សំណួរពីយុវវ័យ
តើការល្បីតាមអនឡាញសំខាន់យ៉ាងណា?
យុវវ័យម្នាក់ឈ្មោះអ៊ីឡេន បាននិយាយថា៖«ពេលខ្ញុំឃើញសិស្សរួមថ្នាក់ខ្ញុំ មានអ្នកតាមដាន(follower)តាមអនឡាញរាប់រយនាក់ ខ្ញុំគិតថា‹ឡូយណាស់ ពួកគេល្បីហើយ!›។ ប្រាប់តាមត្រង់ទៅ ខ្ញុំច្រណែនបន្តិចដែរ»។
តើប្អូនធ្លាប់មានអារម្មណ៍បែបនេះទេ? បើមានមែន អត្ថបទនេះអាចជួយប្អូនឲ្យជៀសចេញពីការជាប់អន្ទាក់នៃការចង់ល្បីតាមអនឡាញ។
តើមានគ្រោះថ្នាក់អ្វីខ្លះ?
ក្នុងគម្ពីរនៅសុភាសិត ២២:១ បានរៀបរាប់ថា៖«មានកេរ្តិ៍ឈ្មោះល្អ ប្រសើរជាងមានទ្រព្យមហាសាល»។ ដូច្នេះ មិនមែនអាក្រក់ទេដែលចង់មានកេរ្តិ៍ឈ្មោះល្អឬចង់ឲ្យអ្នកដទៃចូលចិត្ត។
ប៉ុន្តែ ជួនកាលការមានបំណងចង់ឲ្យគេចូលចិត្តនោះគឺខ្លាំងហួសហេតុពេក។ តើអាចមានគ្រោះថ្នាក់ទេ? ប្អូនស្រីអនយ៉ា ដែលមានអាយុ១៦ឆ្នាំបាននិយាយថា៖
«ខ្ញុំបានឃើញសិស្សខ្លះនៅសាលាខ្ញុំធ្វើអ្វីឆ្កួតៗ ដូចជាលោតចុះពីលើអគារជាន់ទី២ ដើម្បីគ្រាន់តែចង់ល្បីប៉ុណ្ណោះ»។
ដើម្បីបានការចាប់អារម្មណ៍ពីមនុស្សស្រករគ្នា អ្នកខ្លះបានធ្វើវីដេអូប្លែកៗបង្ហោះតាមអនឡាញ។ ជាឧទាហរណ៍ យុវវ័យខ្លះបានបង្ហោះវីដេអូបង្ហាញអំពីការញ៉ាំសាប៊ូបោកខោអាវដែលមានសារធាតុពុលដែលមនុស្សធម្មតាមិនហ៊ានធ្វើទេ!
គម្ពីរចែងថា៖«មិនត្រូវធ្វើអ្វីក្នុងបំណង . . . លើកខ្លួនហួសប្រមាណឡើយ»។—ភីលីព ២:៣
សូមពិចារណា៖
តើការល្បីតាមអនឡាញសំខាន់យ៉ាងណាចំពោះប្អូន?
តើប្អូនសុខចិត្តប្រថុយជីវិតឬបង្ខូចសុខភាពខ្លួនដើម្បីទទួលការចាប់អារម្មណ៍និងការពេញចិត្តពីមនុស្សស្រករប្អូនឬ?
«ការស្រមៃចង់ល្បី»
ការព្យាយាមឲ្យបានល្បី មិនតែងតែទាក់ទងនឹងអ្វីដែលប្រថុយគ្រោះថ្នាក់ទេ។ ប្អូនស្រីអ៊ីរីខា ដែលមានអាយុ២២ឆ្នាំ បានកត់សម្គាល់របៀបដែលអ្នកខ្លះបានធ្វើដូចនេះ៖
«អ្នកខ្លះបង្ហោះអ្វីដែលសំខាន់ៗក្នុងជីវិតរបស់ពួកគេ ដើម្បីបង្ហាញថាពួកគេមានមិត្តភក្ដិជិតស្និទ្ធជាច្រើនដែលចំណាយពេលជាទៀងទាត់ជាមួយគ្នា។ នេះធ្វើឲ្យអ្នកឯទៀតគិតថាពួកគេពិតជាល្បីណាស់»។
ប្អូនស្រីខារ៉ាដែលមានអាយុ១៥ឆ្នាំ បាននិយាយថាអ្នកខ្លះបំភាន់អ្នកឯទៀតដើម្បីបានល្បី៖
«ខ្ញុំឃើញមនុស្សខ្លះបង្ហោះរូបថតដែលមើលទៅដូចជាពួកគេកំពុងនៅក្នុងពិធីជប់លៀង តែតាមការពិតពួកគេនៅផ្ទះសោះ»។
ប្អូនប្រុសម៉ាធីយូដែលមានអាយុ២២ឆ្នាំ បានសារភាពថាគាត់បានធ្វើអ្វីដូចនេះ៖
«ខ្ញុំបានបង្ហោះរូបមួយដែលភ្ជាប់ទីតាំងនៅភ្នំអេវើរ៉េស តែតាមពិតខ្ញុំមិនដែលទៅលេងទ្វីបអាស៊ីឡើយ!»។
គម្ពីរចែងថា៖«យើងចង់ធ្វើការទាំងអស់ដោយទៀងត្រង់»។—ហេប្រឺ ១៣:១៨
សូមពិចារណា៖
បើប្អូនប្រើបណ្ដាញគេហទំព័រសម្រាប់ទាក់ទងគ្នា តើប្អូនបង្ហោះរូបថតបន្លំគេដើម្បីឲ្យខ្លួនល្បីឬ?
តើរូបភាពនិងសារដែលប្អូនបង្ហោះឆ្លុះបញ្ចាំងយ៉ាងណាអំពីអ្វីដែលប្អូនឲ្យតម្លៃនិងលក្ខណៈរបស់ប្អូន?
តើការមានអ្នកតាមដាននិងអ្នកចូលចិត្តច្រើនសំខាន់ទេ?
មនុស្សជាច្រើនជឿថា គន្លឹះសំខាន់មួយដើម្បីធ្វើឲ្យល្បីតាមអនឡាញ គឺត្រូវមានចំនួនអ្នកតាមដាននិងអ្នកចូលចិត្តច្រើនលើសលប់។ ប្អូនម៉ាធីយូដែលរៀបរាប់នៅខាងដើម បានសារភាពថាគាត់ធ្លាប់មានអារម្មណ៍បែបនេះ៖
«ខ្ញុំសួរអ្នកឯទៀតថា៖‹តើអ្នកមានចំនួនអ្នកតាមដានប៉ុន្មាននាក់?› ឬ‹តើអ្នកធ្លាប់ទទួលចំនួនអ្នកចូលចិត្តច្រើនបំផុតប៉ុន្មាន?›។ ដើម្បីខ្ញុំអាចមានអ្នកតាមដានកាន់តែច្រើន ខ្ញុំត្រូវចុចfollowអ្នកដែលខ្ញុំមិនដែលស្គាល់ហើយសង្ឃឹមថាពួកគេនឹងfollowមកខ្ញុំវិញ។ ខ្ញុំចាប់ផ្ដើមចង់ល្បី ហើយបណ្ដាញសង្គមធ្វើឲ្យមានអារម្មណ៍ចង់ល្បីកាន់តែខ្លាំងឡើងៗ»។
ការល្បីតាមអនឡាញប្រៀបដូចជាការញ៉ាំស្ករសូកូឡា វាធ្វើឲ្យប្អូនឆ្ងាញ់មាត់មួយភ្លែត តែវានឹងមិនធ្វើឲ្យប្អូនស្កប់ចិត្តនោះទេ
ប្អូនស្រីម៉ារៀដែលមានអាយុ២៥ឆ្នាំ បានសង្កេតឃើញថាមនុស្សខ្លះឲ្យតម្លៃចំពោះខ្លួនឯងដោយផ្អែកទៅលើចំនួនអ្នកតាមដាននិងចំនួនអ្នកចូលចិត្តដែលពួកគេបានទទួល៖
«បើសិនជាក្មេងស្រីម្នាក់បង្ហោះរូបថតរបស់ខ្លួន ហើយក្រោយមកអត់មានអ្នកចូលចិត្តច្រើន គាត់នឹងគិតថាគាត់មិនស្អាតទេ។ តាមពិតនេះជាគំនិតមិនត្រឹមត្រូវ តែមនុស្សជាច្រើនមានទស្សនៈដូចនេះ។ ការគិតដូច្នេះប្រៀបដូចជាពួកគេកំពុងមើលងាយនិងមិនឲ្យតម្លៃខ្លួនឯង»។
គម្ពីរចែងថា៖«កុំឲ្យយើងទៅជាមនុស្សដែលលើកខ្លួនហួសប្រមាណ ដោយបង្កើតឲ្យមានការប្រកួតប្រជែងគ្នា និងដោយឈ្នានីសគ្នាទៅវិញទៅមកឡើយ»។—កាឡាទី ៥:២៦
សូមពិចារណា៖
បើប្អូនប្រើបណ្ដាញសង្គម តើប្អូនឃើញថាវានាំឲ្យប្អូនប្រៀបធៀបខ្លួនជាមួយអ្នកឯទៀតដែរឬទេ?
តើប្អូនចាប់អារម្មណ៍តែចំនួនអ្នកតាមដាន ជាជាងស្វែងរកមិត្តភក្ដិពិតឬ?