អត្ថបទសិក្សា ២០
តើសៀវភៅការបើកបង្ហាញជាប់ទាក់ទងនឹងសត្រូវព្រះយ៉ាងដូចម្ដេច?
«ពួកគេបានប្រមូលស្ដេចទាំងនោះទៅឯកន្លែងដែលភាសាហេប្រឺហៅថាអាម៉ាគេដូន»។—បប. ១៦:១៦
ចម្រៀងលេខ១៥០ ចូរស្វែងរកសេចក្ដីសង្គ្រោះពីព្រះ
សេចក្ដីសង្ខេបa
១. តើសៀវភៅការបើកបង្ហាញប្រាប់យ៉ាងណាអំពីរាស្ត្រព្រះ?
សៀវភៅការបើកបង្ហាញរៀបរាប់ថារាជាណាចក្ររបស់ព្រះនៅស្ថានសួគ៌បានត្រូវចាប់ផ្ដើមគ្រប់គ្រង ហើយថាសាថានបានត្រូវបណ្ដេញចេញពីស្ថានសួគ៌។ (បប. ១២:១-៩) នេះមានន័យថានៅស្ថានសួគ៌មានសេចក្ដីសុខសាន្ត តែមានវេទនាដល់យើង។ ហេតុអ្វី? ពីព្រោះសាថានខឹងយ៉ាងខ្លាំង និងវាយប្រហារពួកអ្នកដែលបម្រើព្រះយេហូវ៉ាយ៉ាងស្មោះត្រង់នៅផែនដី។—បប. ១២:១២, ១៥, ១៧
២. តើអ្វីនឹងជួយយើងឲ្យរក្សាភាពស្មោះត្រង់ចំពោះព្រះយេហូវ៉ា?
២ តើយើងអាចរក្សាភាពស្មោះត្រង់ចំពោះព្រះយេហូវ៉ាយ៉ាងដូចម្ដេច ទោះជាមានការវាយប្រហារពីសាថានក្ដី? (បប. ១៣:១០) អ្វីមួយដែលនឹងជួយយើង គឺការដឹងអំពីអ្វីដែលនឹងកើតឡើងនៅថ្ងៃអនាគត។ ជាឧទាហរណ៍ ក្នុងសៀវភៅការបើកបង្ហាញ សាវ័កយ៉ូហានបានរៀបរាប់អំពីពរខ្លះដែលយើងនឹងទទួលនៅពេលឆាប់ៗនេះ។ ពរមួយគឺថាសត្រូវរបស់ព្រះនឹងត្រូវបំផ្លាញចោល។ ឥឡូវ សូមយើងពិចារណាថា តើសៀវភៅការបើកបង្ហាញរៀបរាប់យ៉ាងណាអំពីពួកសត្រូវទាំងនេះ និងអ្វីដែលនឹងកើតឡើងចំពោះពួកគេ?
«និមិត្តរូប»បានត្រូវប្រើដើម្បីរៀបរាប់អំពីសត្រូវព្រះ
៣. តើមាននិមិត្តរូបអ្វីខ្លះក្នុងសៀវភៅការបើកបង្ហាញ?
៣ ខដំបូងបង្អស់នៃសៀវភៅការបើកបង្ហាញប្រាប់យើងថា ព័ត៌មានក្នុងសៀវភៅនោះបានត្រូវសរសេរជា«និមិត្តរូប»។ (បប. ១:១) ក្នុងសៀវភៅនោះ សត្វសាហាវមួយចំនួនបានត្រូវប្រើជានិមិត្តរូបដើម្បីរៀបរាប់អំពីសត្រូវព្រះ។ ជាឧទាហរណ៍ មាន«សត្វសាហាវមួយឡើងមកពីសមុទ្រ។ សត្វនោះមានស្នែង១០[និង]ក្បាល៧»។ (បប. ១៣:១) បន្ទាប់មក មាន«សត្វសាហាវមួយទៀតឡើងមកពីផែនដី»។ សត្វសាហាវនោះនិយាយដូចនាគ ហើយវា«ធ្វើឲ្យភ្លើងធ្លាក់ពីលើមេឃ»។ (បប. ១៣:១១-១៣) ក្រោយមក មានសត្វសាហាវផ្សេងទៀតដែលមាន«សម្បុរក្រហមឆ្អៅ» ហើយមានស្ត្រីពេស្យាជិះពីលើវា។ សត្វសាហាវទាំងបីនេះជាតំណាងសត្រូវដែលបន្តប្រឆាំងព្រះយេហូវ៉ា និងរាជាណាចក្ររបស់លោកអស់រយៈពេលជាយូរ។ ដូច្នេះ គឺសំខាន់ឲ្យយើងស្គាល់អត្តសញ្ញាណនៃសត្វសាហាវទាំងនេះ។—បប. ១៧:១, ៣
សត្វធំសម្បើមបួនក្បាល
ពួកវា«ចេញពីសមុទ្រមក»។ (ដាន. ៧:១-៨, ១៥-១៧) ពួកវាជាតំណាងមហាអំណាចពិភពលោកដែលបានគ្រប់គ្រងលើរាស្ត្រព្រះ ឬមានឥទ្ធិពលយ៉ាងខ្លាំងលើពួកគេតាំងពីសម័យដានីយ៉ែល។ (សូមមើលវគ្គ៤, ៧)
៤-៥. តើអ្វីដែលបានត្រូវចែងនៅដានីយ៉ែល ៧:១៥-១៧ ជួយយើងឲ្យយល់អំពីអត្ថន័យនៃនិមិត្តរូបទាំងនេះយ៉ាងដូចម្ដេច?
៤ មុនដែលយើងអាចដឹងថាសត្រូវទាំងនេះជាអ្នកណា យើងត្រូវយល់ថាតើសត្វសាហាវផ្សេងៗនិងស្ត្រីពេស្យាជាតំណាងអ្វី។ របៀបដ៏ល្អបំផុតដើម្បីយល់អំពីចំណុចនេះ គឺឲ្យគម្ពីរពន្យល់ដោយផ្ទាល់។ និមិត្តរូបជាច្រើនដែលមាននៅក្នុងសៀវភៅការបើកបង្ហាញ គឺបានពន្យល់រួចហើយនៅក្នុងសៀវភៅផ្សេងទៀតក្នុងគម្ពីរ។ ជាឧទាហរណ៍ ដានីយ៉ែលដែលជាអ្នកប្រកាសទំនាយបានយល់សប្ដិឃើញ«សត្វធំសម្បើមបួនក្បាលចេញពីសមុទ្រមក»។ (ដាន. ៧:១-៣) ដានីយ៉ែលបានកត់ទុកថាសត្វទាំងនេះជាតំណាងអ្វី គឺសត្វធំសម្បើមទាំងបួននោះជាតំណាង«ស្ដេច»ឬរដ្ឋាភិបាលបួន។ (សូមអាន ដានីយ៉ែល ៧:១៥-១៧) ការពន្យល់យ៉ាងច្បាស់នេះជួយយើងឲ្យយល់ថាសត្វសាហាវដែលបានត្រូវរៀបរាប់នៅក្នុងសៀវភៅការបើកបង្ហាញ ក៏ច្បាស់ជាសំដៅទៅលើរដ្ឋាភិបាលដែរ។
៥ ឥឡូវ សូមយើងពិចារណាអំពីនិមិត្តរូបខ្លះដែលបានត្រូវរៀបរាប់នៅក្នុងសៀវភៅការបើកបង្ហាញ។ កាលដែលយើងធ្វើដូច្នេះ យើងនឹងឃើញអំពីរបៀបដែលគម្ពីរជួយយើងឲ្យយល់ថានិមិត្តរូបទាំងនេះមានន័យយ៉ាងណា។ យើងនឹងចាប់ផ្ដើមដោយពិចារណាអំពីសត្វសាហាវមួយចំនួន។ ដំបូង យើងនឹងកត់សម្គាល់ថាតើពួកវាជាតំណាងអ្នកណា។ បន្ទាប់មក យើងនឹងឃើញអំពីអ្វីដែលកើតឡើងចំពោះសត្វទាំងនេះ។ ចុងក្រោយ យើងនឹងពិចារណាថាតើព្រឹត្តិការណ៍ទាំងនេះមានន័យយ៉ាងណាចំពោះយើង។
អត្តសញ្ញាណនៃសត្រូវរបស់ព្រះបានត្រូវបើកបង្ហាញ
សត្វសាហាវដែលមានក្បាល៧
វា«ឡើងមកពីសមុទ្រ» ហើយមានក្បាល៧ ស្នែង១០ និងមកុដ១០។ (បប. ១៣:១-៤) វាជាតំណាងរដ្ឋាភិបាលទាំងអស់ដែលបានគ្រប់គ្រងលើមនុស្សរហូតដល់សព្វថ្ងៃនេះ។ ក្បាល៧ជាតំណាងមហាអំណាចពិភពលោក៧ដែលបានគ្រប់គ្រងលើរាស្ត្រព្រះ ឬមានឥទ្ធិពលយ៉ាងខ្លាំងលើពួកគេ។ (សូមមើលវគ្គ៦-៨)
៦. តើសត្វសាហាវដែលមានក្បាល៧នៅការបើកបង្ហាញ ១៣:១-៤គឺជាអ្វី?
៦ តើសត្វសាហាវដែលមានក្បាល៧គឺជាអ្វី? (សូមអាន ការបើកបង្ហាញ ១៣:១-៤) យើងកត់សម្គាល់ថាសត្វសាហាវនេះមើលទៅមានភិនភាគដូចខ្លារខិន តែជើងរបស់វាដូចជើងខ្លាឃ្មុំ មាត់របស់វាដូចមាត់តោ ហើយវាមានស្នែង១០។ សត្វសាហាវបួនដែលបានត្រូវរៀបរាប់ក្នុងសៀវភៅដានីយ៉ែល ជំពូកទី៧ ក៏មានលក្ខណៈទាំងនេះដែរ។ ប៉ុន្តែនៅក្នុងសៀវភៅការបើកបង្ហាញ លក្ខណៈទាំងអស់នេះមាននៅក្នុងសត្វតែមួយ មិនមែនសត្វសាហាវបួនក្បាលផ្សេងៗពីគ្នាទេ។ សត្វសាហាវនេះមិនមែនជាតំណាងរដ្ឋាភិបាលមួយ ឬចក្រភពណាមួយទេ។ គម្ពីររៀបរាប់ថាវាគ្រប់គ្រង«លើគ្រប់កុលសម្ព័ន្ធ គ្រប់ជនជាតិ គ្រប់ភាសា និងគ្រប់ប្រជាជាតិ»។ ដូច្នេះ វាគឺធំជាងរដ្ឋាភិបាលណាមួយទាំងអស់របស់មនុស្សជាតិ។ (បប. ១៣:៧) យ៉ាងនេះ សត្វសាហាវនេះត្រូវជាតំណាងរដ្ឋាភិបាលទាំងអស់ដែលបានគ្រប់គ្រងលើមនុស្សជាតិក្នុងប្រវត្តិសាស្ត្រមនុស្សរហូតដល់សព្វថ្ងៃនេះ។b—អទ. ៨:៩
៧. តើក្បាលនីមួយៗនៃក្បាល៧របស់សត្វសាហាវជាតំណាងអ្វី?
៧ តើក្បាលនីមួយៗនៃក្បាល៧របស់សត្វសាហាវជាតំណាងអ្វី? សៀវភៅការបើកបង្ហាញ ជំពូក១៧ជួយយើងឲ្យយល់អំពីចម្លើយចំពោះសំណួរនេះ។ ជំពូកនោះបានរៀបរាប់អំពីរូបសត្វសាហាវដែលបានពណ៌នានៅការបើកបង្ហាញ ជំពូកទី១៣។ ការបើកបង្ហាញ ១៧:១០ ចែងថា៖ ‹មានស្ដេច៧រូប៖ ស្ដេច៥បានរលំហើយ ស្ដេចមួយនៅមានអំណាច ស្ដេចមួយទៀតមិនទាន់មកដល់ តែកាលមកដល់ហើយ ស្ដេចនោះត្រូវនៅមួយរយៈពេលខ្លីប៉ុណ្ណោះ›។ ក្នុងចំណោមរដ្ឋាភិបាលទាំងអស់ដែលសាថានបានប្រើ មានរដ្ឋាភិបាល៧ដែលបានត្រូវប្រដូចទៅនឹង«ក្បាល» ដោយសារពួកគេមានអំណាចខ្លាំងក្លា។ ពួកគេជាមហាអំណាចដែលបានគ្រប់គ្រងលើរាស្ត្រព្រះ ឬមានឥទ្ធិពលយ៉ាងខ្លាំងលើពួកគេ។ នៅសម័យរបស់សាវ័កយ៉ូហាន ក្បាល៥ក្នុងចំណោមក្បាល៧នោះបានគ្រប់គ្រងរួចហើយ គឺអេហ្ស៊ីប អាស៊ីរី បាប៊ីឡូន មេឌីពើស៊ី និងក្រិច។ រ៉ូមដែលជាមហាអំណាចទី៦ កំពុងគ្រប់គ្រងនៅពេលដែលយ៉ូហានបានទទួលការបើកបង្ហាញឲ្យឃើញក្នុងគំនិតនេះ។ តើមហាអំណាចចុងក្រោយដែលជាក្បាលទី៧ជាតំណាងអ្នកណា?
៨. តើក្បាលទី៧នៃសត្វសាហាវជាតំណាងអ្នកណា?
៨ ឥឡូវ យើងនឹងឃើញថាទំនាយក្នុងសៀវភៅដានីយ៉ែលជួយយើងឲ្យស្គាល់ថា ក្បាលទី៧ដែលជាក្បាលចុងក្រោយនៃសត្វសាហាវគឺជាអ្នកណា។ តើមហាអំណាចណាបានគ្រប់គ្រងក្នុងអំឡុងគ្រាចុងបញ្ចប់នេះ ឬនៅ«ថ្ងៃរបស់លោកម្ចាស់»? (បប. ១:១០) គឺមហាអំណាចដែលរួមមានរដ្ឋាភិបាលដ៏ខ្លាំងក្លាពីរ គឺអង់គ្លេសនិងសហរដ្ឋអាម៉េរិក។ នេះបានត្រូវហៅថាមហាអំណាចអង់គ្លេសអាម៉េរិក។ ដូច្នេះ យើងអាចសន្និដ្ឋានថាមហាអំណាចនេះ គឺជាក្បាលទី៧នៃសត្វសាហាវដែលបានត្រូវរៀបរាប់នៅការបើកបង្ហាញ ១៣:១-៤។
សត្វសាហាវមួយដែលមានស្នែងពីរដូចស្នែងចៀម
វា«ឡើងមកពីផែនដី» ហើយ«និយាយដូចនាគ»។ វាក៏ធ្វើឲ្យ«ភ្លើងធ្លាក់ពីលើមេឃ» និងធ្វើសញ្ញាសម្គាល់ជា«អ្នកប្រកាសទំនាយមិនពិត»។ (បប. ១៣:១១-១៥; ១៦:១៣; ១៩:២០) មហាអំណាចអង់គ្លេសអាម៉េរិកបានត្រូវជាតំណាងដោយសត្វសាហាវដែលមានស្នែងពីរ ដែលបានត្រូវហៅថាជាអ្នកប្រកាសទំនាយមិនពិត ដោយសារវាបំភាន់ពួកអ្នកដែលអាស្រ័យនៅផែនដី ហើយប្រាប់ពួកគេឲ្យ«ធ្វើរូបសត្វសាហាវ»ដែលមានក្បាល៧ និងស្នែង១០។ (សូមមើលវគ្គ៩)
៩. តើសត្វសាហាវដែលមាន«ស្នែងពីរដូចស្នែងចៀម»ជាតំណាងអ្វី?
៩ ការបើកបង្ហាញ ជំពូក១៣ប្រាប់យើងថាក្បាលទី៧នេះដែលជាមហាអំណាចអង់គ្លេសអាម៉េរិក ក៏ប្រព្រឹត្តដូចសត្វសាហាវមួយដែលមាន«ស្នែងពីរដូចស្នែងចៀម តែវាចាប់ផ្ដើមនិយាយដូចនាគ»។ ការបើកបង្ហាញ ជំពូក១៦និង១៩បានរៀបរាប់អំពីសត្វសាហាវនេះថាជា«អ្នកប្រកាសទំនាយមិនពិត»។ (បប. ១៦:១៣; ១៩:២០) ក្នុងការបើកបង្ហាញដែលយ៉ូហានឃើញក្នុងគំនិត សត្វសាហាវនេះ«ធ្វើសញ្ញាសម្គាល់អស្ចារ្យជាច្រើន រហូតដល់ធ្វើឲ្យភ្លើងធ្លាក់ពីលើមេឃមកផែនដី ក្រោមក្រសែភ្នែករបស់មនុស្សទាំងឡាយ»។ (បប. ១៣:១១-១៥) ដានីយ៉ែលបានរៀបរាប់អំពីអ្វីដែលស្រដៀងនឹងនេះ គឺថាមហាអំណាចអង់គ្លេសអាម៉េរិកនឹង«បំផ្លិចបំផ្លាញយ៉ាងសម្បើម»។ (ដាន. ៨:១៩, ២៣, ២៤) នេះបានកើតឡើងមែនក្នុងអំឡុងសង្គ្រាមលោកលើកទី២។ សង្គ្រាមនោះបានត្រូវបញ្ចប់ពេលគ្រាប់បែកបរមាណូពីរគ្រាប់បានត្រូវទម្លាក់លើប្រទេសជប៉ុន។ គ្រាប់បែកទាំងពីរគ្រាប់នោះ បានផលិតឡើងដោយអ្នកវិទ្យាសាស្ត្រអង់គ្លេសនិងអាម៉េរិក។ ដោយផលិតគ្រាប់បែកនេះ មហាអំណាចអង់គ្លេសអាម៉េរិកបានធ្វើឲ្យ«ភ្លើងធ្លាក់ពីលើមេឃមកផែនដី»។
សត្វសាហាវមួយដែលមានសម្បុរក្រហមឆ្អៅ
ស្ត្រីពេស្យាម្នាក់ ពោលគឺបាប៊ីឡូនដ៏ខ្លាំងក្លាកំពុងជិះពីលើវា។ សត្វសាហាវនេះបានត្រូវហៅថាជាស្ដេចទី៨។ (បប. ១៧:៣-៦, ៨, ១១) ដំបូង ស្ត្រីពេស្យានេះបញ្ជាសត្វសាហាវ តែក្រោយមក វាបំផ្លាញនាងចោល។ ស្ត្រីពេស្យានេះជាតំណាងសាសនាមិនពិតទាំងឡាយនៅទូទាំងពិភពលោក។ នៅសព្វថ្ងៃនេះ សត្វសាហាវនេះជាតំណាងអង្គការសហប្រជាជាតិ ដែលជួយជ្រោមជ្រែងជាប្រយោជន៍ដល់ប្រព័ន្ធនយោបាយនៅទូទាំងពិភពលោក។ (សូមមើលវគ្គ១០, ១៤-១៧)
១០. តើ«រូបសត្វសាហាវ»ជាតំណាងអ្វី? (ការបើកបង្ហាញ ១៣:១៤, ១៥; ១៧:៣, ៨, ១១)
១០ បន្ទាប់មក មានសត្វសាហាវមួយទៀត។ សត្វសាហាវនោះស្ទើរតែដូចនឹងសត្វសាហាវដែលមានក្បាល៧ លើកលែងតែវាមានសម្បុរក្រហមឆ្អៅ។ វាបានត្រូវហៅថា«រូបសត្វសាហាវ» ហើយជា«ស្ដេចទី៨»។c (សូមអាន ការបើកបង្ហាញ ១៣:១៤, ១៥; ១៧:៣, ៨, ១១) គម្ពីរចែងថា«ស្ដេច»នេះបានលេចមក បានបាត់ទៅ ហើយក្រោយមកបានលេចមកម្ដងទៀត។ នេះរៀបរាប់យ៉ាងច្បាស់អំពីអង្គការសហប្រជាជាតិដែលជួយជ្រោមជ្រែងជាប្រយោជន៍ដល់ប្រព័ន្ធនយោបាយនៅទូទាំងពិភពលោក! ដំបូង អង្គការនោះបានត្រូវហៅថាអង្គការសម្ព័ន្ធប្រជាជាតិ។ បន្ទាប់មក វាបានបាត់ទៅក្នុងអំឡុងសង្គ្រាមលោកលើកទី២។ ក្រោយមក វាបានបង្កើតឡើងម្ដងទៀតជាអង្គការសហប្រជាជាតិ។
១១. តើសត្វសាហាវធ្វើអ្វី ហើយហេតុអ្វីយើងមិនចាំបាច់ភ័យខ្លាចពួកវា?
១១ សត្វសាហាវទាំងនោះឬរដ្ឋាភិបាល នឹងប្រើការឃោសនាដើម្បីលើកទឹកចិត្តមនុស្សឲ្យប្រឆាំងព្រះយេហូវ៉ានិងរាស្ត្រលោក។ យ៉ូហានបាននិយាយថា គឺហាក់ដូចជាពួកគេនឹងប្រមូល«ស្ដេចទាំងឡាយនៅគ្រប់ទីអាស្រ័យនៅផែនដី»ដើម្បីសង្គ្រាមអាម៉ាគេដូន ដែលជា«ថ្ងៃដ៏ធំរបស់ព្រះដែលមានឫទ្ធានុភាពខ្លាំងក្លាបំផុត»។ (បប. ១៦:១៣, ១៤, ១៦) ប៉ុន្តែ យើងនឹងមិនចាំបាច់ភ័យខ្លាចអ្វីឡើយ។ ព្រះយេហូវ៉ាដែលជាព្រះដ៏ឧត្តុង្គឧត្តមរបស់យើងនឹងចាត់វិធានការភ្លាមៗ ដើម្បីសង្គ្រោះអស់អ្នកដែលគាំទ្រការគ្រប់គ្រងរបស់លោក។—អេគ. ៣៨:២១-២៣
១២. តើអ្វីនឹងកើតឡើងចំពោះសត្វសាហាវទាំងអស់នេះ?
១២ តើអ្វីនឹងកើតឡើងចំពោះសត្វសាហាវទាំងអស់នេះ? ការបើកបង្ហាញ ១៩:២០ឆ្លើយថា៖ «សត្វសាហាវបានត្រូវចាប់ រួមទាំងអ្នកប្រកាសទំនាយមិនពិតដែលបានធ្វើសញ្ញាសម្គាល់ក្រោមក្រសែភ្នែកសត្វនោះ ដែលបានបំភាន់ពួកអ្នកដែលបានទទួលសញ្ញានៃសត្វសាហាវ និងពួកអ្នកដែលគោរពប្រណិប័តន៍រូបសត្វសាហាវនោះ។ កាលដែលនៅរស់នៅឡើយ ពួកគេទាំងពីរបានត្រូវបោះទៅក្នុងបឹងដែលឆេះដោយភ្លើងនិងស្ពាន់ធ័រ»។ ដូច្នេះ កាលដែលរដ្ឋាភិបាលដែលជាសត្រូវរបស់ព្រះកំពុងគ្រប់គ្រងនៅឡើយ ពួកគេនឹងត្រូវបំផ្លាញចោលជារៀងរហូត។
១៣. តើគ្រិស្តសាសនិកមានបញ្ហាអ្វីដោយសាររដ្ឋាភិបាលក្នុងពិភពលោកនេះ?
១៣ តើនេះជាប់ទាក់ទងយ៉ាងណានឹងយើង? ក្នុងនាមជាគ្រិស្តសាសនិក យើងត្រូវមានភក្ដីភាពចំពោះព្រះនិងរាជាណាចក្ររបស់លោក។ (យ៉ូន. ១៨:៣៦) ដើម្បីធ្វើដូច្នេះ យើងត្រូវរក្សាអព្យាក្រឹតភាពក្នុងរឿងនយោបាយរបស់ពិភពលោកនេះ។ ប៉ុន្តែ ការរក្សាអព្យាក្រឹតភាពបែបនេះអាចជាការពិបាកណាស់ ដោយសាររដ្ឋាភិបាលរបស់ពិភពលោកចង់ឲ្យយើងគាំទ្រពួកគេតាមរយៈពាក្យសម្ដីនិងការប្រព្រឹត្តរបស់យើង។ ពួកអ្នកដែលចុះចាញ់នឹងការបង្ខំរបស់ពួកគេ ទទួលសញ្ញារបស់សត្វសាហាវ។ (បប. ១៣:១៦, ១៧) ព្រះយេហូវ៉ាមិនពេញចិត្តនឹងអស់អ្នកដែលទទួលសញ្ញានោះ ហើយអ្នកទាំងនោះនឹងមិនទទួលជីវិតដែលគ្មានទីបញ្ចប់ឡើយ។ (បប. ១៤:៩, ១០; ២០:៤) ដូច្នេះ គឺសំខាន់ណាស់ដែលយើងរក្សាអព្យាក្រឹតភាពទាំងស្រុង មិនថារដ្ឋាភិបាលព្យាយាមបង្ខំយើងឲ្យគាំទ្រពួកគេយ៉ាងណាក្ដី!
ទីបញ្ចប់ដ៏គួរឲ្យអាម៉ាស់ចំពោះមេស្ត្រីពេស្យា
១៤. ដូចដែលបានរៀបរាប់នៅការបើកបង្ហាញ ១៧:៣-៥ តើសាវ័កយ៉ូហានភ្ញាក់ផ្អើលចំពោះអ្វី?
១៤ សាវ័កយ៉ូហានរៀបរាប់ថា គាត់«ភ្ញាក់ផ្អើលខ្លាំងណាស់»ចំពោះអ្វីមួយទៀតដែលគាត់បានឃើញ។ តើនេះជាអ្វី? គឺស្ត្រីម្នាក់ជិះលើសត្វសាហាវមួយ។ (បប. ១៧:១, ២, ៦) នាងមើលដូចជា«មេស្ត្រីពេស្យា» ហើយបានត្រូវហៅថា«បាប៊ីឡូនដ៏ខ្លាំងក្លា»។ នាងប្រព្រឹត្ត«អំពើប្រាសចាកសីលធម៌ខាងផ្លូវភេទជាមួយនឹងស្ដេចនានានៅផែនដី»។—សូមអាន ការបើកបង្ហាញ ១៧:៣-៥
១៥-១៦. តើ«បាប៊ីឡូនដ៏ខ្លាំងក្លា»ជាអ្នកណា ហើយហេតុអ្វីយើងដឹងដូច្នេះ?
១៥ តើអ្នកណាជា«បាប៊ីឡូនដ៏ខ្លាំងក្លា»? ស្ត្រីនេះមិនអាចជាតំណាងអង្គការនយោបាយបានទេ ដោយសារសៀវភៅការបើកបង្ហាញរៀបរាប់ថានាងប្រព្រឹត្តអំពើប្រាសចាកសីលធម៌ជាមួយពួកអ្នកដឹកនាំនយោបាយ។ (បប. ១៨:៩) តាមពិត នាងហាក់ដូចជាជិះលើពួកគេក្នុងន័យថានាងព្យាយាមកាន់កាប់លើពួកអ្នកគ្រប់គ្រងទាំងនេះ។ ម្យ៉ាងវិញទៀត នាងមិនអាចជាតំណាងប្រព័ន្ធពាណិជ្ជកម្មដ៏លោភលន់នៃពិភពលោករបស់សាថានដែរ ដោយសារនៅជំពូកឯទៀតក្នុងសៀវភៅការបើកបង្ហាញ ប្រព័ន្ធពាណិជ្ជកម្មបានត្រូវហៅថា«ពួកអ្នកជួញដូរនៅផែនដី»។—បប. ១៨:១១, ១៥, ១៦
១៦ ក្នុងគម្ពីរ ពាក្យ«ស្ត្រីពេស្យា»អាចសំដៅលើពួកអ្នកដែលអះអាងថាពួកគេបម្រើព្រះ តែបែរជាគោរពបូជារូបព្រះ ឬទៅជាមិត្តភក្តិរបស់ពិភពលោកតាមរបៀបផ្សេងទៀត។ (អេគ. ១៦:២, ៣៥, ៣៦; យ៉ា. ៤:៤) ផ្ទុយពីពួកគេ គម្ពីរចែងថាពួកអ្នកដែលគោរពប្រណិប័តន៍ព្រះដោយស្មោះត្រង់គឺ«បរិសុទ្ធ» ហើយអ្នកទាំងនោះក៏បានត្រូវហៅថា«ក្រមុំបរិសុទ្ធ»។ (២កូ. ១១:២; បប. ១៤:៤) បាប៊ីឡូននៅសម័យបុរាណគឺជាកន្លែងសម្រាប់ការគោរពប្រណិប័តន៍មិនពិត។ ដូច្នេះ បាប៊ីឡូនដ៏ខ្លាំងក្លាត្រូវតែជាតំណាងការគោរពប្រណិប័តន៍មិនពិតគ្រប់បែបយ៉ាង។ តាមពិត នាងគឺជាសាសនាមិនពិតទាំងឡាយនៅទូទាំងពិភពលោក (សូមមើលសៀវភៅការគោរពប្រណិប័តន៍ពិតដល់ព្រះយេហូវ៉ាបានត្រូវរៀបចំឡើងវិញហើយ! ជំពូកទី១៥ វគ្គ៤-៥)។—បប. ១៧:៥, ១៨
១៧. តើអ្វីនឹងកើតឡើងចំពោះបាប៊ីឡូនដ៏ខ្លាំងក្លា?
១៧ តើអ្វីនឹងកើតឡើងចំពោះបាប៊ីឡូនដ៏ខ្លាំងក្លា? ការបើកបង្ហាញ ១៧:១៦, ១៧ ឆ្លើយតាមរបៀបនេះថា៖ «សត្វសាហាវដែលមានស្នែង១០ដែលអ្នកបានឃើញ នឹងស្អប់ស្ត្រីពេស្យានោះ ហើយនឹងបំផ្លាញនាង ព្រមទាំងធ្វើឲ្យនាងនៅអាក្រាត ក៏នឹងស៊ីសាច់នាង ហើយដុតនាងចោលក្នុងភ្លើង។ ព្រោះព្រះបណ្ដាលចិត្តពួកគេឲ្យធ្វើតាមគំនិតរបស់លោក»។ ព្រះយេហូវ៉ានឹងជំរុញចិត្តប្រជាជាតិនានាឲ្យប្រើសត្វសាហាវសម្បុរក្រហមឆ្អៅ ពោលគឺអង្គការសហប្រជាជាតិ ដើម្បីវាយប្រហារសាសនាមិនពិតទាំងឡាយនៅទូទាំងពិភពលោក ហើយបំផ្លាញឲ្យសាបសូន្យ។—បប. ១៨:២១-២៤
១៨. តើយើងអាចធ្វើអ្វីដើម្បីប្រាកដថាយើងមិនជាប់ពាក់ព័ន្ធនឹងបាប៊ីឡូនដ៏ខ្លាំងក្លា?
១៨ តើនេះជាប់ទាក់ទងយ៉ាងណានឹងយើង? យើងត្រូវរក្សា‹របៀបគោរពប្រណិប័តន៍ដែលស្អាតស្អំនិងឥតសៅហ្មង តាមទស្សនៈរបស់លោកដែលជាព្រះរបស់យើង›។ (យ៉ា. ១:២៧) យើងមិនចង់បណ្ដោយខ្លួនឲ្យទទួលឥទ្ធិពលពីសេចក្ដីបង្រៀនមិនពិត ពិធីបុណ្យផ្សេងៗរបស់សាសនាមិនពិត ទង្វើដែលទាក់ទងនឹងពួកវិញ្ញាណកំណាច និងខ្នាតតម្រាសីលធម៌ធូររលុងនៃបាប៊ីឡូនដ៏ខ្លាំងក្លា! ម្យ៉ាងទៀត យើងបន្តព្រមានអ្នកឯទៀតឲ្យ«ចេញពីក្រុងនោះមក» ដើម្បីពួកគេអាចជៀសវាងពីការរួមចំណែកក្នុងកំហុសរបស់នាងនៅចំពោះមុខព្រះ។—បប. ១៨:៤
ការវិនិច្ឆ័យសត្រូវដ៏ធំជាងគេរបស់ព្រះ
នាគដែលមានសម្បុរក្រហមដូចភ្លើង
សាថានជាអ្នកឲ្យអំណាចដល់សត្វសាហាវដែលមានក្បាល៧។ (បប. ១២:៣, ៩, ១៣; ១៣:៤; ២០:២, ១០) សាថានដែលជាសត្រូវដ៏ធំបំផុតរបស់ព្រះយេហូវ៉ានឹងត្រូវបោះទៅក្នុងទីជ្រៅបំផុត អស់រយៈពេល១.០០០ឆ្នាំ។ ក្រោយមក វានឹងត្រូវបោះទៅក្នុង«បឹងដែលឆេះដោយភ្លើងនិងស្ពាន់ធ័រ»។ (សូមមើលវគ្គ១៩-២០)
១៩. តើ‹នាគដ៏ធំដែលមានសម្បុរក្រហមដូចភ្លើង›គឺជាអ្នកណា?
១៩ សៀវភៅការបើកបង្ហាញក៏ចែងអំពី«នាគដ៏ធំមួយដែលមានសម្បុរក្រហមដូចភ្លើង»។ (បប. ១២:៣) នាគនេះប្រឆាំងនឹងលោកយេស៊ូនិងបណ្ដាទេវតារបស់លោក។ (បប. ១២:៧-៩) វាវាយប្រហាររាស្ត្ររបស់ព្រះនិងផ្ដល់អំណាចដល់សត្វសាហាវឬរដ្ឋាភិបាលរបស់មនុស្ស។ (បប. ១២:១៧; ១៣:៤) តើសត្វនាគនេះគឺជានរណា? វាគឺជា«ពស់ដំបូងបង្អស់ដែលហៅថាមេកំណាចនិងសាថាន»។ (បប. ១២:៩; ២០:២) វាគឺជាបុគ្គលដែលនៅពីក្រោយខ្នងសត្រូវទាំងអស់របស់ព្រះយេហូវ៉ា។
២០. តើអ្វីនឹងកើតឡើងចំពោះនាគ?
២០ តើអ្វីកើតឡើងចំពោះនាគ? ការបើកបង្ហាញ ២០:១-៣ពន្យល់ថា ទេវតាមួយរូបនឹងបោះសាថានទៅក្នុងទីជ្រៅបំផុតដែលជាតំណាងស្ថានភាពមួយដែលប្រៀបដូចជាគុក។ ពេលសាថាននៅក្នុងទីជ្រៅបំផុតនោះ វានឹងមិន«បំភាន់ប្រជាជាតិនានាទៀត រហូតដល់ផុតគ្រា១.០០០ឆ្នាំ»។ នៅទីបំផុត សាថាននិងពួកវិញ្ញាណកំណាចរបស់វានឹងត្រូវបោះទៅក្នុង«បឹងដែលឆេះដោយភ្លើងនិងស្ពាន់ធ័រ»។ នេះមានន័យថាពួកវានឹងត្រូវបំផ្លាញចោលជារៀងរហូត។ (បប. ២០:១០) សូមព្យាយាមស្រមៃគិតអំពីពិភពលោកមួយដែលគ្មានសាថាននិងពួកវិញ្ញាណកំណាច នោះគឺជាគ្រាដ៏អស្ចារ្យយ៉ាងណាទៅ!
២១. ហេតុអ្វីព័ត៌មានដែលយើងអានក្នុងសៀវភៅការបើកបង្ហាញអាចធ្វើឲ្យយើងមានសុភមង្គល?
២១ ការយល់អំពីអត្ថន័យនៃនិមិត្តរូបទាំងនេះដែលបានត្រូវកត់ទុកនៅសៀវភៅការបើកបង្ហាញ គឺគួរឲ្យលើកទឹកចិត្តណាស់! យើងបានរៀនថាអ្នកណាខ្លះជាសត្រូវរបស់ព្រះយេហូវ៉ា និងអ្វីដែលនឹងកើតឡើងចំពោះពួកគេ។ មែនហើយ «អ្នកណាដែលអានទំនាយនេះឲ្យអ្នកឯទៀតស្ដាប់ និងអ្នកណាដែលឮ . . . អ្នកទាំងនោះមានសុភមង្គលហើយ»។ (បប. ១:៣) ប៉ុន្តែ ពេលដែលសត្រូវរបស់ព្រះបានត្រូវបំផ្លាញចោល តើមនុស្សដែលស្មោះត្រង់នឹងទទួលពរអ្វីខ្លះ? យើងនឹងពិចារណាចម្លើយចំពោះសំណួរនេះនៅក្នុងអត្ថបទចុងក្រោយនៃអត្ថបទតភាគនេះ។
ចម្រៀងលេខ២៣ ព្រះយេហូវ៉ាចាប់ផ្ដើមគ្រប់គ្រង
a សៀវភៅការបើកបង្ហាញប្រើនិមិត្តរូបដើម្បីសម្គាល់សត្រូវរបស់ព្រះ។ សៀវភៅដានីយ៉ែលជួយយើងឲ្យយល់អំពីអត្ថន័យនៃនិមិត្តរូបទាំងនោះ។ ក្នុងអត្ថបទនេះ យើងនឹងប្រៀបធៀបទំនាយខ្លះក្នុងសៀវភៅដានីយ៉ែល ទៅនឹងទំនាយដែលស្រដៀងគ្នានៅក្នុងសៀវភៅការបើកបង្ហាញ។ យ៉ាងនេះ យើងនឹងអាចសម្គាល់ថាអ្នកណាជាសត្រូវរបស់ព្រះ។ បន្ទាប់មក យើងនឹងពិចារណាអំពីអ្វីដែលនឹងកើតឡើងចំពោះពួកគេ។
b អ្វីមួយទៀតដែលបង្ហាញថាសត្វសាហាវដែលមានក្បាល៧ជាតំណាងរដ្ឋាភិបាលទាំងអស់ គឺថាវាមាន«ស្នែង១០»។ ក្នុងគម្ពីរ លេខ១០ច្រើនតែបានត្រូវប្រើដើម្បីសំដៅទៅលើភាពពេញលេញ។
c ខុសពីសត្វសាហាវទី១ រូបសត្វសាហាវនោះមិនមាន«មកុដ»នៅលើស្នែងរបស់វាទេ។ (បប. ១៣:១) នេះគឺដោយសារវា«កើតចេញពីស្ដេចទាំង៧» ហើយវាទទួលអំណាចពីស្ដេចទាំងនោះ។ សូមមើលអត្ថបទនៅក្នុងគេហទំព័រjw.org/km ដែលមានចំណងជើងថា«តើអ្វីជាសត្វសាហាវដែលមានសម្បុរក្រហមឆ្អៅពីសៀវភៅការបើកបង្ហាញ ជំពូក១៧?»។