវចិត្តនិងមានបញ្ហាយ៉ាងធ្ងន់ធ្ងរ។—ពេត្រុសទី២ ២:១៩
តើរូបអាសអាភាសធ្វើឲ្យប៉ះពាល់ដល់ក្រុមគ្រួសារយ៉ាងដូចម្ដេច?
ទស្សនៈរបស់អ្នកជំនាញ: «រូបអាសអាភាសធ្វើឲ្យប្ដីប្រពន្ធនិងក្រុមគ្រួសារបែកបាក់គ្នា» (អន្ទាក់នៃរូបអាសអាភាស ដោយវ៉េនឌី និងលែរី ម៉ល់ជាភាសាអង់គ្លេស)។
រូបអាសអាភាសបំផ្លាញចំណងអាពាហ៍ពិពាហ៍និងក្រុមគ្រួសារដូចជា៖
កាត់បន្ថយទំនុកចិត្តដែលមានចំពោះគ្នា មិនសូវមានអារម្មណ៍ស្និទ្ធស្នាល និងបន្ថយអារម្មណ៍ស្នេហា ព្រមទាំងធ្វើឲ្យសេចក្ដីស្រឡាញ់ចុះខ្សោយ។—សុភាសិត ២:១២-១៧
ទៅជាមនុស្សដែលស្រឡាញ់តែខ្លួនឯង សោះអង្គើយ និងមិនពេញចិត្តចំពោះគូរបស់ខ្លួន។—អេភេសូរ ៥:២៨, ២៩
រំញោចអារម្មណ៍ផ្លូវភេទឥតឈប់ ហើយចេះតែមានការស្រមើស្រមៃដែលមិនសមរម្យ។—ពេត្រុសទី២ ២:១៤
ធ្វើឲ្យអ្នកដែលមើលរូបអាសអាភាស បង្ខំគូរបស់ខ្លួនឲ្យរួមភេទតាមរបៀបប្លែកៗ។—អេភេសូរ ៥:៣, ៤
ធ្វើឲ្យចិត្តនិងរូបកាយលែងមានភាពស្មោះត្រង់។—ម៉ាថាយ ៥:២៨
គម្ពីរប្រាប់ថាប្ដីប្រពន្ធមិនត្រូវ«ប្រព្រឹត្តដោយចិត្តក្បត់»ចំពោះគ្នាឡើយ។ (ម៉ាឡាគី ២:១៦) ភាពមិនស្មោះត្រង់ក៏អាចហៅថាជាការក្បត់ចិត្តដែរ ហើយអាចនាំឲ្យចំណងអាពាហ៍ពិពាហ៍ប្រេះឆា រហូតដល់រស់នៅបែកគ្នា ឬលែងលះគ្នាទៀតផង។ ជាលទ្ធផល កូនដែលកើតក្នុងក្រុមគ្រួសារបែបនេះ ក៏រងផលវិបាកដែរ។
រូបអាសអាភាសក៏អាចជះឥទ្ធិពលអាក្រក់ដោយផ្ទាល់ដល់កូនផងដែរ។ ប្រាយអេនដែលបានរៀបរាប់ខាងលើ បានប្រាប់ថា៖«ពេលខ្ញុំអាយុប្រហែល១០ឆ្នាំ ខ្ញុំបានឃើញទស្សនាវដ្ដីអាសអាភាសរបស់ឪពុកខ្ញុំដោយចៃដន្យ ក្នុងពេលដែលខ្ញុំកំពុងលេងបិទពួន។ ខ្ញុំចាប់ផ្ដើមលួចមើលទស្សនាវដ្ដីនោះទាំងមិនយល់ពីមូលហេតុដែលខ្ញុំចង់ឃើញរូបបែបនោះម្ដងហើយម្ដងទៀត។ តាំងពីពេលនោះមក ខ្ញុំមានទម្លាប់មើលរូបអាសអាភាសរហូតដល់ខ្ញុំពេញវ័យ»។ ការស្រាវជ្រាវបង្ហាញថា ការមើលរូបអាសអាភាសបណ្ដាលឲ្យក្មេងចូលប្រឡូកក្នុងការរួមភេទមុនអាយុ មានដៃគូស្នេហាច្រើន ប្រើហិង្សាដើម្បីសម្រេចចំណង់ផ្លូវភេទ មានបញ្ហាសតិអារម្មណ៍ និងមានផ្លូវចិត្តមិននឹងន។
សរុបសេចក្ដី: រូបអាសអាភាសបង្ខូចទំនាក់ទំនងក្នុងក្រុមគ្រួសារ ហើយនៅទីបំផុតធ្វើឲ្យខូចចិត្តនិងឈឺចាប់។—សុភាសិត ៦:២៧
តើគម្ពីរចែងយ៉ាងណាអំពីរូបអាសអាភាស?
បណ្ដាំរបស់ព្រះចែងថា៖ «ដូច្នេះ ចូររម្ងាប់ភាពទោរទន់ដែលមាននៅក្នុងអវយវៈរូបកាយរបស់អ្នករាល់គ្នា គឺភាពទោរទន់ទៅរកអំពើប្រាសចាកសីលធម៌ខាងផ្លូវភេទ អំពើស្មោកគ្រោក តម្រេក សេចក្ដីប៉ងប្រាថ្នាអាក្រក់ និងការច្រណែនចង់បានរបស់អ្នកដទៃ ដែលទុកដូចជាការគោរពបូជារូបព្រះ»។—កូឡុស ៣:៥
បើនិយាយឲ្យចំទៅ ព្រះយេហូវ៉ាcស្អប់រូបអាសអាភាស។ នេះមិនមែនដោយសារលោកគិតថារឿងរួមភេទជារឿងមិនសមរម្យទេ។ លោកបានបង្កើតមនុស្សឲ្យមានសមត្ថភាពរួមភេទ និងមានគោលបំណងឲ្យប្ដីប្រពន្ធអាចបំពេញចិត្តគ្នាទៅវិញទៅមកក្នុងអាពាហ៍ពិពាហ៍ មានអារម្មណ៍ជិតស្និទ្ធគ្នាកាន់តែខ្លាំង ហើយរួមគ្នាក្នុងអ្វីដ៏អស្ចារ្យមួយ គឺការបង្កើតកូន។—យ៉ាកុប ១:១៧
បើដូច្នេះ ហេតុអ្វីយើងអាចនិយាយដោយជឿជាក់ថា ព្រះយេហូវ៉ាពិតជាស្អប់រូបអាសអាភាស? សូមពិចារណាមូលហេតុមួយចំនួន។
លោកជ្រាបថារូបអាសអាភាសអាចបំផ្លាញជីវិតរបស់យើង។—អេភេសូរ ៤:១៧-១៩
លោកស្រឡាញ់យើង ហើយចង់ការពារយើងពីអន្តរាយ។—អេសាយ ៤៨:១៧, ១៨
ព្រះយេហូវ៉ាចង់ការពារចំណងអាពាហ៍ពិពាហ៍និងក្រុមគ្រួសាររបស់យើង។—ម៉ាថាយ ១៩:៤-៦
លោកចង់ឲ្យយើងមានភាពស្អាតស្អំខាងសីលធម៌ និងគោរពសិទ្ធិរបស់អ្នកឯទៀត។—ថែស្សាឡូនិចទី១ ៤:៣-៦
លោកចង់ឲ្យយើងឲ្យតម្លៃចំពោះអវយវៈភេទរបស់យើង ហើយប្រើអវយវៈភេទតាមរបៀបថ្លៃថ្នូរ។—ហេប្រឺ ១៣:៤
ព្រះយេហូវ៉ាដឹងថារូបអាសអាភាសនាំឲ្យមនុស្សគិតតែពីប្រយោជន៍ផ្ទាល់ខ្លួន និងមានទស្សនៈមិនត្រឹមត្រូវអំពីផ្លូវភេទដូចទស្សនៈរបស់សាថាន។—លោកុប្បត្តិ ៦:២; យូដាស ៦, ៧
សរុបសេចក្ដី: រូបអាសអាភាសបង្ខូចចំណងមិត្តភាពរវាងយើងនិងព្រះ។—រ៉ូម ១:២៤
ក៏ប៉ុន្តែ ព្រះយេហូវ៉ាមានសេចក្ដីមេត្តាករុណាដ៏ធំធេងចំពោះអ្នកដែលចង់ឈប់មើលរូបអាសអាភាស។ គម្ពីរចែងថា៖«ព្រះយេហូវ៉ាទ្រង់មានសេចក្ដីមេត្តាករុណា ហើយនឹងសេចក្ដីអាណិតអាសូរ ទ្រង់យឺតនឹងខ្ញាល់ ហើយមានសេចក្ដីសប្បុរសដ៏បរិបូរ។ ដ្បិតទ្រង់ស្គាល់រាងកាយរបស់យើង ក៏នឹកចាំថា យើងគ្រាន់តែជាធូលីដីប៉ុណ្ណោះ»។ (ទំនុកតម្កើង ១០៣:៨, ១៤) លោកអញ្ជើញមនុស្សរាបទាបឲ្យមកឯលោក ដើម្បី«ទទួលសេចក្ដីមេត្តាករុណានិងគុណដ៏វិសេសលើសលប់នៅពេលដែល[ពួកគេ]ត្រូវការជំនួយ» (សូមមើលប្រអប់«វិធីផ្ដាច់ទម្លាប់មើលរូបអាសអាភាស»)។—ហេប្រឺ ៤:១៦
មនុស្សជាច្រើនបានទទួលយកជំនួយពីព្រះ។ តើលោកពិតជាអាចជួយបានទេ? សូមកត់សម្គាល់អ្វីដែលគម្ពីរចែងអំពីអ្នកខ្លះដែលបានយកឈ្នះទម្លាប់អាក្រក់ ដោយចែងថា៖«អ្នករាល់គ្នាបានត្រូវលាងសម្អាត ក៏បានត្រូវញែកចេញជាបរិសុទ្ធ ហើយបានត្រូវប្រកាសថាជាមនុស្សសុចរិត ក្នុងនាមលោកយេស៊ូគ្រិស្តជាម្ចាស់របស់យើង និងដោយសកម្មពលនៃព្រះរបស់យើង»។ (កូរិនថូសទី១ ៦:១១) ដូចសាវ័កប៉ូលដែរ អ្នកទាំងនោះអាចនិយាយថា៖«ខ្ញុំមានកម្លាំងសម្រាប់អ្វីៗទាំងអស់ ដោយសារលោកដែលផ្ដល់កម្លាំងឲ្យខ្ញុំ»។—ភីលីព ៤:១៣
ស៊ូសានដែលបានផ្ដាច់ការញៀនមើលរូបអាសអាភាស បានរៀបរាប់ថា៖«គឺមានតែព្រះយេហូវ៉ាប៉ុណ្ណោះ ដែលអាចជួយអ្នកឲ្យឈប់មើលរូបអាសអាភាស។ ប្រសិនបើអ្នកសុំជំនួយនិងយោបល់ពីលោក អ្នកអាចទៅជាមនុស្សស្អាតស្អំនៅចំពោះលោក។ លោកនឹងមិនធ្វើឲ្យអ្នកខកចិត្តឡើយ»។
a ពាក្យ«រូបអាសអាភាស»សំដៅលើអ្វីក៏ដោយដែលធ្វើឡើងក្នុងបំណងឲ្យអ្នកមើល អ្នកអាន ឬអ្នកស្ដាប់មានអារម្មណ៍ស្រើបស្រាលឬរំញោចដល់ចំណង់ផ្លូវភេទ។ នេះរួមបញ្ចូលរូបថត អត្ថបទ ឯកសារជាសំឡេង ឬរូបភាពជាដើម។
b ឈ្មោះក្នុងអត្ថបទនេះបានត្រូវផ្លាស់ប្ដូរ។
c យេហូវ៉ាគឺជានាមរបស់ព្រះដែលមាននៅក្នុងគម្ពីរ។