ប្ដីទាំងឡាយ សូមបង្កើតបរិយាកាសសុខសាន្តនៅក្នុងក្រុមគ្រួសារ
តើប្ដីគួរធ្វើឲ្យប្រពន្ធរបស់គាត់មានអារម្មណ៍យ៉ាងណា? តាំងពីតូចមក មនុស្សជាច្រើនបានត្រូវចិញ្ចឹមអប់រំឲ្យគិតថា តួនាទីចម្បងរបស់ប្ដីគឺធ្វើឲ្យក្រុមគ្រួសារមានជីវភាពធូរធារ។ ប៉ុន្តែ ទោះជាក្នុងក្រុមគ្រួសារដែលមានទ្រព្យសម្បត្ដិច្រើនក៏ដោយ ក៏ប្រពន្ធខ្លះនៅតែមិនមានសេចក្ដីសុខក្នុងចិត្ត ហើយថែមទាំងមានអារម្មណ៍ភ័យខ្លាចទៀតផង។ ជាឧទាហរណ៍ ប្រពន្ធម្នាក់ឈ្មោះរ៉ូសាដែលជាជនជាតិអេស្ប៉ាញ បាននិយាយអំពីប្ដីរបស់គាត់ថា៖ «នៅមុខគេ ប្ដីខ្ញុំជាមនុស្សរួសរាយ តែពេលនៅផ្ទះ គាត់ជាមនុស្សគំរោះគំរើយទៅវិញ»។ ប្រពន្ធម្នាក់ទៀតឈ្មោះជយដែលមកពីប្រទេសនីហ្សេរីយ៉ា ប្រាប់ថា៖ «ពេលខ្ញុំមិនយល់ស្របនឹងប្ដីរបស់ខ្ញុំ គាត់នឹងនិយាយថា៖ ‹ឯងត្រូវតែធ្វើតាមអ្វីដែលខ្ញុំប្រាប់ ព្រោះខ្ញុំជាមេគ្រួសារ›»។
តើប្ដីអាចបំពេញភារកិច្ចរបស់គាត់ជាមេគ្រួសារដោយសេចក្ដីស្រឡាញ់យ៉ាងដូចម្ដេច? តើប្ដីត្រូវធ្វើអ្វីខ្លះដើម្បីឲ្យមានបរិយាកាសសុខសាន្តនៅក្នុងក្រុមគ្រួសារ?
តើគម្ពីរចែងយ៉ាងណាអំពីអំណាចរបស់ប្ដី?
តាមទស្សនៈព្រះ ប្ដីនិងប្រពន្ធមានតម្លៃស្មើគ្នា ទោះជាយ៉ាងនោះក៏ដោយ គម្ពីរចែងថា ប្ដីនិងប្រពន្ធមានតួនាទីផ្សេងគ្នានៅក្នុងគ្រួសារ។ ក្នុងខគម្ពីររ៉ូម ៧:២រៀបរាប់ថា ស្ត្រីដែលរៀបការហើយនៅក្រោម«ច្បាប់របស់ប្ដី»។ ជាឧទាហរណ៍ ក្នុងស្ថាប័ននីមួយៗមានអ្នកត្រួតពិនិត្យម្នាក់ដែលបានត្រូវតែងតាំងដើម្បីមើលការខុសត្រូវកិច្ចការផ្សេងៗ។ ស្រដៀងគ្នាដែរ ព្រះក៏បានតែងតាំងប្ដីឲ្យធ្វើជាប្រមុខរបស់ប្រពន្ធដែរ។ (កូរិនថូសទី១ ១១:៣) ដូច្នេះ ប្ដីគួរនាំមុខក្នុងក្រុមគ្រួសាររបស់គាត់។
ក្នុងនាមជាប្ដី តើអ្នកគួរប្រើអំណាចដែលអ្នកទទួលពីព្រះយ៉ាងដូចម្ដេច? គម្ពីរចែងថា៖ «ចូរស្រឡាញ់ប្រពន្ធជាដរាប ដូចគ្រិស្តបានស្រឡាញ់ក្រុមជំនុំ»។ (អេភេសូរ ៥:២៥) ការពិត លោកយេស៊ូគ្រិស្តមិនដែលរៀបការទេ ក៏ប៉ុន្តែ គំរូរបស់លោកអាចជួយអ្នកឲ្យក្លាយទៅជាប្ដីដ៏ល្អម្នាក់។ សូមឲ្យយើងពិចារណាគំរូទាំងនោះ។
លោកយេស៊ូជាគំរូដ៏ល្អឥតខ្ចោះសម្រាប់ប្ដីទាំងឡាយ
លោកយេស៊ូផ្ដល់កម្លាំងចិត្តដល់អ្នកឯទៀតនិងសម្រាលបន្ទុកពួកគេ។ ចំពោះអស់អ្នកដែលត្រូវគេធ្វើទុក្ខនិងមានបន្ទុកធ្ងន់ដោយបញ្ហាផ្ទាល់ខ្លួន លោកយេស៊ូបានសន្យាថា៖ «ចូរមកឯខ្ញុំចុះ ហើយខ្ញុំនឹងធ្វើឲ្យអ្នកមានកម្លាំងចិត្តឡើងវិញ»។ (ម៉ាថាយ ១១:២៨, ២៩) ជាញឹកញយ លោកបំបាត់ការឈឺចាប់របស់ពួកគេ ហើយជួយពួកគេឲ្យមានចំណងមិត្តភាពជិតស្និទ្ធជាមួយនឹងព្រះយេហូវ៉ា។ ហេតុនេះហើយ មនុស្សជាច្រើនចង់ចូលទៅជិតលោកយេស៊ូ ដោយសារពួកគេជឿជាក់ថា លោកនឹងសម្រាលបន្ទុករបស់ពួកគេ!
របៀបដែលប្ដីអាចយកតម្រាប់លោកយេស៊ូ។ សូមគិតអំពីរបៀបដែលអ្នកអាចជួយប្រពន្ធធ្វើកិច្ចការផ្ទះ។ ប្រពន្ធខ្លះមានអារម្មណ៍ដូចរ៉ូសាដែរ ដែលត្អូញត្អែរថា៖ «ចំពោះប្ដីខ្ញុំ ខ្ញុំគ្រាន់តែជាខ្ញុំបម្រើរបស់គាត់ប៉ុណ្ណោះ»។ ផ្ទុយទៅវិញ បុរសម្នាក់ឈ្មោះខ្វេគូ ដែលមានសុភមង្គលក្នុងចំណងអាពាហ៍ពិពាហ៍ និយាយថា៖ «ខ្ញុំច្រើនតែសួរប្រពន្ធខ្ញុំអំពីអ្វីដែលខ្ញុំអាចជួយនាង។ ដោយសារខ្ញុំស្រឡាញ់នាង ខ្ញុំតែងតែខំជួយនាងធ្វើកិច្ចការនៅក្នុងផ្ទះ»។
លោកយេស៊ូចេះគិតនិងយល់អារម្មណ៍របស់អ្នកឯទៀត។ ស្ត្រីក្រីក្រម្នាក់មានជំងឺដែលធ្វើឲ្យគាត់រងទុក្ខអស់រយៈពេល១២ឆ្នាំ។ ស្ត្រីនេះបានឮថាលោកយេស៊ូមានឫទ្ធានុភាពធ្វើការអស្ចារ្យ។ ដូច្នេះ គាត់នឹកក្នុងចិត្ត «ដោយពោលថា៖ ‹បើខ្ញុំគ្រាន់តែពាល់សម្លៀកបំពាក់ក្រៅរបស់លោក នោះខ្ញុំនឹងជា›»។ គាត់គិតត្រូវមែន ព្រោះក្រោយពីគាត់ចូលទៅជិតលោកយេស៊ូ រួចពាល់សម្លៀកបំពាក់ក្រៅរបស់លោក គាត់បានជាសះស្បើយភ្លាម។ ទោះបីអ្នកដែលបានឃើញគាត់ប្រហែលចាត់ទុកថាគាត់បំពានច្បាប់ក៏ដោយ តែលោកយេស៊ូបានយល់ថា គាត់ពិតជាចង់ជាសះស្បើយ។a ពេលនោះ លោកបានមានប្រសាសន៍យ៉ាងសប្បុរសទៅគាត់ថា៖ «កូនស្រីអើយ . . . សូមឲ្យនាងបានជាសះស្បើយពីជំងឺដែលបានធ្វើឲ្យរងទុក្ខ»។ លោកយេស៊ូមិនបានធ្វើឲ្យគាត់អាម៉ាស់មុខ ឬស្តីបន្ទោសគាត់ឡើយ។ ផ្ទុយទៅវិញ លោកយល់ស្ថានភាពជំងឺរបស់គាត់។ ម្ល៉ោះហើយ លោកបានបង្ហាញថាលោកជាអ្នកដែលចេះយល់អារម្មណ៍អ្នកឯទៀត។—ម៉ាកុស ៥:២៥-៣៤
របៀបដែលប្ដីអាចយកតម្រាប់លោកយេស៊ូ។ ពេលប្រពន្ធរបស់អ្នកមិនស្រួលខ្លួន សូមបង្ហាញការយកចិត្តទុកដាក់ចំពោះនាងថែមទៀត ហើយសូមបង្ហាញចិត្តអត់ធ្មត់។ សូមព្យាយាមយល់អារម្មណ៍និងប្រតិកម្មរបស់នាង។ ជាឧទាហរណ៍ រីខាដូបានរៀបរាប់ថា៖ «ពេលដែលខ្ញុំមានអារម្មណ៍ថាប្រពន្ធរបស់ខ្ញុំឆាប់ខឹង ខ្ញុំព្យាយាមមិននិយាយអ្វីដែលធ្វើឲ្យនាងទាស់ចិត្តទេ»។
លោកយេស៊ូប្រាស្រ័យទាក់ទងជាមួយនឹងពួកអ្នកកាន់តាមលោក។ លោកយេស៊ូបាននិយាយអស់ពីចិត្តប្រាប់ពួកអ្នកកាន់តាមដែលជាមិត្តសម្លាញ់របស់លោក។ លោកបានមានប្រសាសន៍ថា៖ «អ្វីៗទាំងអស់ដែលខ្ញុំបានឮពីបិតារបស់ខ្ញុំ ខ្ញុំបានប្រាប់អ្នករាល់គ្នា»។ (យ៉ូហាន ១៥:១៥) មានពេលខ្លះលោកយេស៊ូចង់នៅម្នាក់ឯងដើម្បីរំពឹងគិតនិងអធិដ្ឋានទៅព្រះ។ ប៉ុន្តែ ជារឿយៗលោកប្រាប់អ្នកកាន់តាមអំពីអារម្មណ៍ជ្រាលជ្រៅរបស់លោក។ ជាឧទាហរណ៍ នៅយប់មុនថ្ងៃដែលគេប្រហារជីវិតលោកជាឧក្រិដ្ឋជន លោកប្រាប់ពួកអ្នកកាន់តាមត្រង់ៗថា លោក«កើតទុក្ខស្ទើរនឹងស្លាប់»។ (ម៉ាថាយ ២៦:៣៨) ម្យ៉ាងទៀត សូម្បីតែពួកគាត់បានធ្វើឲ្យលោកយេស៊ូខកចិត្តក្ដី លោកមិនឈប់និយាយជាមួយនឹងពួកគាត់ឡើយ។—ម៉ាថាយ ២៦:៤០, ៤១
របៀបដែលប្ដីអាចយកតម្រាប់លោកយេស៊ូ។ សូមប្រាប់ប្រពន្ធរបស់អ្នកថា អ្នកកំពុងគិតអ្វីនិងមានអារម្មណ៍យ៉ាងណា។ ប្រពន្ធម្នាក់ប្រហែលជាត្អូញត្អែរថា ប្ដីគាត់ស្រួលនិយាយជាមួយនឹងអ្នកដទៃ ប៉ុន្តែពេលនៅផ្ទះ គាត់មិននិយាយអ្វីទេ។ ផ្ទុយទៅវិញ ប្រពន្ធម្នាក់ឈ្មោះអាណា រៀបរាប់អំពីអារម្មណ៍ដែលនាងមាន ពេលប្ដីនាងនិយាយអស់ពីចិត្ត។ អាណានិយាយថា៖ «ខ្ញុំមានអារម្មណ៍ថា គាត់ពិតជាស្រឡាញ់ខ្ញុំណាស់ ហើយខ្ញុំជិតស្និទ្ធនឹងគាត់ទៀតផង»។
ប្ដីខ្លះដាក់ទោសប្រពន្ធដោយមិននិយាយរកនាង។ ប្រពន្ធម្នាក់បាននិយាយថា៖ «ពេលប្ដីខ្ញុំខឹងខ្ញុំ គាត់មិននិយាយរកខ្ញុំអស់ជាច្រើនថ្ងៃ។ គាត់ធ្វើឲ្យខ្ញុំមានអារម្មណ៍ថាខ្ញុំជាអ្នកខុស ហើយធ្វើឲ្យគិតថាខ្ញុំគ្មានតម្លៃទេ»។ ចំណែកឯប្ដីម្នាក់ឈ្មោះអេដវីនបានព្យាយាមធ្វើតាមគំរូរបស់លោកយេស៊ូ។ គាត់បាននិយាយថា៖ «ពេលដែលប្រពន្ធធ្វើឲ្យខ្ញុំទើសចិត្ត ខ្ញុំមិនមានប្រតិកម្មភ្លាមៗទេ តែខ្ញុំរកពេលល្អជាងដើម្បីយើងអាចនិយាយអំពីបញ្ហានោះ ហើយដោះស្រាយជាមួយគ្នា»។
ស្ត្រីម្នាក់ឈ្មោះជយដែលបានត្រូវរៀបរាប់នៅខាងដើម ឃើញថាប្ដីគាត់បានកែប្រែជាច្រើន តាំងពីគាត់ចាប់ផ្ដើមរៀនគម្ពីរជាមួយនឹងសាក្សីព្រះយេហូវ៉ា។ ជយបានប្រាប់ថា៖ «ប្ដីខ្ញុំ គាត់ល្អជាងមុន ហើយគាត់ខំធ្វើតាមគំរូលោកយេស៊ូ ដោយបង្ហាញសេចក្ដីស្រឡាញ់ច្រើនជាងចំពោះខ្ញុំ»។ នៅសព្វថ្ងៃនេះ គូអាពាហ៍ពិពាហ៍រាប់លាននាក់ក៏ទទួលប្រយោជន៍ពីការណែនាំក្នុងគម្ពីរដែរ។ ចុះលោកអ្នកវិញ តើលោកអ្នកចង់ទទួលប្រយោជន៍ពីការណែនាំក្នុងគម្ពីរដែរឬទេ? លោកអ្នកអាចស្នើសុំរៀនគម្ពីរដោយឥតគិតថ្លៃជាមួយនឹងសាក្សីព្រះយេហូវ៉ា។
a យោងទៅតាមច្បាប់ម៉ូសេ ស្ថានភាពរបស់ស្ត្រីនេះធ្វើឲ្យគាត់មិនស្អាតស្អំ ហើយអ្នកណាដែលគាត់ប៉ះនឹងចាត់ទុកថាមិនស្អាតស្អំដែរ។—លេវីវិន័យ ១៥:១៩, ២៥