«ចូរធ្វើចុះ!»
១ នៅគ្រាមួយ ព្រះយេស៊ូបានមានបន្ទូលនឹងសិស្សរបស់ទ្រង់អំពីអាពាហ៍ពិពាហ៍ ហើយព្រះយេស៊ូបានសំដៅទៅលើការដែលនៅលីវ គឺជា‹អំណោយទាន›មួយ។ បន្ទាប់មក ទ្រង់មានបន្ទូលថា៖ «អ្នកណាដែលអាចធ្វើទៅបាន ចូរធ្វើចុះ!»។ (ម៉ាថ. ១៩:១០-១២, ព.ថ.) ប៉ុន្មានឆ្នាំក្រោយ សាវ័កប៉ុលបានសរសេរអំពីប្រយោជន៍ពីការនៅលីវ ហើយបានលើកទឹកចិត្តអ្នកឯទៀតឲ្យធ្វើតាមគំរូរបស់គាត់ដោយសំរេចចិត្តនៅលីវរហូត។ (១កូ. ៧:៧, ៣៨) បងប្អូនជាច្រើនបាន‹ធ្វើ›តាមមែន គឺដោយសំរេចចិត្តនៅលីវ ហើយពួកគេកំពុងតែសប្បាយនឹងផលប្រយោជន៍ដែលមកពីការដែលនៅលីវ។ តើនេះមានប្រយោជន៍អ្វីខ្លះ?
២ បំរើដោយ«ឥតមានសេចក្ដីណានាំឲ្យទាស់ចិត្តឡើយ»: ប៉ុលបានយល់ដឹងថា បើគាត់នៅលីវ មានន័យថាគាត់អាចបំរើព្រះយេហូវ៉ាដោយ«ឥតមានសេចក្ដីណានាំឲ្យទាស់ចិត្តឡើយ»។ ស្រដៀងគ្នាដែរ សព្វថ្ងៃនេះ បងប្អូនប្រុសម្នាក់ដែលនៅលីវអាចខិតខំបំពេញតម្រូវការដើម្បីចូលសាលាបង្ហាត់ខាងកិច្ចបំរើ ហើយធម្មតាមនុស្សម្នាក់ដែលនៅលីវមានសេរីភាពឲ្យបំរើជាអ្នកត្រួសត្រាយ រៀនភាសាមួយទៀត រើទៅកន្លែងដែលត្រូវការអ្នកផ្សាយច្រើនជាង បំរើនៅបេតអែល ឬទទួលឯកសិទ្ធិពិសេសឲ្យបំរើខាងផ្នែកផ្សេងទៀត។ គាត់ប្រហែលមានពេលទំនេរនិងឱកាសច្រើនជាងដើម្បីសិក្សាផ្ទាល់ខ្លួនយ៉ាងជ្រាលជ្រៅ រំពឹងគិត ហើយទាក់ទងនឹងព្រះយេហូវ៉ាតាមរយៈសេចក្ដីអធិស្ឋានអស់ពីដួងចិត្ត។ ជាធម្មតា មនុស្សម្នាក់ដែលមិនទាន់រៀបការមានពេលទំនេរហើយអាចចំណាយពេលច្រើនជាងក្នុងការជួយអ្នកឯទៀត។ សកម្មភាពទាំងនេះគឺ «សំរាប់ជាប្រយោជន៍ដល់»មនុស្សម្នាក់ដែលនៅលីវ។—១កូ. ៧:៣២-៣៥; កិច្ច. ២០:៣៥
៣ កិច្ចបំរើចំពោះព្រះយេហូវ៉ាដែលឥតមានសេចក្ដីណានាំឲ្យទាស់ចិត្ត អាចនាំឲ្យមានរង្វាន់យ៉ាងបរិបូរ។ បងស្រីម្នាក់ដែលនៅលីវ ហើយបានបំរើព្រះនៅប្រទេសកេនីញ៉ាអស់២៧ឆ្នាំហើយ បានសរសេរថា៖ «គឺមានមិត្តភក្ដិច្រើននិងមានការដែលត្រូវធ្វើជាច្រើន! យើងបានធ្វើកិច្ចការជាមួយគ្នាហើយទៅលេងផ្ទះបងប្អូនរបស់យើង . . . ដោយព្រោះខ្ញុំនៅលីវហើយមានសេរីភាពទៅណាក៏បានតាមចិត្ត ខ្ញុំបានជាប់រវល់ក្នុងកិច្ចបំរើផ្សាយ ហើយដោយការធ្វើដូច្នេះនាំឲ្យខ្ញុំទទួលបានសុភមង្គលយ៉ាងច្រើនក្រៃលែង»។ គាត់និយាយជាបន្តថា៖ «ក្នុងកំឡុងប៉ុន្មានឆ្នាំកន្លងទៅនេះ ទំនាក់ទំនងរបស់ខ្ញុំជាមួយនឹងព្រះយេហូវ៉ាកាន់តែជិតស្និទ្ធរឹតតែខ្លាំងឡើងៗ»។
៤ ការប្រើអំណោយទាននោះយ៉ាងត្រឹមត្រូវ: ព្រះយេស៊ូមានបន្ទូលថា ឆន្ទៈដែលជំរុញឲ្យខ្លួននៅលីវគួរ«ដោយយល់ដល់នគរស្ថានសួគ៌»។ (ម៉ាថ. ១៩:១២) ការនៅលីវក៏ដូចជាអំណោយទានណាផ្សេងទៀតដែរ ដ្បិតអំណោយត្រូវតែប្រើយ៉ាងត្រឹមត្រូវទើបអាចនាំឲ្យមានអំណរហើយទទួលប្រយោជន៍បាន។ ដោយឆ្លៀតយកឱកាសពីការដែលខ្លួននៅលីវ ហើយដោយពឹងទៅលើព្រះយេហូវ៉ាសំរាប់ប្រាជ្ញានិងកម្លាំង មនុស្សជាច្រើនដែលមិនទាន់រៀបការយល់ថា ការដែលនៅលីវ នោះមានប្រយោជន៍ជាច្រើន។