ចូរសម្រាលទុក្ខអស់អ្នកដែលសោកសង្រេង
១ គ្មានគ្រាណាមួយក្នុងប្រវត្ដិសាស្ត្រមនុស្សជាតិ ដែលត្រូវការការសម្រាលទុក្ខខ្លាំងជាងគ្រានេះទេ។ ដោយធ្វើតាមការដឹកនាំនៃស្តេចរបស់យើងជាព្រះគ្រិស្តយេស៊ូ យើងក៏ខំជួយសម្រាលទុក្ខឬ«ប្រោសមនុស្សដែលមានចិត្តសង្រេង»ដែរ។—អេសា. ៦១:១
២ វិធីសម្រាលទុក្ខ : ដើម្បីសម្រាលទុក្ខមនុស្ស កិច្ចបម្រើផ្សាយរបស់យើងគួរតែមានរបៀបនិយាយដែលលើកទឹកចិត្ត និងមានតុល្យភាព។ កាលណាយើងនិយាយអំពីសេចក្ដីបង្រៀនមិនពិត និងការប្រព្រឹត្តដ៏អាក្រក់ក្នុងពិភពលោកនេះ យើងមិនគួរនិយាយច្រើនពេកទេ ពីព្រោះអ្វីដែលយើងចង់និយាយច្រើនបំផុត គឺអំពីសេចក្ដីពិតក្នុងបទគម្ពីរ និងសេចក្ដីសង្ឃឹមដ៏ល្អទៅលើការសន្យារបស់ព្រះដែលជួយសម្រាលទុក្ខ។ នេះមិនបានសេចក្ដីថា យើងមិនពិគ្រោះអំពីអើម៉ាគេដូនឡើយ។ យើងត្រូវបានបង្គាប់ឲ្យប្រកាសទាំង«ឆ្នាំដែលព្រះយេហូវ៉ាទ្រង់សព្វព្រះហឫទ័យ នឹងពីថ្ងៃដែលព្រះនៃយើងខ្ញុំនឹងសងសឹក» ហើយដើម្បី«ប្រាប់មនុស្សអាក្រក់នោះ ឲ្យលះបង់ផ្លូវអាក្រក់របស់ខ្លួន»។ ក៏ប៉ុន្តែ ការព្រមានអំពីអើម៉ាគេដូន និងលទ្ធផលដ៏រលំរលាយអំពីគ្រានោះ មិនគួរសំខាន់ជាងដំណឹងល្អអំពីរាជាណាចក្ររបស់ព្រះឡើយ។—អេសា. ៦១:២; អេសេ. ៣:១៨; ម៉ាថ. ២៤:១៤
៣ ពីផ្ទះមួយទៅផ្ទះមួយ : មិនជាការចម្លែកទេ ពេលជួបមនុស្សដែលធ្លាក់ទឹកចិត្តដោយសារគេមានជំងឺតម្កាត់ បាត់បង់មនុស្សជាទីស្រឡាញ់ក្នុងសេចក្ដីស្លាប់ ភាពអយុត្ដិធម៌ ឬបញ្ហាលុយកាក់។ ក្នុងនាមជាអ្នកយកតម្រាប់តាមព្រះគ្រិស្ត យើងមានចិត្ត«ក្ដួលអាណិតអាសូរ» និងសម្ដែងចិត្តគំនិតអាណិតមេត្ដាដល់អស់អ្នកដែលយើងជួបក្នុងកិច្ចបម្រើផ្សាយ។ (លូ. ៧:១៣; រ៉ូម ១២:១៥) ទោះបីយើងអានបទគម្ពីរមួយពីរដែលទាក់ទងនឹងបញ្ហានោះក៏ដោយ យើងត្រូវធ្វើជាមនុស្សដែល«ឆាប់នឹងស្ដាប់» ដោយអនុញ្ញាតឲ្យគេប្រាប់អំពីអារម្មណ៍របស់ខ្លួន។ (យ៉ា. ១:១៩) ដោយស្ដាប់គេជាមុន យើងអាចជួយសម្រាលទុក្ខគេបានប្រសើរជាង។
៤ នៅពេលសមរម្យក្នុងការសន្ទនា យើងអាចនិយាយថា «ខ្ញុំចង់បង្ហាញអ្នកពាក្យដ៏លើកទឹកចិត្តពីគម្ពីរ»។ យើងគួរប្រុងប្រយ័ត្នមិនបដិសេធទស្សនៈខុសទាំងអស់ដែលគេប្រហែលប្រាប់យើងទេ។ ផ្ទុយទៅវិញ យើងគួរប្រមូលអារម្មណ៍ទៅលើការផ្ដល់ការលើកទឹកចិត្តនិងការសម្រាលទុក្ខ ដោយប្រើបទគម្ពីរដើម្បីពង្រឹងចិត្តគេ។ ស្តីអំពីរឿងនេះ ប្រសិនបើបុគ្គលណាម្នាក់បង្ហាញចំណាប់អារម្មណ៍ ប្រហែលអ្នកអាចជូនគាត់ខិត្តប័ណ្ណការជួយសម្រាលទុក្ខសម្រាប់មនុស្សក្រៀមក្រំចិត្តមួយសន្លឹក ព្រមទាំងពិនិត្យមើលព័ត៌មានដែលលើកទឹកចិត្តក្នុងខិត្តប័ណ្ណនោះជាមួយគាត់។
៥ ចូររកឱកាសដើម្បីសម្រាលទុក្ខអ្នកឯទៀត : តើអ្នកដឹងអ្នកជិតខាង អ្នករួមការងារ មិត្តរួមថ្នាក់ ឬសមាជិកក្រុមគ្រួសារណាដែលត្រូវការការសម្រាលទុក្ខឬទេ? ចូរព្យាយាមទៅលេងមនុស្សបែបនេះនៅឯផ្ទះគាត់ ដោយមានបំណងសម្រាលទុក្ខពីបទគម្ពីរ។ ដោយដឹងមូលហេតុដែលគេត្រូវការការសម្រាលទុក្ខ នោះអ្នកអាចត្រៀមខ្លួនស្របតាមសេចក្ដីត្រូវការរបស់គាត់។ ដូច្នេះដើម្បីផ្ដល់ការសម្រាលទុក្ខ អ្នកខ្លះបានសរសេរសំបុត្រឬទូរស័ព្ទទៅបុគ្គលនោះ។ សេចក្ដីស្រឡាញ់ពិតចំពោះអ្នកជិតខាង នឹងជំរុញយើងឲ្យសម្ដែងចិត្តអាណិតអាសូរ ហើយផ្ដល់ការសម្រាលទុក្ខជាចាំបាច់ពីបទគម្ពីរ។—លូ. ១០:២៥-៣៧
៦ ពិតមែនហើយ យើងត្រូវបានបង្គាប់ឲ្យសម្រាលទុក្ខអ្នកដែលសោកសង្រេង ធ្វើឲ្យមនុស្សកម្សត់មានចិត្តសប្បាយ ហើយជួយឲ្យពួកគាត់មានសេចក្ដីសង្ឃឹមចំពោះអនាគតដ៏ភ្លឺត្រចះ។ នេះហើយជាការសម្រាលទុក្ខដែលមនុស្សទូទាំងពិភពលោកត្រូវការ។ ដោយនិយាយយ៉ាងរំភើបអំពីអ្វីៗដ៏ល្អដែលព្រះបានសន្យា នោះនឹងនាំឲ្យអ្នកដែលមានចិត្តស្មោះត្រង់ ទទួលការសម្រាលទុក្ខនិងសេចក្ដីសង្ឃឹម។ សូមឲ្យយើងចាំជានិច្ចថា មានសេចក្ដីត្រូវការឲ្យយើងជួយសម្រាលទុក្ខមនុស្សដែលសោកសង្រេង។