តើអ្នកអាចជួយប្ដីឬប្រពន្ធដែលមិនជឿឲ្យទទួលយកសេចក្ដីពិតបានទេ?
១ តើអ្នកផ្សាយខ្លះក្នុងក្រុមជំនុំរបស់អ្នក មានប្ដីឬក៏ប្រពន្ធដែលមិនមែនជាអ្នកជឿឬទេ? បើមានមែន គ្មានអ្វីចម្លែកទេដែលពួកគាត់ចង់ឲ្យគូរបស់ខ្លួនចូលរួមក្នុងការគោរពប្រណិប័តន៍ពិតជាមួយនឹងពួកគាត់ដែរនោះ។ ប៉ុន្តែមិនគ្រាន់តែពួកគាត់ប៉ុណ្ណោះទេដែលចង់ឲ្យអ្នកដែលមិនជឿរៀនសេចក្ដីពិតនោះ។ សមាជិកទាំងអស់ក្នុងក្រុមជំនុំ ក៏មានសេចក្ដីប្រាថ្នាដូចព្រះដែរ គឺថា«ឲ្យមនុស្សគ្រប់ប្រភេទទទួលសេចក្ដីសង្គ្រោះ ហើយមានចំណេះត្រឹមត្រូវអំពីសេចក្ដីពិត»។ (១ធី. ២:៤) តើយើងអាចជួយប្ដីឬប្រពន្ធដែលមិនជឿរបស់អ្នកផ្សាយក្នុងក្រុមជំនុំរបស់យើងយ៉ាងដូចម្ដេច?
២ មុនដំបូង យើងគួរព្យាយាមយល់អំពីទស្សនៈរបស់ប្ដីឬប្រពន្ធដែលមិនជឿសិន។ គូដែលមិនជឿជាច្រើននាក់ស្រឡាញ់ក្រុមគ្រួសារនិងព្យាយាមធ្វើជាប្ដី ប្រពន្ធ ឪពុក ឬម្ដាយដ៏ល្អ។ ពួកគាត់ប្រហែលជាជឿជាក់ទៅលើសាសនាដែលខុសពីយើង។ ពួកគាត់ក៏ប្រហែលជាមិនសូវដឹងអំពីសាក្សីព្រះយេហូវ៉ាទេ ក្រៅពីអ្វីដែលពួកគេធ្លាប់ឮពីពួកម៉ាកដែលប្រកាន់សាសនាឬមិនស្គាល់ការពិតអំពីយើងនោះ។ អ្នកខ្លះអន់ចិត្តដោយសារគូរបស់ពួកគាត់បានយកពេលដែលធ្លាប់នៅជាមួយនឹងក្រុមគ្រួសារមកប្រើគោរពប្រណិប័តន៍ព្រះវិញ។ ដោយយល់ដឹងអំពីរឿងនេះនឹងជួយយើងឲ្យបង្ហាញការគោរព ចិត្តសប្បុរស ហើយជៀសវាងពីការខ្លាចហួសហេតុពេកពេលនៅជិតពួកគាត់។—សុភ. ១៦:២០-២៣
៣ ខំរាប់អានពួកគាត់: នៅមុនដំបូង វិធីដ៏ល្អបំផុតដើម្បីទាក់ទាញចិត្តប្ដីឬប្រពន្ធដែលមិនជឿឲ្យទទួលសេចក្ដីពិត គឺប្រហែលជាតាមរយៈការប្រព្រឹត្តរបស់យើង មិនមែនតាមរយៈការពិគ្រោះអំពីគម្ពីរទេ។ (១ពេ. ៣:១, ២) ដើម្បីសម្រេចគោលបំណងនេះ ការខំរាប់អានអ្នកនោះគឺសំខាន់ណាស់។ បងប្អូនស្រីៗក្នុងក្រុមជំនុំអាចខំរាប់អានប្រពន្ធដែលមិនរួមជំនឿ ហើយបងប្អូនប្រុសៗក៏អាចធ្វើដូច្នេះដែរចំពោះប្ដីដែលមិនរួមជំនឿ។ តើយើងអាចធ្វើដូច្នេះតាមរបៀបណា?
៤ ប្រសិនបើអ្នកមិនទាន់មានឱកាសជួបប្ដីឬប្រពន្ធមិនជឿនោះទេ ប្រហែលជាអ្នកអាចទៅលេងគាត់ ក្រោយពីបានពិភាក្សាជាមួយនឹងគូរបស់ពួកគាត់សិន។ សូមកុំអន់ចិត្តឡើយប្រសិនបើពួកគាត់មិនសូវរាប់អានយើងវិញនោះ។ បើយើងខំរាប់អានគាត់ នោះប្រហែលជាអាចជំរុញឲ្យគាត់មានទស្សនៈល្អជាងចំពោះសាក្សីព្រះយេហូវ៉ា។ (រ៉ូម ១២:២០) បងប្អូនខ្លះដែលមានភាពចាស់ទុំបានអញ្ជើញប្ដីឬប្រពន្ធដែលមិនជឿនិងក្រុមគ្រួសារមកបរិភោគអាហារ ដោយមានបំណងចង់ស្គាល់គ្នាឲ្យបានច្បាស់ជាង ហើយអាចធ្វើឲ្យគាត់ឈប់រើសអើងទៀត។ បងប្អូនទាំងនោះបាននិយាយអំពីចំណាប់អារម្មណ៍របស់គាត់ ជាជាងបង្ខំឲ្យគាត់សន្ទនាជាមួយពួកគេអំពីរឿងសាសនា។ ក្រោយមក ពេលដែលគាត់មានអារម្មណ៍ស្រួលជាងក្នុងការនិយាយជាមួយយើង នោះប្រហែលជាយើងអាចសន្ទនាជាមួយគាត់អំពីបទគម្ពីរបាន។ ម្យ៉ាងទៀត គាត់ប្រហែលជាព្រមទៅកិច្ចប្រជុំរបស់យើងម្ដង ដើម្បីអាចឃើញអ្វីដែលប្រពន្ធឬប្ដីរបស់គាត់កំពុងរៀន ជាពិសេស ដោយសារគាត់ស្គាល់មនុស្សខ្លះក្នុងក្រុមជំនុំរួចមកហើយ។ ទោះជាគាត់មិនទាន់ចង់រៀនគម្ពីរក៏ដោយ យើងច្បាស់ជាអាចសរសើរគាត់ដោយសារបានគាំទ្រនិងផ្គត់ផ្គង់ដល់ប្ដីឬប្រពន្ធដែលជាអ្នកជឿ។
៥ ជាពិសេស ពួកអ្នកចាស់ទុំគួរខំជួយអ្នកមិនរួមជំនឿ ហើយប្រុងប្រៀបផ្សព្វផ្សាយពេលមានឱកាសហុចឲ្យ។ អ្នកមិនរួមជំនឿដែលពីមុនមិនចង់ពិគ្រោះអំពីគម្ពីរ ប្រហែលជាសុខចិត្តស្ដាប់បទគម្ពីរខ្លះៗដែលលើកទឹកចិត្ត ពេលដែលគាត់នៅក្នុងមន្ទីរពេទ្យ ឬពេលដែលជួបប្រទះបញ្ហាធ្ងន់ធ្ងរខាងសុខភាព។ បើក្រុមគ្រួសារនោះជួបទុក្ខលំបាកដូចជាសមាជិកក្នុងក្រុមគ្រួសារស្លាប់ នោះអ្នកចាស់ទុំអាចអញ្ជើញប្ដីឬប្រពន្ធដែលមិនជឿឲ្យអង្គុយជាមួយពេលបង្ហាញខគម្ពីរដើម្បីសម្រាលទុក្ខក្រុមគ្រួសារ។
៦ សូមស្រមៃគិតអំពីអំណរដែលបងប្អូនគ្រិស្តសាសនិកក្នុងក្រុមជំនុំនឹងមាន បើប្ដីឬប្រពន្ធដែលមិនជឿព្រមរៀននិងទទួលយកសេចក្ដីពិត! នេះគឺជាគ្រាដ៏សប្បាយ ហើយក៏នាំឲ្យព្រះយេហូវ៉ា ពួកទេវតា និងបងប្អូនក្នុងក្រុមជំនុំរីករាយយ៉ាងខ្លាំង។ (លូក. ១៥:៧, ១០) ទោះជានៅដើមដំបូងអ្នកមិនជឿនោះមិនសូវចាប់អារម្មណ៍ក៏ដោយ ក៏យើងនៅតែអាចមានអំណរ ព្រោះការបន្តខំព្យាយាមរបស់យើងធ្វើឲ្យព្រះយេហូវ៉ាពេញចិត្ត ដោយសារលោក«មិនចង់ឲ្យអ្នកណាត្រូវបំផ្លាញចោលឡើយ តែចង់ឲ្យមនុស្សទាំងអស់មានឱកាសប្រែចិត្ត»។—២ពេ. ៣:៩
[សំណួរសម្រាប់អត្ថបទសិក្សា]
១. ចំពោះគ្រិស្តសាសនិកដែលមានប្ដីឬប្រពន្ធដែលមិនមែនជាអ្នកជឿ ហេតុអ្វីមិនគ្រាន់តែពួកគាត់ប៉ុណ្ណោះទេដែលចង់ជួយដល់អ្នកដែលមិនជឿឲ្យរៀនអំពីសេចក្ដីពិតនោះ?
២. តើការយល់ដឹងអំពីអារម្មណ៍របស់ប្ដីឬប្រពន្ធដែលមិនរួមជំនឿនឹងជួយយើងយ៉ាងដូចម្ដេច?
៣. តើអ្វីប្រហែលជាវិធីដ៏ល្អបំផុតដើម្បីទាក់ទាញចិត្តប្ដីឬប្រពន្ធដែលមិនរួមជំនឿ?
៤. តើយើងអាចខំរាប់អានប្ដីឬប្រពន្ធដែលមិនរួមជំនឿតាមរបៀបណា?
៥. តើពួកអ្នកចាស់ទុំអាចខំជួយអ្នកមិនជឿយ៉ាងដូចម្ដេច?
៦. តើមានមូលហេតុអ្វីខ្លះដែលយើងគួរខំជួយប្ដីឬប្រពន្ធដែលមិនជឿ?
[រូបភាពនៅទំព័រ៦]
នៅមុនដំបូង វិធីដ៏ល្អបំផុតដើម្បីទាក់ទាញចិត្តប្ដីឬប្រពន្ធដែលមិនជឿឲ្យទទួលសេចក្ដីពិត គឺប្រហែលជាតាមរយៈការប្រព្រឹត្តរបស់យើង មិនមែនតាមរយៈការពិគ្រោះអំពីគម្ពីរទេ