របៀបប្រើឯកសារជាសំឡេង
១. ក្រៅពីឯកសារសម្រាប់អាន តើមានឯកសារអ្វីទៀតដែលផ្ដល់ប្រយោជន៍ដល់យើង?
១ មនុស្សជាច្រើនចូលចិត្តប្រើគេហទំព័រjw.org ដើម្បីអានពាក្យពីរោះៗ និងពាក្យត្រឹមត្រូវនៃសេចក្ដីពិត។ (សាស្ដ. ១២:១០) ប៉ុន្តែ តើអ្នកធ្លាប់ប្រើឯកសារជាសំឡេងឬទេ? ឯកសារជាសំឡេងទាំងនេះមានព័ត៌មានយ៉ាងច្រើនដែលយើងអាចស្ដាប់ក្នុងគេហទំព័ររបស់យើង។ តើយើងអាចទាញយកប្រយោជន៍អ្វីខ្លះពីឯកសារជាសំឡេង?
២. តើយើងអាចប្រើឯកសារជាសំឡេងសម្រាប់ការសិក្សាផ្ទាល់ខ្លួននិងជាក្រុមគ្រួសារយ៉ាងដូចម្ដេច?
២ សម្រាប់ការសិក្សាផ្ទាល់ខ្លួននិងជាក្រុមគ្រួសារ: ការស្ដាប់ឯកសារជាសំឡេង ដូចជាអំណានគម្ពីរ ទស្សនាវដ្ដី ឬសៀវភៅណាមួយ ពេលដែលយើងធ្វើដំណើរ ឬពេលធ្វើកិច្ចការប្រចាំថ្ងៃ អាចជួយយើងប្រើពេលវេលាដែលយើងមានឲ្យបានប្រយោជន៍ច្រើនបំផុត។ (អេភ. ៥:១៥, ១៦) យើងអាចធ្វើអ្វីបន្ថែមទៀតក្នុងការគោរពប្រណិប័តន៍ជាក្រុមគ្រួសារ ដោយស្ដាប់អំណានពីសៀវភៅណាមួយ ហើយផ្ទៀងតាមក្នុងសៀវភៅរបស់យើង។ ការប្រើឯកសារជាសំឡេងក្នុងអំឡុងពេលយើងសិក្សាផ្ទាល់ខ្លួនគឺមានប្រយោជន៍ ជាពិសេសបើយើងចង់បង្កើនគុណភាពនៃការអានរបស់យើង ឬរៀនភាសាថ្មីមួយ។
៣. តើអ្នកណាខ្លះក្នុងតំបន់ផ្សាយរបស់យើងអាចទទួលប្រយោជន៍ពីឯកសារជាសំឡេង?
៣ សម្រាប់កិច្ចបម្រើផ្សាយ: មនុស្សក្នុងតំបន់ផ្សាយរបស់យើងដែលគិតថាខ្លួនរវល់ពេកគ្មានពេលអាន ប្រហែលជាសុខចិត្តស្ដាប់ឯកសារជាសំឡេងក៏មិនដឹង។ ម្យ៉ាងទៀត យើងប្រហែលជាអាចជួបអ្នកដែលនិយាយភាសាផ្សេង និងអ្នកដែលទំនងជាចាប់អារម្មណ៍ បើពួកគេឮដំណឹងអំពីរាជាណាចក្រព្រះជា«ភាសារបស់ពួកគេរៀងៗខ្លួន»។ (សកម្ម. ២:៦-៨) នៅប្រទេសខ្លះ ការស្ដាប់គឺជាផ្នែកសំខាន់មួយនៃវប្បធម៌។ ជាឧទាហរណ៍ ក្នុងវប្បធម៌ជនជាតិម៉ុង ពួកគេមានទម្លាប់រៀបរាប់ប្រាប់ប្រវត្ដិសាស្ត្ររបស់ពួកគេពីមាត់មួយទៅមាត់មួយ តៗគ្នាដល់មនុស្សតំណក្រោយ ហើយពួកគេចងចាំយ៉ាងល្អនូវព័ត៌មានដែលពួកគេបានឮ។ រីឯវប្បធម៌ជាច្រើននៅទ្វីបអាហ្វ្រិកវិញ មនុស្សចូលចិត្តរៀនតាមរយៈការស្ដាប់រឿងនិទាន។
៤. តើយើងអាចសួរខ្លួននូវសំណួរអ្វីខ្លះ ស្តីអំពីការជួយមនុស្សក្នុងតំបន់ផ្សាយ?
៤ ក្នុងតំបន់ផ្សាយរបស់អ្នក តើការចាក់ឯកសារជាសំឡេងឲ្យម្ចាស់ផ្ទះស្ដាប់ជាភាសារបស់គាត់មានប្រយោជន៍ឬទេ? តើបុគ្គលម្នាក់អាចទទួលប្រយោជន៍ពីឯកសារសំឡេងនៃសៀវភៅមួយដែលយើងផ្ញើដល់គាត់តាមអ៊ីម៉ែលឬទេ? តើយើងអាចថតចម្លងឯកសារសំឡេងនៃសៀវភៅណាមួយចូលទៅក្នុងស៊ីឌីសម្រាប់ជូនម្ចាស់ផ្ទះដែលចាប់អារម្មណ៍ ហើយអ្នកអាចស្នើផ្ដល់ជាមួយនឹងសៀវភៅឬទេ? ឯកសារទាំងនោះមានជាសៀវភៅ សៀវភៅស្តើង ទស្សនាវដ្ដី ឬជាខិត្តប័ណ្ណ។ ឧទាហរណ៍ បើយើងថតចម្លងឯកសារសំឡេងនៃសៀវភៅមួយទាំងមូលជូនអ្នកណាម្នាក់ក្នុងកិច្ចបម្រើផ្សាយ យើងក៏អាចរាប់បញ្ចូលឯកសារសំឡេងនោះជាសៀវភៅមួយក្បាលក្នុងរបាយការណ៍កិច្ចបម្រើផ្សាយបានដែរ។ ឯកសារជាសំឡេងបានត្រូវរៀបចំឡើងដើម្បីប្រើក្នុងការសិក្សាផ្ទាល់ខ្លួន និងដើម្បីសាបព្រោះគ្រាប់ពូជនៃសេចក្ដីពិតអំពីរាជាណាចក្រព្រះ។—១កូ. ៣:៦