ចូរគោរពយ៉ាងខ្លាំងចំពោះព្រះនាមដ៏ថ្កុំថ្កើងរបស់ព្រះយេហូវ៉ា
១ សាតាំងបានបង្ខូចកិត្ដិនាមរបស់ព្រះ នៅពេលដែលវាបានទាញនាំឪពុកម្ដាយដំបូងរបស់យើងឲ្យប្រព្រឹត្តអំពើបាបនោះ។ អារក្សបានពោលបញ្ឆិតបញ្ឆៀងថា ព្រះយេហូវ៉ាបានមានបន្ទូលភូតភរនឹងអ័ដាម។ (លោកុប្បត្តិ ៣:១-៥) ដោយព្រោះព្រះនាមនៃព្រះគឺបានភ្ជាប់នឹងសមត្ថភាពរបស់ព្រះ ក្នុងការសម្រេចតាមបន្ទូលរបស់ទ្រង់ នោះការពោលអះអាងរបស់សាតាំង គឺជាការនិយាយបង្ខូចកិត្ដិនាមដ៏អាក្រក់ជាងគេបំផុត។ ដោយសម្រេចគោលបំណងរបស់ទ្រង់ជាបណ្ដើរៗ នោះព្រះយេហូវ៉ាបានដកអស់ទាំងសេចក្ដីត្មះតិះដៀលចេញពីព្រះនាមទ្រង់ ហើយធ្វើឲ្យព្រះនាមបានថ្កុំថ្កើងឡើងវិញ។—អេសាយ ៦៣:១២-១៤
២ យើងរាល់គ្នាជាប្រជារាស្ត្រដែលព្រះយេហូវ៉ាបាន‹ហៅតាមឈ្មោះរបស់ទ្រង់›។ (កិច្ចការ ១៥:១៤, ១៧) នេះផ្ដល់ឲ្យយើងនូវឱកាសដើម្បីបង្ហាញថា យើងមានអារម្មណ៍យ៉ាងណាអំពីការធ្វើឲ្យបានបរិសុទ្ធដល់ព្រះនាមនោះ។ យើងចាត់ទុកថាព្រះនាមរបស់ព្រះយេហូវ៉ាគឺពិតជាថ្កុំថ្កើងមែន ព្រោះព្រះនាមនេះតំណាងអ្វីៗដែលល្អ សប្បុរស ប្រកបដោយសេចក្ដីស្រឡាញ់ ប្រកបដោយមេត្ដាករុណា ហើយសុចរិតផង។ យើងមានចិត្តកោតស្ងើចនឹងភាពឧត្តមនៃព្រះនាមដ៏សិរីរុងរឿងរបស់ព្រះ។ (ទំនុកដំកើង ៨:១; ៩៩:៣; ១៤៨:១៣) តើនេះគួរជំរុញយើងឲ្យធ្វើអ្វី?
៣ ការធ្វើឲ្យបានបរិសុទ្ធនូវព្រះនាមរបស់ទ្រង់: ព្រះនាមរបស់ព្រះមិនអាចធ្វើឲ្យបានបរិសុទ្ធជាងនេះឡើយ។ ក៏ប៉ុន្តែ ដោយចរិយាដ៏ស្អាតស្អំនិងកិច្ចផ្សព្វផ្សាយរបស់យើងពីដំណឹងព្រះរាជាណាចក្រ នោះយើងអាចសម្ដែងថា យើងចាត់ទុកព្រះនាមរបស់ព្រះជាទីគួរគោរពយ៉ាងខ្លាំង។ សូមឲ្យយើងបញ្ចេញសម្លេងថា៖ «ចូរអរព្រះគុណដល់ព្រះយេហូវ៉ា ចូរអំពាវនាវដល់ព្រះនាមទ្រង់ ចូរសរសើរពីកិច្ចការ ទាំងប៉ុន្មានរបស់ទ្រង់ចុះ នៅកណ្ដាលប្រជាជនទាំងឡាយ ចូរប្រកាសប្រាប់ថា ព្រះនាមទ្រង់ខ្ពស់វិសេស»។ (អេសាយ ១២:៤) តើយើងអាចធ្វើនេះយ៉ាងដូចម្ដេចទៅ?
៤ យើងអាចឆ្លៀតយកគ្រប់ឱកាស ដើម្បីប្រកាសពីព្រះនាមរបស់ព្រះយេហូវ៉ា ហើយនិងអ្វីៗដែលព្រះនាមនេះតំណាងមកនោះ។ មិនថាតាមផ្លូវការឬក៏ក្រៅផ្លូវការ ពីផ្ទះមួយទៅផ្ទះមួយ ឬពីហាងមួយទៅហាងមួយ នៅតាមវិថីឬតាមទូរស័ព្ទ នោះសកម្មភាពផ្សព្វផ្សាយរបស់យើងនឹងផ្ដល់នូវកិត្ដិយសដល់ព្រះយេហូវ៉ា។ នៅពេលដែលរកឃើញពួកអ្នកចាប់អារម្មណ៍ដែលស្ដាប់ នោះយើងគួរតែណាត់ពេលបានជាក់លាក់ ដើម្បីត្រឡប់ទៅជួបគេវិញ ហើយបង្រៀនថែមទៀតអំពីព្រះយេហូវ៉ា។ នេះបានសេចក្ដីថា យើងត្រូវតែទៅជួបគេតាមពេលកំណត់ឲ្យបានប្រាកដប្រជា ហើយខំប្រឹងព្យាយាម ដើម្បីចាប់ផ្ដើមការសិក្សាព្រះគម្ពីរតាមផ្ទះ។ គួរឲ្យសប្បាយណាស់ រៀងរាល់ឆ្នាំមនុស្សរាប់សែននាក់កំពុងតែរៀនឲ្យស្គាល់ និងគោរព ហើយធ្វើឲ្យបរិសុទ្ធដល់ព្រះនាមដ៏ថ្កុំថ្កើងរបស់ព្រះយេហូវ៉ា។
៥ ការចូលរួមដោយអស់ពីដួងចិត្តរបស់យើង ក្នុងការធ្វើឲ្យបានបរិសុទ្ធដល់ព្រះនាមរបស់ព្រះ នោះបង្ហាញយ៉ាងជាក់ស្តែងថាយើងនៅខាងណា ស្តីអំពីរឿងដែលសាតាំងបានចោទឡើងនៅក្នុងសួនអេដែននោះ។ នេះជាកិច្ចការដ៏ប្រសើរ និងថ្លៃថ្នូរបំផុតដែលយើងអាចធ្វើបាន។ សូមឲ្យយើងគោរពយ៉ាងខ្លាំង ហើយសរសើរយ៉ាងខ្នះខ្នែងនូវព្រះនាមដ៏ថ្កុំថ្កើងរបស់ព្រះយេហូវ៉ា!—របាក្សត្រទី១ ២៩:១៣