របៀបរស់នៅជាគ្រិស្តសាសនិក
តើមិត្តភក្តិតាមអនឡាញរបស់អ្នកជាអ្នកណា?
មិត្តភក្តិគឺជា«មនុស្សដែលស្រឡាញ់រាប់អានគ្នាដោយជិតដិត»។ ជាឧទាហរណ៍ យ៉ូណាថាននិងដាវីឌមានចំណងមិត្តភាពយ៉ាងជិតស្និទ្ធជាមួយគ្នាក្រោយដាវីឌបានសម្លាប់កូលីយ៉ាត។ (១សាំ. ១៨:១) បុរសទាំងពីរនាក់នេះបានបង្ហាញគុណសម្បត្តិផ្សេងៗដែលធ្វើឲ្យពួកគាត់ចង់ក្លាយទៅជាមិត្តភក្ដិនឹងគ្នា។ ដូច្នេះ ចំណងមិត្តភាពរឹងមាំមានមូលដ្ឋានទៅលើចំណេះត្រឹមត្រូវ។ ដើម្បីស្គាល់បុគ្គលម្នាក់ឲ្យបានច្បាស់ យើងត្រូវការពេលវេលានិងការខំប្រឹងព្យាយាម។ ប៉ុន្តែ តាមបណ្ដាញគេហទំព័រដើម្បីទាក់ទងគ្នា គឺងាយស្រួលឲ្យយើងធ្វើជា«មិត្ត»របស់អ្នកណាក៏បាន។ តាមអនឡាញមនុស្សអាចគ្រប់គ្រងទៅលើអ្វីដែលគេនិយាយនិងទស្សនៈរបស់អ្នកឯទៀតចំពោះពួកគេ ហេតុនេះហើយគឺងាយស្រួលឲ្យពួកគេធ្វើពុតជាមនុស្សផ្សេង។ ដូច្នេះ ជាការសំខាន់ណាស់ដែលយើងត្រូវសម្រេចចិត្តដោយប្រុងប្រយ័ត្នពេលជ្រើសរើសមិត្តភក្ដិតាមអនឡាញ។ សូមកុំខ្លាចថាអ្នកនឹងធ្វើឲ្យមនុស្សដែលអ្នកមិនសូវស្គាល់អន់ចិត្តដោយបដិសេធមិនព្រមធ្វើជាមិត្តរបស់ពួកគេនោះឡើយ។ ដោយសារតែអាចមានគ្រោះថ្នាក់ទាំងនេះ អ្នកខ្លះសម្រេចចិត្តមិនប្រើបណ្ដាញគេហទំព័រដើម្បីទាក់ទងគ្នាតែម្ដង។ ប៉ុន្តែ បើអ្នកសម្រេចចិត្តប្រើវា តើអ្នកគួរចងចាំអ្វីខ្លះ?
សូមទស្សនាវីដេអូចូរប្រើអ៊ីនធឺណិតដោយឈ្លាសវៃ រួចឆ្លើយសំណួរដូចតទៅនេះ៖
តើអ្នកគួរពិចារណាអំពីអ្វីខ្លះមុននឹងបង្ហោះពាក្យនិងរូបថតផ្សេងៗ?
ហេតុអ្វីអ្នកគួរជ្រើសរើសមិត្តភក្តិតាមអនឡាញដោយប្រុងប្រយ័ត្ន?
ហេតុអ្វីអ្នកគួរដាក់កម្រិតលើពេលវេលាដែលអ្នកប្រើបណ្ដាញគេហទំព័រដើម្បីទាក់ទងគ្នា?—អេភ. ៥:១៥, ១៦