តើអ្នកកំពុងប្រើកូនសៀវភៅការពិគ្រោះទេ?
១. តើសាវ័កប៉ុលនិងលោកយេស៊ូបង្រៀនអ្នកដទៃយ៉ាងដូចម្ដេច?
១ សាវ័កប៉ុលបានព្យាយាមក្នុងការ«ជជែកពន្យល់ដល់គេតាមគម្ពីរ» ឬវែកញែកដោយប្រើគម្ពីរ។ (កិច្ច. ១៧:២, ៣; ១៨:១៩) គាត់បានយកតម្រាប់តាមលោកយេស៊ូ ដែលដកស្រង់បទគម្ពីរនិងប្រើរឿងប្រៀបប្រដូចជារឿយៗ ដើម្បីជួយអ្នកស្ដាប់របស់លោកឲ្យយល់អំពីបំណងប្រាថ្នារបស់ព្រះ។ (ម៉ាថ. ១២:១-១២) កូនសៀវភៅរបៀបចាប់ផ្ដើមនិងបន្តការពិគ្រោះគ្នាអំពីព្រះគម្ពីរ ត្រូវបានរៀបចំដើម្បីជួយយើងឲ្យធ្វើដូច្នោះដែរ។
២. តើយើងអាចប្រើកូនសៀវភៅការពិគ្រោះដើម្បីរៀបចំពាក្យផ្ដើមដែលមានប្រសិទ្ធភាពយ៉ាងដូចម្ដេច?
២ ការរៀបចំពាក្យផ្ដើមដែលមានប្រសិទ្ធភាព : កូនសៀវភៅរបៀបចាប់ផ្ដើមនិងបន្តការពិគ្រោះគ្នា មានពាក្យផ្ដើមនៅទំព័រទី២-៧ ដែលអាចនាំឲ្យម្ចាស់ផ្ទះចង់រៀនថែមទៀតអំពីគម្ពីរ។ ដោយសិក្សាហើយប្រើពាក្យផ្ដើមផ្សេងៗដែលមានក្នុងកូនសៀវភៅនេះ ជាពិសេសបើអ្នកផ្សព្វផ្សាយនៅតំបន់ដដែលជាញឹកញយ នោះនឹងជួយអ្នកឲ្យមានវិធីនិយាយផ្សេងៗច្រើនយ៉ាងក្នុងកិច្ចបម្រើផ្សាយ ព្រមទាំងជួយអ្នកឲ្យចេះកែសម្រួលពាក្យផ្សាយ ហើយមានប្រសិទ្ធភាពជាងក្នុងការចាប់ផ្ដើមការសន្ទនាជាមួយម្ចាស់ផ្ទះ។ យើងអាចអានពាក្យផ្ដើមពីកូនសៀវភៅនេះតែម្ដងពេលផ្សព្វផ្សាយតាមទូរស័ព្ទ ឬពេលនិយាយតាមរយៈវិទ្យុទាក់ទងនៅមុខផ្ទះដែលមានការយាមកាមយ៉ាងដិតដល់។
៣. តើមានព័ត៌មានអ្វីនៅទំព័រ៨-១៦ក្នុងកូនសៀវភៅការពិគ្រោះ ដែលនឹងជួយយើងក្នុងកិច្ចបម្រើផ្សាយ?
៣ ការតបឆ្លើយនឹងសម្ដីដែលអាចរារាំងការសន្ទនា : យកល្អបើយើងគិតជាមុនអំពីអ្វីៗដែលម្ចាស់ផ្ទះនៅតំបន់ផ្សាយរបស់យើងប្រហែលជាលើកឡើងដែលអាចរារាំងការសន្ទនា។ ណាមួយទៀត សូមចំណាយពេលពីរបីនាទីមុនទៅផ្សព្វផ្សាយ ដើម្បីពិនិត្យមើលឡើងវិញនូវរបៀបដែលយើងអាចតបឆ្លើយពាក្យសម្ដីដែលអាចរារាំងការសន្ទនានៅទំព័រ៨-១២។ តើនឹងមានម្ចាស់ផ្ទះដែលកាន់ពុទ្ធសាសនា សាសនាហិណ្ឌូ យូដា ឬអ៊ីស្លាមទេ? ប្រសិនបើមាន ព័ត៌មាននៅទំព័រ១២-១៦នឹងពិតជាជួយយើងមែន។
៤. ដោយប្រើកូនសៀវភៅការពិគ្រោះ តើយើងអាចទទួលប្រយោជន៍អ្វីខ្លះ?
៤ ពិតមែន ការប្រើកូនសៀវភៅការពិគ្រោះនាំឲ្យមានពរជាច្រើនណាស់។ ប្រសិនបើយើងចាត់ទុកពេលវេលាដើម្បីរៀបចំពាក្យផ្សាយថ្មីៗ ព្រមទាំងពាក្យផ្ដើមដែលនឹងទាក់ទាញចិត្តម្ចាស់ផ្ទះ នោះយើងនឹងមានចិត្តរំភើបចំពោះការផ្សព្វផ្សាយ។ ការប្រើកូនសៀវភៅនេះមិនពិបាកទេ តែយើងត្រូវព្យាយាមនិងអនុវត្តតាមយោបល់ដែលបានកត់ទុកនោះ។ សូមឲ្យយើងស្គាល់ច្បាស់អំពីពាក្យផ្ដើមដែលមានចំនួន៤០នៅទំព័រ២-៧។ ម្យ៉ាងទៀត នៅទំព័រ៨-១៦ មានរបៀបតបឆ្លើយ៤៧យ៉ាងដែលយើងអាចប្រើដើម្បីបន្តការសន្ទនាជាមួយម្ចាស់ផ្ទះ។ តើអ្នកខំប្រឹងប្រើយោបល់ខ្លះ ជាពិសេសយោបល់ដែលមានប្រសិទ្ធភាពក្នុងការនិយាយជាមួយមនុស្សនៅតំបន់ផ្សាយរបស់អ្នកឬទេ?
៥. ពេលផ្សព្វផ្សាយ តើយើងមានគោលដៅអ្វី?
៥ ពេលយើងផ្សព្វផ្សាយ គោលដៅរបស់យើងគឺមិនមែនដើម្បីយកឈ្នះនឹងប្រកែកជាមួយម្ចាស់ផ្ទះទេ ឬមិនគ្រាន់តែផ្ដល់ព័ត៌មានតែប៉ុណ្ណោះឡើយ។ ផ្ទុយទៅវិញ យើងចង់វែកញែកដោយប្រើគម្ពីរយ៉ាងប៉ិនប្រសប់។ ខណៈដែលយើងប្រើកូនសៀវភៅការពិគ្រោះឲ្យបានយ៉ាងល្អ នោះបង្ហាញថាយើងកំពុងប្រុងប្រយ័ត្ននឹងសេចក្ដីបង្រៀនរបស់យើង។—១ធី. ៤:១៦