សេចក្ដីសង្ឃឹមសម្រាប់មនុស្សស្លាប់ ការប្រោសឲ្យរស់ឡើងវិញ
តើអ្នកជឿសេចក្ដីសន្យាក្នុងគម្ពីរអំពីការប្រោសឲ្យរស់ឡើងវិញទេ?a សេចក្ដីសង្ឃឹមជួបជុំអ្នកជាទីស្រឡាញ់ដែលបានស្លាប់ទៅគឺពិតជាទាក់ទាញចិត្តយើងមែន។ ប៉ុន្តែ តើសេចក្ដីសង្ឃឹមដូចនោះគ្រាន់តែជាការស្រមៃឬ? ដើម្បីដឹងចម្លើយអំពីរឿងនោះ សូមយើងពិចារណាគំរូសាវ័ករបស់លោកយេស៊ូគ្រិស្ត។
ពួកសាវ័កបានជឿយ៉ាងខ្លាំងទៅលើការប្រោសមនុស្សស្លាប់ឲ្យរស់ឡើងវិញ។ ហេតុអ្វី? យ៉ាងហោចណាស់មានមូលហេតុពីរដែលពួកគេជឿដូច្នោះ។ ទី១ សេចក្ដីសង្ឃឹមរបស់ពួកគេមានមូលដ្ឋានយ៉ាងរឹងមាំលើហេតុការណ៍ពិតគឺ: លោកយេស៊ូផ្ទាល់បានត្រូវប្រោសឲ្យរស់ឡើងវិញ។ ពួកសាវ័កនិង«បងប្អូនជាងប្រាំរយនាក់នៅពេលតែមួយ»បានឃើញលោកយេស៊ូរស់ឡើងវិញ។ (កូរិនថូសទី១ ១៥:៦) បន្ថែមទៅទៀត សៀវភៅដំណឹងល្អទាំងបួនបានបង្ហាញថា មានសាក្សីផ្សេងទៀតបានឃើញ ហើយទទួលស្គាល់ថាលោកយេស៊ូបានត្រូវប្រោសឲ្យរស់ឡើងវិញមែន។—ម៉ាថាយ ២៧:៦២–២៨:២០; ម៉ាកុស ១៦:១-៨; លូកា ២៤:១-៥៣; យ៉ូហាន ២០:១–២១:២៥
ទី២ ពួកសាវ័កបានឃើញលោកយេស៊ូប្រោសមនុស្សស្លាប់ឲ្យឡើងវិញដោយផ្ទាល់ភ្នែក យ៉ាងហោចណាស់មានបីដងគឺ ដំបូងនៅក្រុងណាអ៊ីន រួចមកនៅក្រុងកាពើណិម និងចុងក្រោយនៅភូមិបេថានី។ (លូកា ៧:១១-១៧; ៨:៤៩-៥៦; យ៉ូហាន ១១:១-៤៤) ការប្រោសឲ្យរស់ឡើងវិញចុងក្រោយនោះ គឺបានរៀបរាប់ក្នុងអត្ថបទនៅទំព័រ៦ អំពីក្រុមគ្រួសារមួយដែលជាមិត្តជិតស្និទ្ធរបស់លោកយេស៊ូ។ សូមឲ្យយើងមើលថែមទៀត តើមានអ្វីដែលបានកើតឡើង?
‹ការរស់ឡើងវិញគឺដោយសារខ្ញុំ›
ម៉ាថាជាបងស្រីរបស់ឡាសា។ ឡាសាបានស្លាប់អស់រយៈពេលបួនថ្ងៃហើយ។ លោកយេស៊ូបានមានប្រសាសន៍ទៅកាន់នាងម៉ាថា ថា៖ «ប្អូនប្រុសរបស់នាងនឹងរស់ឡើងវិញ»។ ដំបូងនាងម៉ាថាមិនបានយល់ពាក្យសម្ដីរបស់លោកយេស៊ូទេ។ ដូច្នេះនាងតបឆ្លើយទៅលោកវិញថា៖ «ខ្ញុំដឹងថាគាត់នឹងរស់ឡើងវិញ»។ ប៉ុន្តែនាងគិតថានោះនឹងកើតឡើងនៅពេលមួយនាអនាគត។ ម្ល៉ោះហើយ លោកយេស៊ូមានប្រសាសន៍ថា៖ «ការរស់ឡើងវិញនិងជីវិតគឺដោយសារខ្ញុំ»។ ក្រោយពេលលោកយេស៊ូមានប្រសាសន៍ដូច្នោះហើយ នាងបានឃើញលោកយេស៊ូប្រោសប្អូនប្រុសរបស់នាងឲ្យរស់ឡើងវិញមែន។ សូមស្រមៃគិត តើនាងម៉ាថាមានអារម្មណ៍ភ្ញាក់ផ្អើលយ៉ាងណាពេលដែលឃើញបែបនោះ!—យ៉ូហាន ១១:២៣-២៥
ក្នុងអំឡុងបួនថ្ងៃដែលឡាសាបានស្លាប់ តើគាត់បានទៅកន្លែងណា? ឡាសាមិនបានប្រាប់ថា គាត់បានទៅកន្លែងណាមួយទេក្នុងរយៈពេលបួនថ្ងៃនោះ។ ឡាសាគ្មានព្រលឹងអមតៈដែលហោះឡើងទៅស្ថានសួគ៌ទេ។ ពេលលោកយេស៊ូប្រោសឡាសាឲ្យរស់ឡើងវិញ លោកមិនបានយកគាត់ចេញពីស្ថានសួគ៌ជាកន្លែងដ៏សុខសាន្តដែលនៅជិតព្រះ ដើម្បីឲ្យគាត់មកផែនដីវិញនោះទេ។ ដូច្នេះ យើងឆ្ងល់ថា ក្នុងអំឡុងបួនថ្ងៃដែលឡាសាបានស្លាប់ តើគាត់បានទៅកន្លែងណា? តាមពិត គាត់បានដេកលក់ក្នុងទីបញ្ចុះសព។—សាស្ដា ៩:៥, ១០
សូមចាំថា លោកយេស៊ូបានប្រដូចសេចក្ដីស្លាប់ទៅនឹងការដេកលក់។ អ្នកដែលដេកលក់នឹងត្រូវដាស់ពីដំណេកតាមរយៈការប្រោសឲ្យរស់ឡើងវិញ។ កំណត់ហេតុក្នុងគម្ពីរប្រាប់ថា៖ «‹ឡាសាជាសម្លាញ់របស់យើងបានដេកលក់ទៅហើយ ប៉ុន្តែខ្ញុំនឹងទៅទីនោះដើម្បីដាស់គាត់ពីដំណេក›។ ដូច្នេះ ពួកអ្នកកាន់តាមនិយាយទៅកាន់លោកថា៖ ‹លោកម្ចាស់ ប្រសិនបើគាត់បានដេកលក់ នោះគាត់នឹងជាឡើងវិញ›។ ក៏ប៉ុន្តែលោកយេស៊ូកំពុងមានប្រសាសន៍អំពីមរណភាពរបស់គាត់ តែពួកគាត់នឹកស្មានថាលោកកំពុងមានប្រសាសន៍អំពីការដេកលក់ធម្មតា។ ដូច្នេះ ពេលនោះលោកយេស៊ូមានប្រសាសន៍ប្រាប់ពួកគាត់ដោយត្រង់ថា៖ ‹ឡាសាបានស្លាប់ហើយ›»។ (យ៉ូហាន ១១:១១-១៤) តាមរយៈការប្រោសឡាសាឲ្យរស់ឡើងវិញ លោកយេស៊ូបានឲ្យគាត់មានជីវិតម្ដងទៀត ហើយគាត់បានជួបជុំជាមួយក្រុមគ្រួសារ។ នេះពិតជាអំណោយដ៏អស្ចារ្យណាស់ដែលលោកយេស៊ូបានឲ្យដល់ក្រុមគ្រួសារនោះ!
ការប្រោសឲ្យរស់ឡើងវិញដែលលោកយេស៊ូបានធ្វើនៅផែនដី បង្ហាញឲ្យឃើញទុកជាមុននូវអ្វីដែលលោកនឹងធ្វើនៅអនាគតក្នុងនាមជាស្តេចនៃរាជាណាចក្ររបស់ព្រះ។b ក្នុងអំឡុងការគ្រប់គ្រងរបស់លោកយេស៊ូពីស្ថានសួគ៌មកលើផែនដី លោកនឹងប្រោសមនុស្សស្លាប់ឲ្យរស់ឡើងវិញ ពោលគឺអស់អ្នកដែលបានដេកលក់ក្នុងទីបញ្ចុះសព។ ហេតុដូច្នោះហើយបានជាលោកមានប្រសាសន៍ថា៖ ‹ការរស់ឡើងវិញគឺដោយសារខ្ញុំ›។ សូមគិតទៅមើល តើអ្នកនឹងសប្បាយចិត្តខ្លាំងប៉ុនណា ពេលដែលឃើញអ្នកជាទីស្រឡាញ់មានជីវិតម្ដងទៀត! សូមស្រមៃគិតដែរថា តើអ្នកដែលបានត្រូវប្រោសឲ្យរស់ឡើងវិញនឹងមានអំណរខ្លាំងយ៉ាងណា!—លូកា ៨:៥៦
ចូរមានជំនឿដើម្បីបានជីវិតជារៀងរហូត
លោកយេស៊ូបានមានប្រសាសន៍ទៅនាងម៉ាថា ថា៖ «អ្នកណាដែលបង្ហាញជំនឿលើខ្ញុំ ទោះជាអ្នកនោះស្លាប់ទៅក៏ដោយ ក៏នឹងរស់ឡើងវិញ ឯអស់អ្នកណាដែលមានជីវិតរស់នៅហើយបង្ហាញជំនឿលើខ្ញុំ អ្នកទាំងនោះនឹងមិនស្លាប់សោះឡើយ»។ (យ៉ូហាន ១១:២៥, ២៦) អស់អ្នកដែលលោកយេស៊ូប្រោសឲ្យរស់ឡើងវិញក្នុងអំឡុងការសោយរាជ្យមួយពាន់ឆ្នាំ នឹងមានសេចក្ដីសង្ឃឹមទទួលជីវិតជារៀងរហូតបាន លុះត្រាតែពួកគេបង្ហាញជំនឿទៅលើលោកយ៉ាងពិតប្រាកដ។
ប្រសាសន៍របស់លោកយេស៊ូអំពីការប្រោសឲ្យរស់ឡើងវិញ គឺគួរឲ្យកត់សម្គាល់ណាស់។ បន្ទាប់ពីលោកបានមានប្រសាសន៍ដូចនោះហើយ លោកបានសួរសំណួរមួយដល់នាងម៉ាថាដែលធ្វើឲ្យនាងពិចារណាអំពីជំនឿរបស់ខ្លួន។ លោកបានសួរថា៖ «‹តើនាងជឿរឿងនេះទេ?›។ នាងនិយាយទៅកាន់លោកថា៖ ‹ចាសលោកម្ចាស់ ខ្ញុំជឿថាលោកជាគ្រិស្ត ជាបុត្រព្រះ›»។ (យ៉ូហាន ១១:២៦, ២៧) ចុះអ្នកវិញ? តើអ្នកចង់មានជំនឿទៅលើសេចក្ដីសង្ឃឹមអំពីការប្រោសឲ្យរស់ឡើងវិញដូចជំនឿរបស់នាងម៉ាថាទេ? ជំហានដំបូង អ្នកត្រូវស្គាល់ឬមានចំណេះអំពីគោលបំណងរបស់ព្រះសម្រាប់មនុស្សជាតិ។ (យ៉ូហាន ១៧:៣; ធីម៉ូថេទី១ ២:៤) ចំណេះបែបនោះអាចជួយអ្នកឲ្យមានជំនឿ។ ស្តីអំពីរឿងនោះ សូមសួរសាក្សីព្រះយេហូវ៉ាណាម្នាក់ឲ្យបង្ហាញអ្នកនូវអ្វីដែលគម្ពីរបង្រៀន។ ពួកគាត់នឹងរីករាយពិគ្រោះជាមួយអ្នកអំពីសេចក្ដីសង្ឃឹមដ៏អស្ចារ្យនៃការប្រោសឲ្យរស់ឡើងវិញ។
[កំណត់សម្គាល់]
a សូមមើលអត្ថបទ«សេចក្ដីស្លាប់មិនមែនជាទីបញ្ចប់នៃអ្វីៗទាំងអស់ទេ!»នៅទំព័រ៦ក្នុងទស្សនាវដ្ដីនេះ។
b សម្រាប់ព័ត៌មានបន្ថែមអំពីសេចក្ដីសន្យានៃការប្រោសឲ្យរស់ឡើងវិញនៅអនាគត សូមមើលជំពូកទី៧ក្នុងសៀវភៅតើព្រះគម្ពីរពិតជាបង្រៀនយ៉ាងណា? បោះពុម្ពផ្សាយដោយសាក្សីព្រះយេហូវ៉ា។ លោកអ្នកក៏អាចមើលឬថតចម្លងតាមគេហទំព័រwww.jw.org/km។
[ឃ្លាអក្សរធំនៅទំព័រ១៥]
«អ្នកណាដែលបង្ហាញជំនឿលើខ្ញុំ ទោះជាអ្នកនោះស្លាប់ទៅក៏ដោយ ក៏នឹងរស់ឡើងវិញ»។—យ៉ូហាន ១១:២៥
[រូបភាពនៅទំព័រ១៤, ១៥]
សូមគិតទៅមើល តើអ្នកនឹងសប្បាយចិត្តខ្លាំងប៉ុនណា ពេលដែលឃើញអ្នកជាទីស្រឡាញ់មានជីវិតម្ដងទៀត!