អត្ថបទអំពីក្របទស្សនាវដ្ដី | លោកអ្នកអាចមានមិត្តភាពជាមួយនឹងព្រះ
នេះជាជីវិតដ៏ល្អបំផុត
តើលោកអ្នកអាចធ្វើយ៉ាងដូចម្ដេច ដើម្បីមានចំណងមិត្តភាពជាមួយនឹងព្រះ? យើងបានពិចារណារួចហើយនូវចំណុចខាងក្រោម ដែលលោកអ្នកអាចធ្វើតាមគឺ:
ស្គាល់នាមព្រះយេហូវ៉ាហើយប្រើនាមរបស់លោក។
ប្រស្រ័យទាក់ទងជាមួយនឹងព្រះយេហូវ៉ាយ៉ាងទៀងទាត់តាមរយៈសេចក្ដីអធិដ្ឋាន និងសិក្សាគម្ពីរដែលជាបណ្ដាំរបស់លោក។
ខំព្យាយាមធ្វើអ្វីដែលនាំឲ្យព្រះយេហូវ៉ាពេញចិត្ត។
ដោយផ្អែកលើចំណុចទាំងនេះ តើលោកអ្នកអាចនិយាយថា លោកអ្នកកំពុងធ្វើអស់ពីសមត្ថភាពដើម្បីមានចំណងមិត្តភាពជាមួយនឹងព្រះឬទេ? តើមានចំណុចណាខ្លះដែលលោកអ្នកគិតថាអាចធ្វើឲ្យល្អជាងឬទេ? ពិតមែនការធ្វើដូច្នេះ តម្រូវឲ្យលោកអ្នកព្យាយាមយ៉ាងខ្លាំង ប៉ុន្តែសូមគិតអំពីប្រយោជន៍ដែលលោកអ្នកនឹងទទួលបាន។
ជេនអេហ្វឺដែលមកពីសហរដ្ឋអាម៉េរិកបាននិយាយថា៖ «ពេលយើងខំប្រឹងអស់ពីសមត្ថភាពដើម្បីឲ្យមានចំណងមិត្តភាពជាមួយនឹងព្រះ យើងនឹងទទួលពរជាច្រើនដូចជា: យើងមានទំនុកចិត្តទៅលើព្រះថែមទៀត យើងកាន់តែយល់ច្បាស់អំពីបុគ្គលិកលក្ខណៈរបស់លោក ហើយសំខាន់បំផុត យើងស្រឡាញ់ព្រះកាន់តែខ្លាំងឡើង។ នេះជាជីវិតដ៏ល្អបំផុត!»។
បើលោកអ្នកចង់មានចំណងមិត្តភាពជាមួយនឹងព្រះ សាក្សីព្រះយេហូវ៉ារីករាយបង្រៀនលោកអ្នកពីគម្ពីរដោយឥតគិតថ្លៃ។ បន្ថែមទៀត សាក្សីព្រះយេហូវ៉ាសូមអញ្ជើញលោកអ្នកឲ្យចូលរួមកិច្ចប្រជុំនៅឯសាលប្រជុំក្នុងតំបន់លោកអ្នក។ នៅទីនោះលោកអ្នកអាចសេពគប់មនុស្សដែលកំពុងមានចំណងមិត្តភាពជាមួយនឹងព្រះ។a ពេលលោកអ្នកធ្វើដូច្នេះ នោះលោកអ្នកនឹងមានអារម្មណ៍ដូចអ្នកតែងទំនុកតម្កើងដែលថា៖ «ឯទូលបង្គំ ដែលទូលបង្គំចូលទៅជិតព្រះ នោះជាការល្អដល់ទូលបង្គំ»។—ទំនុកតម្កើង ៧៣:២៨
a ដើម្បីស្នើសុំរៀនគម្ពីរឬរកសាលប្រជុំដែលនៅក្នុងតំបន់របស់លោកអ្នក សូមសួរអ្នកដែលស្នើផ្ដល់ទស្សនាវដ្ដីនេះ ឬសូមចូលគេហទំព័រwww.jw.org/km ហើយចុចទាក់ទងយើងនៅខាងក្រោមទំព័រនោះ។