អត្ថបទសិក្សា ១៧
ចូរទទួលយកជំនួយពីព្រះយេហូវ៉ាដើម្បីទប់ទល់នឹងពួកវិញ្ញាណទុច្ចរិត
«យើងមានការប្រយុទ្ធ . . . [នឹង]ពួកវិញ្ញាណទុច្ចរិតនៅស្ថានសួគ៌»។—អេភ. ៦:១២
ចម្រៀងលេខ៥៥ កុំខ្លាចពួកគេឡើយ!
សេចក្ដីសង្ខេបa
១. ដូចដែលបានពន្យល់នៅអេភេសូរ ៦:១០-១៣ តើព្រះយេហូវ៉ាបង្ហាញការយកចិត្តទុកដាក់ចំពោះយើងតាមរបៀបណា? សូមពន្យល់។
របៀបដ៏កក់ក្ដៅមួយដែលព្រះយេហូវ៉ាបង្ហាញការយកចិត្តទុកដាក់ចំពោះយើងជាអ្នកបម្រើលោក គឺដោយជួយយើងឲ្យទប់ទល់នឹងសត្រូវរបស់យើង។ សត្រូវដ៏ធំបំផុតរបស់យើងគឺសាថាននិងពួកវិញ្ញាណកំណាច។ ព្រះយេហូវ៉ាព្រមានយើងអំពីសត្រូវទាំងនេះ ហើយលោកផ្ដល់ឲ្យយើងនូវអ្វីដែលយើងត្រូវការដើម្បីទប់ទល់នឹងពួកវា។ (សូមអាន អេភេសូរ ៦:១០-១៣) ពេលយើងព្រមទទួលជំនួយពីព្រះយេហូវ៉ា និងពឹងផ្អែកទាំងស្រុងលើលោក យើងអាចតស៊ូនឹងមេកំណាចដោយជោគជ័យ។ យើងអាចមានទំនុកចិត្តដូចសាវ័កប៉ូលដែលបានសរសេរថា៖ «ប្រសិនបើព្រះគាំទ្រយើង តើអ្នកណានឹងប្រឆាំងយើងបាន?»។—រ៉ូម ៨:៣១
២. តើយើងនឹងពិចារណាអ្វីក្នុងអត្ថបទនេះ?
២ ក្នុងនាមជាគ្រិស្តសាសនិកពិត យើងមិនផ្ដោតអារម្មណ៍ទៅលើសាថាននិងពួកវិញ្ញាណកំណាចទេ។ យើងផ្ដោតអារម្មណ៍ទៅលើការរៀនអំពីព្រះយេហូវ៉ានិងការបម្រើលោក។ (ទំនុក. ២៥:៥) ប៉ុន្តែ យើងត្រូវដឹងអំពីវិធីខ្លះដែលសាថានប្រើដើម្បីបំភាន់មនុស្ស។ ហេតុអ្វី? ដើម្បីកុំឲ្យវាមានឱកាសឈ្នះយើង។ (២កូ. ២:១១) ក្នុងអត្ថបទនេះ យើងនឹងពិចារណាអំពីវិធីចម្បងមួយដែលសាថាននិងពួកវិញ្ញាណកំណាចប្រើដើម្បីបំភាន់មនុស្ស។ យើងក៏នឹងពិចារណាអំពីរបៀបដែលយើងអាចទប់ទល់នឹងពួកវាដោយជោគជ័យ។
របៀបពួកវិញ្ញាណទុច្ចរិតបំភាន់មនុស្ស
៣-៤. (ក) តើការទាក់ទងនឹងពួកវិញ្ញាណអាក្រក់គឺជាអ្វី? (ខ) តើមនុស្សច្រើនយ៉ាងណាមានជំនឿលើពួកវិញ្ញាណអាក្រក់?
៣ វិធីចម្បងមួយដែលសាថាននិងពួកវិញ្ញាណកំណាចប្រើដើម្បីបំភាន់មនុស្ស គឺធ្វើឲ្យមនុស្សចង់ទាក់ទងនឹងពួកវា។ មនុស្សដែលទាក់ទងនឹងពួកវិញ្ញាណកំណាចអះអាងថាពួកគេដឹងអ្វីមួយដែលតាមធម្មតាមនុស្សមិនអាចដឹង ឬថាពួកគេមានសមត្ថភាពធ្វើអ្វីដែលតាមធម្មតាមនុស្សមិនអាចធ្វើបានទេ។ ជាឧទាហរណ៍ អ្នកខ្លះអះអាងថាពួកគេអាចដឹងអំពីអនាគតតាមរយៈការទស្សន៍ទាយគន់គូរឬហោរាសាស្ត្រ។ អ្នកខ្លះទៀត ប្រហែលជាធ្វើឲ្យមើលទៅថាពួកគេកំពុងនិយាយជាមួយនឹងមនុស្សដែលបានស្លាប់។ រីឯអ្នកខ្លះទៀត ធ្វើអំពើអាបធ្មប់ ឬប្រើវេទមន្ត ហើយពួកគេប្រហែលជាព្យាយាមដាក់អំពើលើអ្នកឯទៀត។b
៤ តើមនុស្សច្រើនយ៉ាងណាជឿថាមនុស្សអាចទាក់ទងជាមួយនឹងឬអាចទទួលសមត្ថភាពពិសេសពីពួកវិញ្ញាណ? ការស្ទង់មតិមួយដែលបានត្រូវធ្វើឡើងនៅ១៨ប្រទេសនាអាម៉េរិកឡាទីននិងនៅសមុទ្រការីប បានសឲ្យឃើញថាមនុស្សប្រហែលជាមួយភាគបីនៃចំនួនមនុស្សដែលបានត្រូវស្ទង់មតិនោះ ជឿលើវេទមន្ត ឬអំពើអាបធ្មប់ ហើយជិតមួយភាគបីជឿថាមនុស្សអាចប្រាស្រ័យទាក់ទងជាមួយនឹងពួកវិញ្ញាណ។ ការស្ទង់មតិមួយទៀតនៅ១៨ប្រទេសនាទ្វីបអាហ្វ្រិកក៏បានបង្ហាញថា ជាមធ្យមជាងពាក់កណ្ដាលនៃមនុស្សដែលបានត្រូវស្ទង់មតិនោះនិយាយថាពួកគេជឿលើអំពើអាបធ្មប់។ ទោះជាយើងរស់នៅកន្លែងណាក៏ដោយ យើងត្រូវប្រុងប្រយ័ត្នដើម្បីមិនទាក់ទងនឹងពួកវិញ្ញាណអាក្រក់។ ហេតុអ្វី? ពីព្រោះសាថានកំពុងព្យាយាមបំភាន់«ពិភពលោកទាំងមូល»។—បប. ១២:៩
៥. តើព្រះយេហូវ៉ាមានអារម្មណ៍យ៉ាងណាចំពោះការទាក់ទងនឹងពួកវិញ្ញាណអាក្រក់?
៥ ព្រះយេហូវ៉ាជា«ព្រះនៃសេចក្ដីពិត»។ (ទំនុក. ៣១:៥) ដូច្នេះ តើលោកមានអារម្មណ៍យ៉ាងណាចំពោះការទាក់ទងនឹងពួកវិញ្ញាណអាក្រក់? លោកស្អប់ខ្ពើមអំពើបែបនោះ! ព្រះយេហូវ៉ាបានប្រាប់ជនជាតិអ៊ីស្រាអែលថា៖ «នៅក្នុងពួកឯង មិនត្រូវឲ្យឃើញមានអ្នកណាមួយដែលធ្វើឲ្យកូនប្រុសឬកូនស្រីខ្លួនឆ្លងកាត់ភ្លើង ឬគ្រូទាយ គ្រូគន់គូរនក្ខត្តឫក្ស គ្រូអង្គុយធម៌ គ្រូអាបធ្មប់ គ្រូសន្ធាប់ គ្រូខាប គ្រូគាថា ឬគ្រូអន្ទងខ្មោចណាឡើយ។ ដ្បិតអ្នកណាដែលប្រព្រឹត្តការទាំងនោះ ជាទីស្អប់ខ្ពើមដល់ព្រះយេហូវ៉ាណាស់»។ (ចោ. ១៨:១០-១២) គ្រិស្តសាសនិកពិតមិននៅក្រោមច្បាប់ដែលព្រះយេហូវ៉ាបានឲ្យដល់ជនជាតិអ៊ីស្រាអែលទេ។ ប៉ុន្តែ យើងដឹងថាអារម្មណ៍របស់លោកចំពោះការទាក់ទងនឹងពួកវិញ្ញាណអាក្រក់គឺមិនបានប្រែប្រួលឡើយ។—ម៉ាឡ. ៣:៦
៦. (ក) តើតាមរបៀបណាសាថានប្រើការទាក់ទងនឹងពួកវិញ្ញាណអាក្រក់ដើម្បីធ្វើឲ្យមនុស្សរងទុក្ខវេទនា? (ខ) យោងទៅតាមសាស្ដា ៩:៥ តើសេចក្ដីពិតអំពីស្ថានភាពមនុស្សស្លាប់គឺជាអ្វី?
៦ ព្រះយេហូវ៉ាព្រមានយើងមិនឲ្យទាក់ទងនឹងពួកវិញ្ញាណអាក្រក់ ដោយសារលោកដឹងថាសាថានប្រើវិធីនោះដើម្បីធ្វើឲ្យមនុស្សរងទុក្ខវេទនា។ សាថានប្រើការទាក់ទងនឹងពួកវិញ្ញាណអាក្រក់ដើម្បីលើកស្ទួយការកុហក ដូចជាការកុហកដែលថាមនុស្សស្លាប់បន្តរស់នៅភពផ្សេងទៀត។ (សូមអាន សាស្ដា ៩:៥) សាថានក៏ប្រើអ្វីនេះដើម្បីធ្វើឲ្យមនុស្សភ័យខ្លាច និងដើម្បីបង្វែរពួកគេចេញពីព្រះយេហូវ៉ា។ គោលបំណងរបស់វាគឺចង់ឲ្យអ្នកដែលទាក់ទងនឹងពួកវិញ្ញាណអាក្រក់ទុកចិត្តលើពួកវា ជាជាងទុកចិត្តលើព្រះយេហូវ៉ា។
របៀបយើងទប់ទល់នឹងពួកវិញ្ញាណទុច្ចរិត
៧. តើព្រះយេហូវ៉ាប្រាប់យើងអំពីអ្វី?
៧ ដូចដែលបានត្រូវរៀបរាប់នៅខាងលើ ព្រះយេហូវ៉ាប្រាប់យើងអំពីអ្វីដែលយើងត្រូវដឹងដើម្បីមិនឲ្យសាថាននិងពួកវិញ្ញាណកំណាចបំភាន់យើង។ សូមពិចារណាអំពីអ្វីមួយចំនួនដែលយើងអាចធ្វើដើម្បីប្រយុទ្ធនឹងសាថាននិងពួកវិញ្ញាណកំណាច។
៨. (ក) តើរបៀបដ៏សំខាន់ចម្បងដែលយើងអាចទប់ទល់នឹងពួកវិញ្ញាណទុច្ចរិតគឺជាអ្វី? (ខ) តើទំនុកតម្កើង ១៤៦:៤បង្ហាញយ៉ាងណាថាសាថានបានកុហកអំពីស្ថានភាពមនុស្សស្លាប់?
៨ ចូរអានបណ្ដាំរបស់ព្រះនិងរំពឹងគិតអំពីអ្វីដែលអ្នកបានអាន។ នេះគឺជារបៀបដ៏សំខាន់ចម្បងដែលយើងអាចទប់ទល់នឹងការកុហកដែលពួកវិញ្ញាណទុច្ចរិតលើកស្ទួយ។ បណ្ដាំរបស់ព្រះប្រៀបដូចជាដាវមុតដែលអាចបកអាក្រាតការកុហកដែលសាថានលើកស្ទួយ។ (អេភ. ៦:១៧) ជាឧទាហរណ៍ បណ្ដាំរបស់ព្រះបកអាក្រាតការកុហកដែលថាមនុស្សស្លាប់អាចប្រាស្រ័យទាក់ទងជាមួយនឹងអ្នកដែលនៅរស់។ (សូមអាន ទំនុកតម្កើង ១៤៦:៤) បណ្ដាំរបស់លោកក៏រំលឹកយើងដែរថាមានតែព្រះយេហូវ៉ាប៉ុណ្ណោះអាចប្រាប់នូវអ្វីដែលគួរឲ្យទុកចិត្តអំពីអនាគត។ (អេ. ៤៥:២១; ៤៦:១០) បើយើងអានបណ្ដាំរបស់ព្រះនិងរំពឹងគិតអំពីអ្វីដែលយើងបានអានជាទៀងទាត់ យើងនឹងស្អប់ការកុហកដែលសាថាននិងពួកវិញ្ញាណទុច្ចរិតចង់ឲ្យយើងជឿ ហើយយើងក៏នឹងមានសមត្ថភាពទប់ទល់នឹងការកុហករបស់ពួកវាដែរ។
៩. តើយើងជៀសវាងពីការប្រព្រឹត្តណាខ្លះដែលជាប់ទាក់ទងនឹងពួកវិញ្ញាណអាក្រក់?
៩ ចូរកុំធ្វើអ្វីណាដែលជាប់ទាក់ទងនឹងពួកវិញ្ញាណអាក្រក់។ ដោយសារយើងជាគ្រិស្តសាសនិកពិត យើងមិនធ្វើអ្វីណាដែលជាប់ទាក់ទងនឹងពួកវិញ្ញាណកំណាចទាល់តែសោះ។ ជាឧទាហរណ៍ យើងមិនទៅរកគ្រូខាប ឬព្យាយាមប្រាស្រ័យទាក់ទងនឹងមនុស្សស្លាប់តាមរបៀបណាមួយឡើយ។ ដូចដែលយើងបានពិចារណាក្នុងអត្ថបទមុន យើងជៀសវាងពីទំនៀមទម្លាប់ដែលមានមូលដ្ឋានលើជំនឿថាមនុស្សស្លាប់នៅតែបន្តរស់នៅក្នុងភពផ្សេងទៀត។ ម្យ៉ាងទៀត យើងមិនធ្វើការទស្សន៍ទាយឬហោរាសាស្ត្រដើម្បីដឹងអំពីអនាគតឡើយ។ (អេ. ៨:១៩) យើងដឹងថាការប្រព្រឹត្តទាំងអស់នោះនាំឲ្យមានគ្រោះថ្នាក់ ហើយក៏អាចនាំឲ្យយើងទាក់ទងជាមួយនឹងសាថាននិងពួកវិញ្ញាណកំណាច។
ចូរយកតម្រាប់គ្រិស្តសាសនិកសម័យដើម ដោយចោលអ្វីណាក៏ដោយដែលអ្នកមានដែលជាប់ទាក់ទងនឹងអំណាចពិសេសពីពួកវិញ្ញាណកំណាច និងដោយជៀសចេញពីការកម្សាន្តដែលជាប់ទាក់ទង នឹងពួកវិញ្ញាណអាក្រក់ (សូមមើលវគ្គ១០-១២)
១០-១១. (ក) តើមនុស្សខ្លះនៅសតវត្សរ៍ទី១បានធ្វើអ្វីពេលពួកគេបានរៀនសេចក្ដីពិត? (ខ) យោងទៅតាមកូរិនថូសទី១ ១០:២១ ហេតុអ្វីយើងគួរធ្វើតាមគំរូរបស់គ្រិស្តសាសនិកនៅសម័យដើម ហើយតើយើងអាចធ្វើដូច្នេះយ៉ាងដូចម្ដេច?
១០ ចូរចោលអ្វីៗដែលទាក់ទងនឹងអំណាចពិសេសដែលមកពីពួកវិញ្ញាណកំណាច។ មនុស្សខ្លះដែលរស់នៅក្រុងអេភេសូរនាសតវត្សរ៍ទី១ធ្លាប់ទាក់ទងនឹងពួកវិញ្ញាណអាក្រក់។ ប៉ុន្តែ ពេលពួកគេបានរៀនសេចក្ដីពិត ពួកគេបានចាត់វិធានការយ៉ាងម៉ឺងម៉ាត់។ គម្ពីរចែងថា៖ «មនុស្សជាច្រើនដែលចេះវេទមន្តបានយកសៀវភៅរបស់ពួកគេមកដាក់រួមគ្នា រួចដុតចោលនៅមុខគេទាំងអស់គ្នា»។ (សកម្ម. ១៩:១៩) ពួកគេបានខំអស់ពីសមត្ថភាពដើម្បីតយុទ្ធនឹងពួកវិញ្ញាណទុច្ចរិត។ សៀវភៅវេទមន្តរបស់ពួកគេមានតម្លៃថ្លៃណាស់។ ទោះជាយ៉ាងនោះក៏ដោយ ជាជាងឲ្យសៀវភៅនោះទៅអ្នកផ្សេង ឬលក់ទៅឲ្យអ្នកឯទៀត ពួកគេបានបំផ្លាញសៀវភៅទាំងនោះចោល។ ចំពោះពួកគេ ការធ្វើឲ្យព្រះយេហូវ៉ាពេញចិត្តគឺសំខាន់ជាងតម្លៃសៀវភៅទាំងនោះ។
១១ តើយើងអាចធ្វើតាមគំរូរបស់គ្រិស្តសាសនិកទាំងនោះនៅសតវត្សរ៍ទី១យ៉ាងដូចម្ដេច? គឺជាការឈ្លាសវៃឲ្យយើងចោលអ្វីណាក៏ដោយដែលជាប់ទាក់ទងនឹងពួកវិញ្ញាណអាក្រក់។ នេះរួមបញ្ចូលវត្ថុស័ក្ដិសិទ្ធិ ខ្សែគាថា ឬអ្វីផ្សេងទៀតដែលមនុស្សប្រើដើម្បីការពារខ្លួនពីគ្រោះថ្នាក់និងពីពួកវិញ្ញាណអាក្រក់។—សូមអាន កូរិនថូសទី១ ១០:២១
១២. តើយើងគួរសួរខ្លួនយើងនូវសំណួរអ្វីខ្លះស្តីអំពីការកម្សាន្ត?
១២ ចូរពិនិត្យពិចារណាអំពីការកម្សាន្តរបស់អ្នកយ៉ាងដិតដល់។ សូមសួរខ្លួនអ្នកថា ‹តើខ្ញុំអានសៀវភៅ ទស្សនាវដ្ដី ឬអត្ថបទតាមប្រព័ន្ធអ៊ីនធឺណិតដែលរៀបរាប់អំពីអំណាចពិសេសដែលមកពីពួកវិញ្ញាណកំណាចឬទេ? ចុះយ៉ាងណាអំពីចម្រៀងដែលខ្ញុំស្ដាប់ ភាពយន្តនិងកម្មវិធីទូរទស្សន៍ដែលខ្ញុំមើល ឬហ្គេមវីដេអូដែលខ្ញុំលេង? តើការកម្សាន្តរបស់ខ្ញុំរួមបញ្ចូលអ្វីដែលជាប់ទាក់ទងនឹងពួកវិញ្ញាណអាក្រក់ឬទេ? តើការកម្សាន្តនោះរួមបញ្ចូលបិសាចនិងខ្មោចឆៅ ឬអំណាចពិសេសដែលមកពីពួកវិញ្ញាណកំណាចឬទេ? តើវាធ្វើឲ្យមើលទៅវេទមន្ត ការដាក់អំពើ ឬបណ្ដាសាជាអ្វីដ៏សប្បាយឬទេ?›។ ទោះជាការកម្សាន្តខ្លះជារឿងព្រេងឬរឿងប្រឌិតក្ដី នេះមិនតែងតែមានន័យថាវាជាប់ទាក់ទងនឹងការប្រើអំណាចពិសេសពីពួកវិញ្ញាណអាក្រក់ទេ។ ពេលពិនិត្យពិចារណាអំពីការកម្សាន្តរបស់អ្នក ចូរតាំងចិត្តធ្វើការសម្រេចចិត្តដែលនឹងជួយអ្នកឲ្យនៅឆ្ងាយពីអ្វីណាក៏ដោយដែលព្រះយេហូវ៉ាស្អប់។ យើងចង់ខំអស់ពីសមត្ថភាពដើម្បី‹ឲ្យចិត្តយើងវិនិច្ឆ័យយើងថា យើងមិនបានល្មើសច្បាប់របស់ព្រះឡើយ›។—សកម្ម. ២៤:១៦c
១៣. តើយើងចង់ជៀសវាងពីការធ្វើអ្វី?
១៣ សូមជៀសវាងពីការផ្សាយរឿងអំពីពួកវិញ្ញាណកំណាច។ ស្តីអំពីរឿងនេះ យើងចង់ធ្វើតាមគំរូរបស់លោកយេស៊ូ។ (១ពេ. ២:២១) លោកយេស៊ូបាននៅស្ថានសួគ៌មុនលោកមកផែនដី ដូច្នេះលោកដឹងព័ត៌មានជាច្រើនអំពីសាថាននិងពួកវិញ្ញាណកំណាច។ ប៉ុន្តែ លោកមិនបានផ្សាយរឿងអំពីអ្វីដែលពួកវិញ្ញាណអាក្រក់បានធ្វើទេ។ លោកយេស៊ូចង់ធ្វើជាសាក្សីបញ្ជាក់អំពីព្រះយេហូវ៉ា មិនមែនជាអ្នកផ្សព្វផ្សាយឲ្យសាថានទេ។ យើងអាចយកតម្រាប់លោកយេស៊ូ ដោយមិនផ្សាយរឿងអំពីពួកវិញ្ញាណកំណាច។ ផ្ទុយទៅវិញ ពាក្យសម្ដីរបស់យើងបង្ហាញថា‹ចិត្តរបស់យើងពេញហៀរដោយសេចក្ដីដ៏ល្អ› ពោលគឺដោយសេចក្ដីពិត។—ទំនុក. ៤៥:១
យើងមិនចាំបាច់ខ្លាចពួកវិញ្ញាណទុច្ចរិតទេ។ ព្រះយេហូវ៉ា លោកយេស៊ូ និងពួកទេវតាមានឫទ្ធានុភាពខ្លាំងជាង (សូមមើលវគ្គ១៤-១៥)d
១៤-១៥. (ក) ហេតុអ្វីយើងមិនគួរខ្លាចពួកវិញ្ញាណទុច្ចរិត? (ខ) តើមានទីសំអាងអ្វីដែលបង្ហាញថាព្រះយេហូវ៉ាការពាររាស្ត្ររបស់លោកនៅសព្វថ្ងៃនេះ?
១៤ ចូរកុំភ័យខ្លាចពួកវិញ្ញាណទុច្ចរិត។ នៅក្នុងពិភពលោកសព្វថ្ងៃនេះ រឿងអាក្រក់ប្រហែលជានឹងកើតឡើងដល់យើង។ ជាឧទាហរណ៍ ជំងឺ គ្រោះថ្នាក់ ឬថែមទាំងសេចក្ដីស្លាប់អាចកើតឡើងភ្លាមៗដោយមិនបានរំពឹងទុក។ ប៉ុន្តែ យើងមិនគួរគិតថាបញ្ហាទាំងនោះកើតឡើងដោយសារបុគ្គលវិញ្ញាណនោះទេ។ គម្ពីរពន្យល់ថា៖ «ពេលវេលានឹងឱកាស»ឬបញ្ហានិងហេតុការណ៍ដែលយើងមិនបានរំពឹងទុក អាចកើតឡើងភ្លាមៗដល់យើងទាំងអស់គ្នា។ (សាស្ដ. ៩:១១) ម្យ៉ាងទៀត ព្រះយេហូវ៉ាបានបង្ហាញថាលោកមានឫទ្ធានុភាពខ្លាំងជាងពួកវិញ្ញាណកំណាចឆ្ងាយណាស់។ ជាឧទាហរណ៍ ព្រះបានហាមឃាត់សាថានមិនឲ្យសម្លាប់យ៉ូប។ (យ៉ូប ២:៦) នៅសម័យម៉ូសេ ព្រះយេហូវ៉ាបានបង្ហាញថាលោកមានអំណាចខ្លាំងជាងពួកគ្រូមន្តអាគមនៅស្រុកអេស៊ីប។ (និក្ខ. ៨:១៨; ៩:១១) ដោយទទួលឫទ្ធានុភាពពីព្រះយេហូវ៉ា លោកយេស៊ូបានបង្ហាញថាលោកមានអំណាចលើសាថាននិងពួកវិញ្ញាណកំណាច ពេលលោកបានបោះទម្លាក់ពួកវាពីស្ថានសួគ៌មកផែនដី។ មិនយូរទៀត ពួកវានឹងត្រូវបោះទៅក្នុងទីជ្រៅបំផុត ហើយមិនអាចធ្វើបាបអ្នកណាបានឡើយ។—បប. ១២:៩; ២០:២, ៣
១៥ យើងអាចឃើញទីសំអាងជាច្រើនដែលបង្ហាញថាព្រះយេហូវ៉ាការពាររាស្ត្ររបស់លោកនៅសព្វថ្ងៃនេះ។ យើងកំពុងផ្សព្វផ្សាយនិងបង្រៀនសេចក្ដីពិតនៅគ្រប់ទីអាស្រ័យនៅផែនដី។ (ម៉ាថ. ២៨:១៩, ២០) ជាលទ្ធផល យើងកំពុងបកអាក្រាតស្នាដៃដ៏ខូចអាក្រក់របស់មេកំណាច។ បើសាថានអាចធ្វើបានវាច្បាស់ជានឹងបញ្ឈប់កិច្ចការទាំងអស់របស់យើង តែវាមិនអាចធ្វើបានទេ។ ដូច្នេះ យើងមិនចាំបាច់ភ័យខ្លាចពួកវិញ្ញាណទុច្ចរិតឡើយ។ យើងដឹងថា«ព្រះនេត្រនៃព្រះយេហូវ៉ាចេះតែទតច្រវាត់នៅគ្រប់លើផែនដីទាំងមូល ដើម្បីនឹងសំដែងព្រះចេស្ដាជួយដល់អស់អ្នកណាដែលមានចិត្តស្មោះត្រង់ចំពោះទ្រង់»។ (២រប. ១៦:៩) បើយើងស្មោះត្រង់នឹងព្រះយេហូវ៉ា ពួកវិញ្ញាណកំណាចមិនអាចធ្វើឲ្យយើងរងទុក្ខរហូតឡើយ។
ពរសម្រាប់ពួកអ្នកដែលព្រមទទួលជំនួយពីព្រះយេហូវ៉ា
១៦-១៧. សូមលើកឧទាហរណ៍អំពីបុគ្គលដែលបានបង្ហាញចិត្តក្លាហានក្នុងការទប់ទល់នឹងពួកវិញ្ញាណទុច្ចរិត។
១៦ យើងត្រូវការចិត្តក្លាហានដើម្បីទប់ទល់នឹងពួកវិញ្ញាណទុច្ចរិត ជាពិសេសពេលមិត្តសម្លាញ់ឬសាច់ញាតិដែលមានបំណងល្អប្រឆាំងយើង។ ប៉ុន្តែ ព្រះយេហូវ៉ាឲ្យពរដល់ពួកអ្នកដែលបង្ហាញចិត្តក្លាហានបែបនោះ។ សូមគិតអំពីគំរូរបស់បងស្រីអ៊ីរីខាដែលរស់នៅប្រទេសហ្គាណា។ ពេលបងអ៊ីរីខាមានអាយុ២១ឆ្នាំគាត់បានចាប់ផ្ដើមសិក្សាគម្ពីរ។ ដោយសារឪពុករបស់គាត់ជាគ្រូមន្តអាគម គេរំពឹងថាបងអ៊ីរីខានឹងចូលរួមក្នុងទំនៀមទម្លាប់ដែលរួមបញ្ចូលការបរិភោគសាច់ដែលបានត្រូវសែនដល់ព្រះផ្សេងៗរបស់ឪពុកគាត់។ ពេលបងអ៊ីរីខាមិនព្រមធ្វើតាមទំនៀមទម្លាប់នោះ ក្រុមគ្រួសាររបស់គាត់គិតថាគាត់បានប្រមាថព្រះរបស់ពួកគេ ហើយពួកគេជឿថាព្រះទាំងនោះនឹងដាក់ទោសពួកគេដោយធ្វើឲ្យមានជំងឺខាងផ្លូវកាយនិងខាងសតិអារម្មណ៍។
១៧ ក្រុមគ្រួសាររបស់បងអ៊ីរីខាព្យាយាមបង្ខំគាត់ឲ្យធ្វើតាមទំនៀមទម្លាប់នោះ ប៉ុន្តែគាត់មិនព្រមធ្វើតាមពួកគេទេ ទោះជានេះតម្រូវឲ្យគាត់ចាកចេញពីផ្ទះក៏ដោយ។ សាក្សីខ្លះបានឲ្យគាត់ស្នាក់នៅជាមួយនឹងពួកគេ។ ក្នុងន័យនោះ ព្រះយេហូវ៉ាបានផ្ដល់ពរដល់បងអ៊ីរីខា ដោយឲ្យគាត់មានក្រុមគ្រួសារថ្មី ពោលគឺបងប្អូនរួមជំនឿដែលប្រៀបដូចជាបងប្អូនប្រុសស្រីរបស់គាត់។ (ម៉ាក. ១០:២៩, ៣០) ទោះជាញាតិសន្ដានរបស់បងអ៊ីរីខាបានកាត់កាល់គាត់ និងថែមទាំងបានដុតរបស់របរគាត់ក្ដី គាត់បានរក្សាភក្ដីភាពចំពោះព្រះយេហូវ៉ា បានទទួលការជ្រមុជទឹក ហើយឥឡូវគាត់បម្រើជាអ្នកត្រួសត្រាយពេញពេល។ គាត់មិនភ័យខ្លាចពួកវិញ្ញាណកំណាចទេ។ បងអ៊ីរីខានិយាយថា៖ «រាល់ថ្ងៃ ខ្ញុំអធិដ្ឋានសុំឲ្យក្រុមគ្រួសារខ្ញុំទទួលឯកសិទ្ធិស្គាល់ព្រះយេហូវ៉ានិងមានសេរីភាពដែលមកពីការបម្រើព្រះរបស់យើងដែលប្រកបដោយសេចក្ដីស្រឡាញ់»។
១៨. តើយើងទទួលពរអ្វីខ្លះពីការទុកចិត្តព្រះយេហូវ៉ា?
១៨ មិនមែនយើងទាំងអស់គ្នានឹងត្រូវប្រឈមមុខនឹងការសាកល្បងជំនឿតាមរបៀបដ៏ខ្លាំងបែបនោះទេ។ ប៉ុន្តែ យើងទាំងអស់គ្នាត្រូវទប់ទល់នឹងពួកវិញ្ញាណទុច្ចរិត ហើយទុកចិត្តព្រះយេហូវ៉ា។ បើយើងធ្វើដូច្នេះ យើងនឹងទទួលពរជាច្រើន ហើយសាថានមិនអាចប្រើការកុហកដើម្បីបំភាន់យើងបានទេ។ យើងក៏នឹងមិនឲ្យការភ័យខ្លាចចំពោះពួកវិញ្ញាណកំណាចបញ្ឈប់យើងពីការបម្រើព្រះយេហូវ៉ាឡើយ។ សំខាន់បំផុត យើងនឹងពង្រឹងចំណងមិត្តភាពរបស់យើងជាមួយនឹងព្រះយេហូវ៉ា។ យ៉ាកុបដែលជាអ្នកកាន់តាមលោកយេស៊ូបានសរសេរថា៖ «ចូរចុះចូលនឹងព្រះតែចូរតស៊ូនឹងមេកំណាច រួចវានឹងរត់ចេញពីអ្នករាល់គ្នា។ ចូរចូលទៅជិតព្រះ ហើយលោកនឹងចូលមកជិតអ្នករាល់គ្នាដែរ»។—យ៉ា. ៤:៧, ៨
ចម្រៀងលេខ១៥០ ចូរស្វែងរកសេចក្ដីសង្គ្រោះពីព្រះ
a ដោយសេចក្ដីស្រឡាញ់ ព្រះយេហូវ៉ាបានព្រមានយើងអំពីពួកវិញ្ញាណអាក្រក់និងបញ្ហាដែលពួកវាបណ្ដាលឲ្យមាន។ តើពួកវិញ្ញាណអាក្រក់ព្យាយាមបំភាន់មនុស្សតាមរបៀបណា? តើយើងអាចធ្វើអ្វីខ្លះដើម្បីទប់ទល់នឹងពួកវិញ្ញាណទុច្ចរិត? ក្នុងអត្ថបទនេះ យើងនឹងពិចារណាអំពីរបៀបដែលព្រះយេហូវ៉ាជួយយើង ដើម្បីមិនឲ្យពួកវាបោកបញ្ឆោតយើងបាន។
b ការពន្យល់ពាក្យ: ការទាក់ទងនឹងពួកវិញ្ញាណអាក្រក់សំដៅទៅលើជំនឿនិងការប្រព្រឹត្តដែលជាប់ទាក់ទងនឹងពួកវិញ្ញាណកំណាច។ នេះរួមបញ្ចូលជំនឿដែលថាមនុស្សស្លាប់មានព្រលឹងដែលបន្តរស់នៅ ទោះជាអ្នកនោះបានស្លាប់ក្ដី ហើយថាបុគ្គលដែលបានស្លាប់នោះអាចប្រាស្រ័យទាក់ទងនឹងមនុស្សដែលនៅរស់ ជាពិសេសតាមរយៈបុគ្គលណាម្នាក់(គ្រូខាប)។ ការទាក់ទងនឹងពួកវិញ្ញាណអាក្រក់ក៏រួមបញ្ចូលអំពើអាបធ្មប់និងការទស្សន៍ទាយគន់គូរ។ ក្នុងអត្ថបទនេះ ពាក្យវេទមន្តសំដៅលើការប្រព្រឹត្តដែលជាប់ទាក់ទងនឹងអំណាចពិសេសដែលមកពីពួកវិញ្ញាណកំណាច។ នេះក៏អាចរួមបញ្ចូលការដាក់បណ្ដាសានិងការដាក់ឬដោះអំពើ។ នេះមិនសំដៅលើសៀករហ័សកម្មដែលគេសម្ដែងដើម្បីជាការកម្សាន្តទេ។
c ពួកអ្នកចាស់ទុំមិនមានសិទ្ធិដាក់ច្បាប់អំពីការកម្សាន្តទេ។ ផ្ទុយទៅវិញ គ្រិស្តសាសនិកម្នាក់ៗត្រូវប្រើសមត្ថភាពវិនិច្ឆ័យខ្លួនដែលបានត្រូវបង្វឹកបង្ហាត់ស្របតាមគម្ពីរ ពេលសម្រេចចិត្តអំពីអ្វីដែលគាត់នឹងអាន មើល ឬលេង។ ប្រមុខគ្រួសារដែលមានប្រាជ្ញាធ្វើឲ្យប្រាកដថាការកម្សាន្តរបស់ក្រុមគ្រួសារគាត់ គឺសមស្របតាមគោលការណ៍គម្ពីរ (សូមមើលគេហទំព័រjw.org/km រួចចុច«អំពីយើង»▸«សំណួរដែលមនុស្សជាច្រើនសួរ» ហើយមើលអត្ថបទដែលមានចំណងជើងថា «តើសាក្សីព្រះយេហូវ៉ាហាមឃាត់ភាពយន្ត សៀវភៅ ឬចម្រៀងណាមួយឬទេ?»)។
d ការពណ៌នាអំពីរូបភាព: រូបភាពបង្ហាញអំពីលោកយេស៊ូជាស្តេចដ៏អង់អាចនៅស្ថានសួគ៌ដែលនាំមុខកងទ័ពទេវតា។ បល្ល័ង្ករបស់ព្រះយេហូវ៉ានៅខាងលើ។