ហេតុអ្វីយើងត្រូវបន្តផ្សព្វផ្សាយ?
១ តើសហគមន៍របស់អ្នកបានត្រូវគេផ្សព្វផ្សាយតាំងពីយូរមកហើយទេ? (ម៉ាថ. ២៤:១៤) ប្រសិនបើដូច្នេះមែន អ្នកប្រហែលជានឹកស្មានថាតំបន់ផ្សាយរបស់ក្រុមជំនុំអ្នកបានត្រូវផ្សព្វផ្សាយសព្វគ្រប់រួចរាល់អស់ហើយ។ ឥឡូវប្រហែលជាពេលអ្នកទៅផ្សព្វផ្សាយ មនុស្សភាគច្រើនហាក់បីដូចជាព្រងើយកន្តើយនឹងសារព្រះរាជាណាចក្រហើយមើលទៅ។ ទោះជាយ៉ាងណាក៏ដោយ សូមកត់សម្គាល់នូវអ្វីដែលទំព័រទី១៤១ក្នុងសៀវភៅភាសាអង់គ្លេសចំណងជើងថាបទទំនាយរបស់លោកអេសាយក្បាលទី២បានបញ្ជាក់អំពីសិស្សពិតរបស់ព្រះយេស៊ូ។ «នៅកន្លែងខ្លះ លទ្ធផលនៃកិច្ចបំរើផ្សាយរបស់គេប្រហែលជាមើលទៅដូចជាតិចទេ បើប្រៀបធៀបទៅនឹងការព្យាយាមនិងការនឿយហត់របស់គេនោះ។ យ៉ាងណាក៏ដោយ ពួកគេនៅតែស៊ូព្យាយាម»។ ក៏ប៉ុន្តែ ហេតុអ្វីយើងត្រូវបន្តផ្សព្វផ្សាយ?
២ ចូរនឹកចាំអំពីលោកយេរេមា: ការតស៊ូព្យាយាមរបស់យើងក្នុងកិច្ចផ្សព្វផ្សាយមិនគួរអាស្រ័យទៅលើមនុស្សស្ដាប់ឬមិនស្ដាប់នោះទេ។ យេរេមា បានផ្សព្វផ្សាយអស់៤០ឆ្នាំនៅតំបន់ដដែល ទោះបីជាមនុស្សតែបន្ដិចបន្តួចបានស្ដាប់គាត់ ហើយទោះជាមនុស្សជាច្រើនបានប្រឆាំងនឹងគាត់ក៏ដោយ។ ហេតុអ្វីបានជាយេរេមាខំតស៊ូព្យាយាមដូច្នេះ? ពីព្រោះគាត់ចង់បំពេញកិច្ចការដែលព្រះបានបញ្ជាឲ្យគាត់ធ្វើ។ មួយទៀត គាត់ដឹងរួចហើយអំពីអ្វីដែលនឹងកើតឡើងនាពេលអនាគត ហើយនេះក៏បានជំរុញចិត្តគាត់ឲ្យចង់ផ្សព្វផ្សាយដែរ។—យេ. ១:១៧; ២០:៩
៣ កាលៈទេសៈរបស់យើងគឺស្រដៀងគ្នាដែរ។ ព្រះយេស៊ូបាន«ផ្ដាំមកយើងរាល់គ្នា ឲ្យប្រកាសប្រាប់ដល់បណ្ដាជនទាំងឡាយ ហើយឲ្យធ្វើបន្ទាល់សព្វគ្រប់ថា គឺព្រះអង្គនេះហើយ ដែលព្រះបានតាំងឡើង ឲ្យជំនុំជំរះដល់ទាំងមនុស្សរស់ នឹងមនុស្សស្លាប់ផង»។ (កិច្ច. ១០:៤២) សារដែលយើងផ្សព្វផ្សាយគឺជារឿងជីវិតស្លាប់រស់ដល់អ្នកដែលឮ។ មនុស្សនឹងត្រូវជំនុំជំរះដោយផ្អែកលើហេតុដែលថា គេបានស្ដាប់តាមឬមិនស្ដាប់តាមដំណឹងល្អប៉ុណ្ណោះ។ ហេតុនេះហើយ យើងមានភារកិច្ចធ្វើតាមអ្វីដែលយើងត្រូវបញ្ជាឲ្យធ្វើនោះ។ សូម្បីតែពេលមនុស្សមិនព្រមស្ដាប់ នេះឲ្យយើងមានឱកាសបង្ហាញជម្រៅចិត្តនៃសេចក្ដីស្រឡាញ់ចំពោះមនុស្សនិងភាពស្មោះត្រង់របស់យើងចំពោះព្រះយេហូវ៉ា ដោយស៊ូព្យាយាមបំពេញភារកិច្ចរបស់យើង។ ក៏ប៉ុន្តែ នៅមានហេតុផ្សេងទៀត។
៤ យើងទទួលប្រយោជន៍: មិនថាមនុស្សក្នុងតំបន់ផ្សាយស្ដាប់ឬមិនស្ដាប់តាមយើងក៏ដោយ ប្រសិនជាយើងធ្វើតាមព្រះហឫទ័យរបស់ព្រះនោះ យើងមានអារម្មណ៍សុខស្រួល មានការពេញចិត្ត និងមានសុភមង្គលដែលយើងមិនអាចទទួលបានពីប្រភពណាផ្សេងទៀតឡើយ។ (ទំនុក. ៤០:៨) ជីវិតរបស់យើងចាប់ផ្ដើមមានគោលបំណងពិត។ ពេលយើងចូលរួមកិច្ចបំរើផ្សាយកាន់តែច្រើននោះ ចិត្តគំនិតរបស់យើងត្រូវផ្ចង់ទៅលើសេចក្ដីសង្ឃឹមនិងអំណរនៃការរស់ក្នុងពិភពលោកថ្មីរបស់ព្រះ។ ការរំពឹងគិតអំពីសេចក្ដីសន្យាទាំងនេះក្នុងបទគម្ពីរ ជួយបង្កើនភាពខាងវិញ្ញាណរបស់យើងហើយធ្វើឲ្យយើងមានទំនាក់ទំនងកាន់តែជិតស្និទ្ធជាមួយព្រះយេហូវ៉ា។
៥ សូម្បីតែពេលយើងមិនអាចមើលឃើញលទ្ធផលភ្លាមៗពីកិច្ចផ្សព្វផ្សាយរបស់យើងក៏ដោយ ប្រហែលជាសេចក្ដីពិតខ្លះៗបានជ្រួតជ្រាបក្នុងចិត្តរបស់អ្នកស្ដាប់ ហើយក្រោយមកតាមពេលកំណត់របស់ព្រះយេហូវ៉ា ពូជនៃសេចក្ដីពិតនោះអាចដុះដាលឡើង។ (យ៉ូន. ៦:៤៤; ១កូ. ៣:៦) គ្មានយើងណាម្នាក់ទេដែលអាចដឹងថា មនុស្សប៉ុន្មាននាក់ទៀតនឹងរៀនអំពីព្រះរាជាណាចក្រ តាមរយៈការព្យាយាមរបស់រាស្ត្រនៃព្រះយេហូវ៉ានៅតាមតំបន់យើងឬក៏កន្លែងផ្សេងទៀតទូទាំងពិភពលោក។
៦ យើងត្រូវអនុវត្តជាបន្ទាន់លើសជាងមុនៗទៀត នូវសេចក្ដីបង្គាប់របស់ព្រះយេស៊ូដែលថា៖ «ចូរប្រុងប្រយ័ត ឲ្យចាំយាម ហើយអធិស្ឋានផង ដ្បិតអ្នករាល់គ្នាមិនដឹងពេលកំណត់នោះទេ។ ឯសេចក្ដីដែលខ្ញុំប្រាប់ដល់អ្នករាល់គ្នានេះ នោះខ្ញុំក៏ប្រាប់ដល់មនុស្សទាំងអស់ដែរ គឺថា ចូរចាំយាមចុះ!»។ (ម៉ាកុស ១៣:៣៣, ៣៧) ដូច្នេះ ចូរឲ្យយើងទាំងអស់គ្នាបន្តប្រកាសប្រាប់ដំណឹងល្អអំពីព្រះរាជាណាចក្រ ព្រមទាំងធ្វើឲ្យព្រះយេហូវ៉ាមានព្រះទ័យរីករាយនឹងយើង ពេលដែលយើងបង្ហាញថាព្រះនាមដ៏ឧត្តុង្គឧត្តមនិងបរិសុទ្ធរបស់ទ្រង់គឺវិសុទ្ធ។