សំបុត្រពីការិយាល័យសាខា
ជម្រាបជូនបងប្អូនជាអ្នកផ្សាយរាជាណាចក្ររបស់ព្រះជាទីស្រឡាញ់ :
ដោយការយកចិត្តទុកដាក់ បងប្អូនបានត្រូវលើកទឹកចិត្តឲ្យបំពេញតាមគោលដៅដើម្បីព្យាយាមធ្វើការត្រឡប់ទៅជួប និងយ៉ាងហោចណាស់ដឹកនាំបង្រៀនសិស្សគម្ពីរឲ្យបានម្នាក់។ នៅក្នុងសេចក្ដីរាយការណ៍អំពីកិច្ចផ្សព្វផ្សាយរបស់អ្នកឃើញថាអ្នកពិតជាព្យាយាមខ្នះខ្នែងធ្វើតាមការលើកទឹកចិត្តនេះមែន។ ពេលដែលយើងបានសរសេរសំបុត្រនេះ យើងបានពិនិត្យមើលសេចក្ដីរាយការណ៍អំពីកិច្ចផ្សព្វផ្សាយរបស់បងប្អូនតាំងពីដើមឆ្នាំកិច្ចបម្រើរហូតដល់ខែឧសភា ឆ្នាំ២០០៧ ចំនួនការត្រឡប់ទៅជួបនិងសិស្សគម្ពីរបានឡើងដល់កំពូល : ខែមីនាមានការត្រឡប់ទៅជួប ៥.២០៩ និងខែឧសភាមានសិស្សគម្ពីរ ៧៣៣នាក់។ អ្វីដែលគួរឲ្យរំភើបចិត្តទៅទៀត គឺឆ្នាំនេះមាន១.៣០៥នាក់បានចូលរួមពិធីបុណ្យរំលឹកដែលច្រើនជាងអ្នកផ្សព្វផ្សាយប្រាំដង លើសឆ្នាំមុន២៨០នាក់។ នេះមានន័យថាមានអ្នកចាប់អារម្មណ៍ច្រើនណាស់នៅស្រុកខ្មែរ!
រវាងថ្ងៃទី១៦ ខែតុលា រហូតដល់ថ្ងៃទី១២ ខែវិច្ឆិកា ឆ្នាំ២០០៦ បងប្អូនបានចែកចាយដោយចិត្តសប្បាយនូវសន្លឹកដំណឹងព្រះរាជាណាចក្រ លេខ៣៧ ដែលមានចំណងជើង«សាសនាមិនពិតជិតត្រូវបំផ្លាញហើយ!»។ បងប្អូនក្នុងក្រុមជំនុំខ្លះបានចែកចាយសន្លឹកនោះអស់យ៉ាងឆាប់ ហើយគេបានស្នើសុំបន្ថែមម្ដងហើយម្ដងទៀត។ នេះពិតជាបានលើកទឹកចិត្តមែន!
ក្នុងកិច្ចបម្រើព្រះរាជាណាចក្រយើង សម្រាប់ខែកុម្ភៈ ឆ្នាំ២០០៧មានគោលដៅឲ្យស្រុកខ្មែរមានអ្នកត្រួសត្រាយជំនួយ៤០នាក់នៅខែមេសា។ តើគោលដៅនេះបានសម្រេចឬទេ? ពិតមែន! គឺមានអ្នកផ្សព្វផ្សាយ៤០នាក់សប្បាយរីករាយបានកែប្រែកាលៈទេសៈរបស់ខ្លួនដើម្បីត្រួសត្រាយជំនួយនៅខែនោះ។ ពួកគាត់ពិតជាមានចិត្តគំនិតល្អណាស់! នៅខែមីនា ឆ្នាំ២០០៦មានអ្នកត្រួសត្រាយជំនួយ៣៣នាក់ តាំងពីពេលនោះមកមិនធ្លាប់ឡើងដល់កំពូលដូចខែមេសា ឆ្នាំ២០០៧នេះទេ។ យើងចង់លើកទឹកចិត្តអ្នកឲ្យគិតពីការឈោងចាប់ឯកសិទ្ធិធ្វើជាអ្នកត្រួសត្រាយពេញពេល បើអ្នកអាចរៀបចំកាលៈទេសៈរបស់អ្នកបាន។
ព្រះយេស៊ូមានប្រសាសន៍ថា៖ «ចូរងើបឡើងមើលទៅស្រែមើល ដ្បិតបានក្រហមល្មមច្រូតហើយ»។ (យ៉ូន. ៤:៣៥) ពាក្យនេះមានសារៈសំខាន់នៅសម័យនេះច្រើនជាងមុនៗទៅទៀត។ ពេលដែលអ្នកផ្សព្វផ្សាយជួបមនុស្សចាប់អារម្មណ៍ សូមសរសេរកំណត់ហើយត្រឡប់ទៅជួបគេដោយមានគោលបំណងចាប់ផ្ដើមបង្រៀនគម្ពីរ។ (ម៉ាថ. ២៨:១៩, ២០) យើងមានចិត្តរីករាយនឹងសហការជាមួយអ្នកក្នុងកិច្ចការដ៏សំខាន់នេះ សូមផ្ញើសេចក្ដីស្រឡាញ់ជាគ្រិស្តសាសនិក។
ពីបងប្អូនរបស់អ្នក
ការិយាល័យសាខានៅប្រទេសជប៉ុន