ក្លាហាន តែនៅជាមេត្រី
១ មនុស្សជាច្រើនដែលយើងជួបនៅពេលផ្សព្វផ្សាយ បានបង្ហាញពីជំនឿរបស់ពួកគេ ដែលផ្ទុយពីសេចក្ដីពិតនៃព្រះគម្ពីរ។ ក្នុងខណៈដែលយើងត្រូវផ្សព្វផ្សាយយ៉ាងអង់អាច យើងក៏ត្រូវ«នៅជាមេត្រីនឹងមនុស្សទាំងអស់» និងគួរជៀសវាងពីការដែលធ្វើឲ្យគេអាក់អន់ចិត្ត។ (រ៉ូម ១២:១៨; កិច្ច. ៤:២៩) ពេលយើងប្រកាសផ្សាយសារព្រះរាជាណាចក្រ តើយើងអាចរក្សាភាពក្លាហានដោយនៅជាមេត្រីនឹងមនុស្សទាំងអស់យ៉ាងដូចម្ដេច?
២ ចូររិះរកចំណុចដែលស្របគ្នា: អ្នកដែលចង់នៅជាមេត្រីជាមួយមនុស្សទាំងអស់ប្រយ័ត្នមិនជជែកយកឈ្នះចាញ់ទេ។ បើយើងប្រកែកជាមួយម្ចាស់ផ្ទះនៅពេលដែលគេប្រកាន់ជំនឿខ្លាំង នោះមិនងាយឲ្យគេស្ដាប់សាររបស់យើងឡើយ។ បើគាត់អះអាងខុស ប្រហែលជាយើងលើកចំណុចមួយឡើង ដែលមើលទៅគាត់អាចយល់ស្រប។ ដោយបញ្ជាក់ពីអ្វីដែលយល់ស្របគ្នានោះបណ្ដាលឲ្យគាត់លែងមានគំនិតមិនល្អពីយើង ហើយធ្វើឲ្យគាត់ចាប់អារម្មណ៍វិញ។
៣ បើយើងមិនអើពើនឹងទស្សនៈខុសឆ្គងរបស់ម្ចាស់ផ្ទះ តើនេះមានន័យថាយើងសម្រុះសម្រួលឬយើងធ្វើឲ្យសេចក្ដីពិតលែងមានទម្ងន់វិញ? អត់ទេ! កាតព្វកិច្ចជាគ្រិស្តសាសនិកគឺដើម្បីផ្សព្វផ្សាយសារព្រះរាជាណាចក្ររបស់ព្រះ មិនមែនសម្រាប់បដិសេធគ្រប់ការភាន់ច្រឡំដែលយើងជួបប្រទះឡើយ។ (ម៉ាថ. ២៤:១៤) ជាជាងច្រឡោតពេលគេបញ្ចេញទស្សនៈមិនត្រឹមត្រូវ យើងអាចយកឱកាសនោះស្វែងយល់ពីគំនិតរបស់ម្ចាស់ផ្ទះវិញ។—សុ. ១៦:២៣
៤ ចូរជៀសវាងការបន្តុះបង្អាប់: មានពេលដែលយើងត្រូវតែអង់អាចនិងក្លាហានដើម្បីបដិសេធសេចក្ដីបង្រៀនមិនពិត។ យ៉ាងណាក៏ដោយ យើងដែលនៅជាមេត្រីទប់មិននិយាយចំអកឬប្រើពាក្យមើលងាយដើម្បីពណ៌នាពីអស់អ្នកដែលជឿនិងបង្រៀនសេចក្ដីមិនពិតទេ។ ចិត្តគំនិតជាអ្នកប្រកាន់ឫកធ្វើឲ្យមនុស្សជៀសឆ្ងាយពីយើង ក៏ប៉ុន្តែរបៀបរបបរាបទាបនិងចិត្តល្អទាក់ទាញទឹកចិត្តអស់អ្នកដែលស្រឡាញ់សេចក្ដីពិតទៅវិញ។ ការសម្ដែងការគោរពចំពោះអ្នកស្ដាប់និងសេចក្ដីជំនឿរបស់ពួកគាត់ នាំឲ្យយើងជៀសវាងនិយាយបន្តុះបង្អាប់ ហើយជំរុញពួកគាត់ឲ្យងាយស្ដាប់សាររបស់យើងជាង។
៥ សាវ័កប៉ុលយកចិត្តទុកដាក់ដល់សេចក្ដីជំនឿរបស់អស់អ្នកដែលគាត់បានផ្សព្វផ្សាយ និងរកឱកាសប្រាប់ពីសារនៃដំណឹងល្អតាមរបៀបដែលធ្វើឲ្យគេចាប់អារម្មណ៍។ (កិច្ច. ១៧:២២-៣១) គាត់ផ្លាស់ប្ដូរ«គ្រប់សណ្ឋានទាំងអស់ ដល់មនុស្សទាំងអស់»ដោយស្ម័គ្រចិត្ត ប្រយោជន៍ឲ្យ«បានសង្គ្រោះដល់អ្នកខ្លះ ដោយសារសណ្ឋានទាំងនោះ»។ (១កូ. ៩:២២) យើងក៏អាចធ្វើដូចប៉ុលដែរដោយនៅជាមេត្រីនឹងផ្សព្វផ្សាយដំណឹងល្អយ៉ាងក្លាហាន។