យើងរំលើងអ្វីៗដែលចាក់ឫសជ្រៅ
១ អស់ច្រើនសតវត្សរ៍មកហើយ សាតាំងបានប្រើសាសនាមិនពិតនិងការបោកបញ្ឆោត ដើម្បីធ្វើឲ្យគំនិតរបស់មនុស្សជាច្រើនទៅជាងងឹតងងុល។ វាបានបង្កើតលទ្ធិផ្សេងៗ ដូចជាព្រះឯកត្រីអង្គ ព្រលឹងអមតៈនិងភ្លើងនរកជាដើម។ វាធ្វើឲ្យមនុស្សសង្ស័យថា តើមានព្រះជាអ្នកបង្កើត និងព្រះជាអ្នកនិពន្ធគម្ពីរឬអត់? ការប្រកាន់ពូជសាសន៍និងជាតិនិយម គឺជាឧបសគ្គផ្សេងទៀតដែលបញ្ឈប់មនុស្សពីការទទួលយកសេចក្ដីពិត។ (២កូ. ៤:៤) តើយើងអាចរំលាយឬរំលើងជំនឿដែលចាក់ឫសជ្រៅយ៉ាងដូចម្ដេច?—២កូ. ១០:៤, ៥
២ ចូរយល់អារម្មណ៍: មនុស្សដែលកាន់ជំនឿខ្លួនយូរយារមកហើយ ជំនឿនោះក៏ជ្រួតជ្រាបដក់ជាប់យ៉ាងជ្រៅក្នុងចិត្តរបស់ពួកគេ។ អ្នកខ្លះបានកាន់ជំនឿខុសនោះ តាំងពីក្មេងមកម្ល៉េះ។ ដើម្បីជួយមនុស្សបែបនេះ យើងត្រូវនិយាយដោយសុភាពឬដោយការគោរពចំពោះទស្សនៈរបស់ពួកគេ។—១ពេ. ៣:១៥
៣ យើងអាចបង្ហាញការគោរពដល់មនុស្សទាំងនេះ ដោយអនុញ្ញាតឲ្យពួកគេពន្យល់ជំនឿរបស់គេ និងហេតុដែលគេជឿ។ (យ៉ា. ១:១៩) ប្រហែលជាពួកគេជឿយ៉ាងស៊ប់ថាព្រលឹងគឺអមតៈ ពីព្រោះពួកគេមានមនុស្សជាទីស្រឡាញ់បានស្លាប់ ហើយចង់ឃើញមនុស្សជាទីស្រឡាញ់នោះម្ដងទៀត។ ពួកគេក៏ប្រហែលធ្វើបុណ្យណាមួយ ដោយព្រោះពួកគេសប្បាយចិត្តក្នុងការចំណាយពេលជាមួយនឹងក្រុមគ្រួសារ។ ការស្ដាប់អ្វីដែលពួកគេនិយាយអាចជួយយើងឲ្យយល់នូវអារម្មណ៍របស់ពួកគេ និងជួយយើងឲ្យតបឆ្លើយតាមបែបដែលមានប្រសិទ្ធភាព។—សុ. ១៦:២៣
៤ ចូរយកតម្រាប់តាមលោកយេស៊ូ: លោកយេស៊ូបានតាំងគំរូដ៏ល្អបំផុតសម្រាប់យើង ពេលដែលលោកបានតបឆ្លើយនឹងសំណួរពីអ្នកប្រាជ្ញច្បាប់ម្នាក់។ លោកយេស៊ូមិនបានប្រាប់បុរសនោះឲ្យធ្វើអ្វីទេ ដ្បិតបុរសនោះអាចបដិសេធ ដោយសារគាត់បានកាន់ជំនឿនោះយូរមកហើយ។ ផ្ទុយទៅវិញ លោកយេស៊ូបានលើកបញ្ជាក់ពីអ្វីដែលមានចែងក្នុងគម្ពីរ ដោយអញ្ជើញគាត់ឲ្យប្រាប់ពីទស្សនៈខ្លួន និងបានជួយគាត់ឲ្យចេះវែកញែកត្រឹមត្រូវ ដោយប្រើរឿងប្រៀបប្រដូច។—លូ. ១០:២៥-៣៧
៥ បណ្ដាំរបស់ព្រះអាចជួយមនុស្សឲ្យឈប់ជឿលើសេចក្ដីបង្រៀនរបស់សាសនាមិនពិត។ (ហេ. ៤:១២) ដោយចេះអត់ធ្មត់ យើងពន្យល់មនុស្សអំពីសេចក្ដីពិត ដ្បិតនេះអាចជំរុញទឹកចិត្តមនុស្សឲ្យបដិសេធសេចក្ដីបង្រៀនមិនពិត និងទទួលយកសេចក្ដីពិតវិញ ដែលអាចប្រោសឲ្យអ្នកនោះបានរួច។—យ៉ូន. ៨:៣២