អត្ថបទអំពីក្របទស្សនាវដ្ដី
ហេតុអ្វីលោកយេស៊ូរងការឈឺចាប់ហើយស្លាប់?
«ដូចភាពខុសឆ្គងបានចូលក្នុងពិភពលោកតាមរយៈបុរសតែម្នាក់[អាដាម] ហើយសេចក្ដីស្លាប់បានចូលតាមរយៈភាពខុសឆ្គង»។—រ៉ូម ៥:១២
តើលោកអ្នកនឹងឆ្លើយយ៉ាងណា? បើគេសួរលោកអ្នកថា «តើអ្នកចង់រស់ជារៀងរហូតទេ?»។ មនុស្សភាគច្រើនប្រហែលជាឆ្លើយថា «ចង់» ប៉ុន្តែពួកគេគិតថារឿងនោះមិនអាចទៅរួចទេ។ ពួកគេនិយាយថាការស្លាប់ជារឿងធម្មតានៃជីវិត ដែលមនុស្សទាំងអស់មិនអាចគេចផុតបាន។
ប៉ុន្តែ ចុះយ៉ាងណាបើគេសួរលោកអ្នកថា «តើអ្នកចង់ស្លាប់ទេ?»។ តាមធម្មតាមនុស្សភាគច្រើននឹងឆ្លើយថា «អត់ទេ»។ ដូច្នេះ តើចម្លើយទាំងនោះបង្ហាញអំពីអ្វី? នេះបង្ហាញថាតាមធម្មតាមនុស្សយើងមានសេចក្ដីប៉ងប្រាថ្នាចង់រស់ជារៀងរហូត ទោះជាយើងជួបទុក្ខលំបាកយ៉ាងណាក្ដី។ គម្ពីរប្រាប់ថាព្រះបានបង្កើតមនុស្សជាតិឲ្យមានបំណងប្រាថ្នាចង់រស់រហូត ដោយចែងថា៖ «ទ្រង់ក៏ធ្វើឲ្យចិត្តគេសង្ឃឹមដល់អស់កល្បទៅមុខ»។—សាស្ដា ៣:១១
ក៏ប៉ុន្តែ ហេតុការណ៍ពិតនោះគឺថាមនុស្សមិនអាចរស់ជារៀងរហូតទេ។ ហេតុអ្វីដូច្នេះ? តើព្រះបានធ្វើអ្វីដើម្បីដោះស្រាយបញ្ហានេះ? គម្ពីរមានចម្លើយដ៏គួរឲ្យលើកទឹកចិត្ត ហើយប្រាប់អំពីមូលហេតុដែលលោកយេស៊ូបានរងការឈឺចាប់និងស្លាប់។
ហេតុអ្វីមនុស្សស្លាប់?
បីជំពូកដំបូងនៃសៀវភៅលោកុប្បត្តិក្នុងគម្ពីរប្រាប់យើងថា ព្រះបានឲ្យអាដាមនិងអេវ៉ាដែលជាប្ដីប្រពន្ធដំបូងមានឱកាសទទួលបានជីវិតដែលគ្មានទីបញ្ចប់ ហើយប្រាប់ពួកគេនូវអ្វីដែលត្រូវធ្វើដើម្បីទទួលបានជីវិតនោះ។ រួចមក កំណត់ហេតុនោះក៏រៀបរាប់អំពីរបៀបដែលពួកគេឈប់ស្ដាប់បង្គាប់ព្រះ ហេតុនេះពួកគេក៏បាត់បង់ឱកាសនោះ។ អ្នកខ្លះឃើញថាកំណត់ហេតុនេះគ្មានព័ត៌មានល្អិតល្អន់ទេ រហូតដល់ពួកគេគិតថានេះគឺជារឿងព្រេងសុទ្ធសាធ។ ប៉ុន្តែ ដូចសៀវភៅដំណឹងល្អដែរ សៀវភៅលោកុប្បត្តិមានលក្ខណៈផ្សេងៗដែលបញ្ជាក់ថាកំណត់ហេតុទាំងនេះគឺជារឿងពិតនិងត្រឹមត្រូវតាមប្រវត្ដិសាស្ត្រ។a
តើការមិនស្ដាប់បង្គាប់របស់អាដាមនាំឲ្យមានលទ្ធផលអ្វី? គម្ពីរប្រាប់ថា៖ «ភាពខុសឆ្គងបានចូលក្នុងពិភពលោកតាមរយៈបុរសតែម្នាក់[អាដាម] ហើយសេចក្ដីស្លាប់បានចូលតាមរយៈភាពខុសឆ្គង ដូច្នេះ សេចក្ដីស្លាប់បានឆ្លងរាលដាលដល់មនុស្សទាំងអស់ ពីព្រោះពួកគេទាំងអស់គ្នាជាអ្នកធ្វើខុស»។ (រ៉ូម ៥:១២) ដោយសារអាដាមមិនស្ដាប់បង្គាប់ព្រះ នោះគាត់មានភាពខុសឆ្គង។ ដូច្នេះ គាត់បាត់បង់ឱកាសទទួលជីវិតដែលគ្មានទីបញ្ចប់ ហើយទីបំផុតគាត់បានស្លាប់។ ដោយសារយើងជាកូនចៅរបស់អាដាម យើងបានទទួលភាពខុសឆ្គងជាមត៌កពីគាត់។ ជាលទ្ធផល យើងឈឺ ចាស់ និងស្លាប់។ ការពន្យល់អំពីមូលហេតុដែលមនុស្សយើងស្លាប់ គឺស្របគ្នានឹងអ្វីដែលអ្នកវិទ្យាសាស្ត្រពន្យល់អំពីហ្សែននៅសព្វថ្ងៃនេះ។ ក៏ប៉ុន្តែ តើព្រះបានធ្វើអ្វីដើម្បីដោះស្រាយបញ្ហានេះ?
តើព្រះបានធ្វើអ្វី?
ព្រះបានរៀបចំថ្លៃលោះឬទិញមកវិញនូវអ្វីដែលអាដាមបានធ្វើឲ្យបាត់បង់សម្រាប់កូនចៅរបស់គាត់ ពោលគឺឱកាសទទួលបានជីវិតដែលគ្មានទីបញ្ចប់។ តើព្រះបានធ្វើយ៉ាងណាដើម្បីសម្រេចគោលបំណងរបស់លោក?
ក្នុងគម្ពីរនៅសៀវភៅ រ៉ូម ៦:២៣ ចែងថា៖ «ប្រាក់ឈ្នួលដែលភាពខុសឆ្គងបើកឲ្យ គឺជាសេចក្ដីស្លាប់»។ នេះមានន័យថាសេចក្ដីស្លាប់គឺជាលទ្ធផលនៃភាពខុសឆ្គង។ អាដាមមានភាពខុសឆ្គង ដូច្នេះគាត់ស្លាប់។ ស្រដៀងគ្នាដែរ យើងមានភាពខុសឆ្គង ដូច្នេះយើងក៏ទទួលប្រាក់ឈ្នួលនៃភាពខុសឆ្គងដែរ ពោលគឺសេចក្ដីស្លាប់។ ប៉ុន្តែ នេះមិនមែនដោយសារកំហុសរបស់យើងទេ តែដោយសារយើងកើតមកមានភាពខុសឆ្គងស្រាប់។ យ៉ាងណាក្ដី ព្រះដែលប្រកបដោយសេចក្ដីស្រឡាញ់បានចាត់លោកយេស៊ូដែលជាបុត្ររបស់លោក ឲ្យមកទទួល‹ប្រាក់ឈ្នួលនៃភាពខុសឆ្គង›ជំនួសយើង។ តើនេះកើតឡើងតាមរបៀបណា?
មរណភាពរបស់លោកយេស៊ូបើកឱកាស ឲ្យយើងមានសុភមង្គលនិងជីវិតដែលគ្មានទីបញ្ចប់
អាដាមជាបុរសម្នាក់ដែលមានភាពល្អឥតខ្ចោះ តែដោយសារគាត់មិនបានស្ដាប់បង្គាប់ នោះគាត់បាននាំឲ្យយើងមានភាពខុសឆ្គងនិងសេចក្ដីស្លាប់។ ដូច្នេះ យើងត្រូវការបុរសល្អឥតខ្ចោះម្នាក់ទៀតដែលស្ដាប់បង្គាប់រហូតដល់ស្លាប់ ទើបអាចរំដោះយើងពីឈ្នួលនៃភាពខុសឆ្គងបាន។ គម្ពីរពន្យល់ថា៖ «ដូចមនុស្សជាច្រើនបានទៅជាមនុស្សមានភាពខុសឆ្គង ដោយសារបុរសម្នាក់នោះមិនបានស្ដាប់បង្គាប់ មនុស្សជាច្រើននឹងទៅជាមនុស្សសុចរិត ដោយសារមនុស្សម្នាក់នេះបានស្ដាប់បង្គាប់»។ (រ៉ូម ៥:១៩) លោកយេស៊ូគឺជា«មនុស្សម្នាក់នេះ»។ លោកបានចាកចេញពីស្ថានសួគ៌ ហើយក្លាយជាបុរសល្អឥតខ្ចោះម្នាក់b រួចមកលោកស្លាប់ជំនួសយើងទាំងអស់គ្នា។ ជាលទ្ធផល ព្រះអាចចាត់ទុកយើងជាមនុស្សសុចរិត ហើយផ្ដល់ឱកាសឲ្យយើងទទួលជីវិតដែលគ្មានទីបញ្ចប់។
ហេតុអ្វីលោកយេស៊ូរងការឈឺចាប់ហើយស្លាប់?
ក៏ប៉ុន្តែ ហេតុអ្វីចាំបាច់ឲ្យលោកយេស៊ូស្លាប់ដើម្បីសម្រេចកិច្ចការនេះ? តើព្រះមិនអាចចេញបង្គាប់ឲ្យកូនចៅរបស់អាដាមរស់ជារៀងរហូតបានទេឬ? លោកប្រាកដជាមានសិទ្ធិធ្វើដូច្នេះមែន។ ប៉ុន្តែ បើព្រះធ្វើដូច្នេះ នឹងនាំឲ្យប្រឆាំងច្បាប់ដែលលោកប្រាប់ថាឈ្នួលដែលភាពខុសឆ្គងបើកឲ្យគឺជាសេចក្ដីស្លាប់។ ច្បាប់នោះគឺសំខាន់ ហើយមិនអាចលុបចោលឬផ្លាស់ប្ដូរបានទេ ពីព្រោះច្បាប់នេះជាគោលនៃសេចក្ដីយុត្ដិធម៌ពិត។—ទំនុកតម្កើង ៣៧:២៨
បើព្រះមិនបន្តធ្វើតាមសេចក្ដីយុត្ដិធម៌របស់លោកក្នុងរឿងនេះទេ មនុស្សប្រហែលជាគិតថាលោកក៏នឹងមិនធ្វើដូច្នេះក្នុងរឿងផ្សេងទៀតដែរ។ ជាឧទាហរណ៍ តើលោកនឹងប្រព្រឹត្តដោយយុត្ដិធម៌ឬទេ បើលោកសម្រេចថាកូនចៅណាខ្លះរបស់អាដាមអាចទទួលបានជីវិតដែលគ្មានទីបញ្ចប់? តើយើងអាចទុកចិត្តថាលោកធ្វើតាមពាក្យសន្យារបស់លោកឬទេ? ប៉ុន្តែ ដោយសារព្រះធ្វើតាមសេចក្ដីយុត្ដិធម៌របស់លោកដើម្បីសង្គ្រោះយើង នេះជាការធានាថាព្រះតែងតែធ្វើអ្វីដែលត្រឹមត្រូវជានិច្ច។
ដោយសារលោកយេស៊ូស្លាប់ដើម្បីជាគ្រឿងបូជា នោះព្រះបានបើកឱកាសឲ្យមនុស្សជាតិមានសេចក្ដីសង្ឃឹមទទួលជីវិតដែលគ្មានទីបញ្ចប់នៅផែនដីដែលជាសួនឧទ្យាន។ សូមកត់សម្គាល់ប្រសាសន៍របស់លោកយេស៊ូដែលបានត្រូវកត់ទុកនៅ យ៉ូហាន ៣:១៦ ថា៖ «ព្រះស្រឡាញ់ពិភពលោកដល់ម្ល៉េះបានជាលោកបានឲ្យបុត្រតែមួយរបស់លោក ដើម្បីឲ្យអស់អ្នកដែលបង្ហាញជំនឿលើបុត្រនោះអាចមានជីវិតដែលគ្មានទីបញ្ចប់ ហើយមិនត្រូវបំផ្លាញឡើយ»។ យ៉ាងនេះ មរណភាពរបស់លោកយេស៊ូមិនគ្រាន់តែបញ្ជាក់ថាព្រះធ្វើតាមសេចក្ដីយុត្ដិធម៌ប៉ុណ្ណោះទេ តែសំខាន់ជាងនោះទៅទៀត គឺលោកមានសេចក្ដីស្រឡាញ់ដ៏ធំធេងចំពោះមនុស្សយើង។
ប៉ុន្តែ ហេតុអ្វីលោកយេស៊ូចាំបាច់រងទុក្ខវេទនាហើយស្លាប់តាមរបៀបដែលឈឺចាប់យ៉ាងខ្លាំងដូចដែលបានរៀបរាប់ក្នុងសៀវភៅដំណឹងល្អ? ដោយសារលោកយេស៊ូសុខចិត្តទទួលការល្បងលដ៏ខ្លាំងបំផុត ហើយនៅតែរក្សាភាពស្មោះត្រង់ នោះលោកបង្ហាញថាការចោទប្រកាន់ទាំងអស់របស់មេកំណាចគឺមិនពិតឡើយដែលថា មនុស្សនឹងមិនអាចរក្សាភក្ដីភាពចំពោះព្រះបានទេពេលដែលពួកគេជួបនឹងទុក្ខលំបាក។ (យ៉ូប ២:៤, ៥) ការចោទប្រកាន់របស់មេកំណាចសាថានមើលទៅហាក់ដូចជាត្រឹមត្រូវ ក្រោយពីវាបាននាំឲ្យអាដាមដែលជាមនុស្សល្អឥតខ្ចោះធ្វើអំពើខុសឆ្គង។ ប៉ុន្តែ លោកយេស៊ូដែលមានភាពល្អឥតខ្ចោះដូចអាដាមនៅតែស្ដាប់បង្គាប់ព្រះជានិច្ច ទោះជាលោករងការឈឺចាប់យ៉ាងខ្លាំងក៏ដោយ។ (កូរិនថូសទី១ ១៥:៤៥) ដោយធ្វើដូច្នេះ លោកយេស៊ូបង្ហាញថាអាដាមក៏អាចស្ដាប់បង្គាប់ព្រះបានដែរ បើគាត់ជ្រើសរើសស្ដាប់បង្គាប់លោក។ ដោយសារលោកយេស៊ូបានស៊ូទ្រាំនឹងទុក្ខលំបាក នោះលោកបានទុកគំរូសម្រាប់យើង។ (ពេត្រុសទី១ ២:២១) ព្រះបានផ្ដល់រង្វាន់ឲ្យលោកយេស៊ូមានជីវិតអមតៈនៅស្ថានសួគ៌ ដោយសារលោកយេស៊ូស្ដាប់បង្គាប់ព្រះយ៉ាងល្អឥតខ្ចោះ។
តើលោកអ្នកអាចទទួលប្រយោជន៍អ្វីខ្លះ?
លោកយេស៊ូពិតជាបានស្លាប់ជំនួសយើងមែន។ នេះបានបើកឱកាសឲ្យយើងអាចទទួលជីវិតដែលគ្មានទីបញ្ចប់។ តើលោកអ្នកចង់រស់នៅជារៀងរហូតឬទេ? ដើម្បីបានជីវិតដូចនោះ លោកយេស៊ូបានប្រាប់នូវអ្វីដែលយើងត្រូវធ្វើ ដោយមានប្រសាសន៍ថា៖ «ដើម្បីបានជីវិតដែលគ្មានទីបញ្ចប់ ពួកគាត់ត្រូវស្គាល់លោកដែលជាព្រះពិតតែមួយឲ្យបានច្បាស់ ព្រមទាំងយេស៊ូគ្រិស្ត ដែលលោកបានចាត់ឲ្យមក»។—យ៉ូហាន ១៧:៣
អ្នកបោះពុម្ពសៀវភៅនេះអញ្ជើញលោកអ្នកឲ្យរៀនថែមទៀតអំពីព្រះយេហូវ៉ាដែលជាព្រះពិតតែមួយ និងអំពីលោកយេស៊ូគ្រិស្តដែលជាបុត្ររបស់លោក។ សាក្សីព្រះយេហូវ៉ាក្នុងតំបន់លោកអ្នក រីករាយជួយបង្រៀនលោកអ្នក។ ម្យ៉ាងទៀត លោកអ្នកក៏អាចទទួលព័ត៌មានដ៏មានប្រយោជន៍ថែមទៀតតាមរយៈគេហទំព័ររបស់យើងwww.jw.org/km។
a សូមមើលទស្សនាវដ្ដីប៉មយាម ថ្ងៃទី១ ខែកុម្ភៈ ឆ្នាំ២០១១ ទំព័រ៤-៩ ចំណងជើងថា«តើពិតជាមានសួនច្បារអេដែនមែនឬ?» បោះពុម្ពផ្សាយដោយសាក្សីព្រះយេហូវ៉ា។
b ព្រះបានបញ្ជូនជីវិតបុត្ររបស់លោកពីស្ថានសួគ៌ឲ្យមកកើតក្នុងផ្ទៃរបស់នាងម៉ារៀ ហើយលោកបានប្រើសកម្មពលបរិសុទ្ធរបស់លោកដើម្បីការពារលោកយេស៊ូមិនឲ្យទទួលភាពមិនល្អឥតខ្ចោះពីម៉ារៀ។—លូកា ១:៣១, ៣៥