ចូរកាន់តាមព្រះយេស៊ូជានិច្ច
១ នៅពេលមួយ ព្រះយេស៊ូមានបន្ទូលថា៖ «បើអ្នកណាចង់មកដើរតាមក្រោយខ្ញុំ ត្រូវឲ្យអ្នកនោះលះបង់ខ្លួនឯងចោល និងលីបង្គោលឈើទារុណកម្មរបស់ខ្លួន ហើយមកតាមខ្ញុំជាដរាបចុះ»។ (ម៉ាថាយ ១៦:២៤; ព.ថ.) យ៉ាងប្រាកដណាស់ យើងចង់ធ្វើយ៉ាងសកម្មតាមពាក្យបន្ទូលរបស់ព្រះយេស៊ូ។ ចូរឲ្យយើងពិចារណាមើលនូវអ្វីៗដែលទាក់ទងជាមួយឃ្លានិមួយៗនៃការអញ្ជើញរបស់ទ្រង់។
២ «ត្រូវឲ្យអ្នកនោះលះបង់ខ្លួនឯងចោល»៖ ពេលដែលយើងថ្វាយខ្លួនរបស់យើងដល់ព្រះយេហូវ៉ា នោះយើងបានលះបង់ខ្លួនរបស់យើងចោលហើយ។ អត្ថន័យសំខាន់នៃពាក្យក្រិកដែលបានបកប្រែ«ការលះបង់»គឺ«និយាយ ទេ»។ នេះមានន័យថា យើងស្ម័គ្រចិត្តស៊ូប្ដូរការប្រាថ្នាដ៏លើសលុប សេចក្ដីចង់បាន ការស្រណុក ហើយនិងការកំសាន្តដ៏អាត្មានិយមរបស់យើង ដើម្បីផ្គាប់ព្រះហឫទ័យនៃព្រះអស់កល្បជានិច្ច។—រ៉ូម ១៤:៨; ១៥:៣
៣ «លីបង្គោលឈើទារុណកម្មរបស់ខ្លួន»៖ ជីវិតរបស់គ្រីស្ទាន គឺជីវិតនៃការទទួលលីឈើទារុណកម្ម នៃកិច្ចបំរើបូជាខ្លួនដល់ព្រះយេហូវ៉ា។ វិធីបង្ហាញគតិនៃការបូជាខ្លួន គឺដោយការខំប្រឹងក្នុងការផ្សាយ។ មកដល់ឆ្នាំនេះ អ្នកផ្សាយជាច្រើន បានបំរើដ៏សប្បាយក្នុងកិច្ចការត្រួសត្រាយជំនួយ។ ប្រហែលជាអ្នកនៅក្នុងចំណោមពួកគេ ហើយអ្នកអាចបញ្ជាក់ថា ពរដែលអ្នកបានទទួល គឺមានច្រើនលើសជាងការបូជាដែលអ្នកបានធ្វើទៅទៀត។ ពួកអ្នកដែលមិនអាចបំរើជាអ្នកត្រួសត្រាយជំនួយ ជាញឹកញាប់ពួកគេតែងតែរៀបចំដើម្បីចំណាយពេលវេលាបានច្រើនក្នុងកិច្ចការផ្សាយ ជាអ្នកផ្សាយក្នុងក្រុមជំនុំ។ ដោយមានគោលបំណងនេះ ក្រុមជំនុំខ្លះចាត់ចែងកិច្ចប្រជុំសំរាប់កិច្ចផ្សាយបំរើរបស់គេ ពីរបីនាទីមុនពេលដែលគេធ្លាប់ចាប់ផ្ដើមតាមធម្មតា។ ដោយរដូវក្ដៅជិតមកដល់ហើយ អ្នកផ្សាយជាច្រើនមានចិត្តអបអរដោយមានពេលផ្សាយបានយូរថែមទៀត។ អ្នកខ្លះមានលទ្ធផលល្អណាស់ ពេលដែលគេសម្រេចចិត្តទៅគោះទ្វារ‹តែមួយទៀត› ឬក៏ទៅផ្សាយ‹គ្រាន់តែពីរបីនាទីទៀត›។
៤ ម្យ៉ាងទៀត វិធីបង្ហាញគតិនៃការបូជាខ្លួនមួយទៀត គឺដោយមានការរៀបចំគោលដៅផ្ទាល់ខ្លួន។ ដោយគ្រោងដ៏ផ្ចិតផ្ចង់ ហើយដោយប្រែប្រួលទៅតាមតារាងរបស់គេ អ្នកខ្លះក៏អាចធ្វើជាអ្នកត្រួសត្រាយពេញពេលបានដែរ។ អ្នកខ្លះទៀតក៏បានរៀបចំកិច្ចការរបស់គេយ៉ាងណា ដើម្បីឲ្យអាចបំរើនៅបេតអែល ឬក៏ជាសាសនទូត។ អ្នកខ្លះទៀត ក៏ទៅបំរើនៅទីកន្លែងដែលត្រូវការអ្នកផ្សាយដំណឹងល្អនៃព្រះរាជាណាចក្រថែមទៀត។
៥ «តាមខ្ញុំជាដរាបចុះ»៖ ទោះជាពួកកាន់តាមរបស់ព្រះយេស៊ូ បានពិសោធការពិបាកជាច្រើន ពួកគេបានលើកទឹកចិត្តពីការខ្នះខ្នែងនិងការស៊ូទ្រាំក្នុងកិច្ចបំរើរបស់ទ្រង់។ (យ៉ូហាន ៤:៣៤) ពួកគេមានកម្លាំងចិត្តឡើងវិញដោយវត្តមានរបស់ទ្រង់។ ដូច្នេះហើយបានជាអ្នកណាដែលបានកាន់តាមព្រះយេស៊ូ នោះបញ្ចេញសេចក្ដីអំណរដ៏ពិត។ (ម៉ាថាយ ១១:២៩) ដូច្នេះ សូមយើងលើកទឹកចិត្តគ្នាទៅវិញទៅមក ដើម្បីស៊ូទ្រាំក្នុងការផ្សាយដំណឹងល្អដ៏សំខាន់នៃព្រះរាជាណាចក្រ ហើយនិងកិច្ចការបង្កើតឲ្យមានសិស្ស។
៦ សូមឲ្យយើងទាំងអស់គ្នាប្រព្រឹត្តឲ្យបានល្អតាមសេចក្ដីអញ្ជើញរបស់ព្រះយេស៊ូឲ្យដើរតាមទ្រង់ជាដរាប ដោយបណ្ដុះឲ្យមានគតិនៃការបូជាខ្លួន។ បើយើងធ្វើដូច្នោះ នោះយើងនឹងមានសេចក្ដីសប្បាយរីករាយនៅឥឡូវនេះ ហើយនិងបានទទួលពរច្រើនថែមទៀតទៅអនាគត។