របៀបរស់នៅជាគ្រិស្តសាសនិក
របៀបទៅជាអ្នកសិក្សាគម្ពីរយ៉ាងខ្នះខ្នែង
តើអ្នកចង់រក្សាភាពស្មោះត្រង់ដូចដានីយ៉ែលទោះជាមានទុក្ខលំបាកឬទេ? ដានីយ៉ែលបានសិក្សាគម្ពីរយ៉ាងខ្នះខ្នែង រួមទាំងទំនាយដ៏ជ្រាលជ្រៅ។ (ដាន. ៩:២) ការសិក្សាគម្ពីរយ៉ាងខ្នះខ្នែងអាចជួយអ្នកឲ្យរក្សាភាពស្មោះត្រង់។ តើតាមរបៀបណា? នោះអាចជួយពង្រឹងជំនឿរបស់អ្នកថាព្រះយេហូវ៉ានឹងធ្វើតាមសេចក្ដីសន្យារបស់លោក។ (យ៉ូស. ២៣:១៤) នោះក៏អាចជួយអ្នកឲ្យស្រឡាញ់ព្រះកាន់តែខ្លាំង ហើយសេចក្ដីស្រឡាញ់នោះនឹងជំរុញចិត្តអ្នកឲ្យធ្វើអ្វីដែលត្រឹមត្រូវ។ (ទំនុក. ៩៧:១០) ប៉ុន្តែ តើអ្នកអាចចាប់ផ្ដើមពីណា? សូមពិចារណាយោបល់ខាងក្រោមនេះ។
តើខ្ញុំគួរសិក្សាអំពីអ្វី? ទម្លាប់ល្អក្នុងការសិក្សារួមបញ្ចូលការរៀបចំសម្រាប់កិច្ចប្រជុំ។ អំណានគម្ពីររាល់សប្ដាហ៍នឹងកាន់តែមានប្រយោជន៍ បើអ្នកលៃពេលដើម្បីស្រាវជ្រាវចំណុចណាដែលអ្នកមិនយល់។ លើសពីនេះទៀត បងប្អូនខ្លះសម្រេចចិត្តរៀនថែមទៀតអំពីទំនាយក្នុងគម្ពីរ ផលដែលបង្កើតដោយសកម្មពលរបស់ព្រះ ដំណើរជាសាសនទូតរបស់សាវ័កប៉ូល ឬក៏អំពីអ្វីៗដែលព្រះយេហូវ៉ាបានបង្កើត។ បើអ្នកមានចម្ងល់អំពីគម្ពីរ សូមសរសេរទុក ហើយយកធ្វើជាប្រធានបទពេលសិក្សាគម្ពីរលើកក្រោយ។
តើខ្ញុំអាចស្វែងរកព័ត៌មាននៅឯណា? សូមមើលវីដេអូជំនួយស្រាវជ្រាវដើម្បីស្វែងរកចំណេះវិសេស។ ដើម្បីដឹងថាអ្នកចេះស្វែងរកព័ត៌មានឬយ៉ាងណា សូមស្រាវជ្រាវថាតើអ្នកណាជាមហាអំណាចដែលប្រដូចទៅនឹងសត្វសាហាវផ្សេងៗដែលបានត្រូវរៀបរាប់ក្នុងដានីយ៉ែល ជំពូក៧។
តើខ្ញុំគួរចំណាយពេលយូរប៉ុណ្ណាដើម្បីសិក្សាគម្ពីរ? ការសិក្សាជាទៀងទាត់គឺជាកត្ដាសំខាន់ដើម្បីរក្សាចំណងមិត្តភាពជាមួយនឹងព្រះ។ បើចាំបាច់ អ្នកអាចចាប់ផ្ដើមដោយសិក្សារយៈពេលខ្លី ហើយក្រោយមកបន្ដិចម្ដងៗបង្កើនរយៈពេលដែលអ្នកសិក្សា។ ការសិក្សាបណ្ដាំរបស់ព្រះប្រៀបដូចជាការជីករកកំណប់ទ្រព្យ។ ពេលអ្នករកឃើញកំណប់កាន់តែច្រើន អ្នកកាន់តែចង់ជីករកថែមទៀត។ (សុភ. ២:៣-៦) អ្នកនឹងកាន់តែចង់សិក្សាបណ្ដាំរបស់ព្រះ ហើយអ្នកនឹងរក្សាទម្លាប់ជានិច្ចក្នុងការសិក្សាគម្ពីរ។—១ពេ. ២:២
តើសត្វសាហាវក្នុងដានីយ៉ែល ជំពូក៧ ជាតំណាងអ្វី?
សំណួរបន្ថែម:
តើដានីយ៉ែល ៧:៨, ២៤ បានសម្រេចយ៉ាងដូចម្ដេច?
ប្រធានបទសម្រាប់សិក្សាលើកក្រោយ:
តើសត្វសាហាវនៅការបើកបង្ហាញ ជំពូក១៣ ជាតំណាងអ្វី?